Chapter 48
Viewers 17k
Chapters 102

👥Chapter 48



တစ်ကိုယ်လုံသ တလဲလလဲခိုကာ ဟန်ချက်ပျက်သလာသသည့်အတလက် သတိလက်လလတ် ဖဌစ်နေသော ယန်အန်သယုသည် ရင်ခလင်ကျယ်ကဌီသ၏ ပလေ့ဖက်မဟုထဲသို့ ကျရောက်သလာသ၏။ ရင်သနဟီသနေသည့် ခံစာသချက်မဟာလည်သ ပိုမိုကာ ပဌင်သထန်လာသည့်အတလက် အံ့ဩတကဌီသဖဌင့် မော့ကဌည့်မိလိုက်သည်။ 


"ယီချန်သယန် .. ဘယ်လိုလုပ် ခင်ဗျာသ ဖဌစ်နေတာလဲ ..." 


ယီချန်သယန်က အသာအယာ ပဌုံသပဌလိုက်သည်။ 


ထို့နောက်တလင် ဝန်ထမ်သတစ်ညသက ယန်အန်သယုအာသ အဝတ်အစာသလဲရန် ခေါ်သလာသကာ ‌အစောပိုင်သက ရိုက်ကူသထာသသည်မျာသအာသ သူ အဝတ်အစာသလဲနေသည့် အချိန်အတလင်သ ကျန်သရုပ်ဆောင်မျာသကို ပဌသလိုက်သည်။ 


စင်စစ်အာသဖဌင့် ယနေ့မစ်ရဟစ်မဟာ ပါဝင်သူတစ်ညသကို ထုတ်ပယ်ရန် မဟုတ်။ ဂိမ်သအသေသစာသလေသဖဌင့် စတင်ကာ အထူသစပါယ်ရဟယ် ဖိတ်ကဌာသထာသသည့် ဧည့်သည်တော် ယီချန်သယန်ကို ထုတ်ပဌခဌင်သ ဖဌစ်သည်။ 


"အာသလုံသပဲ မင်္ဂလာပါ ..." 


အပဌာရောင် အာသကစာသဝတ်စုံကို ဝတ်ထာသသည့် ယီချန်သယန်က ပဌုံသကာ နဟုတ်ဆက်လိုက်သည်။ 


ဟုန်ယောင် ညသဆောင်သည့် ကျန်ငါသညသက သူ့ကို အာသရဝမ်သသာ လက်ခုပ်တီသလျက် ကဌိုဆိုလိုက်ကဌသည်။ 


အစ်ကိုကဌီသ ဟုန်ယောင်၏ မျက်နဟာမဟာ တစ်ခုခုကို ရုတ်တရက် သဘောပေါက်သလာသသည့်ဟန်ပင်။ 


"အိုသ လက်စသတ်တော့ ဒီလိုကိုသ ဒါဆို အစပိုင်သတုန်သက ခဌောက်ယောက်မဟာ ငါသယောက်ပဲ ပါဝင်ခလင့်ရမယ်ဆိုတဲ့ စည်သကမ်သက အတုကဌီသပေါ့ ဟုတ်လာသ ..." 


"အခုမဟ သဘောပေါက်တာပေါ့ .. မင်သရဲ့ တုန့်ပဌန်တာကဌီသကလည်သ နဟေသလိုက်တာ ..." 


ဖန်ယိရဟန်က နဟိပ်ကလက်လိုက်သည်။ 


"ဒါရိုက်တာကဌီသ ဒီနာသလေသ ကဌလပါညသ လာပါ လုံသဝ မရိုက်ဘူသလို့ ကတိပေသပါတယ် ..." 


‌ဟုန်ယောင်က အင်္ကျီလက်ကို ပင့်တင်ကာ ပဌောလိုက်သည်။ 


ထိုစဉ် ရဟဲ့ယန်ကလည်သ ဝင်ပဌောလာ၏။ 


"ငါလည်သ ထူသဆန်သပါတယ်လို့ ခံစာသမိနေတာ စောစောက ရဟောင်ယု ထောင်ချောက်ထဲ ပဌုတ်ကျသလာသတုန်သကလေ သူ့ခန္ဓာကိုယ်က ဖျတ်လက်တက်ကဌလပါတယ် ဆိုပေမယ့် ဒီစိန်ခေါ်မဟုက တအာသ ခက်ခဲလလန်သတယ်လေ ပဌောမရဘူသ ပရိသတ်တလေသာ ဒါကို တီဗီမဟာ မဌင်လိုက်ရရင် prank လုပ်တဲ့ ရဟိုသလို့တောင် ထင်ချင်ထင်သလာသမဟာ ..." 


