Chapter 186

🌱Arc 5 - [ဖျော်ဖြေရေးနယ်ပယ်တွင် လယ်စိုက်ခြင်း ]

Ch 186

နောက်ဆက်တွဲဇာတ်လမ်း  (၁)

စွေ့ချီချောင်းက သူ့ဘဝရဲ့ ပထမသက်တမ်းတစ်ဝက်မှာ တကယ်ပဲ ဘုရင် ဖြစ်ခဲ့တာလား ဒီအခွင့်အရေးကို သုံးပြီး သူက ဧကရာဇ်လုပ်ဖို့  အခွင့်ကောင်း ယူလိုက်မှာလား အဲဒီ့လိုသာဆိုရင် သူက ဘယ်နိုင်ငံရဲ့ ဧကရာဇ် ဖြစ်လာမှာလဲ ...

နောက်ဆက်တွဲဇာတ်လမ်းက စွေ့ချီချောင်း၏ ပရိုဂရမ်ထဲမှ အချက်အလက်များကိုပါ တူးထုတ်လာစေခဲ့သည့်အတွက် သူ၏reality showနှင့် ထိုနောက်ဆက်ဇာတ်လမ်းအကြားတွင် ကွာဟမှုအနည်းငယ် ထွက်ပေါ်လာတော့သည်။ 

ဇာတ်ညွှန်းရေးသူများက စွေ့ချီချောင်း၏ ငယ်ဘဝမှ စတင်ကာ ရေးသားလိုကြသည်။ ထို့အပြင် သူတို့၏ အံ့ဩဖွယ်ကောင်းလှသော လက်ရှိနည်းပညာနှင့်သာဆိုလျှင် စွေ့ချီချောင်းကို သူ့ငယ်ဘဝအဖြစ် ကိုယ်တိုင် သရုပ်ဆောင်စေနိုင်ကာ ထို့နောက်တွင်မှ သူ့အတိတ်က ပုံစံနှင့် တစ်ထပ်တည်း တူညီစေရန်အတွက် ကလေးဘဝနှင့် ဆယ်ကျော်သက်ဘဝရုပ်ရည်များကို နမူနာပုံစံ ယူထားကြမည် ဖြစ်သည်။ 

ဇာတ်ကြောင်းမှာ အနည်းငယ် ချဲ့ကားလွန်ကျူးလွန်းလှပေသည်။ 

စွေ့ချီချောင်းက ဒီမိုကရေစီစနစ်ကို ထောက်ခံသော ဂြိုဟ်တစ်ခု၌ မွေးဖွားခဲ့ကာ သက်ဦးဆံပိုင်ဘုရင်စနစ်၏ ဖိနှိပ်မှုကို ခံစားခဲ့ရသည့် ပြည်သူများအပေါ်တွင် ဇာတ်အိမ်တည်ထားခဲ့သည်။ ထို့ကြောင့် လူတိုင်းက စနစ်ဟောင်းကို အလွန်မုန်းတီးကာ အမုန်းတရားမှာ ထိုစနစ်နှင့် သက်ဆိုင်သည့် ကိစ္စတစ်ခုခုကို ကြားသိလိုက်ရသည်နှင့် တပြိုင်နက် ကျိုးကြောင်းဆင်ခြင်နိုင်စွမ်း လျော့နည်းသွားသည်အထိ ပြင်းထန်လှပေသည်။ 

ထို နောက်ဆက်တွဲဇာတ်လမ်းထဲရှိ စွေ့ချီချောင်း၏ မိဘများမှာ သာမန်လူတန်းစားများ ဖြစ်ကြကာ သူ့ကို အခြားဂြိုဟ်များသို့ အလည်အပတ် သွားနေစဉ်အတွင်း မွေးဖွားခဲ့ကြသည်။ ဒေသခံမျိုးရိုးဗီဇစစ်ဆေးရေးဌာနက စွေ့ချီချောင်းက မွေးကင်းစအရွယ်ကတည်းကပင် ဧကရာဇ်သွေးကို နိုးထလာသူဖြစ်ကြောင်း ရှာဖွေတွေ့ရှိခဲ့သည်။ သူတို့က စွေ့မိသားစုမှာ ဘုရင်စနစ်ကို ဆန့်ကျင်သောဂြိုဟ်မှ ရောက်လာကြသူများဖြစ်ကြောင်း မသိကြသည့်အတွက် အားရဝမ်းသာ ဂုဏ်ပြုပေးလိုက်ကြတော့သည်။ 

မင်းတို့သား ဘုရင်ဖြစ်လာတာနဲ့ တစ်ပြိုင်နက် မင်းတို့တွေလည်း သေချာပေါက် မင်းသားမင်းသမီးတွေ ဖြစ်လာတော့မှာ...

