MM Story Teller

Chapter 103

Viewers 19k

👻Chapter 103

နှုတ်ဆက်ပါတယ်....ဖာခ့်ယူ....(17)

နောက်ဆုံး ၁၀စက္ကန့်အချိန်တွင်....

ဒီကိစ္စပြီးရင် သူတို့က တစ်သက်လုံး ကွဲသွားပြီပဲ.....လော့ဇီယန်က အတိတ်ကရှောင်ယဲ့ကိုလည်း မေ့သွားတော့မှာ....ကမ္ဘာအစစ်ကို ပြန်သွားတဲ့အချိန်ကျရင် သရဲဖြစ်လာခဲ့တဲ့ ရှောင်ယဲ့ကို လုံးဝမေ့သွားတော့မှာ.....

သူ့ကမ္ဘာမှာ ရှောင်ယဲ့ဆိုတဲ့သူ ရှိတော့မှာ မဟုတ်ဘူး....

ဒါပေမယ့် သူ့ရဲ့အစ်ကိုလော့က သူမရှိလည်း ပျော်ပျော်ရွှင်ရွှင်နေနိုင်တယ်ဆိုရင် ဘာအရေးလဲနော်....

သူက ပရလောကမှာ သူ့အစ်ကိုလော့ကို ထပ်တွေ့ရတဲ့အတွက် နောင်တရစရာ မရှိပါဘူး....

***

မလှမ်းမကမ်းမှာ ချူဟွိုက်နှင့်တစ်ထပ်တည်းတူသည့် သရဲက ပေါ်လာပြီး ချူဟွိုက်တစ်ယောက်တည်းကသာ မြင်ရသည့်ပုံပင်။

သရဲအရိပ်က တိတ်တဆိတ် ချဥ်းကပ်လာပြီး ချူဟွိုက်ကိုယ်ထဲ ဝင်ရန်ပြင်လိုက်စဥ် အချိန်က နောက်ဆုံးတစ်ဆယ်စက္ကန့်ကို ရောက်လာခဲ့သည်။

၁၀....၉.....၈

သူ့ကို ဖယ်ရှားလို့မရနိုင်ပါဘူး ချူဟွိုက်ရဲ့ ကံတရားက သူ့အာဟာရဓါတ်ဖြစ်လာမှာ ဆိုသည့် ရုပ်ကြီးနှင့် သရဲက ချူဟွိုက်ကို ပြုံးပြလာသည်။ အဆုံးသတ်က ကြိုတင်ခန့်မှန်းပြီးသားဖြစ်နေ၍ သေလမ်းတစ်ခုသာ ရှိတော့သည်။

ချူဟွိုက်ကလည်း သရဲကို ပြန်ပြုံးပြလိုက်ရင်း လက်ခလယ်ထောင်ပြလိုက်ကာ ဓါးနှင့် လည်ပင်းကို ဖြတ်ချလိုက်လေသည်။

သွေးများ ပန်းထွက်လာ၏။

စုံတွဲနှစ်ယောက်ကြားက အန္တရာယ်ကို ကြိုသိနိုင်သည့် စွမ်းရည်က လုပ်ဆောင်လာ၍ ကျင်းထျန်းယိက ချက်ချင်း လှည့်ကြည့်လာရာ မြေကြီးပေါ် လှဲနေသည့် ချူဟွိုက်ကို တွေ့လိုက်ရ၍ နှလုံးခုန်ရပ်သွားရသည်။ သူက ချက်ချင်းပင် သူ၏နောက်ဆုံး Nမှတ်ကို သုံးလိုက်လေသည်။

“ကျောင်းကျောင်း..." လော့ဇီယန်က အော်လိုက်မိသည်။

အချိန်ပြည့်သွားလေပြီ....

[ သရုပ်ဆောင် ကျင်းထျန်းယိ လော့ဇီယန်.....] သွေးစာကြောင်းက တစ်ခဏမျှရပ်သွားပြီးနောက် နောက်ထပ်နာမည်တစ်ခုကို ထပ်ဖြည့်လာသည် [ ချူဟွိုက်....တို့ 'သဲထိတ်ရင်ဖို အပန်းဖြေစံအိမ်' ရုပ်ရှင် ရိုက်ကူးရေးကို အောင်အောင်မြင်မြင် ပြီးဆုံးသွားတဲ့အတွက် ဂုဏ်ယူပါတယ်....]