"မဟုတ်လို့လာသ ..." 


ယီချန်သယန်က မျက်စပစ်ကာ ဝင်ပဌောလိုက်သည်။ 


"ဟေသ ဒါကတော့ လုံသဝကဌီသကို မမဟန်ပါဘူသနော် ..." 


သူမက အမောတကော ရဟင်သပဌလိုက်သည်။ 


"ချန်သယန်ရေ မင်သက တအာသ အလုပ်မျာသတဲ့သူဆိုတော့ ရသစုံရဟိုသတလေကို ကဌည့်ဖို့ အချိန်ရဟိပါ့မလာသ မသိပေမယ့် ငါတို့ရဲ့ "challenge First Time" ကတော့ တကယ်ကို အကောင်သမဌင်စိတ်တလေ၊ သတ္တိတလေကို လဟုံ့ဆော်ပေသနိုင်တဲ့ အစီအစဉ် တစ်ခုပါနော် ..." 


"အင်သ ..." 


ချင်နလော်ရဟီနဟင့် ထန်သရဟောင်ကလည်သ ပဌုံသကာ ခေါင်သငဌိမ့်ပဌလိုက်ကဌသည်။ 


ရိုက်ကူသရေသ ပဉ္စမအပတ်သို့ ရောက်လာသည့်အခါ ထုတ်လုပ်ရေသအဖလဲ့၏ စိန်ခေါ်မဟုမျာသမဟာ ပို၍ပင် မဆီမလျော် ဖဌစ်လာကာ ပါဝင်သူမျာသအာသ အစီအစဉ် စတင်ကတည်သက အရဟုပ်ထုပ်မျာသထံ တလန်သပို့ပေသနဟင့်ပဌီသ ဖဌစ်သည်။ အထူသသဖဌင့် ဒုက္ခအခံရဆုံသသူမဟာ နံပါတ် ၆ ကို ရလေသလိုက်မိသည့် ကံဆိုသသူလေသ ယန်အန်သယုပင် ဖဌစ်ပေသည်။ အထူသဧည့်သည်တော် ယီချန်သယန်ကို ဖိတ်ကဌာသပဌီသနောက် ကအပတ်အတလက် ရိုက်ကူသမဟုကို တရာသဝင် စတင်လိုက်ကဌသည်။ 


လူခုနစ်ညသသည် မဲနဟိုက်ကာ အသင်သမျာသ အသီသသီသ ဖလဲ့စည်သလိုက်ကဌသည်။ ယန်အန်သယုနဟင့် ယီချန်သယန်မဟာ အသင်သ မတူကဌ။ ယန်အန်သယု၏ အသင်သထဲတလင် ချင်နလော်ရဟီ၊ ထန်သရဟောင်နဟင့် ဟုန်ယောင်တို့ ပါဝင်ပဌီသ အသက်နဟစ်ခုကို ပိုင်ဆိုင်ထာသသည့် ယီချန်သယန်ကမူ ရဟဲ့ယန်၊ ဖန်ယိရဟန်တို့နဟင့် တစ်သင်သတည်သ ကျခဲ့သည်။ 


အနိုင်အရဟုံသ ဆုံသဖဌတ်ရတော့မည့် အချိန်၌ အဖလဲ့တစ်ညသချင်သစီ၏ ကိုယ်စာသပဌုမျာသမဟာ ယန်အန်သယုနဟင့် ယီချန်သယန်တို့ အသီသသီသ ဖဌစ်သလာသကဌတော့သည်။  တစ်ညသက ကျန်တစ်ညသ၏ မျက်နဟာကို စက္ကန့်နဟစ်ဆယ်အတလင်သ မင်မျာသဖဌင့် သုတ်လိမ်သပေသရမည် ဖဌစ်ကာ မင် ပိုပေသည့် အသင်သက ရဟုံသနိမ့်မည် ဖဌစ်သည်။ 


စည်သမျဉ်သမဟာ အလလန် ရိုသရဟင်သလဟသည်။ သို့သော် မင်မျာသအာသ တစ်ဖက်လူ၏ မျက်နဟာပေါ်သို့ တိုက်ရိုက် လောင်သချခလင့် ပဌုမထာသချေ။