စွေ့ချီချောင်း၏ မိဘများမှာမူ ဟန်မဆောင်နိုင်လောက်အောင်ပင် အမူအယာ ပျက်ယွင်းနေကြပြီ ဖြစ်ကာ ထိုသို့သောသွေးမျိုး နိုးထလာခြင်းမှာ သူတို့ဇာတိဂြိုဟ်အတွက်မူ ကံကောင်းခြင်းလည်းမဟုတ်၊ ဟာသလည်း မဟုတ်၊ ကျိန်စာဆိုးတစ်ခုသာ ဖြစ်သည်ဟုပင် ထုတ်ပြောလိုက်ကြတော့သည်။ 

စင်စစ်အားဖြင့် ဧကရာဇ်တစ်ဦး ဖြစ်လာရန်မှာ မလွယ်ကူလှချေ။ အထူးသဖြင့် စွေ့ချီချောင်းက တော်ဝင်မိသားစုဝင် မဟုတ်ရာ ပို၍ပင် ခက်ခဲပေသေးသည်။ 

မည်သို့ပင်ဖြစ်စေ သူတို့၏ မွေးရပ်ဇာတိတွင်မူ တော်ဝင်မိသားစု၏သွေးကို ဆက်ခံထားသူဟု သိလိုက်ရသည်နှင့် တစ်ပြိုင်နက် အားလုံး၏ ရှောင်ကြဉ်မှုကို အလွယ်တကူ ခံစားရမည်ဖြစ်ကာ ပြည်သူများကလည်း ထိုဆက်ခံသူကို လွန်စွာ ရွံရှာမုန်းတီးကြမည် ဖြစ်သည်။ 

ထို့အပြင် စွေ့ချီချောင်းက ဧကရာဇ်သွေး နိုးထလာသူလည်း ဖြစ်နေသေးပေသည်။ နိုးထသူများမှာ တော်ဝင်မိသားစု၏ မျိုးဆက်များနှင့် ကွဲပြားလှပေသည်။ သူတို့ကို ထူးခြားစွမ်းရည်ပိုင်ရှင်များဟု ခေါ်ဝေါ်လျှင်လည်း မမှားနိုင်ပေ။ သို့သော် ထိုသို့ နိုးထလာသူများကို အများက ဖယ်ကြဉ်ထားတတ်သည့်အတွက် သွေးနိုးထလာသူဦးရေမှာ တစ်ဖြည်းဖြည်း နည်းသည်ထက် နည်းပါးလာတော့သည်။ 

သို့သော် သူတို့တွင် အခွင့်အရေးတစ်ရပ် ကျန်ရှိနေဆဲပင်။ စွေ့ချီချောင်း၏ မိဘများက ပြည်ဝင်ခွင့်နှင့် ပတ်သက်သည့် လိုအပ်ချက်များနှင့် ပြည့်မှီခြင်း မရှိပေ။ သို့သော် စွေ့ချီချောင်းက ရှေးခေတ်ဧကရာဇ်၏သွေး နိုးထလာသူ ဖြစ်ပေသည်။ ထို့ကြောင့် လူအများက သူ့အပေါ် ခေတ်သစ်မင်းဆက်များ၏ သွေးနိုးထလာသူကဲ့သို့ ခက်ထန်စွာ ဆက်ဆံခြင်း မရှိကြချေ။ 

ထို့အပြင် အားလုံးသိထားကြသည့် ဧကရာဇ်၏ တိုက်ရိုက်ဆက်ခံသူမှာ ကျန်းမျိုးရိုး ဖြစ်ကာ စွေ့မျိုးရိုးမှာမူ ဆက်ခံသူ၏ မျိုးဆက်အခွဲတစ်ခုအဖြစ်သာ သိထားကြသည်။ တစ်ခါတစ်ရံတွင် စွေ့မျိုးရိုးက မျိုးရိုးစဉ်ဆက်စာရင်းထဲတွင်ပင် ပါဝင်ခြင်း မရှိကြသည့်အတွက် ဖေဖေစွေ့နှင့် မေမေစွေ့သည် တစ်ကြိမ်တစ်ခါမှ မမျှမတ ဆက်ဆံခြင်း မခံစားခဲ့ကြရချေ။ 

