MM Story Teller

Chapter 79

Viewers 7k

🌍Chapter 79

ထန်မော့ မီးခြစ်ဆံကြီးအား သူ၏တက်တူးထဲသို့ ပြန်ထည့်လိုက်ပြီးနောက်ဆိုလိုက်သည်။

"ဒါလည်းကျွန်တော့်စွမ်းရည်ပဲ"

နှစ်ဦးစလုံးမှာ စွမ်းရည်ကိုယ်စီကိုဖော်ပြပြီးပြီမို့ ကြေပြီဟုဆိုနိုင်သည်။ မီးခြစ်ဆံတက်တူးမှာ သူစုဆောင်းထားသော စွမ်းရည်များထဲမှ တစ်ခုသာဖြစ်ကာ သူ၏စွမ်းရည်အစစ်အမှန်ဟုတော့ဆို၍မရချေ။

သို့သော် ထန်မော့ ဖူ၀မ်သော်၏ စွမ်းရည်ကို မသေချာခဲ့ချေ။ ဖူ၀မ်သော်၏စွမ်းရည်မှာ ထိုဒုချွန်လက်နက်အဖြစ်ပြောင်းရုံအပြင်မကကြောင်း သိသာလွန်းသည်။ လူနှစ်ဦးမှာ ကိုယ်စီလျို့၀ှတ်ချက်များကို ဆက်၍ ထိန်ချန်ထားခဲ့ကြသည်။

ပီနိုကီယို အော်ဟစ်နေသေးသော်လည်း သူကတဖြည်းဖြည်း အားပိုနည်းသထက်နည်းလာခဲ့သည်။

"မင်းတို့က မြေအောက်ကမ္ဘာနဲ့ အနက်ရောင်မျှော်စင်ကိုဆန့်ကျင်ချင်လို့လား... ရူးနေကြပြီလား"

ထန်မော့ပေါ့ပါးစွာဆိုလိုက်သည်။

"မစ်စတာပီနိုကီယို ခင်များကို သတိပေးရရင် ခင်များက မြေအောက်နိုင်ငံသားအခွင့်အရေးကို အလွဲသုံးစားလုပ်လိုက်တာပါ... ပြီးတော့ကျွန်တော်တို့ ကစားနေတာကလည်း ပီနိုကီယိုရဲ့ ရိုးသားမှုကတ်ဂိမ်းမဟူတ်တော့ဘူး... စန်တာရဲ့ရိုးသားမှု ကတ်ဂိမ်းဖြစ်သွားပြီ...ခင်များနဲ့မဆိုင်တော့ဘူး ဂိမ်းကိုဘယ်လို သက်ရောက်နိုင်ဦးမှာလဲ"

ပီနိုကီယိုမှာ ချေပစရာစရာမရှိတော့သဖြင့် ကျိန်ဆဲရုံသာတတ်နိုင်လေသည်။

"မင်းတို့တွေ မြေအောက်ကမ္ဘာကရွံစရာအကောင်းဆုံး ခွေးတွေပဲ..မင်းတို့ရဲ့ခြေထောက်တွေဖြတ်ထုတ်ခံရပြီး ဆပ်ကပ်မှာပြစားရင်တောင် ဘယ်သူမှကြည့်ချင်မှာမဟုတ်ဘူး"

ထန်မော့နှင့် ဖူ၀မ်သော်မှာ ပင်နိုကီယို၏ အဆဲမုန်တိုင်းကို မည်သို့မျှ မတုန့်ပြန်ခဲ့ချေ။

ဖူ၀မ်သော်က ငွေရောင်ကြိုးတစ်ခုကိုထုတ်လိုက်သည်။ ၄င်းမှာကြိုးတစ်ခုဆိုသည်ထက် ရှည်လျားသော ငွေရောင်၀ါယာကြိုးတစ်ခုဟုဆိုသည်။ ထူးဆန်းသည်က ပီနိုကီယိုမှာ ဤကြိုးကို လွတ်အောင်ရုန်းမရခြင်းပင်။ သူရုန်းလေ ကြိုးမှာပို၍ တင်းလာလေပင်။