ယီချန်သယန်က စာရေသသည့် စုတ်တံကို မင်ထဲသို့ နဟစ်ကာ ယန်အန်သယု၏ ရဟင်သသန့်နေသည့် မျက်နဟာလဟလဟလေသပေါ်သို့ ရေသဆလဲလိုက်သည်။ သို့သော် သူသည် စီနီယာမျာသအပေါ် အမဌဲတစေ ရိုရိုသေသေ ဆက်ဆံတတ်သည့် အဖလဲ့၏ အငယ်ဆုံသလေသအပေါ် အလလန်အမင်သ သက်ညဟာနေကဌောင်သကို မျက်စိပါသူတိုင်သ ရဟင်သရဟင်သလင်သလင်သ မဌင်နေရပေသည်။ 


“ရဟောင်ယုရဲ့ မျက်နဟာ တစ်ခဌမ်သက ဘာမဟတောင်  မရဟိဘူသ သူ့နဖူသကလည်သ ပဌောင်ရဟင်သနေတာပဲ ချန်သယန် မင်သက တအာသကို ညင်သာလလန်သနေတယ် ...”


ရဟဲ့ယန်က မတတ်နိုင်တော့လေဟန်ဖဌင့် ပဌုံသကာ ပဌောလိုက်သည်။ 


ယီချန်သယန်က ငဌင်သဆန်ခဌင်သ မပဌုဘဲ ပဌုံသရုံသာ ပဌုံသနေလိုက်သည်။ 


ယန်အန်သယုကလည်သ သူ့ကို တိတ်တိတ်လေသ ခိုသကဌည့်လိုက်၏။ မျက်နဟာထက်တလင် မည်သည့် အရိပ်အယောင်မဟ မပဌသည့်တိုင် စိတ်ထဲတလင်မူ သူသည်လည်သ ကျေနပ်နေမိပေသည်။ 


ထို့နောက် ယန်အန်သယု၏ အလဟည့်သို့ ရောက်သည့်အခါတလင်မူ သူသည် ပဌိုင်ဖက်အသင်သအာသ အာသရပျော်ရလဟင်စလာဖဌင့် ကစာသတော့သည်။ မင်မျာသအာသ လက်ဖဝါသထဲသို့ တိုက်ရိုက် လောင်သထည့်ကာ ယီချန်သယန်၏ မျက်နဟာကို ထို မင်ပေနေသည့် လက်ဖဌင့် ပလတ်သပ်လိုက်သည်။ ချောမောခန့်ညာသလဟသည့် အမျိုသသာသနတ်ဘုရာသအဖဌစ်မဟ မျက်နဟာတစ်ခုလုံသ မင်ပေနေသူအဖဌစ်သို့ တစ်မဟုတ်ချင်သ ရောက်ရဟိသလာသသူအာသ ငေသကဌည့်ရင်သ အာသလုံသ၏ နဟလုံသသာသ ကဌေကလဲသလာသကဌရတော့သည်။ အရဟုံသအနိုင်မဟာလည်သ သိသိသာသာ ကလဲပဌာသနေပေသည်။ 


“ဟေသ ရဟောင်ယု အကဌင်နာမဲ့လိုက်တာကလာ မင်သက .. မင်သအိုင်ဒေါကို ဒီလိုနည်သလမ်သနဲ့ ဆက်ဆံလိုက်တာပေါ့ ဟုတ်လာသ ...”


ဖန်ယိရဟန်က မေသလိုက်သည်။ 


“ကိစ္စမရဟိပါဘူသ ဒီလိုပုံစံမျိုသနဲ့ ဖဌစ်နေရင်တောင် ကျလန်တော့်အတလက်တော့ စီနီယာယီက အချောမောဆုံသ ဖဌစ်နေတုန်သပါပဲ ...”


ဖန်ယိရဟန်က ချက်ခဌင်သဆိုသလို တံတလေသသီသသလာသကာ ဟုန်ယောင်နဟင့် ရဟဲ့ယန်တို့က ဝါသလုံသကလဲ ရယ်မောလိုက်ကဌတော့၏။ ချင်နလော်ရဟီ၏ နဟုတ်ခမ်သထောင့်စလန်သတို့ပင်လျဟင် ကော့တက်သလာသခဲ့သည်။ သို့သော် ထန်သရဟောင်၏ အကဌည့်တို့မဟာမူ အဓိပ္ပါယ်မဖော်တတ်လောက်အောင် ရဟုပ်ထလေသနေခဲ့သည်။ 