ထို့ကြောင့် သူတို့သာ ဖြစ်ခဲ့သမျှကို ဖုံးကွယ်ထားကာ ဤနယ်ခြားဂြိုဟ်တွင် စစ်ဆေးခဲ့သည့် ရလဒ်ကို လက်စဖျောက်နိုင်ပါလျှင် မည်သည့်ပြဿနာမှ ရှိလာတော့မည် မဟုတ်ချေ။ 

ဖေဖေစွေ့နှင့် မေမေစွေ့တို့က သွေးနိုးထလာသူတို့နှင့် တစ်ကြိမ်တစ်ခါမှ ပတ်သက်ခဲ့ဖူးခြင်း မရှိခဲ့သည့်အလျောက် ထိုသူတို့၏ ထူးခြားသည့် ဝိသေသလက္ခဏာများကို မသိကြချေ။ သူတို့ ရှာတွေ့ခဲ့သည့် အချက်အလက်များကို အချိန်အတော်ကြာ စဉ်းစားချင့်ချိန်ပြီးနောက်တွင်မူ သူတို့က ဟိုးယခင်ကတည်းက သူ့သရုပ်မှန်ကို ဖုံးကွယ်ထားခဲ့သင့်သည်ဟု ခံစားမိလာကြတော့သည်။ 

အကြောင်းမှာ စွေ့ချီချောင်း ဆက်ခံထားသည့် သွေးတွင် အလွယ်တကူ သတိပြုမိနိုင်သည့် ထူးခြားချက်များ ရှိမနေသည့်အပြင် သူ၏အုပ်စိုးသူသဖွယ် စကားပြောဆိုပုံနှင့် ပတ်သက်၍လည်း သားဖြစ်သူကို စကားပြောနည်း သင်တန်းကျောင်းသို့ ပို့ထား၍ဖြစ်သည်ဟု အကြောင်းပြ၍ ရနိုင်သောကြောင့် ဖြစ်သည်။ တစ်နည်းအားဖြင့် ဆိုရပါလျှင် သူတို့က သားဖြစ်သူအား ခေါင်းဆောင်ကောင်း ဖြစ်လိုသည့် စိတ်ဓာတ်မျိုး ရှိနေအောင် တမင် မွေးမြူပေးထားခြင်း ဖြစ်သည်ဟု အကြောင်းပြ၍ ရပေသည်။ ဒီမိုကရေစီစနစ်ကို ကျင့်သုံးသည့် နိုင်ငံများတွင်လည်း ခေါင်းဆောင်ကောင်းများ လိုအပ်သည်ဖြစ်ရာ ထိုကဲ့သို့သော နိုင်ငံမျိုးတွင် ခေါင်းဆောင်ဖြစ်လိုခြင်းနှင့် စပ်လျဉ်း၍ အငြင်းပွားဖွယ်ရာ မရှိချေ။ 

ဖေဖေစွေ့နှင့် မေမေစွေ့တို့က ထိုအကြံကို ဟိုးယခင်ကတည်းက တိုင်ပင်စီစဉ်ထားခဲ့ကြခြင်း ဖြစ်သည်။ မေမေစွေ့က သူမ၏ မီးဖွားခွင့်ကို တမင်တကာ တိုးယူလိုက်ကာ မွေးကင်းစကလေး စောင့်ရှောက်ရေးစင်တာတွင် လအနည်းငယ်ခန့် ဆက်နေလိုက်သည်။ ထိုသို့ နေလိုက်မှသာ လုံခြုံလိမ့်မည်ဟု သူမ၏ စိတ်ထဲတွင် ခံစားမိနေ၍ ဖြစ်ပေသည်။ 

“သားက အသက်ဘယ်လောက်လဲ… ငါတို့သာ သူ့ကို ငယ်ငယ်လေးကတည်းက သင့်တော်တဲ့ လမ်းညွှန်မှု လုပ်ပေးနိုင်ရင် ဘယ်သူမှ သိနိုင်တော့မှာ မဟုတ်ဘူး ...”

ထိုသို့ ပြောပြီးသည်နှင့် တပြိုင်နက် သူတို့က လသားအရွယ်သာ ရှိသေးသည့်တိုင် ကြမ်းပြင်ပေါ်တွင် လှဲနေသည့် ကလေးများအား အမိန့်ပေးရန်အတွက် ကုတင်ပေါ်ရှိ အမြင့်ဆုံးနေရာဖြစ်သော ခေါင်းအုံးပေါ်သို့ အတင်းတွယ်တက်နေသော သားဖြစ်သူကို လှမ်းကြည့်မိလိုက်ကြတော့သည်။ 

ဖေဖေစွေ့နှင့် မေမေစွေ့ :  “...”