ကျင်းထျန်းယိနှင့် လော့ဇီယန်တို့က သွေးစာတန်းကိုမြင်လိုက်သောအခါမှ ချက်ချင်း စိတ်အေးသွားကြရသည်။ သူတို့ခန္ဓာကိုယ်ထဲရှိ အားအင်များ ကုန်ခန်းသွားရသော်လည်း ကျင်းထျန်းယိက Nမှတ်ကို သုံးလိုက်၍ မျက်စိရှေ့က မြင်ကွင်းက ချက်ချင်း ပြောင်းပြန်ဖြစ်သွားပြီး သွေးစာတန်းများက တစ်ခုပြီးတစ်ခု ပေါ်လာသည်။

ချူဟွိုက်ကို ထိရန် လက်တစ်ကမ်းစာသာ လိုတော့သည့် သရဲကလည်း နောက်ပြန်ဆုတ်သွားရင်း ချူဟွိုက်ဆီမှ တဖြေးဖြေးဝေးကွာသွားကာ မျက်စိတစ်မှိတ်စာအတွင်း မီတာပေါင်း ရာနှင့်ချီ နောက်ပြန်ဆုတ်သွားပြီး ထိုနေရာမှာတင် တောင့်တောင့်ကြီးရပ်ကျန်နေခဲ့လေသည်။

ကျင်းထျန်းယိဆီ ဖမ်းမိသွားပြီး အဖက်ခံလိုက်ရသည့် ချူဟွိုက်က ရယ်မောလိုက်သည်။

ရုပ်ရှင်က ရပ်တန့်သွားပြီး အချိန်ကလည်း တုန့်ခနဲရပ်သွားကာ မစ်ရှင်က ပြီးဆုံးကြောင်း အတိအလင်းကြေညာလာသည်။

အချိန်က ရှေ့ဆက်မသွားတော့ပဲ နောက်ဆုံးလက်ကျန့် စက္ကန့်အနည်းငယ်က နောက်ဆုံး ကျန်ရှိနေသည့် အချိန်သာ ဖြစ်သည်။

သူ အောင်မြင်သွားပြီ ဖြစ်သည်။ ထိုသရဲက အချိန်ကြောင့် သူ့နားကပ်နိုင်တော့မည် မဟုတ်ပေ။

သူက 'သဲထိတ်ရင်ဖို အပန်းဖြေစံအိမ်'ထဲတွင် ကျန်နေခဲ့ရတော့မည်ပင်။

ထိုသရဲ၏ နောက်ဆုံးဖြစ်သွားသည့် မျက်နှာအမူအရာက ကြောက်သွားပြီး မယုံကြည်နိုင်သလို ဖြစ်သွားသည့် ပုံစံမျိုးပင်။ ချူဟွိုက်က သူ့ကို သတ်လိုက်သည့်အချိန် အရာရာတိုင်းက ပြောင်းလဲသွားလေသည်။

Nမှတ်က နောက်ဆုံးလက်ကျန်အခိုက်အတန့်ကို ပြန်ရောက်သွားပြီး သူကလည်း ရုပ်ရှင်ထဲ ရှိနေ၍ ရုပ်ရှင်စည်းမျဥ်းများကြောင့် တစ်ကြိမ်ပေါ်လာရန် စောင့်နေရတော့မည်။

သူ ဘယ်တော့မှ ထွက်သွားနိုင်တော့မှာ မဟုတ်တော့ဘူး....

မဖြစ်ဘူး....