၄င်းမှာ ဂိမ်းကူပစ္စည်းတစ်မျိုးပင်။

ထန်မော့တိတ်တဆိတ်တွေးလိုက်မိသည်။

ပီနိုကီယိုအား ဖြေရှင်းပြီးသည်နှင့် ထန်မော့နှင့် ဖူ၀မ်သော်မှာ အလယ်ကွင်းပြင်တွင်ရပ်လျက် တစ်ဦးကိုတစ်ဦး ကြည့်လိုက်မိကြသည်။

ထိုစဥ် အဖြူရောင်အလင်းတန်း၂ခုမှာ သူတို့၏ နဖူးများကို ချိတ်ဆက်လျက် စီးချင်းထိုးဖက်များဖြစ်ကြောင်းပြောနေခဲ့သည်။

ထန်မော့မှာ အစေခံကတ်ကို ရွေးခဲ့ခြင်းဖြစ်ကာ

ကတ်နှစ်ခုမှာ ရှေ့သို့ထွက်လာပြီးနောက် ဖူ၀မ်သော်၏ ကတ်မှာ ကွဲကြေသွားခဲ့သည်။

၄င်းမှာ ဖူ၀မ်သော်၏ ဘုရင်ကတ်ပင်။

ကတ်၂ခုမှာ မတူညီပဲ ဘုရင်ကတ်မှာ ကွဲကြေသွားပြီး စီးချင်းထိုးသက်ရောက်မှုကို အသက်သွင်းမိခဲ့လေသည်။ ကတ်ကို ကိုယ်စားပြုသူ၂ဦးက စီးချင်းထိုးရတော့မှာပင်။

ယခု ပီနိုကီယို၏ ကတ်ဂိမ်းမှာ စန်တာ၏ကတ်ဂိမ်းအဖြစ်သို့ ပြောင်းလဲသွားခဲ့သည်။ သို့သော် သူတို့နဖူးတွင်ချိတ်ဆက်နေသော အလင်းတန်းများမှာမူ ပျောက်ကွယ်မသွားခဲ့ချေ။ ထန်မော့မျက်မှောင်ကျုံ့လိုက်မိသည်။ သူကခတ္တမျှတွေးတောလိုက်ပြီးနောက် အိတ်ကပ်ထဲလက်ထည့်လျက် ကြက်ဆင်ဥကို ထိလိုက်သည်။

သူကြက်ဆင်ဥကို ထုတ်ယူလိုက်မည့်အချိန်တွင် အသံတစ်ခုကိုကြားလိုက်ရလေသည်။

ထို့နောက် လူ၂ဦးကိုဆက်သွယ်ထားသော အလင်းတန်းမှာ ကျိုးပျက်သွားလျက် အဝေးတစ်နေရာမှ မြူးကြွသောတေးသံတစ်ခု ထွက်ပေါ်လာခဲ့လေသည်။

"ဟား ဟား ဟား ဟား မယ်ရီခရစ်စမတ်"

သမင်များက ရှေ့သို့ပြေးလာခဲ့ပြီး စွပ်ဖားတွင် ဆွဲထားသော ခြူလုံးလေးများမှာ တချွင်ချွင်မြည်နေခဲ့သည်။

လူတိုင်း အသံလာရာကို လှည့်ကြည့်လိုက်မိကြသည်။ ထို့နောက် သူတို့သည် အနီရောင်၀တ်စုံဖြင့် ရယ်မောနေသော စန်တာကလော့အား တွေ့လိုက်ကြလေသည်။ ၀င်ရိုးစွန်းသမင်လေးကောင်မှာ ကြမ်းပြင်ပေါ်ခြေချလိုက်သည်နှင့် အဖြူရောင်ကမ္ဘာကြီးတစ်ခုလုံး တုန်လှုပ်သွားခဲ့သည်။

စန်တာကလော့က သူ၏ကိုယ်ပိုင်နောက်ခံတေးသီချင်းကိုယူလာခဲ့ပုံပေါ်ပြီး မယ်ရီခရစ်စမတ်သီချင်းမှာ အရပ်၄မျက်နှာလုံး ပဲ့တင်ထပ်နေခဲ့သည်။