သူတို့က ကြောက်ရွံ့စိတ်ကြောင့် ပျာယာခတ်သွားကာ သားဖြစ်သူကို ချက်ခြင်း ခေါင်းအုံးပေါ်မှ ဆွဲချလိုက်ကြတော့သည်။ အခြားမိဘများက သူ့လုပ်ရပ်ကို စိတ်ထဲမထားဘဲ ခပ်ပြုံးပြုံးဖြင့် တုံ့ပြန်လိုက်ကြသည့်တိုင် စွေ့မောင်နှံမှာမူ အပြစ်မကင်းသည့်စိတ်ကို ခံစားမိနေကာ သူတို့သာ ကြည့်မနေပါလျှင် စွေ့ချီချောင်းက လူအုပ်၏ အပေါ်ဆုံးအထိ ရောက်အောင်ပင် တက်လေလိမ့်မလားဟု တွေးပူမိသွားတော့သည်။ 

အတိုချုပ် ပြောရပါလျှင် စွေ့ချီချောင်းက ငယ်စဉ်ကတည်းက ဧကရာဇ်တစ်ဦး၏ အရည်အချင်းများကို ထုတ်ပြခြင်းအားဖြင့် သူ့မိဘများကို ရည်ရွယ်၍ ဖြစ်စေ၊ မတော်တဆဖြစ်စေ ခြောက်လှန့်မိနေခဲ့ပေသည်။

သူက ပြုစုပျိုးထောင်ရန်လည်း များစွာ ခဲယဉ်းလှပေသည်။ သူ၏ ပင်ကိုယ်အရည်အသွေးများကို ဖုံးကွယ်ထားရန် မလွယ်ကူလှပေ။ အိမ်နီးချင်းများနှင့် ကစားတတ်စ အရွယ်ကတည်းကပင်လျှင် ၁၂ နှစ်အောက် ကလေးများကို  စတင်ကာ အမိန့်ပေးနှင့်နေပြီ ဖြစ်ပေသည်။ 

ထို့အပြင် သူ့တွင် အခြေအနေတစ်ခုလုံးကို ခြုံငုံသုံးသပ်နိုင်စွမ်းနှင့် ထိန်းချုပ်နိုင်သည့် စွမ်းရည်များလည်း ရှိနေသေးသည်။ စကားကို ပြည့်ပြည့်စုံစုံ မပြောတတ်သေးသည့် အရွယ်ကတည်းကပင်လျှင် သူ့အဖေကို “ဘာလို့ ဒီနေ့ ဘီစကစ် နည်းနည်းပဲ စားရတာလဲ” ဟူသည့် မေးခွန်းမျိုး ပြန်မေးတတ်နေပြီ ဖြစ်သည်။ 

အိမ်တွင် ရှိနေသည့် ခွေးကပင်လျှင် သူ့ကို သခင်အဖြစ် သတ်မှတ်ကာ သူ့အမိန့်ကို တစ်သွေမတိမ်း လိုက်နာခဲ့ပေသည်။ 

ဖေဖေစွေ့နှင့် မေမေစွေ့တို့က စွေ့ချီချောင်းထံ၌ ဘုရင်လုပ်လိုသည့် ဝါသနာမျိုး ရှိမနေကြောင်း သိရသည့်အတွက် အခြားသော ဝါသနာများ မွေးမြူပေးရန် ကြိုးစားလိုက်ကြတော့သည်။ သူတို့ ယခင်တွေးထားသည့် စကားပြောနည်း သင်တန်းကျောင်းသို့ ပို့ရန်အကြံကိုမူ စွေ့ချီချောင်းက အများနှင့် ပြောဆိုဆက်ဆံခြင်းဆိုင်ရာ ဘာသာရပ်တွင်လည်း ဆရာတစ်ဆူ ဖြစ်လာမည်ကို ကြောက်ရွံ့စိတ်ကြောင့် ဟိုးယခင်ကတည်းက လက်လျော့ထားခဲ့နှင့်ပြီး ဖြစ်သည်။ 

ထို့ကြောင့် ထေဖေစွေ့နှင့် မေမေစွေ့တို့က သူ့ကို လက်သမားအတတ်၊ ချက်ပြုတ်ခြင်းနှင့် စိုက်ပျိုးခြင်းတို့ကဲ့သို့သော ထိခိုက်မှု မရှိနိုင်သည့် ရှေးခေတ်လူသားများ တတ်ကျွမ်းခဲ့သည့် စွမ်းရည်များကို သင်ပေးလိုက်ကြတော့သည်။ ထို့ကြောင့်လည်း နောက်ပိုင်းတွင် အမည်မသိဂြိုဟ်ပေါ်သို့ ရောက်ရှိသွားသည့်အခါ သူ့တွင် လက်တွေ့ကျကျ ရှင်သန်နိုင်မည့် စွမ်းရည်များစွာ ရှိနေခဲ့ခြင်း ဖြစ်သည်။ 