သရဲက တရှုံ့ရှုံ့ငိုနေသလိုမျိုး သူတို့ဘေးပတ်လည်ရှိ လေကလည်း ရွှီခနဲမြည်လာသည်။

ကျင်းထျန်းယိအပါအဝင် လူတိုင်းက ရုတ်တရက် ဖြစ်သွားသည့်ကိစ္စအပေါ် အံ့သြသွားကြရသည်။

ချူဟွိုက်၏ တိကျပြတ်သားသည့် လုပ်ဆောင်ချက်က ကျင်းထျန်းယိ၏ အမြင်ကို တစ်ကြိမ်ပြန်ပြီး ပွင့်ထွက်သွားစေသည်။ သူက လော့ဇီယန်နှင့်ရှောင်ယဲ့အပါအဝင် ချူဟွိုက်ကို တင်းတင်းကျပ်ကျပ် ဖက်ထားလိုက်သည်။

သွေးစာတန်း [ ပြန်လည်ပို့ဆောင်ပေးတော့မှာ ဖြစ်ပါတယ်...]

ရှောင်ယဲ့က နွေးနွေးထွေးထွေးပြုံးပြလိုက်သော်လည်း မတည်မငြိမ်ဖြစ်နေသည့် အသံကို ထိန်းရန် ချောင်းဆိုးလိုက်သည်။

" နှုတ်ဆက်ပါတယ်...

အစ်ကိုလော့...."

“နှုတ်ဆက်တာလား....." လော့ဇီယန်က လှည့်ပတ်ကြည့်လိုက်ရင်း ချက်ချင်း အံတင်းတင်းကြိတ်ကာ ဆဲလိုက်သည်

" မင်းမေကိုပဲ နှုတ်ဆက်...."

ရှောင်ယဲ့မှာ ထိတ်လန့်သွားရသည်။

ချူဟွိုက်လိုမျိုး သူလည်း ဓါးတစ်ချောင်း ထုတ်လာသည်။

ချူဟွိုက်မျက်ဆံများ ကျုံ့ဝင်သွားရင်း ရုတ်တရက် တစ်ခုခုကို နားလည်သွားပြီး အော်ဟစ်လိုက်သည် " မဖြစ်ဘူး...."

သူက ပြေးသွားရန်ပြင်လိုက်သော်လည်း ကျင်းထျန်းယိက သူ့ကို ထိန်းချုပ်လာပြီး သူ့မျက်လုံးများကို အမြန်ပိတ်လိုက်လေသည်။

ချူဟွိုက်၏ခန္ဓာကိုယ်ပေါ်သို့ သွေးပူပူများ စင်လာသည်။ ကျင်းထျန်းယိက ချူဟွိုက်ခန္ဓာကိုယ်က ကူကယ်ရာမဲ့သွားသလို ပျော့ခွေသွားပြီး ဘောလုံးလေးတစ်လုံးလို ကွေးတက်သွားမှန်း ခံစားလိုက်ရသည်။

သူ့လုပ်ဖော်ကိုင်ဖက်က သူ့ရှေ့မှာတင် သေသွားခဲ့သည်။

ကမ္ဘာပေါင်းများစွာ အတူတူဖြတ်သန်းခဲ့သည့် လုပ်ဖော်ကိုင်ဖက်ဆက်ဆံရေးက အဆုံးသတ်ကို ရောက်ရှိသွားသည်။

ချူဟွိုက်က လော့ဇီယန်လုပ်သွားရသည့် အကြောင်းရင်းကို နားလည်သော်လည်း သူပိုပြီး နားလည်လာလေလေ အသက်ရှူရခက်အောင် သူ့ရင်ဘတ်ကို ဖိထားသည့် ကျောက်တုံးကြီးတစ်တုံးလို ခံစားမိလာရသည်။

ကျင်းထျန်းယိက သူ့ကို အုပ်မိုးပေးလာပြီး သက်ပြင်းဖွဖွချကာ ဖက်ထားပေးလိုက်သည်။ ပထမဆုံးအကြိမ် သူက သူ့ခံစားချက်အစစ်အမှန်ကို ဖွင့်ထုတ်ပြလာသည်

" ကိုယ်လည်း အရမ်း စိတ်မကောင်းဖြစ်ရပါတယ်....ဒါပေမယ့် ဒါက သူ့ရဲ့ ရွေးချယ်မှုပဲလေ...."

