MM Story Teller

Chapter 58

Viewers 19k

Chapters 123

👻Chapter 58

လက်မှတ်ပျောက်သွားခြင်း (8)

“စက်ဝိုင်းလား...." လော့ဇီယန်၏ မျက်လုံးများက ချက်ချင်း ပင့်တက်သွားသည်။

သူက စာရွက်ခေါက်ထဲက သဲလွန်စဖြစ်လောက်မှန်း အမှတ်ရသွားသည်။

" မဟုတ်သေးဘူး....."လော့ဇီယန်က မျက်နှာရှုံ့မဲ့သွားသော်လည်း အဖြေမရှာနိုင်သေးပေ

" စက်ဝိုင်းနဲ့ ကြယ်အစုအဝေးနဲ့ ဘယ်လိုဆက်စပ်လို့လဲ...."

ယဲ့ယွမ်က ရှင်းပြရန် ပြင်လိုက်စဥ် သရဲမက အချိန်တိုအတွင်း ချုံပုတ်စိမ်းစိမ်းကို ဖြတ်၍ လမ်းပိတ်လာပြီး မျက်လုံးများကလည်း စိတ်လှုပ်ရှားမှုကြောင့် တလက်လက်ဖြစ်နေသည်။

သူမ၏ ပင်လယ်ရေမှော်လို ဆံပင်ရှည်ကြီးများက မျက်နှာကို အုပ်ပြီး ဖားလျားကျနေ၍ ဆတကိုနှင့်တူနေသည်။ [ဆတကို =ဂျပန်သရဲ]

သရဲမက မြေကြီးနှင့်ခေါင်းကပ်နေ၍ ခေါင်းပေါ်က ပန်းပွင့်သရဖူကို မြင်နေရသည်။ ယဲ့ယွမ်က သရဖူတစ်ခုလုံးကို တွေ့လိုက်၍ မျက်လုံးပင့်သွားသည်။

ပန်းပွင့်သရဖူတွင် အဖိုးတန်ကျောက်မျက် ၇သွယ်ရှိနေသည်။ ကျောက်များကို သရဖူထဲ နစ်မြုပ်ထား၍ အလင်းဖျော့ဖျော့ ထုတ်လွှင့်နေ၏။

ယဲ့ယွမ်၏ နှုတ်ခမ်းထောင့်တို့ အနည်းငယ် မြောက်တက်သွားရင်း ပြောလာသည်

" မြောက်အရပ် သရဖူသဏ္ဍာန် ကြယ်အစုအဝေးက ကြယ်ခုနစ်လုံးရှိမယ်.....သူတို့ ဖြန့်ကျက်ထားတဲ့ပုံက ကျောက်ခုနစ်ခုလုံးရဲ့ နေရာနဲ့ တစ်ထပ်တည်းပဲ....ကျွန်တော်မှန်းတာ မှန်သွားတယ်...."

သူ့နောက်ရှိ လော့ဇီယန်က ယဲ့ယွမ်ကို ဆွဲပြီး ပြေးလိုက်သည် " မင်းမှာ ခန့်မှန်းနေဖို့ အချိန်ရှိသေးတယ်ပေါ့...."

လော့ဇီယန်က ယဲ့ယွမ်ကို ဆွဲခေါ်သွားပြီး ပင်စည်တုတ်တုတ် သစ်ပင်တစ်ပင်နောက် ပုန်းနေလိုက်သည်။ သရဲမ ပျောက်သွားသည်ကို တွေ့လိုက်၍ သစ်ပင်ပေါ် လက်ထောက်ပြီး အမောဖြေလိုက်ရသည်။

ယဲ့ယွမ်က ပြုံးလိုက်ရာ သူ့မျက်လုံးများက အမှောင်ယံညထဲရှိ ကြယ်လေးများလို လင်းလက်နေသည်

" ဒီသရဲမက တွားသွားပြီး လူတွေနောက်လိုက်နေရတဲ့ အကြောင်းရင်းကို သိသွားပြီ...."

"ဘာ.....လို့လဲ..."

“ဘာလို့လဲဆိုတော့ သူမသာ မတ်တပ်ရပ်နေရင် ကျွန်တော်တို့က သရဖူထဲက မြုပ်နေတဲ့အရာကို မမြင်ရတော့ဘူးလေ....ဒါကြောင့် သူမက တွားသွားပြီး အနောက်ကလိုက်လာမှ ပန်းပွင့်သရဖူထဲက ကျောက်တွေကို တွေ့ရမှာပေါ့...."

ယဲ့ယွမ်က လက်ခါပြလာသည်။

"...ကြည့်ရတာ အဓိပ္ပါယ်ရှိသလိုပဲ...သရဲမကရော...."