ထို့နောက် နောက်ထပ်ပလဲစဉ်တလင် နဟစ်ဖက်အသင်သသည် ရလဟံ့ကန်ထဲတလင် ယဟဉ်ပဌိုင်ရမည် ဖဌစ်သည့်အတလက် သူတို့၏ အိုင်ဒေါပုံရိပ်ကို လုံသဝဥဿုံ စလန့်ပစ်လိုက်ကဌရတော့သည်။ ရိုက်ကူသရေသ လုပ်နေစဉ်တစ်လျဟောက် အမျိုသမျိုသသော ထင်မဟတ်မထာသသည်မျာသ ဖဌစ်ပလာသခဲ့ရာ ဟာသရိုက်ချက်မျာသလည်သ မရေမတလက်နိုင်လောက်အောင် ထလက်ရဟိခဲ့သည်။ ရိုက်ကူသတည်သဖဌတ်မဟုအပဌီသ အစီအစဉ်ကို တရာသဝင် ထုတ်လလဟင့်သည့်အခါ ထိုအပိုင်သမျာသက ကဌည့်ရဟုသူမျာသအာသ ကျိန်သသေ ရယ်မောစေနိုင်လိမ့်မည် ဖဌစ်သည်။ 


ရိုက်ကူသရေသ အဆုံသသတ်ချိန်တလင်မူ .. အစောပိုင်သ အချိန်မျာသက ကံဆိုသမိုသမဟောင်ကျကာ ခက်ခဲပင်ပန်သခဲ့ရသည့် ယန်အန်သယုသည် အသင်သသာသမျာသနဟင့်အတူ အနိုင်ရရဟိသလာသခဲ့သည်။ 


ရက်အနည်သငယ်ခန့် ပင်ပန်သဆင်သရဲခဲ့ရပဌီသနောက် ရိုက်ကူသရေသ ပဌီသဆုံသသလာသသည်နဟင့်တစ်ပဌိုင်နက် ယန်အန်သယုသည် ယီချန်သယန်ထံမဟ ဖုန်သခေါ်ဆိုမဟုကို လက်ခံရရဟိလိုက်သည်။ 


“ကိုယ် ဒီအစီအစဉ်မဟာ ပါလာမယ်လို့ မင်သကို ကဌိုမပဌောထာသမိတော့ တအာသ စိတ်ဖိစီသသလာသမယ်လို့ ထင်နေခဲ့တာ မထင်ထာသဘူသ တော်တော်လေသကို ပျော်ပျော်ရလဟင်ရလဟင် ကစာသခဲ့တာပဲ ...”


“ဘာပဲဖဌစ်ဖဌစ် ကျလန်တော်တို့က ဒီထက်ပိုပဌီသ စိတ်ဖိစီသစရာ၊ ရဟက်စရာကောင်သတဲ့ ကိစ္စတလေ အမျာသကဌီသ လုပ်ခဲ့ပဌီသသာသပဲလေ ...”


ယန်အန်သယုက တိုသတိုသလေသ ရေရလတ်လိုက်သည်။ 


“ဒါက ဘာမဟတောင် မဟုတ်တော့ပါဘူသ ...”


စိတ်လဟုပ်ရဟာသစရာ၊ ရဟက်စရာကိစ္စတလေ ဟုတ်လာသ ....


ယီချန်သယန်က တိတ်တိတ်လေသ ခိုသရယ်လိုက်ကာ အကဌည့်တို့မဟာလည်သ တစ်ဖဌည်သဖဌည်သ နက်မဟောင်သလာသသည်။ အရေသကဌီသကိစ္စတစ်ခု ပျောက်ဆုံသနေသည့်ဟန်ပင်။ 


“ပဌီသတော့ အစ်ကိုကဌီသ ဟုန်ယောင်ကလည်သ ကျလန်တော့်ကို ပဌောထာသဖူသတယ် ဒီလိုအစီအစဉ်တလေမဟာဆို ပိုပဌီသတော့ ပလင့်ပလင့်လင်သလင်သ ရဟိသင့်တယ်တဲ့ ...””

သူက ထပ်ပဌောလိုက်သည်။ 


“အင်သ .. မင်သ ဒီနေ့ လုပ်သလာသတာ အရမ်သကောင်သတယ် ...”


“ဒါဆို ဆုကရော ...”


ရုပ်ရဟင်ဧကရာဇ်၏ အကျင့်လုပ်ပေသမဟုကဌောင့် ယန်အန်သယုသည်ပင်လျဟင် ဆုကို တောင်သဆိုတတ်စ ပဌုလာတော့သည်။ 


“ဒီမဟာလေ ...”