ပြိုင်ပွဲဝင်တစ်ယောက်က မစ်ရှင်ပြီးမြောက်၍ ကမ္ဘာအစစ်ကို ပြန်ရသောအခါ ပရလောကတွင် ဖြစ်ခဲ့သည့် အကြောင်းအရာတိုင်းကို မေ့သွားရန် တွန်းအားပေးခံကြရသည်။

လော့ဇီယန်က မေ့မသွားချင်၍ ထွက်မသွားရန် ရွေးချယ်ခဲ့ခြင်းပင်။

ထွက်မသွားပဲနေလို့ရသည့် တစ်ခုတည်းသော နည်းလမ်းက သေဆုံးပြီး သရဲတစ်ယောက် ဖြစ်လာရန်သာ ရှိသည်။

အဆင့်ငါးက အရေးကြီးသည့်အဆင့်ဖြစ်ပြီး လော့ဇီယန်၏ ငါးခုမြောက် မစ်ရှင်ဖြစ်သည်။ အဆင့်ငါးနှင့် သူ့ထက်အဆင့်မြင့်သော ပြိုင်ပွဲဝင်များကသာ သေဆုံးပြီးနောက် အင်အားကြီးသရဲ ဖြစ်လာနိုင်သည်ပင်။

ကျင်းထျန်းယိက နူးနူးညံ့ညံ့ပြောလာသည် " ရှောင်လော့မရှိပေမယ့် မင်းမှာ ကိုယ်ရှိပါသေးတယ်...."

တော်တော်လေးကြာပြီးမှ သူက တိုးတိုးလေးထပ်ပြောလာသည် " တစ်သက်လုံးပေါ့...."

သူက မည်သည့်အရာကိုပဲ ရွေးချယ်ရပါစေ သူ့ကိုတော့ စွန့်လွှတ်လိမ့်မည် မဟုတ်ပေ။

ချူဟွိုက်က ထိုစကားလုံးနှစ်လုံးကို နားထောင်ပြီးနောက် တဖြေးဖြေး စိတ်တည်ငြိမ်လာသည်။

သူ့မှာ ကျင်းထျန်းယိ ရှိသေးတယ်...

ရှောင်လော့က သူလိုချင်တာကို ရသွားပြီ...

ချူဟွိုက်ကိုယ်ထဲ နေနေခဲ့သည့် သရဲက လော့ဇီယန်ကို ဆွဲချသွားသည့်အချိန် ညှို့ငင်နေသည့် အသံတစ်ခုက သူ့ခေါင်းထဲ ရုတ်တရက် ပေါ်လာသည်။

" ရှောင်ယဲ့ကို ကြည့်ရတာ ရင်းနှီးနေတယ်လို့ မခံစားရဘူးလား...."

သူ့အဖြေကို မစောင့်ပဲ ထိုအသံက ဆက်ပြောလာသည်

" မင်းက မှတ်ဥာဏ်ဆုံးရှုံးထားတာလို့ပဲ ခေါင်းမာမာနဲ့ ယုံကြည်နေဦးမှာလား....မင်းရဲ့ ဥာဏ်ရည်ပေါက်စနနဲ့ သူများတွေကိုပါ ဆွဲချနေတာ စိတ်မကောင်းမဖြစ်မိဘူးလား...."

" မင်းသာ တစ်ကြိမ်သေပေးမယ်ဆိုရင် ငါ မင်းကို အဖြေတစ်ခု ပေးနိုင်တယ်....စိတ်မပူပါနဲ့ သူတို့မှာ မင်းကို ကယ်ပေးဖို့ Nမှတ်တွေ ရှိပါတယ်...."