လော့ဇီယန်က သရဲမ ပျောက်သွားသည့် အကြောင်းရင်းကို သိချင်နေသေးသည်။

ယဲ့ယွမ်က ဖြူဖြူစင်စင်လေး ပြုံးပြလာပြီး ဖြေးဖြေးချင်း လက်မြောက်လာရင်း သစ်ပင်ထိပ်ကို ညွှန်ပြလာသည်။

လော့ဇီယန်က မသိ၍ မော့ကြည့်လိုက်ရာ သစ်ပင်ပေါ်မှ ဇောက်ထိုးကျနေသော သရဲမကို ရုတ်တရက် တွေ့လိုက်၍ မျက်ဖြူစိုက်မတတ် ကြောက်သွားကာ အသက်ပင်ထွက်သွားမလို ခံစားလိုက်ရ၏။

သစ်ပင်က ၇မီတာ ၈မီတာခန့် မြင့်၍ သရဲမက သူတို့နား အသံမထွက်ပဲ ကပ်လာနိုင်မည်ဟု တွေးနေဟန်ပင်။

လော့ဇီယန် " ပြေး....."

ယဲ့ယွမ်က ပြုံးပြလိုက်ပြီး တစ်ချက်မလှုပ်ပေ "အစ်ကိုလော့ ပြေးပါ....."

လော့ဇီယန်က ဒေါသတကြီး ခြေဆောင့်လိုက်ရင်း လက်တစ်ကမ်းစာထိ နီးကပ်နေပြီဖြစ်သော သရဲမကို မျက်ရည်ရွှဲနေသော မျက်လုံးများနှင့် ကြည့်လိုက်မိသည်

" ငါ့အတွက်နဲ့ မင်းကိုယ်မင်း စွန့်လွှတ်အနစ်နာမခံပေးစေချင်ဘူး...."

လော့ဇီယန်က ယဲ့ယွမ်ကိုပါ ဆွဲခေါ်သွားပြီး ကြယ်အစုအဝေးတစ်လျှောက် ပြေးသွားလိုက်သည်။

ထိုအချိန် သရဲမက သစ်ပင်ပေါ်မှ အမြန်ဆင်းလာပြီး တစ်ဖန်ပြန်လိုက်လာသည်။

အဆွဲခံထားရသည့် ယဲ့ယွမ်က နှုတ်ခမ်းတွန့်လျက် မေးလာသည် " ....အစ်ကိုလော့ တစ်ခုခုများ နားလည်မှုလွဲနေတာလား....အစ်ကိုလော့ကပဲ သရဲမရဲ့ ပစ်မှတ်လေ..."

လော့ဇီယန် "...???"

ယဲ့ယွမ်က ရယ်မောလိုက်သည် "ကျွန်တော်က ဧည့်သည်သရဲလေ....ကျွန်တော့်ကို ရန်မူမှာ မဟုတ်ဘူး...."

လော့ဇီယန် " ဒါဆို ဘာလို့ အစောကတည်းက ငါ့နောက်လိုက်နေရတာလဲ...."

ယဲ့ယွမ်က ရှက်ဝဲဝဲပြောလာသည် "....ကျွန်တော်က ဘာမှတောင် မပြောရသေးဘူး....အစ်ကိုလော့ပဲ ဆွဲခေါ်သွားပြီးတော့....."

လော့ဇီယန် "......."

စကားပြောနေရင်း ယဲ့ယွမ်က တမင်သက်သက်လား တိုက်ဆိုင်သွား၍လားမသိ လော့ဇီယန် ပြေးနိုင်အောင် သူ့ကိုယ်နှင့် ပိတ်ထားပေးသည်။

အခြား နတ်ဘုရားရုပ်တုများကို ဖြတ်သွားချိန် ယဲ့ယွမ်စိတ်ထဲ တစ်ခုခုပေါ်လာသည်

" ကျွန်တော် မြောက်အရပ် သရဖူသဏ္ဍာန်ကြယ်စုဝေးရဲ့ နေရာကို သိပြီ...."