သူကရယ်မောလျက် အထိန်းကြိုးကိုဆွဲလိုက်သည်နှင့် ၀င်ရိုးစွန်း သမင်၄ကောင်က ကစားသမားများနှင့် ပီနိုကီယိုရှေ့တွင် ရပ်တန့်သွားခဲ့သည်။ သူ၏ကြီးမားသောကိုယ်မှာ တောင်ကြီးသဖွယ် ကစားသမားများ၏ ခေါင်းအပေါ် အရိပ်ကြီးဖြင့် လွှမ်းခြုံထားခဲ့သည်။ စန်တာကလော့က ရယ်မောနေသော်လည်း ၄င်းထံမှ ကြီးစွာသောဖိအားကြောင့် ထန်အော့၏ရင်ထဲမှ တင်းကြပ်သွားမိလေသည်။

၎င်းက ပီနိုကီယိုထက် တစ်ဆင့်ပိုမြင့်သော ဂိမ်း၏ဘော့စ်ပင်။

ထန်မော့ ထီးကလေးကို တင်းတင်းဆုပ်လျက် စန်တာကလော့အား သတိဖြင့် ကြည့်နေခဲ့သည်။

စန်တာ၏စူးရှသောအကြည့်မှာ ကစားသမား၄ဦးထံဖြတ်သန်းသွားလျက် နောက်ဆုံးတွင် ပီနိုကီယိုအပေါ် ကျရောက်သွားခဲ့သည်။ သနားစရာပီနိုကီိယိုက ကြမ်းပင်ပေါ်တွင် ကြိုးနှင့်တုပ်ခံထားရသည်။

ပီနိုကီယို စန်တာကလော့ကိုတွေ့သည်နှင့် ကြောက်လွန်း၍ သူ၏ကိုယ်မှာ တဆတ်ဆတ်တုန်လာခဲ့သည်။ ကြိုးနှင့်တုပ်ခံထားရလျက် ရုန်းကန်ပြီး ထွက်ပြေးရန်ကြိုးစားနေခဲ့လေသည်။

"မင်း ဒီဒုက္ခပေးလွန်းတဲ့ ပီနိုကီယို"

စန်တာကလော့ ပီနိုကီယိုကိုလျက်ညှိုးထိုးလျက် အော်လိုက်သည်။

"မင်းကငါ့ရဲ့ ရွှေကြယ်ကိုလည်းခိုးသွားတယ်... ဂိမ်းတစ်ခုကိုတောင်ဖွင့်လိုက်သေးတယ်...ငါ့ကလေးလေးတွေက သနားစရာ ရိုးသားပြီး လိမ္မာတဲ့ကလေးလေးတွေ ဒါကိုမင်းကလိမ်ရက်တယ်လား...တစ်ယောက်ကတော့နိုင်မှာဆိုပြီး ဂိမ်းပြီးတာနဲ့ မင်းသူတို့ကို စားမှာလေ"

ကျောက်၀မ်ပင်းမှာ ၄င်းကိုကြားလျှင် ဖြူဖျော့သွားခဲ့လေသည်။

ထန်မော့ ထိုအဆုံးသတ်ကို မမျှော်လင့်ထားခဲ့ချေ။ သူသည် ပီနိုကီယိုက ဂိမ်းအဆုံးသတ်တွင် ခိုး၀င်သူကိုသာ စားလိမ့်မည်ဟု ထင်ထားခဲ့သည်။ ကျန်သောကစားသမားအကုန် အစားခံရမည်ဟု မထင်ထားခဲ့။

စန်တာက လက်ဆောင်ထုပ်များပြည့်နေသော အိတ်ကြီးကိုဖွင့်လျက် ပီနိုကီယိုထံ ထိုအိတ်ကိုချိန်ရွယ်လိုက်သည်။ ပီနိုကီယိုမှာ အော်ဟစ်ရင်း ထိုအိတ်ကြီးထဲသို့ စုပ်ယူခံလိုက်ရလေသည်။

စန်တာထိုအိတ်အား ကြိုးတစ်ချောင်းနှင့် ပြန်ချည်လိုက်သည်။ ထို့နောက် ပြည့်ဖောင်းနေသော အိတ်ကို ပုတ်လိုက်ပြီး ကစားသမားများကိုလှည့်ကြည့်လိုက်သည်။ သူကကြင်နာသောအပြုံးကိုဆင်မြန်းလျက် ဆိုလာသည်။