ထိုအသံက ချူဟွိုက်အသံနှင့် တစ်ထပ်တည်းတူနေပြီး ခပ်ထေ့ထေ့ရယ်မောလိုက်ကာ ဆက်ပြောလာသည်

" မင်း ဘာမှဆုံးရှုံးသွားမှာ မဟုတ်ဘူးလေ...မင်းသာ ဒီအခွင့်အရေးနဲ့ လွဲသွားမယ်ဆိုရင် မင်းတစ်သက်လုံး သိရတော့မှာ မဟုတ်ဘူး...အရင်အတိုင်းဆို မင်းသေသွားပြီး သရဲဖြစ်လာတာနဲ့ မင်းရဲ့မှတ်ဥာဏ်တွေကို ပြန်ရနိုင်တယ်....ဒါပေမယ့် ကံကောင်းလို့ မင်းမှာ ရုပ်ရှင်ရိုက်ကူးနေတုန်း Nမှတ်နဲ့ အယောင်ဆောင်သေလို့ရတဲ့ အခွင့်အရေး ရှိနေတယ်....မင်း စွန့်စားချင်လား...."

လော့ဇီယန်မှာ အံ့သြသွားရသည်။ သရဲချူဟွိုက်၏ စကားလုံးများက သေစေနိုင်သော အလှဲအလှယ်ကို လုပ်ခိုင်းနေသည်။

ချူဟွိုက်ကိုယ်ထဲက သရဲက ချူဟွိုက်ကို ရန်ပြု၍မရသဖြင့် သူ့အတွက် အရေးကြီးသော သူ့သူငယ်ချင်းဖြစ်သူဆီ အာရုံပြောင်းလိုက်သည်။ သူက မှတ်ဥာဏ်ပြန်ရသွားမည့် လော့ဇီယန်၏ ရွေးချယ်မှုကို စောင့်မျှော်နေရင်း ချူဟွိုက် စိတ်ဓာတ်ကျနေမည့်ပုံစံကို မြင်ချင်မိသည်။

သို့သော်လည်း ထိုချူဟွိုက်က အစီအစဥ်ဆွဲထားပြီး ရုပ်ရှင်ထဲတွင် သူ့ကို ချန်ထားခဲ့ကာ တစ်သက်လုံးဖယ်ရှားပစ်ခဲ့လိမ့်မည်ဟု ထင်မထားခဲ့ပေ။

လော့ဇီယန်က သေသွားခဲ့သည်။

ထို့နောက် N အမှတ်ကြောင့် လော့ဇီယန်က အသက်ပြန်ရှင်လာသည်။ သူ၏အတိတ်က မှတ်ဥာဏ်များနှင့်အတူ တစ်ဖန်ပြန်လည်ရှင်သန်လာခဲ့သည်။

သူက ပြစ်မှုတစ်ခုမှ ကျူးလွန်မထားသော်လည်း သူ့ကို ကမ္ဘာကြီးက ရွေးချယ်ခဲ့သည်။

ရှောင်ယဲ့က သူ့အတွက် သွားပေးခဲ့သည့်သူ ဖြစ်နေသည်။

ရုတ်တရက်ရလိုက်သည့် မှတ်ဥာဏ်ထဲတွင် ရှောင်ယဲ့က အမှန်တရားကို သိသွား၍ သူ့အိမ်ကို လိမ်ခေါ်သွားပြီး အိပ်ဆေးတိုက်ကာ သူ့လက်ဖမိုးပေါ်က ထျန်းကျီမှတ်ကို ဖြတ်ပစ်ခဲ့သည်။

ရှောင်ယဲ့က သူ၏ထျန်းကျီမှတ်ကို ယူသွားခဲ့သည်။

ညသန်းခေါင်ရောက်လာသည်နှင့် ရှောင်ယဲ့က ထိုအမှတ်နဲ့ သူ့ကိုယ်စား ပရလောကထဲ ဝင်သွားခဲ့သည်။

ရှောင်ယဲ့ပျောက်ကွယ်သွားသည်နှင့် သူ့လက်က ဒဏ်ရာလည်း ပျောက်ကင်းသွားခဲ့သည်။ သူက သူ၏ချစ်သူကောင်ငယ်လေး ရှောင်ယဲ့ကို မေ့သွားပြီး ပျင်းစရာအထက်တန်းကျောင်းသားဘဝကို ဆက်နေခဲ့ရသည်။

နောက်ထပ် ခုနစ်နှစ်ရှစ်နှစ်ကြာပြီးနောက် ထျန်းကျီမှတ်က သူ့ကိုယ်ပေါ်တွင် ထပ်မံပေါ်လာခဲ့သည်။