သူက မြေပုံကို ထုတ်လိုက်ရာ မြေပုံတွင် ကြယ်စုဝေးနှင့်ဆိုင်သည့် အချက်အလက်များ မရှိသော်လည်း နတ်ဘုရားရုပ်တုများ ရှိနေသေးသည်။ ယခုလုပ်ရမည့်အရာက သေရည်နတ်ဘုရား ဘပ်က်ခပ်စ်၏ ရုပ်တုကို ရှာရမည်ဖြစ်သည်။

“ဒီမှာ....." ရှေ့တည့်တည့်တွင် လမ်းခွဲတစ်ခုရှိနေ၍ ယဲ့ယွမ်က လှည့်ပတ်ကြည့်လိုက်ပြီး လော့ဇီယန်လက်ကို ဆွဲကာ အရှေ့ကို ခေါ်သွားလိုက်သည်။

သူ့နောက်က လော့ဇီယန်က ပြင်းထန်သည့် ဆွဲအားကြောင့် တစ်ခဏမျှ အံ့သြသွားရသည်။

အချိန်ကုန်တော့မည်ဖြစ်၍ သရဲမက သူတို့ဘက်က လမ်းမှန်ကို ရွေးမိသွားမှန်း နားလည်သွားဟန် အရှိန်တိုးပြီး လိုက်လာသည်။

ယဲ့ယွမ်က လော့ဇီယန်ကို ဦးဆောင်ခေါ်သွားပြီး မီးအိမ်လေးများကို တစ်ခုပြီးတစ်ခု ခုန်တက်လိုက်ပြီးအဆုံး၌ ဘပ်က်ခပ်စ်၏ ရုပ်တုကို ရှာတွေ့သွားသည်။

လော့ဇီယန်က အက်ကွဲရာများနှင့် ရုပ်တုကို မော့ကြည့်လိုက်ပြီး အံ့အားသင့်သွားရသည် " ဒီမှာရှိနေမယ်လို့ လုံးဝ မထင်ထားခဲ့ဘူး....."

ယဲ့ယွမ် "......."

သူတို့ လှည့်ကြည့်လိုက်သည့်အချိန် သရဲမက သုံးမီတာခန့်အကွာတွင် ရောက်နေပြီး သူတို့ကို ရုပ်တုနှင့်သူမကြား လမ်းပိတ်ထားကာ စူးရှသည့်မျက်လုံးများနှင့် ကြည့်နေသည်။

ယဲ့ယွမ်က တည်တည်ငြိမ်ငြိမ်နှင့် လော့ဇီယန်ကို နောက်ပို့ထားလိုက်ရင်း သရဲမကို ရင်ဆိုင်လိုက်၏။ လေထုက တစ်ခဏမျှ တင်းမာနေလေသည်။

လော့ဇီယန်က ငိုချင်နေသော်လည်း အသံတိုးတိုးနှင့် ပြောလာသည်

" ရှောင်ယဲ့....မြောက်အရပ် ကြယ်စုဝေးက ဘယ်မှာလဲ......"

ယဲ့ယွမ်က သူ့ကို ခေါင်းခါပြလိုက်သည်။

နောက်ဆုံးတွင် သရဲမ၏ သည်းခံနိုင်စွမ်းက အရင်ဆုံး ကုန်ဆုံးသွားသည်။ သူမတွင် အရည်အသွေးမြင့် အခုန်စွမ်းရည်ရှိ၍ ခုန်ရန်ပြင်လိုက်သည့်အချိန် ယဲ့ယွမ်က နောက်ကလော့ဇီယန်ကို ခြေထိုးခံလိုက်သည်။

လော့ဇီယန်က ယဲ့ယွမ်ခြေထောက်ကြောင့် ဒူးထောက်ပြီး နောက်ပြန်လဲကျသွား၍ မြောက်အရပ် သရဖူသဏ္ဍာန်ကြယ်စုဝေးပေါ် ကျမိသွားလေသည်။

မြောက်အရပ် သရဖူသဏ္ဍာန် ကြယ်စုဝေးက ဘပ်က်ခပ်စ်၏ ရုပ်တု နောက်တည့်တည့်တွင် ရှိနေသည်။

မြေကြီးပေါ် ဖင်ထိုင်လျက်လဲကျသွားသည့် လော့ဇီယန်က အော်ဆဲရန်ပြင်လိုက်စဥ် သူ့လက်ထောက်မိသွားသည့် မီးအိမ်လေးကိုမြင်သွား၍ ရန်မမူနိုင်တော့သည့် သရဲမကို စပ်ဖြဲဖြဲကြည့်လိုက်ရင်း ပြုံးပြလိုက်သည်။

သူက ဘယ်လောက်ပဲ တုံးတယ်ဆိုဦးတော့ သူ့လက်နားက မီးရောင်လေးတွေက မြောက်အရပ် သရဖူသဏ္ဍာန် ကြယ်စုဝေးမှန်းတော့ သိပါသေးတယ်....