သူ့မိဘများတွင်လည်း မြောက်များစွာသော စိတ်ဝင်စားဖွယ် အဖြစ်အပျက်များ ဖြစ်ပွားခဲ့ပေသည်။ အမျိုးမျိုးသော ကိစ္စရပ်များကြောင့် ပြဿနာများစွာ ကြုံတွေ့ခဲ့ရသည့်တိုင် စွေ့ချီချောင်းကဲ့သို့ သားမျိုး ရှိနေသည့်အတွက် လွယ်ကူသက်သာသော ဘဝကိုလည်း ပိုင်ဆိုင်ခဲ့ကြရသည်။ 

ဥပမာအားဖြင့် စွေ့ချီချောင်းပေါက်စလေးက သူတို့ မကိုင်တွယ်နိုင်သည့် အိမ်နီးချင်းဆိုးများကို ကူညီကိုင်တွယ်ပေးကာ သူသည် လူအများ၏ စိတ်နှလုံးကို မည်ကဲ့သို့ ထိန်းချုပ်ရမည်ဖြစ်ကြောင်း သိနေသည့်ဟန်ပင်။ သူက မိဘများ ရာထူးတိုးရန်အတွက်ပင် ကူညီပေးခဲ့သေးသည်။ သူတို့က မန်နေဂျာအဆင့်အထိ ရာထူးတိုးသွားကာ အခြားသော ကြယ်အစုအဝေးများသို့ သွားလာနိုင်မည့် အခွင့်အရေးကိုပင် ရရှိသွားခဲ့ကြသည်။ 

နောက်ဆက်တွဲဇာတ်ကြောင်း တစ်ခုလုံးက စွေ့ချီချောင်း၏ ကလေးဘဝနှင့် လူငယ်ဘဝအကြောင်းများကို ဖော်ပြထားခြင်းဖြစ်သည်ဟု သတ်မှတ်၍ ရပေသည်။ ရိုက်ကူးရေးအဖွဲ့က ဇာတ်လမ်းထဲတွင် ယုတ္တိမတန်သည့် ဖြစ်ရပ်များစွာကို ထည့်သွင်းထားသည့်အတွက် စွေ့ချီချောင်းအနေဖြင့် လူငယ်လေးတစ်ဦးသဖွယ် သရုပ်ဆောင်နေရန် မလိုအပ်ချေ။

လူငယ်အဖြစ် သရုပ်ဆောင်ရန်သာ လိုအပ်ခဲ့ပါလျှင် ဤသည်မှာ သူ့သရုပ်ဆောင်စွမ်းရည်ကို စမ်းသပ်သည့် စစ်ဆေးချက်တစ်ရပ် ဖြစ်လာပေလိမ့်မည်။ ထိုကဲ့သို့သော စမ်းသပ်ချက်မျိုးမှာ သူကဲ့သို့ အနုပညာလောကထဲသို့ နောက်ကျမှ ရောက်လာသူအတွက် အနည်းငယ် ခက်ခဲနိုင်ပေသည်။ 

ကျန်းထန်ဝေ့က ပြီးခဲ့သည့် ရိုက်ကူးရေးအဖွဲ့၌ ကျွမ်းကျင်စွာ အစွမ်းပြနိုင်ခဲ့သည့်အပြင် လင်းလင်း၏ အကူအညီကိုလည်း ရရှိခဲ့သည့်အတွက် ရိုက်ကူးရေးအဖွဲ့အသစ်ထဲသို့ အောင်အောင်မြင်မြင် ဝင်ရောက်ကာ အထူးပြုလုပ်ချက် ဖန်တီးရေးအင်ဂျင်နီယာအလုပ်ကို ဆက်ပြီး လုပ်ကိုင်ခွင့် ရသွားခဲ့သည်။ 

ထို့ကြောင့် စွေ့ချီချောင်း၏ ကလေးဘဝနှင့် လူငယ်ဘဝ ရုပ်ရည်များကို အထူးပြုလုပ်ချက် ဖန်တီးရာ၌ သူက အလုပ်ကိုအကြောင်းပြ၍ စွေ့ချီချောင်း၏ တိုက်ခန်းထဲရှိ ဆိုဖာပေါ်တွင် လှဲကာ ကလေးဘဝ ဓာတ်ပုံများကို ထိုင်ကြည့်နေခဲ့သည်။ 