ထို့ကြောင့် ဘော့စ်က ရှောင်ယဲ့ကို နောက်မှဖြစ်သည့်သရဲလားဟု မေးခဲ့ခြင်းပင်။

ဒါကြောင့် " မင်းတစ်ယောက်တည်းသာ" ဆိုတဲ့ သဲလွန်စပြိုင်ပွဲမှာတုန်းက ရှောင်ယဲ့က သနားစရာ အခြေအနေရောက်နေတာတောင်မှ တွန့်ဆုတ်မနေပဲ သူ့ကို အအောင်ပေးခဲ့ပြီး အလွတ်ပေးခဲ့တယ်...

ဒါက ရှောင်ယဲ့က သူ့ကို ကာကွယ်ပေးချင်ရတဲ့ အကြောင်းရင်းပေါ့....

သူက ရှောင်ယဲ့ကို သဘောကျတဲ့သူ ရှိဖူးလားလို့ မေးတုန်းက ရှက်သွေးဖြာသွားရတာ ဒါကြောင့်ကိုး...

ရှောင်ယဲ့က သူ့အိပ်မက်ထဲက ကောင်လေးဖြစ်နေမှန်း သက်သေပြချက်တွေ အများကြီးရှိနေပေမယ့် သူက တစ်ယောက်တည်း အနာကို လျှာနဲ့လျက်နေမိတယ်.....

သူ သိသွားတဲ့အချိန်မှာမှ သူက မေ့လိုက်ရတော့မယ်တဲ့....ဘယ်လိုများ ဒုတိယအကြိမ် မေ့ရက်နိုင်မှာလဲ....

ကမ္ဘာအစစ်ကို ပြန်သွားပြီးရင်ရော ဘာဖြစ်လာမှာလဲ....သူ့ရဲ့ ကူကယ်ရာမဲ့နေတဲ့ အနာဂတ်ကြီးကို မြင်နေရတာလေ....

သူ့မိဘများက လွန်ခဲ့သော နှစ်အနည်းငယ်ခန့်က ကွယ်လွန်သွားကြပြီဖြစ်၍ လော့ဇီယန်မှာ စိုးရိမ်စရာမရှိပေ။

ထို့ကြောင့် ကောင်းယွမ်ကို ချူဟွိုက်အတွက် သတ်ပေးနိုင်ခဲ့သည်။ သူက သက်ရှိများနှင့်ပတ်သက်ပြီး ကြီးကြီးမားမား စွဲလမ်းသည်မျိုးမရှိခဲ့ပေ။

နောက်မှာ နေခဲ့ပြီး ရှောင်ယဲ့လို သရဲဖြစ်လာမှ တစ်သက်လုံး အတူတူနေနိုင်တော့မှာ....ပြီးတော့လည်း ကောင်းယွမ်ကို သတ်မိလို့ သူ့ကိုယ်သူ ဒဏ်ခတ်လိုက်တာလည်း ပါတာပေါ့....

လော့ဇီယန်က ထောင်ချောက်မှန်း သိခဲ့သော်လည်း ထိုထောင်ချောက်က သူလိုလိုလားလား ခုန်ချချင်မိသော ထောင်ချောက်တစ်ခုဖြစ်နေ၍ပင်။ သူက ဤထောင်ချောက်ကို မလွန်ဆန်နိုင်ပေ။

ထိုသရဲက သူ့ကို ထွက်သွားခြင်းက တစ်သက်လုံး မေ့ပျောက်သွားခြင်းဖြစ်သည်ဟု ပြောပြခဲ့သည်။ သူက ဘော့စ်ကို မေးလိုက်သည့်အခါ ဘော့စ်က ထိုသရဲက သူ့ကို လိမ်နေခြင်းဖြစ်သည်ဟု ဆိုခဲ့သည်။

ဘော့စ်က ဘာခံစားချက်မှမရှိသလို အေးအေးလူလူဖျောင်းဖျခဲ့သော်လည်း လော့ဇီယန်က ဘော့စ်လိမ်နေမှန်း သိခဲ့သည်။

ဘော့စ်က သူအသက်ရှင်လျက် ထွက်သွားနိုင်ဖို့ မျှော်လင့်နေတာလေ....