"ကြည့်ရအောင် ကလေးတို့က ကံကောင်းတာပဲ ဘိုးဘိုးကအချိန်မီရောက်လာပေလို့ အခုစစ်မှန်တဲ့ ရိုးသားမှုကတ်ဂိမ်းကို ဆော့ရတော့မယ်... ခရစ်စမတ်ဆိုတော့ ဒါကဘိုးဘိုးပြင်ပေးထားတဲ့ လက်ဆောင်ပဲ ကလေးတို့ကို ထပ်ပေးမယ်နော်"

ထန်မော့မှာ ပြုံးနေသော စန်တာကိုကြည့်လျက် ခတ္တမျှတွေးတောလိုက်မိသည်။

"စန်တာက ပီနိုကီယိုနဲ့ အလောင်းအစားလုပ်ထားခဲ့လားဆိုတာ ကျွန်တော်မေးလို့ရမလား"

၄င်းကိုကြားသည်နှင့် စန်တာ၏မျက်နှာတွင် ဒေါသအရိပ်အယောင်တချို့ထင်ဟပ်လာခဲ့သည်။

"ဒီသောက်ပီနိုကီယိုကတော့ သိပ်ဆိုးတဲ့ကောင်ပဲ... ခရစ်စမတ်အကြိုနေ့တုန်းက သူကတစ်ခွက်လောက် သောက်ရအောင်ဆိုပြီး လာပြောတယ်လေ..ပြီးတော့ လိမ္မာတဲ့ကလေးလေးတွေအတွက် လက်ဆောင်တွေပေးမယ်လည်းကြားရော သူကအလောင်းအစားလုပ်မယ်ပြောတယ်... ပြီးတော့ ဘိုးဘိုးမူးနေတုန်း ရွှေကြယ်ကြီးကို ခိုးသွားတော့တာပဲ"

"ပင်နိုကီယိုက လိမ်ရင် နှာခေါင်းရှည်ထွက်လာတယ်လေ"

ဖူ၀မ်သော်ကဆိုလိုက်သည်။

စန်တာကလော့ကခေါင်းညိတ်လိုက်သည်။

"ဟုတ်ပါ့ ဒါပေမယ့် သူနဲ့အလောင်းအစားလုပ်ပြီးတာနဲ့ သူ့နှာခေါင်းကရှည်မလာဘူး...သူအမှန်ကိုပြောနေတာ...လက်ဆောင်ပေးရမယ့်ကလေးတွေက အတော်များတယ်လေ...ဘိုးဘိုးကတကယ်ပဲ ပင်နိုကီယိုရဲ့အကူအညီကို လိုအပ်ခဲ့တာ... ဒီလိုလှည့်ဖျားမယ်လို့တော့မထင်ထားခဲ့ဘူးလေ...ရွှေကြယ်ကြီးကိုတောင်ခိုးသွားပြီး ဂိမ်းအနိုင်ရမယ့်ဆုလို့တောင် လိမ်လိုက်သေးတယ်"

ထန်မော့ချက်ချင်ပင် နားလည်သွားခဲ့သည်။

"ရွှေကြယ်က နိုင်တဲ့အသင်းရမယ့်ဆုမဟုတ်ဘူးပေါ့"

"သေချာပေါက်မဟုတ်ဘူးပေါ့ ဘိုးဘိုးမှာ ဒီလိုကြယ်မျိုး၁၀ခုပဲရှိတာ... ကမ္ဘာပေါ်က ကလေးတွေအကုန် ဘယ်ပေးလို့ရမလဲ"

စန်တာလက်ကိုဝေ့ယမ်းလိုက်သည်နှင့် လေထဲမှ ရွှေကြယ်ကြီးမှာ စန်တာထံပျံ၀ဲလာပြီး ပျောက်ကွယ်သွားခဲ့သည်။

"ကလေးတွေက ဂိမ်း၀င်ဆော့ရုံနဲ့ ဘိုးဘိုးက ခရစ်စမတ်သစ်ပင်ရဲ့ အကိုင်းလေးတွေပေးမှာ ဒါလေးကိုတွေ့လား ဒါဘိုးဘိုးရဲ့ လက်ဆောင်ပဲ"