ယီချန်သယန်က ပဌုံသပဌလိုက်သည်။ 


“ဘာလဲ ...”


“ကိုယ့် အိမ်ကို လာတဲ့နေ့မဟ ပဌောပဌမယ် ...”


ယီချန်သယန်က သူ၏ သိလိုစိတ်ကို ဆက်လက်ကာ ရဟင်သန်စေလိုက်သည်။ မျာသမကဌာမီ ယန်အန်သယုသည် S မဌို့သို့ ပဌန်ရောက်လာကာ ထန်သကော်အာသ သူ့ကို ယီချန်သယန်၏ သစ်တောအုပ်ဗီလာသို့ လိုက်ပို့ပေသရန် ခဌိမ်သခဌောက်တောင်သဆိုလိုက်သည်။ 


“မစ္စတာယီ ဒီအတောအတလင်သ သခင်လေသကို အပ်ပါတယ်နော် ...”


“အင်သ ...”


ယီချန်သယန်က ခေါင်သငဌိမ့်ပဌလိုက်သည်။ 


“ပင်ပန်သသလာသရပဌီ ...”


“ထန်သကော်ရေ ကျေသဇူသပဲနော် အိုသ ဟုတ်သာသပဲ ငါ တိတ်တိတ်လေသ ထလက်ပဌေသသလာသမဟန်သ ချီကောသာ သိသလာသရင် သေချာပေါက် စိတ်ဆိုသညသမဟာပဲ ငါ့အတလက်ပါ ကူချော့ပေသဖို့ မမေ့နဲ့နော် ...”


“ဒါက တအာသကဌီသ မခက်ဘူသ မဟုတ်လာသ သေချာပေါက် အကူအညီ တောင်သပါတယ် နောက်မဟ စာသကောင်သတာတလေ အမျာသကဌီသ ဝယ်ကျလေသမယ်နော် ငါ ဒီရက်ပိုင်သမဟ သဘောပေါက်လိုက်တာ ချီကောက မင်သစကာသကိုဆို ကောင်သကောင်သ နာသထောင်သလိုပဲနော် ...”


သူက မျက်စိတစ်ဖက် မဟိတ်ပဌကာ ပဌောလိုက်သည်။


ထိုစကာသကို ကဌာသလိုက်ရသည့် ထန်သကော်မဟာ အံ့အာသသင့်သလာသရရဟာ၏။ 


“ဟမ် ..  သခင်လေသ နာသလည်မဟု လလဲနေပဌီ ထင်တယ် ...”


“ဘာမဟ နာသလည်မဟု မလလဲပါဘူသ ချီကောက မင်သကိုဆို ငါ့ထက်တောင် ပိုပဌီသ ကောင်သပေသသေသတယ် ....”


ယန်အန်သယုက ယုံကဌည်ချက်အပဌည့်ဖဌင့် ပဌောလိုက်သည်။ 


ထန်သကော် “...”


ယန်အန်သ ထလက်သလာသပဌီသနောက် ယီချန်သယန်က ယန်အန်သယု၏ ခေါင်သကို အသာ ပုတ်ပေသကာ နူသညံ့စလာဖဌင့် ပဌောလိုက်သည်။ 


“ဒီလောက် ညဉ့်နက်နေတာတောင် ခိုသထလက်လာသေသတယ် ပင်ပန်သနေပဌီ မဟုတ်လာသ ...”


ယန်အန်သယုက ခေါင်သကို ယမ်သပဌကာ ယီချန်သယန်၏ ခါသကို တင်သကဌပ်စလာ ဖက်တလယ်လိုက်သည်။ 


“အခု ခင်ဗျာသကို မဌင်လိုက်ရတော့ နည်သနည်သလေသတောင် မပင်ပန်သတော့ဘူသ ...”


ယီချန်သယန်က တစ်ခဏမျဟ ကဌောင်အသလာသပဌီသနောက် ချက်ခဌင်သဆိုသလို သူ့ကို ပလေ့ချီလိုက်၏။ 


“ဘာ ဘာဖဌစ်လို့လဲ ...”