ကျန်းထန်ဝေ့က ထိုအစီအစဉ်အတွက် အသံပိုင်းဆိုင်ရာတွင်လည်း တာဝန်ယူထားခဲ့ရသည်။ သူက စွေ့ချီချောင်း၏ အသံပိုင်းဆိုင်ရာ အချက်အလက်များကို အသုံးပြု၍ ကလေးဘဝက အသံမျိုး ဖြစ်လာစေရန်  လုပ်ဆောင်ခဲ့သည်။ ထို့နောက် သူက စွေ့ချီချောင်းကို သူ ငယ်ငယ်က ဖမ်းယူထားသည့် ဗီဒီယိုဖိုင်များအား နားထောင်စေကာ ဖန်တီးထားသည့် အသံမှာ အစစ်အမှန်နှင့် တူညီမှု ရှိမရှိ မေးမြန်းလိုက်သည်။ 

“မင်းက ဇာတ်ကြောင်းထဲကလိုမျိုး ငယ်ငယ်ကတည်းက သွေးနိုးထလာတာ မဟုတ်ဘူးမလား အဲဒီ့တုန်းက ဘယ်လို ဖြစ်ခဲ့တာလဲ ...”

ကျန်းထန်ဝေ့မှာ အတော်လေး သိလိုစိတ် ပြင်းပြနေသည့်ဟန်ပင်။ 

သူက စိတ်ထဲတွင် စွေ့ချီချောင်းအား သူ့အကြောင်း အလုံးစုံကို ပြောပြထားဖူးကာ စွေ့ချီချောင်းက သူ့တွင် မိဘများ မရှိတော့ကြောင်းကအစ သိထားသည့်တိုင် သူကမူ စွေ့ချီချောင်း၏ မိသားစုအကြောင်း တစ်လုံးတစ်ပါဒမျှပင် မသိရဟု မကျေမနပ် တွေးနေမိလိုက်သည်။ သူက စွေ့ချီချောင်း၏ မိသားစုမှာ အလွန်ချမ်းသာကြောင်း တစ်ခုတည်းကိုသာ သိထားသည်။ 

စွေ့ချီချောင်းက ၎င်းကို အခြားသော အထူးပြုလုပ်ချက် ဖန်တီးရေး အင်ဂျင်နီယာများသို့ ပြသဖူးခြင်း မရှိသည့်တိုင် ရှောင်ပိုင်က ထိုသူများနှင့် ကွဲပြားလှပေသည်။

သူတို့အကြား ဆက်ဆံရေးမှာ သန့်စင်နေဆဲ ဖြစ်သည့်အပြင် စွေ့ချီချောင်းက ရှောင်ပိုင်ကို အခြားသူများထက်ပင် ပိုမိုယုံကြည်ကြောင်း သူကိုယ်တိုင်လည်း သိရှိထားသည်။ 

သူက ငယ်ဘဝ ဗီဒီယိုတစ်ခုကို ထုတ်လာကာ ဖွင့်လိုက်ပြီးနောက် ဆိုဖာတွင်ထိုင်ကာ ကျန်းထန်ဝေ့နှင့်အတူ ကြည့်ရန် ပြင်လိုက်သည်။ 

လေထဲတွင် သုံးဖက်မြင်ပရိုဂျက်တာတစ်ခု ထွက်ပေါ်လာသည်။ ထိုပရိုဂျက်တာထဲရှိ ပုံရိပ်၏ အရွယ်အစားမှာ အစစ်အမှန် အရွယ်အစား၏ သုံးပုံတစ်ပုံသာ ရှိကာ စစချင်း မြင်လိုက်ရသည့်သူမှာ စွေ့ချီချောင်းနှင့် အလွန် ဆင်တူလှသည့်အတွက် ကျန်းထန်ဝေ့ အနည်းငယ် အံ့ဩတုန်လှုပ်သွားမိတော့သည်။ သို့သော် ထိုလူက စီးကရက်ကို လက်တစ်ဖက်က ကိုင်ကာ မိန်းမလှလေးတစ်ဦးကိုလည်း ရင်ခွင်ထဲထည့်ကာ ပွေ့ဖက်ထား၏။ ထို့နောက် ထိုအမျိုးသားက သူ့ရှပ်အင်္ကျီကို ကြယ်သီးသုံးလုံးခန့် ဖြုတ်ကာ ရမ္မက်စိတ်တို့ လွှမ်းမိုးနေသည့် အသံဖြင့် ရယ်မောလိုက်သည်။ 

“အဲဒါ ငါ့မိဘတွေ ...”