ထန်မော့ စန်တာလက်ထဲမှ သစ်ကိုင်းကိုကြည့်လျက် သူ၏အိတ်ထဲမှ သစ်ကိုင်းကို ထုတ်ယူကြည့်လိုက်မိသည်။ သူ့လိုပင် လူတိုင်းက အကိုင်းကိုယ်စီကို ထုတ်ကြည့်လိုက်ကြသည်။

ထန်မော့ ထိုဘာမှထူးခြားပုံမရသည့် ရိုးရိုးသစ်ကိုင်းကိုကြည့်လျက် ရယ်စရာကောင်းသည်ဟုခံစားမိလေသည်။

သူတို့အစကတည်းက အစစ်အမှန်ဆုကို ရရှိပြီးသားပင်။

စန်တာကလော့ ရယ်လိုက်သည်။

"ဒီလူလိမ်ကောင် ပီနိုကီယိုကို စိတ်မပူကြနဲ့...သူကမြေအောက်ကမ္ဘာရဲ့နိုင်ငံသားမဟုတ်တော့ဘူး...သူ့ကို မွန်းစတားကမ္ဘာကိုပို့လိုက်တော့မှာ...အဲဒီကမွန်းစတားတွေက သူ့ကိုချစ်ကြမှာပါ.. ကဲ ဂိမ်းလေးကိုဆက်လိုက်ကြစို့လေ ဂိမ်းလေးပြီးတာနဲ့ ဘိုးဘိုးဆီက ဆုတွေရမှာနော်"

"တင်းတောင်~ အံ့ဖွယ်ခရစ်စမတ်ဂိမ်း 'စန်တာရဲ့ရိုးသားမှုကတ်ဂိမ်း' တရား၀င်စတင်လိုက်ပါပြီ ဂိမ်းရဲ့စည်းမျဥ်းတွေကတော့..."

"ပထမအချက်၊ တစ်သင်းစီအတွက် ကတ်လေးကတ်..."

……

"ပဥ္စမအချက်၊ ကတ်ကိုရွေးချယ်ပြီးသည်နှင့် တဖက်အသင်းမှ မိမိရွေးချယ်ထားသောကတ်ကို မသိနိုင်ပါ"

……

"ဆဌမအချက် ကတ်တစ်ကတ်မှမရှိတော့သည့်အသင်းကို ရှုံးနိမ့်သည်ဟု သတ်မှတ်ပါမည်။

"စန်တာကလော့ရဲ့လက်ဆောင်တွေက အမြဲကပ်စေးနဲပါတယ်...သစ်ကိုင်းတစ်ကိုင်းပဲရမှာပါ... ဒါပေမယ့် စိတ်ဓါတ်မကျလိုက်ပါနဲ့နော်... ဒါကအထူးသစ်ကိုင်းလေးဖြစ်နေနိုင်ပါတယ်... စန်တာကလော့ရဲ့ ခရစ်စမတ်သစ်ကိုင်းလို့တောင်ခေါ်သေးတာပဲလေ နော့်"

စန်တာ၏ကတ်ဂိမ်းမှာ ပင်နိုကီယို၏ဂိမ်းနှင့်ကွာခြားလေသည်။ စည်းမျဥ်း၆ခုသာရှိသည်။ မတူညီသောကတ်များအတွက် စီးချင်းထိုးသက်ရောက်မှုမရှိတော့ချေ။ ပင်နိုကီယိုက ကတ်များကို ကြိုမသိရခြင်းနှင့် ဘုရင်မကတ်၏ အသာစီးရမှုလည်း မရှိတော့ချေ။ စီးချင်းထိုးစရာမလို၍ တစ်သင်းနှင့်တစ်သင်း ပိုသာ မသာ ဂရုစိုက်စရာမလိုအပ်တော့ချေ။

ဤသည်မှာ ကစားသမားများမှာ ဂိမ်းကို ငြိမ်းချမ်းစွာအဆုံးသတ်ပြီးနောက် တူညီသောဘောနပ်စ်ကိုယ်စီရရှိသော ဂိမ်းမျိုးပင်။