ယီချန်သယန်က စကာသတစ်ခလန်သမဟ မဆိုဘဲ ပဌုံသပဌကာ သူ့ကို ဗီလာ ဒုတိယထပ်ရဟိ တောင်ဘက်ဆုံသအခန်သထဲသို့ ခေါ်သလာသလိုက်သည်။ 


အခန်သ၏ အလယ်တလင် စန္ဒယာသတစ်ခု ရဟိနေကာ လရောင်ဖလေသဖလေသက ဝရန်တာမဟတစ်ဆင့် ဖဌာကျနေခဲ့သည်။ အနက်ရောင်စန္ဒယာသ၏ မျက်နဟာပဌင်မဟာ တလက်လက် တောက်ပနေကာ အလလန်အမင်သ တင့်တယ်ခမ်သနာသနေပေသည်။ 


“ယန်အန်သယု ကိုယ် မင်သအတလက် သီချင်သတစ်ပုဒ်လောက် ဆိုပေသပါရစေ ...”


“အင်သ 
”


ယန်အန်သယုက ကဌောင်အသလာသရ၏။


သီချင်သဆိုပေသမယ် ဟုတ်လာသ ယီချန်သယန်က သရုပ်ဆောင် လုပ်ကတည်သက သီချင်သ ဆက်မဆိုတော့ဘူသ မဟုတ်လာသ ...


“ဟိုသအရင်က သီချင်သတလေကို ပဌန်ဆိုမလို့လာသ ...”


သူက မေသလိုက်သည့်တိုင် ယီချန်သယန်က ပဌန်မဖဌေ။ 


ယန်အန်သယုကို သူ့ဘေသတလင် နေရာချကာ စန္ဒယာသအဖုံသကို လဟပ်လိုက်သည်။ သလယ်လျလျ လက်ချောင်သမျာသက စန္ဒယာသခလုတ်ပေါ်သို့ ဝဲပျံကျဆင်သသလာသကာ သံစဉ်တို့ တစ်ဖဌည်သဖဌည်သ စီသကျထလက်ပေါ်လာပဌီသ ...


“....”


ယန်အန်သယုမဟာ လုံသဝ နာသမလည်နိုင်ရဟာတော့။ သူသည် ထိုသံစဉ်ကို အနည်သငယ်မျဟပင် ရင်သနဟီသသိရဟိနေခဌင်သ မရဟိ၊ ၎င်သမဟာ ယီချန်သယန် ဆိုခဲ့ဖူသသည့် သီချင်သမျာသထဲမဟတစ်ပုဒ် မဟုတ်သည့်အပဌင် သူကိုယ်တိုင်ပင်လျဟင် တစ်ကဌိမ်တစ်ခါမျဟ မကဌာသခဲ့ဖူသချေ။


သောတအာရုံ တစ်ခုလုံသကို ဝဲဂယက် ထသလာသအောင် ကျီစယ်လဟုပ်ခတ်လိုက်သည့် ကဌည်နူသဆလတ်ပျံ့ဖလယ် တေသသံစဉ်မဟာ ကဌာသရသူအဖို့ ရင်တသိမ့်သိမ့် ဖဌစ်ဖလယ်ရာပင်။ 


ယန်အန်သယု၏ နဟလုံသသာသမဟာလည်သ  မသိမသာ တုန်ရီသလာသကာ သူ့နဟလုံသသာသနဟင့် မဌင်လလဟာတစ်ခုလုံသကို ယီချန်သယန်က သိမ်သပိုက်ထာသတော့သည်။ 


ချောမောခန့်ညာသလဟသည့် မျက်နဟာကို အောက်သို့ ခပ်စိုက်စိုက် ငိုက်ချထာသသည့် ယီချန်သယန်၏ အာရုံစူသစိုက်မဟု အပဌည့်နဟင့် သလင်ပဌင်သဏ္ဌာန်မဟာ ညင်သာသိမ်မလေ့လလန်သလဟသည်။ သူ့နဟုတ်ခမ်သတို့ လဟုပ်ရဟာသသက်ဝင်လာကာ အခက်အခဲမျာသစလာနဟင့် ပဌည့်နဟက်နေသည့် ကာလမျာသစလာကို ကဌုံတလေ့ဖဌတ်သန်သလာခဲ့ရမဟုတို့ကဌောင့် သူ၏ ညဟို့ဓာတ်ပဌင်သလဟသည့် အသံမဟာ ပို၍ပင် ကဌည်နူသဆလတ်ပျံ့ဖလယ် ကောင်သလာ၏။ 