သရဲမကို တားမြစ်ထားသည့်အရာက မီးအိမ်လေးများဖြစ်သော်လည်း အချို့ကြယ်စုဝေးများက တစ်ဝက်သာ ပွင့်ပြီး အရီယာနီခေါင်းပေါ်က ပန်းပွင့်သရဖူကို အခြေခံထားသည့် မြောက်အရပ် သရဖူကြယ်စုဝေးကသာ ပြစ်ချက်ကင်းသည့် စက်ဝိုင်းတစ်ခုဖြစ်သည်။

သရဲမမှာ သတိထားနေရသည်။

ယဲ့ယွမ်က ဘပ်က်ခပ်စ်၏ ရုပ်တုပေါ် လက်တစ်ဖက် တင်လိုက်ပြီး ဒေါသတကြီးနှင့် လော့ဇီယန်နား တဝဲလည်လည်လုပ်နေသည့် သရဲမကို ကြည့်နေလိုက်သည်။

လော့ဇီယန်က အလေးသာနေ၍ စက်ဝိုင်းထဲမှ ရှင်းပြနေသေးသည် " ညီမလေး....လျှောက်သွားမနေနဲ့တော့.....ခေါင်းမူးလာပြီ....မင်းကိုယ်မင်း ပုံစံငါးခုရှိတဲ့ ပင့်ကူများ ထင်နေလား...."

သုံးမိနစ်ခန့်ကြာပြီးနောက် သူမက သုံးလှမ်းနောက်ဆုတ်ပြီး လှည့်ထွက်သွားလေသည်။ တစ်ချိန်တည်းမှာပင် လော့ဇီယန်၏ ခေါင်းထဲ သွေးစာတန်းတစ်ခုက ရုတ်တရက် ပေါ်လာလေသည်။

လော့ဇီယန်က သတင်းအသစ်ပေးခြင်းဟု ထင်၍ လန့်မသွားသော်လည်း အကြောင်းရာကို တွေ့လိုက်သည့်အချိန် ချက်ချင်း မျက်နှာမည်းသွားသည်။

"ဘယ်လိုမျိုး ကြီးကျယ်မြင့်မြတ်လှတဲ့ ချစ်ခြင်းမျိုးမဆို ဘဝရဲ့တန်ဖိုးကို သိပြီး အချစ်ပြန်လည် ပေါက်ဖွားလာတဲ့ အချိန်မတိုင်ခင်ထိ တစ်ကြိမ်လောက်တော့ စိတ်ပျက်ရဦးမှာပဲ....ပျောက်ကွယ်သွားဦးမှာပဲ....သေဆုံးသွားဦးမှာပဲ...."

"သူမချစ်သူရဲ့ သစ္စာဖောက်ပြီး စွန့်ပစ်သွားမှုကြောင့် အရီယာနီက သူမကို ကယ်တင်ပေးခဲ့တဲ့ သေရည်နတ်ဘုရား ဘပ်က်ခပ်စ်နဲ့ ချစ်ကျွမ်းဝင်သွားခဲ့တယ်....ပြီးတော့ ဘပ်က်ခပ်စ်ကလည်း အရီယာနီက နာမကျန်းဖြစ်ပြီး သေသွားတဲ့အတွက် သူမက ဘယ်လောက်တောင် တန်ဖိုးရှိမှန်း သိခဲ့ရတယ်...."

လော့ဇီယန်က အပေါ်ယံပြုံးပြလိုက်ရင်း ပြောလာသည် " ....ဝိုး....ဒီဂရိဒဏ္ဍာရီလာပြတိုက်က တကယ် ခမ်းနားတာပဲ......"

သရဲမက ယဲ့ယွမ်ကို သူမချစ်သူ ဘပ်က်ခပ်စ်ဟု အထင်မှားပြီး သူ့ကိုလည်း ဘပ်က်ခပ်စ်၏ အချစ်လေးဟု ထင်နေ၍ ဘလော့တုံးရှစ်ခုထိ လိုက်ခဲ့ရသေးသည်။

ယဲ့ယွမ်က ဘပ်က်ခပ်စ်ရုပ်တုဘေးနားရှိ လော့ဇီယန်ကို ခေါ်လိုက်သည်။ လော့ဇီယန်က သိချင်စိတ်ကြောင့် အနားရောက်လာပြီး ယဲ့ယွမ်လို ထိုင်ချလိုက်ချိန် ရုပ်တု၏ ကျောက်တုံးအကွက်ပေါ်၌ ထွင်းထုထားသော စာလုံးလေးများကို တွေ့လိုက်ရသည်။