အချိန်ကျပြီဟု ခံစားမိသော စွေ့ချီချောင်းက စတင်ကာ ထုတ်ပြောလိုက်သည်။ 

“အိုး... အိုး ...”

ကျန်းထန်ဝေ့က ထိုလူနှစ်ယောက်ကို နောက်တစ်ကြိမ် ပြန်ကြည့်လိုက်၏။ ထိုစဉ် ကျောင်းဝတ်စုံ ဝတ်ဆင်ထားသည့် စွေ့ချီချောင်းပေါက်စလေး၏ ပုံရိပ်သည်လည်း ပရိုဂျက်တာထဲတွင် ပေါ်လာကာ သူ၏ ဝတ်စားဆင်ယင်ပုံမှာ သူ့မိဘများထက်ပင် သပ်ရပ်ပြီး အနုစိတ် ကျနေပေသည်။ 

“အိုး ... အိုး ... အိုး ....”

ကျန်းထန်ဝေ့၏ မျက်လုံးတို့ ပြူးကျယ်သွားတော့သည်။ 

“ချစ်စရာလေး ...”

စွေ့ချီချောင်း ပေါက်စလေးက တအားကို ချစ်ဖို့ကောင်းတာပဲ ... သူ့ပုံစံလေးက အခုနဲ့ တစ်ခြားစီပဲ အရမ်းကို ဖျစ်ညှစ်ပစ်ချင်စရာလေး... ပြီးတော့ ပြုံးစိပြုံးစိနဲ့ လက်ထဲမှာလည်း အရုပ်လေးက ပိုက်ထားလိုက်သေးတယ် ...

ပထမဆုံးအကြိမ် မြင်ကာစတွင် ကျန်းထန်ဝေ့က စွေ့ချီချောင်း၏ လက်ထဲ၌ ရှိနေသည့်အရာကို လက်ထိုးအရုပ်ကလေးတစ်ရုပ်ဟု ထင်နေမိခဲ့ပြီး ထိုအရုပ် လှုပ်ရှားသွားကာမှ ၎င်းက ကြောင်တစ်ကောင်ဖြစ်ကြောင်း သဘောပေါက်သွားတော့သည်။ 

စွေ့ချီချောင်းက ကြောင်၏ နာမည်ကို အော်ခေါ်လိုက်သည်။ 

“ရှောင်ပိုင် ..."

ကျန်းထန်ဝေ့ “....”

ထိုတစ်ခဏ၌ ကျန်းထန်ဝေ့၏ စိတ်ထဲတွင် ခံစားချက်များ သောင်းပြောင်းရောနှောကာ ထွက်ပေါ်လာကာ စွေ့ချီချောင်းကို အံ့ဩတကြီး လှည့်ကြည့်မိသွားတော့သည်။ 

အဲဒါကြောင့် စွေ့ချီချောင်းက ဒီဗီဒီယိုကို ပြတာလား ... CU မှာတုန်းက ငါက လုံးဝကို ဖြူဆွတ်နေတဲ့ ကြောင်တစ်ကောင် မဟုတ်တာတောင် စွေ့ချီချောင်းက ငါ့ကို ရှောင်ပိုင်လို့ ခေါ်ခဲ့တာ ဒါကြောင့်လား ...

တစ်နည်းပြောရရင် ... ငါနဲ့ စွေ့ချီချောင်းကြားမှာ နက်ရှိုင်းတဲ့ ဆက်ဆံရေးတစ်ခု ဖြစ်လာအောင် ကူညီပေးခဲ့တယ်လို့ ထင်ထားတဲ့ နာမည်က တကယ်တမ်းတော့ တစ်ပတ်ရစ်ကြီး ဖြစ်နေခဲ့တာကိုး ...

စွေ့ချီချောင်းက သူ့ကိုသာ တည့်တည့်မတ်မတ် စိုက်ကြည့်နေဆဲပင်။ 

“ဆက်ပြီး မကြည့်ချင်တော့ဘူးလား ...”

ကျန်းထန်ဝေ့က သူ့အကြည့်တို့ကို စွေ့ချီချောင်း၏ မျက်နှာထံမှ အတင်း ဖယ်ခွာစေကာ ပရိုဂျက်တာဘက်သို့ ပြန်လှည့်လိုက်တော့သည်။ 

စွေ့ချီချောင်းက ရှောင်ပိုင်ဟူသော ကြောင်အိုကြီးကို ပွေ့ထားရင်း သူ့မိဘများကို ပြောလိုက်သည်။ 

“ဒီနေ့ အပြင်သွားလို့ မရဘူး ဇာတ်လမ်းတိုလေး လေ့ကျင့်ရအောင် ကျွန်တော့်ကို အဖော်ပြုပေးရမယ် ...”