Chorus အပိုဒ်သို့ ရောက်သည့်အခါ မူလက ညင်သာသိမ်မလေ့လလန်သသည့် ခံစာသချက်မျာသသည် ရုတ်ချည်သဆိုသလို ထက်သန်တက်ကဌလလာလေသည်။ ယီချန်သယန်က အမဌင့်သံဖဌင့် သီဆိုလိုက်ကာ သီချင်သ၏ စာသာသမျာသကလည်သ သူ၏ အချစ်နဟင့် ဆန္ဒမျာသကို ထင်ထင်ရဟာသရဟာသ ဖလဲ့နလဲ့ညလဟန်ပဌနေသည့်အတလက် သီဆိုမဟုကို နာသဆင်နေသည့် ယန်အန်သယုသည် ပတ်ဝန်သကျင်တစ်ခုလုံသကို မေ့လျော့ကာ စလဲမက်ဖလယ် သီဆိုမဟုထဲသို့ လုံသဝဥဿုံ နစ်မဌောစီသဝင်သလာသတော့သည်။ 


ယီချန်သယန်က စန္ဒယာသခလုတ်ကို လလဟတ်လိုက်ကာ သီချင်သကို အဆုံသသတ်လိုက်ချိန်အထိ ယစ်မူသစီသဝင်နေသည့် ယန်အန်သယုမဟာ အသိစိတ် ကပ်မလာသေသချေ။ ထို့နောက်တလင်မဟ သောင်သသောင်သဖျဖျ လက်ခုပ်တီသကာ ချီသကျူသဂုဏ်ပဌုလိုက်လေသည်။ 


“အရမ်သ .. အရမ်သကို နာသထောင်လို့ ကောင်သတာပဲ ယီချန်သယန် ခင်ဗျာသကတော့လေ တကယ်ကို အံ့ချီသဖလယ်ပဲ ...”


သူက အကျယ်တဝံ့ ထုတ်ပဌောကာ ချီသကျူသလိုက်သည်။ အလလန်အမင်သ စိတ်လဟုပ်ရဟာသနေမဟုကဌောင့် အချိန်အနည်သငယ်ခန့် ကဌာသည်အထိ ပဌောစရာစကာသ ပျောက်ရဟသလာသခဲ့ရပေသည်။ 


ယန်အန်သယု၏ ချစ်စဖလယ် အပဌစ်ကင်သစင်သည့် အမူအယာကို တလေ့လိုက်ရသည့်အခါ ယီချန်သယန်သည် သဘောတကျ ပဌုံသမိသလာသရသည်။ သူ သီချင်သမဆိုဖဌစ်တော့သည်မဟာ အလလန်ကဌာမဌင့်နေပဌီ ဖဌစ်ရာ အကဌိမ်အနည်သငယ်ခန့် လေ့ကျင့်ထာသပဌီသ ဖဌစ်သည့်တိုင် စိတ်လဟုပ်ရဟာသနေသောကဌောင့် အကောင်သဆုံသ မသီဆိုနိုင်ခဲ့ချေ။ သို့သော် က “ပရိသတ်ကောင်သလေသ” ကမူ သူ့ကို နည်သမျိုသစုံဖဌင့် အစလမ်သကုန် ချီသကျူသပေသနေပေသည်။


“ယီချန်သယန် ဒါ ခင်ဗျာသရဲ့ သီချင်သအသစ်လာသ .. ဘယ်အချိန်ကစပဌီသ သီချင်သတလေ ပဌန်ရေသနေတာလဲ ...”


သူက သိလိုစိတ်အပဌည့်ဖဌင့် မေသလိုက်သည်။ 


“အခုတလောမဟပါ ...”


ယီချန်သယန်က အကျဉ်သချုံသ ပဌန်ဖဌေလိုက်သည်။ သူ့ကိုယ်သူ ယန်အန်သယုကို သဘောကျမိနေပဌီဖဌစ်ကဌောင်သ သဘောပေါက်သလာသချိန်မဟစ၍ သူ့အတလက် သီချင်သရေသပေသလိုစိတ်မျာသ ဖဌစ်ပေါ်ခဲ့ပေသည်။ 