“ဒီကစားကွင်းရဲ့ အဓိကပိုင်းကို နတ်သမီးနန်းတော်ရယ် အနက်ရောင် နတ်သမီးပုံပြင် အနက်ရောင် ဒဏ္ဍာရီနဲ့ ဖွဲ့စည်းထားတယ်....ဘပ်က်ခပ်စ်နဲ့ အရီယာနီတို့ ဇာတ်လမ်းရဲ့ အဆက်က အရီယာနီသေပြီးတဲ့နောက် ဘပ်က်ခပ်စ်က သူမကို အမြန်မေ့သွားပြီး ချစ်သူအသစ်ရသွားတယ်....အရီယာနီက သေပြီးတဲ့နောက် သရဲဖြစ်သွားပြီး ဘပ်က်ခပ်စ်နဲ့ ပထမဆုံးတွေ့ခဲ့တဲ့နေရာမှာ ငိုနေလေ့ရှိတယ်.....ပြီးတော့ သူမမျက်ရည်တွေက တဖြေးဖြေးနဲ့ မြစ်တစ်စင်း ဖြစ်လာခဲ့တယ်...."

“အရီယာနီက ဘပ်က်ခပ်စ်နဲ့ ပြန်ပေါင်းဖို့ စောင့်စားရင်း ဒီနှလုံးသားမရှိတဲ့သူကို သူမလက်နဲ့ သတ်ချင်ခဲ့တယ် .....ဒါပေမယ့် မမျှော်လင့်ပဲ ဘပ်က်ခပ်စ်ရဲ့ ချစ်သူအသစ်ကလည်း ပေါ်လာခဲ့တယ်...."

လော့ဇီယန်က စိတ်ရှုပ်သွားသည့်ပုံနှင့် ပြောလာသည်

" ကျောင်းကျောင်းနဲ့ ကျင်းထျန်းယိ....သူတို့က နတ်သမီးနန်းတော်မှာ ပါရမှာမို့လား...."

ယဲ့ယွမ် "အင်း...."

ထူးဆန်းသည့် မြင်ကွင်းတစ်ခု ပေါ်လာခဲ့သည်။ ကျောက်တုံး၏ အောက်ခြေရှိ စာလုံးလေးများအဆုံး၌ နောက်ထပ်စာတန်းတစ်ခု ပေါ်လာသည်။

“အဆုံးသတ်....ဘပ်က်ခပ်စ်က သူ့ချစ်သူအသစ်နဲ့ မြောက်အရပ် သရဖူသဏ္ဍာန် ကြယ်စုဝေးဆီ ထွက်ပြေးခဲ့တယ်....အရီယာနီက သူမနှင့် ဘပ်က်ခပ်စ်ရဲ့ ခန်းဝင်လက်ဆောင်ကို တွေ့သွားလို့ ဂရုဏာသက်ပြီး သူတို့ဘဝတွေကို လွှတ်ပေးလိုက်ဖို့ ဆုံးဖြတ်ခဲ့တယ်...."

“ပျော်ရွှင်ဖွယ် အဆုံးသတ်ပေါ့...."

လော့ဇီယန်က လန့်သွားသလို ယဲ့ယွမ်၏လက်ကို ဆွဲယူလိုက်ပြီး ပြောလာသည်

" ဝိုး...ငါတို့တော့ ဆွဲဆောင်ခံလိုက်ရပြီ..."

ယဲ့ယွမ်က ပြုံးပြလာသည် " ဆိုးဝါးတဲ့ အဆုံးသတ်သာဆို ဒီလိုဖတ်လိမ့်မယ်....အရီယာနီက ဘပ်က်ခပ်စ်ရဲ့ ချစ်သူအသစ်ကို သတ်လိုက်ပြီး ဘပ်က်ခပ်စ်က သူမရဲ့ ဇွဲကောင်းမှုကြောင့် မြောက်အရပ် သရဖူသဏ္ဍာန် ကြယ်စုဝေးရှေ့မှာ ထပ်မံ လက်ထပ်လိုက်တယ်....နတ်ဘုရားနဲ့ သရဲက သူတို့ဆက်ဆံရေးကို ဆက်ပြီး တည်ဆောက်တာပေါ့...."

လော့ဇီယန်က တစ်စက္ကန့်မျှ မေ့လဲမတတ်ဖြစ်သွားပြီးနောက် ကျယ်ကျယ်လောင်လောင် ရယ်မောလိုက်၏။

ယဲ့ယွမ်က မြေပုံကို ပြန်ထုတ်လိုက်ပြီး ဒုတိယအနီခြစ်ဆီ လော့ဇီယန်ကို ခေါ်သွားလိုက်သည်။

......