ကျင်းထျန်းယိက သူ့ကို အသက်ရှင်အောင် လုပ်ပေးခဲ့ပေမယ့် သူက သေလမ်းကိုပဲ ရွေးချယ်သွားခဲ့တယ်...

ကံကောင်းလို့ ချူဟွိုက်က အဲ့ဒီသရဲချူဟွိုက်ကို လက်တုံ့ပြန်ပြီး နောက်ဆုံးအချိန်လေးမှာ ဖယ်ရှားပစ်နိုင်ခဲ့တယ်....

ရုပ်ရှင်မပြီးဆုံးမီ နောက်ဆုံးအပိုင်းတွင် မျက်နှာဖြူဖြူနှင့် လော့ဇီယန်က ရုတ်တရက် မျက်လုံးဖွင့်လာပြီး ငိုယိုနေသော ရှောင်ယဲ့၏ နားရွက်ကို ဆွဲကိုင်လိုက်သည်။

******

တိုက်ခန်းသို့ ပြန်ရောက်လာလေပြီ။

ရုတ်တရက် လော့ဇီယန်၏ ပူညံပူညံအသံကို မကြားရ၍ ချူဟွိုက်မှာ မနေတတ်သလို နေရာမှာတင် ရပ်နေမိသည်။

ကျင်းထျန်းယိက ပင်ပန်းနွမ်းနယ်နေသော သူ့မျက်နှာလေးကို တွေ့လိုက်၍ အာရုံလွဲသွားအောင် ညုတုတုအသံနှင့် နားနားကပ်ပြောလာသည်

" အခုဆို တိုက်ခန်းမှာ ကိုယ်တို့နှစ်ယောက်ပဲ ကျန်တော့တယ်...."

ချူဟွိုက်က နားမလည်၍ သူ့ကို ဗလာသက်သက်ကြည့်လိုက်မိသည် " အခြားသူတွေ သေသွားကြတဲ့အချိန်မှာ ဘာပျော်စရာတွေ ရှိမှာလဲ...."

ကျင်းထျန်းယိ "....." ချူဟွိုက်က တကယ်ကို မရိုတတ်ဘူးပဲ....

ကျင်းထျန်းယိက ဇွဲမလျှော့ပဲ ညစ်ညမ်းသည့်အကြံတစ်ခု ပေးလာသည် " ကိုယ်တို့ တစ်ခုခုလုပ်လို့ ရနိုင်တာပဲလေ...."

ချူဟွိုက်က ရုတ်တရက် မော့ကြည့်လာပြီး မျက်လုံးတို့ တောက်ပလာသည် " ခင်ဗျားပြောတာ မှန်တယ်..."

ကျင်းထျန်းယိမှာ ပျော်ချိန်မရလိုက် ချူဟွိုက်က သူ့ကို ချက်ချင်း တွန်းထုတ်ပစ်ပြီး အပြင်ဘက်ကို ထွက်သွားလေသည်။ ကျင်းထျန်းယိက ဝေခွဲမရဖြစ်စွာ ကျန်နေခဲ့သည် " မင်း ဘယ်သွားမလို့လဲ...."

“ ခင်ဗျားပြောတာ အဲ့ဒါ မဟုတ်ဘူးလား...." ချူဟွိုက်က ခြေလှမ်းရပ်သွားပြီး နောက်ပြန်လှည့်ကြည့်လာကာ နားမလည်သလို မျက်နှာမျိုးပြလာသည်

" ရှောင်လော့ရဲ့ အမှတ်တရဓါတ်ပုံကို နံရံမှာ ချိတ်ချင်လို့ ဓါတ်ပုံစတူဒီယိုများ ရှိမလား သွားကြည့်မလို့လေ...."

ကျင်းထျန်းယိ "....."