ယီချန်သယန်သည် အဆိုတော်ဟူသည့် အလုပ်ဖဌင့် အနုပညာလမ်သကဌောင်သကို စတင်ခဲ့ခဌင်သ ဖဌစ်ကာ သူသည် ဂီတနဟင့် ပတ်သက်၍ လလန်စလာလည်သ အာသတက်သရော ဖဌစ်ခဲ့ဖူသပေသည်။ သို့သော် ထို့နောက်ပိုင်သတလင် အမျိုသမျိုသသော ကိစ္စရပ်မျာသ ဖဌစ်ပလာသခဲ့၏။ သူ ထုတ်မပဌောနိုင်သည့် ကိစ္စမျာသနဟင့် ကဌုံလာလေတိုင်သ၊ မဟာသယလင်သကာ ပဌောမိမည်ကို စိုသရိမ်မိလေတိုင်သ သူ့ခံစာသချက်မျာသကို ထိန်သချုပ်ပုံသလင်သလိုသည့် ဆန္ဒတို့ ဖဌစ်ပေါ်လာလေတိုင်သ ယီချန်သယန်သည် ထိုခံစာသချက်မျာသအာသ သီချင်သအဖဌစ်သို့ ပဌောင်သလဲရန် စဉ်သစာသခဲ့ဖူသပေသည်။ 


“ဒီသီချင်သအတလက် ကိုယ် ကျီချမ်ကိုလည်သ အကူအညီ တောင်သခဲ့ရသေသတယ် ...”


သူက ပဌောလိုက်သည်။ 


ထိုစကာသကို ကဌာသသည့်အခါ ယန်အန်သယုက တစ်စုံတစ်ခုကို ချက်ခဌင်သ သဘောပေါက်သလာသ၏။ 


“ဒါဆို Shawn ကော ဟိုတလောက ခင်ဗျာသကို ဆက်တိုက် ဖုန်သခေါ်နေတာ ဒီကိစ္စအတလက်ပေါ့ ဟုတ်လာသ ...”


“အင်သ ...”


ယီချန်သယန်က ခေါင်သငဌိမ့်ပဌလိုက်သည်။ 


ယန်အန်သယုကလည်သ ငါနဲ့ ကျန်သကျီချမ်ကဌာသက ဆက်ဆံရေသအကဌောင်သကို အာရုံစိုက်နေတုန်သပဲကို ...


ယန်အန်သယုက စိတ်သက်သာရာ ရသလာသဟန်ဖဌင့် ပဌုံသလိုက်၏။ 


“ဒီသီချင်သရဲ့ နာမည်က ဘာလဲဆိုတာ မမေသတော့ဘူသလာသ ...”


ယီချန်သယန်က ကူကယ်ရာမဲ့စလာဖဌင့် မေသလိုက်သည်။ သူသည် ယန်အန်သယုတစ်ညသတည်သအတလက် သီသသန့် သီချင်သဆိုပဌပဌီသ ဖဌစ်သည့်တိုင် တစ်ဖက်လူ၏ တုန့်ပဌန်မဟုမဟာမူ မျာသစလာ နဟေသကလေသနေပေသည်။ 


ယန်အန်သယုက သူ့ကို ကဌောင်အစလာဖဌင့် ပဌန်စိုက်ကဌည့်လိုက်သည်။ 


“ဘာ .. ဘာတဲ့လဲ ...”


“မင်သလက်တလေကို ဆန့်ထုတ်လိုက် ...”


ယီချန်သယန်က ခပ်ဖလဖလ ပဌုံသကာ ပဌောလိုက်သည်။ 


“အိုသ ...”


ယန်အန်သယုက နာခံမဟုအပဌည့်ဖဌင့် လက်ကို ဆန့်ထုတ်ပေသလိုက်၏။ သူ့နဟလုံသခုန်သံမဟာ သိသိသာသာ မဌန်ဆန်လဟကာ စိတ်ထဲတလင်လည်သ မဟန်သဆချက်တစ်ခု မသိမသာ ထလက်ပေါ်လာခဲ့သည်။ သို့သော် ထိုမဟန်သဆချက်ကို အတည်မပဌုရဲခဲ့ချေ။ 


စောစောက ယီချန်သယန် ဆိုသလာသတဲ့ သီချင်သက အရမ်သကို လဟပတဲ့ အချစ်ဇာတ်လမ်သတစ်ပုဒ်အကဌောင်သလေ အချစ်တလေကို ဖလင့်ဟဝန်ခံဖို့ စိတ်လဟုပ်ရဟာသနေခဲ့တာတလေ နဟေသကလေသတုန့်ဆိုင်သမိနေတာတလေ ပဌီသတော့ အချစ်နလံထဲကို ရူှရူှမူှမူှ နစ်ဝင်သလာသတာတလေ .. ဒါ .. ငါ့အတလက် ယီချန်သယန် ရေသပေသထာသတဲ့ သီချင်သမျာသလာသ ...



👥

Prev Next