စန်တာကလော့မှာ စွပ်ဖားပေါ်တွင်ထိုင်လျက် ပြုံးလိုက်သည်။

"ကဲ ကလေးတို့ရေ... ဘိုးဘိုးနဲ့အတူ ဒီစစ်မှန်တဲ့ ရိုးသားမှု ကတ်ဂိမ်းလေးကို ဆော့လိုက်ရအောင်နော်.. လှပတဲ့ခရစ်စမတ်ကို တူတူကုန်ဆုံးလိုက်ကြစို့ မယ်ရီခရစ်စမတ်ပါကွယ်"

ဂိမ်းမှာ တဖန်စတင်လာခဲ့ပြန်သည်။

ထန်မော့ အကွက်ထံပြန်လျှောက်သွားလိုက်ပြီး အဖြူရောင်နံရံကြီးကျဆင်း လာခဲ့ပြန်သည်။ နံရံကြီးတဖြည်းဖြည်းကျဆင်းလာနေစဥ် ထန်မော့ မျက်နှာချင်းဆိုင်မှ အမျိုးသားကို ကြည့်လိုက်မိလေသည်။ ဖူ၀မ်သော်မှာလည်း ထန်မော့အားကြည့်လျက် နှုတ်ခမ်းထောင့်တို့ကို တွန့်ကွေးကာ အပြုံးတစ်ခုကို လှစ်ဟပြလာခဲ့သည်။

နံရံကလုံး၀ဖုံးကွယ်သွားပြီးနောက် ထန်မော့လည်း စိတ်အေးလက်အေးဖြစ်သွားချေပြီ။

သူကဘုရင့်ရွှေဒင်္ဂါးကို မရနိုင်တော့သော်လည်း

ဤအဆုံးသတ်မှာ အကောင်းဆုံးပင်။

အနက်ရောင်မျှော်စင်၏စည်းမျဥ်းများကို ကြားလိုက်စဥ်ကတည်းက ထန်မော့သည် ပီနိုကီယိုအား စည်းမျဥ်းထဲထည့်ရေးထားသည်ကို သတိထားမိလိုက်သည်။ သူကြုံဖူးသောဂိမ်းများထဲတွင် ဂိမ်း၏ဘော့စ်အမည်အား စည်းမျဥ်းထဲထည့်ရေးထားသည်မှာ ဤသည်မှာ ပထမဆုံးပင်။

'ငါ့စာအုပ်ကို ဘယ်သူခိုးသွားလဲ''ဂိမ်းမှ ယခု 'ရိုးသားမှူကတ်ဂိမ်း'အထိ ထန်မော့ ဂိမ်း၈ဂိမ်းအထိ ဆော့ဖူးခဲ့သည်။ မည်သည့်ဂိမ်းစည်းမျဥ်းကမှ ဂိမ်းဘော့စ်အမည်မပါရှိချေ။ ပီနိုကီယိုတစ်ဦးတည်းကသာ ချွင်းချက်ဖြစ်သည်။

သို့သော် ထန်မော့မှာ ဤအချက်ကြောင့် သံသယ၀င်ခဲ့ခြင်းမဟုတ်။

သူသည် ဒုတိယအချီမတိုင်ခင်ကပင် ပီနိုကီယိုကို အရင်ဆုံးထုတ်ပစ်ချင်နေခဲ့ခြင်းပင်။ ပထမအချီတွက် ထန်မော့၏ မူးမတ်ကတ်မှာ ဖူ၀မ်သော်၏ ဘုရင်ကတ်ထံမှ ဖိနှိပ်ခံလိုက်ရသည်။ အဖြူရောင်နံရံမကျလာခင်တွင် ဖူ၀မ်သော်အား နောက်အချီတွင် ဘုရင်မကတ်ကို ရွေးမည်ဖြစ်ကြောင်းပြောကာ တတ်နိုင်သမျှ အသာစီးပြန်ရရန်ကြိုးပမ်းခဲ့သည်။ နောက်အချီတွင် ပီနိုကီယိုက သူ့အားဘုရင်မကတ်တကယ်ရွေးခဲ့သလားဟု သိချင်စိတ်ဖြင့် မေးလာခဲ့သည်။ ထန်မော့အမှန်တကယ်ပြောရန်ပြင်သည့်အခါတွင်မူသူက တစ်စုံတစ်ခုကို ကြောက်ရွံ့သည့်နှယ် စိုးရိမ်တကြီးငြင်းဆန်လာပြန်သည်။