စစ်ယွီနှင့် ကွဲသွားပြီးနောက် ချူဟွိုက်က ကျင်းထျန်းယိ၏ ကားပေါ်တက်လိုက်ပြီး နတ်သမီးနန်းတော်ဆီ ဦးတည်သွားလိုက်သည်။

ရိုလာကိုစတာတွင် လူသုံးယောက် သေသွားခဲ့သည်။ လောလောဆယ် အခြားပရောဂျက်များအကြောင်း မသိသော်လည်း အခြေအနေက အကောင်းဘက်မရှိပေ။

ကျင်းထျန်းယိက ကားမောင်းနေရင်း ရုတ်တရက် ခါးထောက်ထားသည့် မည်းမည်းနှင့် ပုံရိပ်တစ်ခုက ရှေ့က မြင်ကွင်းပေါ် ပေါ်လာသည်။

ထိုပုံရိပ်မည်းကြီးက ခေါင်းမပါသည့် ယင်ကောင်လို တစ်ခုခုရှာနေသလိုမျိုး ဟိုလှည့်သည်လှည့်လုပ်နေသည်။

ချူဟွိုက်ကလည်း တစ်ခုခုမူမမှန်မှန်း သတိထားမိသည်။

ကားလေးက အနီးသို့ ရောက်သွားသည်နှင့် ချူဟွိုက်က ထိုအမျိုးသား၏ စိတ်ပျက်လက်ပျက် ညည်းညူသံကို ကြားလိုက်ရသည်

" အဲ့ဒါ ဘယ်ရောက်သွားတာလဲ....ဘယ်မှာ ကျပျောက်သွားတာလဲကွာ...."

ကျင်းထျန်းယိက ကားမီးဖွင့်လိုက်ရာ စူးစူးရှရှအလင်းရောင်က ထိုအမျိုးသား၏ မျက်နှာပေါ် ထိုးကျသွား၍ ထိုလူက ဝမ်းပန်းတသာဖြစ်သွားလေသည်

" အလင်းရောင်ပဲ...."

ချူဟွိုက်က ရှင်းရှင်းလင်းလင်း တွေ့လိုက်ရသည်။ ထိုလူက ချောမောသော်လည်း အဆီတဝင်းဝင်းနှင့် အမျိုးသားတစ်ယောက် ဖြစ်နေသည်။ သူက ကားပေါ်မှ ခုန်ဆင်းလိုက်ပြီး မေးလိုက်သည် " ဘာရှာနေတာလဲ...."

"ပျောက်သွားတာကွ...." ထိုလူက စိတ်မကြည်ဖြစ်နေ၍ ချူဟွိုက်ကို တွန်းထုတ်လိုက်ပြီး တုန်တုန်ယင်ယင်နှုတ်ခမ်းများနှင့် ဆိုလာသည်

" တစ်မိနစ်နဲ့ မိနစ်ဝက်......မဟုတ်ဘူး....ဒီလို မဖြစ်ရဘူးလေ....ဘယ်မှာလဲ....ဘယ်ရောက်သွားတာလဲလို့...."

ထိုအမျိုးသားက မြေပြင်ပေါ် လက်သီးနှင့်ထုလိုက်၍ လက်ဖဝါးမှ သွေးတစိမ့်စိမ့် စီးကျလာသည်။

ကျင်းထျန်းယိက အနားရောက်လာသည့်အချိန် ထိုလူကလည်း သူ့ကို တွေ့လိုက်ရ၍ သူ့မျက်လုံးထက် မျှော်လင့်ချက်ရောင်ခြည်လေး သန်းလာသည်။ သူက ချူဟွိုက်လက်မောင်းကို ဆွဲယူလိုက်ပြီး မေးလာသည်

" သူက မင်းရဲ့ ချစ်သူမို့လား...."

ချူဟွိုက် ပြန်မဖြေနိုင်မီ ထိုအမျိုးသားက ကျင်းထျန်းယိ၏ မျက်လုံးထဲမှ စိုးရိမ်စိတ်တို့ကို တွေ့လိုက်ရသည်။ သူက အသက်ရှင်ရန် ကောက်ရိုးတစ်မျှင်လေး တွေ့လိုက်သလို အပြေးရောက်လာပြီး ကျင်းထျန်းယိခြေထောက်ကို လာဖက်သည်

" ငါ့ကို ကူညီပါဦး....ကျေးဇူးပြုပြီး.....မင်းရဲ့ လက်မှတ်ကို ငှားပေးလို့ရမလား...."

ချူဟွိုက်၏ မျက်လုံးထက် အေးစက်စက် ဖြစ်သွားပြီး ကျင်းထျန်းယိလက်ကို တိတ်တိတ်လေး ဆွဲလိုက်သည်။

ကျင်းထျန်းယိက သူစိတ်မပူရအောင် မျက်ရိပ်မျက်ခြေပြလာသည်။

ကျင်းထျန်းယိက အတန်ကြာသည်ထိ ပြန်မဖြေလာ၍ ထိုလူက စိုးရိမ်ပူပန်လာပြီး သောကပြည့်နေသည့် မျက်နှာနှင့် ပြောလာသည်

" ငါ တကယ် ငှားချင်လို့ပါ...."