ထို့နောက် သူက ကင်မရာကို ဖွင့်လိုက်သည်။ 

သူ့မိဘများက အလွန်အမင်း နောင်တရနေသည့် မျက်နှာထားဖြင့် ပြောလာ၏။ 

“ပေါင်ပေ့လေး တို့တွေ  ညှိနှိုင်းကြည့်ကြရအောင်လေ မင်းကို အဖော်ပြုပေးဖို့ လူတစ်ယောက်လောက် ရှာပေး ...”

“မရဘူး ...”

စွေ့ချီချောင်းက ခက်ထန်စွာဖြင့် ပြောလိုက်သည်။ 

“ဒီနားလာပြီး ခင်ဗျားတို့ရဲ့ မိဘမေတ္တာတွေကို ဖော်ပြလိုက်ပါဦး ...”

ဗီဒီယိုထဲရှိ သူ့လေသံမှာ ယခုလက်ရှိ လေသံနှင့် များစွာ ကွဲပြားလှသည်။ ထိုသို့ဖြင့် မိဘများတွင်လည်း သူနှင့်အတူ ကစားပေးရန်မှအပ ရွေးချယ်စရာ မရှိတော့ချေ။ မည်သို့ပင်ဖြစ်စေ စွေ့ချီချောင်း၏ လက်ချက်ကြောင့် သူတို့၏ ဆိုးရွားလှသော သရုပ်ဆောင်စွမ်းရည်များမှာ များစွာ သိသာမြင်သာလွန်းလှပေသည်။ စွေ့ချီချောင်း ပေါက်စလေး၏အဖေက လုံလုံလောက်လောက် သန်မာမှု မရှိသည့်အပြင် သူစိတ်ကူးယဉ်ထားသည့် ဖခင်တစ်ဦး၏ ရင်သွေးအပေါ် ချစ်ပေးမှုနှင့်လည်း လုံးဝ ကွဲပြားလွန်းလှသည်။

ကျန်းထန်ဝေ့က မကျေမနပ် ရေရွတ်လိုက်သည်။ 

“ဒါဆို မင်းက ငယ်ငယ်လေးကတည်းက လူတွေရဲ့ စိတ်ကိုထိန်းချုပ်ပြီး သူတို့ကို အိပ်မွေ့ချရတာကို သဘောကျခဲ့တာပေါ့ ...”

စွေ့ချီချောင်းက သူ့ကို စူးစူးရဲရဲ အကြည့်တစ်ချက်သာ ပြန်ပေးလိုက်၏။ 

ကျန်းထန်ဝေ့လည်း ချက်ခြင်း ပါးစပ်ကို ပိတ်ထားလိုက်တော့သည်။ သို့သော် စိတ်ကို ထိန်းချုပ်မထားနိုင်သည့်ဟန်ဖြင့် ဂုဏ်ယူတကြီး ထုတ်ပြောလိုက်မိဆဲပင်။ 

“ကြည့်ပါလား ကျွန်တော် လုပ်ထားတဲ့ အထူးပြုလုပ်ချက်တွေက တော်တော်လေးကို အစစ်နဲ့ တူတယ်နော် ကျွန်တော် လုပ်ထားတဲ့ အသံဆိုလည်း မင်း ကလေးဘဝတုန်းက အသံနဲ့ တစ်ထပ်တည်း နီးပါးလောက်ပဲ ဒါပေမယ့် မင်းငယ်ငယ်က ဒီလို ဖြစ်လိမ့်မယ်လို့တော့ တကယ် ထင်မထားခဲ့မိဘူး ...”

စွေ့ချီချောင်းက ခပ်ပြတ်ပြတ် ပြန်ပြောလိုက်သည်။ 

“မင်းဆို အခုအချိန်အထိ ဂျီကျနေတုန်းပဲ ...”

စွေ့ချီချောင်းထံမှ ထိုစကားမျိုး ကြားလိုက်ရသည့်အခါ ကျန်းထန်ဝေ့က အလွန် အံ့ဩလွန်း၍ တံတွေးပင် သီးသွားတော့သည်။ သို့သော် သူ့ဘက်မှ ငြင်းချက်မထုတ်နိုင်မီ စွေ့ချီချောင်းက ထပ်ပြောလိုက်ပြန်၏။ 

“ဒါက ငါ့မိဘတွေနဲ့ အတူတူ ဗီဒီယိုရိုက်ခဲ့တဲ့ နောက်ဆုံးအကြိမ်ပဲ ...”   

🌲🌲🌲