ပီနိုကီယိုသည် ထန်မော့မှ ဘုရင်မကတ်ကို ရွေးခဲ့ကြောင်း အမှန်အတိုင်းပြောပြလာပြီး သူ့အားအနက်ရောင်မျှော်စင်မှ စည်းမျဥ်းချိုးဖောက်သည်ဟု သတ်မှတ်သွားမည်ကို ကြောက်ရွံ့နေခဲ့လေသည်။

ထို့ကြောင့် ၄င်းကိုတွေ့ပြီးနောက် ထန်မော့ ထိုအကြံကိုရလိုက်ခြင်းပင်။

ပီနိုကီယိုက အနက်ရောင်မျှော်စင်၏ စည်းမျဥ်းများထဲတွင် ပါ၀င်နေသဖြင့် ပင်နိုကီယိုသာစည်းမျဥ်းချိုးဖောက်မိပါက ဘာဖြစ်လာမည်နည်း။

ဤဂိမ်းတွင် ရလဒ်၄မျိုးရှိလေသည်။ ထန်မော့၏အသင်း အနိုင်ရခြင်း၊ ဖူ၀မ်သော်၏ အသင်းအနိုင်ရခြင်း၊ နှစ်သင်းလုံးဂိမ်းကို အေးအေးချမ်းချမ်းအဆုံးသတ်ခြင်း၊ ဂိမ်းအဆုံးသတ်တွင် ပီနိုကီယိုမှ ကစားသမားများအား စားလိုက်ခြင်းဟူ၍ပင်။

ထန်မော့နှင့် ဖူ၀မ်သော်က သိပ်မရင်းနှီးလှသော်လည်း ထန်မော့မှာ ဤလူက ထက်မြတ်လှမှန်း ခံစားမိသည်။ သူသည်လည်းပီနိုကီယို၏ 'ခရစ်စမတ်မှာ ဘယ်လိုလုပ်လူသေမှာလဲ'ဟူသောစကားကို သတိထားမိမည်သာ။ ၄င်းမှာ ဂိမ်းပြီးသွားသည်နှင့် ပီနိုကီယိုက လူသတ်နိုင်ပြီဟုဆိုလိုခြင်းပင်။

ဖူ၀မ်သော်လည်း ၄င်းကို ကျိန်းသေပေါက် တွေးမိမည်သာ။

သူက တရား၀င်ကစားသမားဖြစ်ပြီး ဂိမ်းထဲမှ မွန်းစတားများမှာ သူ့ကိုစိတ်မ၀င်စားကြချေ။ သို့သော် ဖူ၀မ်သော်ကမူကွဲပြားသည်။ သူကခိုး၀င်သူပင်။

ဖူ၀မ်သော်က ခိုး၀င်သူတစ်ဦး၏ စွမ်းအားကိုပြသပြီးဖြစ်သည်။ အကယ်၍ ဖူ၀မ်သော်သာဤဂိမ်းကို အမှန်တကယ်နိုင်ခဲ့ပါလျှင် ပင်နိုကီယိုကသူ့ကိုသွားခွင့်ပြုပါမည်လော။

မည်သူမျှမသိနိုင်ချေ။

ဘုရင့်ရွှေဒင်္ဂါးမှာ ကြီးစွာသောဆွဲဆောင်မှုကြီးဖြစ်ကာ ဖူ၀မ်သော် လွယ်လွယ်ကူကူလက်လျှော့နိုင်မည်မဟုတ်ချေ။ သို့နှင့် ထန်မော့က ဘုရင်မကတ်၏ အကျိုးခံစားခွင့်ကိုသုံးလျက် ဖူ၀မ်သော်၏ ရည်ရွယ်ချက်ကို တီးခေါက်ကြည့်ခဲ့ခြင်းပင်။ ထို့နောက် ဖူ၀မ်သော်မှာ ထိုရွှေဒင်္ဂါးအတွက်နှင့် အရဲစွန့်လောက်မည်မဟုတ်ဟု ကောက်ချက်ချခဲ့သည်။ ထို့နောက် အလောင်းအစားဖြင့် နှစ်ဦးကြားသဘောတူညီမှုထားကာ ပင်နိုကီယိုကို ထုတ်ပစ်ခဲ့လေသည်။