သူက ဒူးထောက်နေရင်း မျက်နှာက ရက်စက်သည့်ပုံပြောင်းသွားပြီး ရုတ်တရက် ပေါက်ကွဲလာကာ ကျင်းထျန်းယိအဝတ်အစားများကို ဆွဲဖြဲပစ်ချင်လာသည်။ ကျင်းထျန်းယိက လှောင်ရယ်လိုက်ရင်း သူ့ကို အလွယ်တကူ ဖိနှိပ်ထားလိုက်သည်။

ထိုလူက မြေပြင်နှင့် အဖိခံထားရ၍ နှုတ်ခမ်းတို့ တုန်ယင်နေပြီး မျက်ရည်စိုရွှဲလာလေသည်

" ဆယ်စက္ကန့်...."

"မဟုတ်ဘူး....မလုပ်နဲ့....ငါ မသေချင်သေးဘူး....."

မတ်တပ်ရပ်နေသော ချူဟွိုက်က တစ်ဆယ်ထိ ရေတွက်လိုက်ပြီး တစ်ဆယ်စက္ကန့် ကြာပြီးချိန် ထိုလူက ရုန်းကန်နေရာမှ ရပ်သွား၏။

ကျင်းထျန်းယိက ထိုအမျိုးသား၏ အသက်ရှူသံကို သွားစစ်ဆေးလိုက်ပြီးနောက် အေးစက်စက် ဆိုလာသည်

" သူ သေသွားပြီ...."

ချူဟွိုက်၏ မျက်နှာက တည်တင်းသွားသည်

" တစ်ယောက်ယောက်က လက်မှတ်ပျောက်သွားလို့ရှိရင် သေသွားမှာလား...."

ကျင်းထျန်းယိက မတ်တပ်ရပ်လိုက်သည်

" တကယ်တော့ နားလည်ဖို့ လွယ်ပါတယ်....ပုံမှန်အခြေအနေမှာဆို လည်ပတ်ကစားတဲ့သူတွေက ကစားကွင်းထဲဝင်ဖို့ လက်မှတ်ဝယ်ရတယ်...လက်မှတ်ပျောက်သွားရင် ပြန်ဝယ်ရမှာပေါ့...ပြိုင်ပွဲဝင်တွေသာ လက်မှတ်ပျောက်သွားတယ်ဆိုရင် သူရထားတဲ့ ပစ္စည်းက အကျုံးမဝင်တော့ဘူးလို့ ယူဆတယ်....မစ်ရှင်ကျသွားတာမျိုးပေါ့....ဒါကြောင့် အရှင်းခံလိုက်ရတာ...."

တစ်ခုခု တွေးမိသွားဟန် ချူဟွိုက်က လှောင်ရယ်လိုက်သည်

" ဒီလူက အခုလေးတင် 'တစ်မိနစ်နဲ့ မိနစ်ဝက်စာ....' ရယ် ' ၁၀စက္ကန့်' လို့ ပြောသွားတာ...ကြည့်ရတာ ကမ္ဘာကြီးက သူတို့ကို အခွင့်အရေးတော့ ပေးထားတဲ့ပုံပဲ... သူက စုံတွဲလက်မှတ် ဖြစ်နိုင်တယ်....သူက ရှင့်လက်မှတ်ကို ယူလိုက်တာနဲ့ ကျွန်မနဲ့ တွဲဖက်ဖြစ်လာတော့မှာ...အဲ့လိုဆိုရင်...."

ချူဟွိုက်က ကျင်းထျန်းယိကို ကြည့်လိုက်သည်

" လက်မှတ်မရှိတဲ့သူက ရှင်ဖြစ်သွားပြီးတော့ ရှင်သေသွားမှာပေါ့...."

ထိုခန့်မှန်းချက်က ချူဟွိုက်ကို မပျော်မရွှင် ဖြစ်သွားစေသည်။

ချစ်သူနှစ်ယောက်၏ အဆုံးသတ်ကို လူရွေးပြီး ထိန်းသိမ်းထားရခြင်းပင်။

စဥ်းစားကြည့်ရင်တော့ အဓိပ္ပါယ်ရှိပေမယ့် လျစ်လျူရှုထားဖို့က လွယ်လွယ်လေးပဲ.....။

ကမ္ဘာအစစ်မှာဆို စုံတွဲဆိုရင် လျှော့စျေးရတဲ့အတွက် စုံတွဲလက်မှတ် ဝယ်တဲ့သူတွေမှ အများကြီး....။ ရှော့ပင်းမောတွေကလည်း လူကိုမဟုတ်ပဲ လက်မှတ်ကိုပဲ သတိထားမိတာ......။ ယောကျ်ားဖြစ်ဖြစ် မိန်းမဖြစ်ဖြစ် ကိစ္စမရှိဘူး.....။

ကျင်းထျန်းယိ၏ မျက်လုံးထက် အေးစက်စက်အကြည့်တစ်ခု ပေါ်လာလေသည်။

ချူဟွိုက်က ရုတ်တရက် ပြုံးပြလာသည်

" သူ့လက်မှတ် ဘယ်ရောက်သွားလဲ ရှင်စဥ်းစားမိလား...."