" သူ့ကို အမှတ်ရနေဖို့ ဒါက ကျွန်တော်လုပ်ပေးနိုင်တဲ့ တစ်ခုတည်းသော အရာပဲ...." ချူဟွိုက်က စိတ်မကောင်းသလို သက်ပြင်းမောကြီး ချလိုက်ရင်း မော့ကြည့်လာသည် " ခင်ဗျား လိုက်မှာလား မလိုက်ဘူးလား....ကျွန်တော် မေးနေတယ်လေ...ဘာလို့ အဲ့ဒီမှာ ရပ်ပဲရပ်နေရတာလဲ....မလိုက်ဘူးဆိုလည်း ထားလိုက်...."

ချူဟွိုက်က ကျင်းထျန်းယိပြောသွားသည့် စကားများကို ပြန်လည်အတွေးပေါက်သွားပြီး သူပြောချင်သည့် အဓိပ္ပါယ်ကို ချက်ချင်း နားလည်သွားသည်။ သူဆက်ပြောမည့်စကားတို့က လည်ချောင်းထဲ တစ်သွားရင်း မျက်နှာကလည်း ရဲသွေးဖြာသွားရသည်။

ကျင်းထျန်းယိက အခွင့်အရေးရလာပြီဟု ခံစားမိရင်း သူ့ကို မျက်လုံးမှိတ်ပြလာသည်။

တစ်ခဏမျှ တိတ်သွားပြီးနောက် ချူဟွိုက်က သူ့ဆီ လျှောက်လာပြီး ဖြူဖြူစင်စင်လေး ပြုံးပြလာ၍ ကျင်းထျန်းယိ၏ နှလုံးက ထိန်းမရအောင် ခုန်ပေါက်လာသည်။

" သဘောတူတယ်မို့လား...နော်....နော်....နော်..."

ကျင်းထျန်းယိ၏ အာဒမ်ပန်းသီးက လိမ့်တက်သွားပြီး တစ်ဖက်လူကို ဆုတ်ဖြဲပြီး စားသောက်ပစ်ချင်လာသည့်စိတ်တို့ ပြင်းထန်သွားသည်။

သို့သော်လည်း ချူဟွိုက်က သူ့လက်ကို ပုတ်ထုတ်ပစ်လိုက်ပြီး ချက်ချင်း မျက်နှာပြောင်းသွားကာ အေးစက်စက်ပြောလိုက်သည်

" အင်္ကျီသွားဝတ်လိုက်ဦး...."

ကျင်းထျန်းယိက ခေါင်းရှုပ်သွားရသည်။ သူက သူ့ကိုယ်သူ ငုံ့ကြည့်လိုက်မိသည်။ သူ အဝတ်အစားကို ပြည့်ပြည့်စုံစုံ ဝတ်ထားပါတယ်....

" ကျွန်တော့်အပေါ် ရိုးသားပါ့မယ်လို့ ကတိပေးခဲ့တယ်မို့လား...." ချူဟွိုက်က ပြုံးပြလာသည်။

" တစ်ခါလိမ်ရင် အဝတ်တစ်ထပ်ချွတ်မှာလေ...နှစ်ထပ်တည်းနဲ့ ရပြီလို့ ထင်နေတာလား...."

ချူဟွိုက်က ကျင်းထျန်းယိကို အပေါ်အောက် စုန်ချည်ဆန်ချည် ကြည့်လိုက်ပြီး အမှန်တကယ် သံသယဝင်လာမိသည်။

ကျင်းထျန်းယိက တစ်ခဏမျှ အံ့သြသွားပြီးနောက် အနည်းငယ် ရှက်သွေးဖြာသွားပြီး တိုးတိုးပြောလာသည် " သုံးထပ်ဝတ်ထားတယ်...."

ထို့နောက် သူက သူ့ကိုယ်သူ တွေးလိုက်မိသည် " သုံးခါ လိမ်လိုက်ဖို့ပဲ လိုတယ်..."

ချူဟွိုက်က တစ်ခဏမျှ အံ့သြသွားရင်း တိုးတိုးတိတ်တိတ် ကျိန်ဆဲလိုက်ပြီး သူ့မျက်နှာက ရဲတွတ်လာကာ ထိန်းမထားတော့ပဲ ပြင်းပြင်းလေး ကန်ပစ်လိုက်လေသည်။

👻

Prev Next