"သူ့ကိုယုံအောင်လုပ်ရတာအတော်ခက်တာပဲ"

ထန်မော့ထိုသို့မခံစားမိပဲ မနေနိုင်ချေ။

စန်တာပေါ်လာပြီးနောက် ကျောက်၀မ်ပင်းမှာလည်း တော်တော်များများကို သဘောပေါက်သွားခဲ့သည်။ သူ၏အသက်မှာ ကယ်တင်ခံလိုက်ရပုံပင်။ ထိုစဥ်မှာပင် ထန်မော့၏ စကားကိုကြားလိုက်ရလေသည်။ သူကခတ္တမျှတွေးတောလိုက်ရင်း ဆိုလာသည်။

"အမှန်အတိုင်းပြောရရင် မင်းတို့ ပင်နိုကီယိုကို တိုက်ခိုက်နေတုန်းက ငါသေမလောက်ကြောက်ခဲ့တာ အဲဒါကြောင့်လေ...ငါတို့က အသင်းဖော်ဆိုလည်း ဟုတ်တာပဲ မင်းရဲ့အစီအစဥ်တွေကို ငါ့ကိုဖြစ်နိုင်ရင်ကြိုပြောပေးလို့ရမလား"

ထန်မော့ကပြန်ဖြေလိုက်သည်။

"ပီနိုကီယိုက ငါတို့ပြောသမျှစကားကို ကြားတယ်"

ကျောက်၀မ်ပင်းနားလည်သွားခဲ့သည်။

"ဟုတ်သား သူကနံရံပေါ်မှာ လဲပြီးနားထောင်နေတာပဲ"

သူကခတ္တမျှတွေးတောသွားပြန်သည်။

"ဒါပေမယ့် ဒီဂိမ်းကပြီးသွားပြီလို့ပြောလို့ရတယ်လေ၊ ငါတို့တွေအသင်းဖော်မဟုတ်တော့ဘူးပေါ့"

ထန်မော့ပြန်မဖြေခဲ့ချေ။

ထိုပူးပေါင်းမှုတွင် အခက်ခဲဆုံးမှာ ပီနိုကီယိုအား သတိလက်လွတ်နှင့် စည်းမျဥ်းကိုချိုးဖောက်မိအောင် လုပ်ရခြင်းပင်။ အဆုံးအထိ ထန်မော့နှင့် ဖူ၀မ်သော်တို့သည် ရိုးရှင်းသော်လည်း ထိရောက်သည့်နည်းဖြင့် ပင်နိုကီယိုအား တစ်ဆင့်ပြီးတစ်ဆင့် ထောင်ခြောက်ဆင်ခဲ့သည်။

စတင်စဥ်က ပူးပေါင်းမှုမှာ အလောင်းအစားတစ်ခုသာဖြစ်ခဲ့သည်။ တစ်ချိန်ထဲတွင် ထန်မော့က ဖူ၀မ်သော်အား ဆက်တိုက်အသိပေးနေခဲ့သည်။

[ပင်နိုကီယိုက ကတ်တွေကိုသိလို့မရဘူး]

သူက၄င်းကို ထပ်ခါထပ်ခါ သတိပေးနေခဲ့သည်ပင်။

ဖူ၀မ်သော်ကလည်း သူ့အားစိတ်မပျက်စေခဲ့ရချေ။

ဖူ၀မ်သော်က သူ၏အဓိပ္ပါယ်ကိုနားလည်လျက် အလောင်းအစားကို သဘောတူခဲ့သည်။ အတိအကျဆိုရလျှင် သူကထိုအလောင်းအစားကို သဘောတူခဲ့ခြင်းမဟုတ်ပဲ ပူးပေါင်းခြင်းကိုသာ သဘောတူခဲ့ခြင်းပင်။

🪩

Prev Next