လက်မှတ်လို အရေးကြီးတဲ့ ပစ္စည်းက ဘယ်လိုလုပ် အလွယ်တကူ ပျောက်သွားနိုင်မှာလဲ......။ ဒါဆို ဖြစ်နိုင်တာက.....

ချူဟွိုက်က လှည့်ပတ်ကြည့်လိုက်ရာ အမျိုးသမီးတစ်ယောက် ရပ်နေသည့် မလှမ်းမကမ်းမှ ရေချိုးခန်းတံခါးပေါ် အကြည့်ရောက်သွားသည်။

ကျင်းထျန်းယိကလည်း မြင်လိုက်၍ လှောင်ရယ်လိုက်သည်။

ထိုအမျိုးသမီးက ခိုးကြောင်ခိုးဝှက် ခေါင်းထောင်လာသည့်အချိန် ချူဟွိုက်၏ မျက်လုံးအကြည့်နှင့် ဆုံလိုက်ရ၍ ထိတ်လန့်သွားပြီး အလန့်တကြား ပြေးထွက်သွားလေသည်။

ကျင်းထျန်းယိက ထွက်ပြေးသွားသည့် ထိုအမျိုးသမီး၏ နောက်ကျောကို ကြည့်လိုက်ရင်း မေးလာသည် " ကိုယ်တို့ လိုက်ကြမလား...."

ချူဟွိုက်က ခေါင်းယမ်းလိုက်ပြီး ပြုံးပြလာသည်

" သူမသာ အမှန်ဆိုရင် ကျွန်မတို့က သူမကို သတ်နေသလို ဖြစ်သွားလိမ့်မယ်...."

သူတို့က ထိုအမျိုးသမီး ရှိခဲ့ဖူးသည့် နေရာသို့ သွားလိုက်ကြသည်။ အမျိုးသမီးသုံးသန့်စင်ခန်း ဖြစ်နေသည်။

ချူဟွိုက်၏ မျက်နှာက အေးခဲသွားပြီး အသက်ပြင်းပြင်းရှူလိုက်ရင်း ပြောလာသည်

" ....ကျွန်မ ဝင်သွားလိုက်မယ်....ရှင် အပြင်က စောင့်နေရစ်..."

ကျင်းထျန်းယိ " မလိုပါဘူး...."

"လူရှိလား...." သူက တံခါးဝတွင် ရပ်လိုက်ရင်း အော်ခေါ်လိုက်သည် " မရှိရင် ဝင်မယ်နော်...."

ချူဟွိုက်၏ မျက်နှာက မည်းမှောင်သွားသည် "......"

ကျင်းထျန်းယိက ပြုံးပြလာပြီး လက်ဆန့်ပြလိုက်ကာ စကားဆိုလာသည် " ကြည့်လေ....ဘယ်သူမှ မရှိတာ....ဝင်ကြတာပေါ့...."

သန့်စင်ခန်းက ဆီးသွားထားသည့် အနံ့အသက်ရသည်။

" လှည့်ပတ်ကြည့်ကြတာပေါ့....မင်းက ဘယ်ဘက်သွား....ကိုယ်က ညာဘက်သွားကြည့်မယ်...သူမပုံစံကို ကြည့်ရတာ လက်မှတ်ကို ကိုယ်ပေါ်မှာ ဖွက်ထားတာနဲ့ မတူဘူး...."

"ကောင်းပါပြီ...."

ချူဟွိုက်က ပထမဆုံးအခန်းကို တွန်းဖွင့်လိုက်သည်။

မလှမ်းမကမ်းမှ ဂရိဒဏ္ဍာရီလာပြတိုက်မှ ထွက်လာသည့် လော့ဇီယန်က အမျိုးသမီးသန့်စင်ခန်းထဲ ဝင်သွားကြသည့် ဘော့စ်နှင့်ချူကျောင်းတို့ကို လျပ်ခနဲ မြင်လိုက်ရသည်။

လော့ဇီယန် "....ငါတော့ မကောင်းတာ တစ်ခုခု တွေးမိနေပြီ...."

👻

Prev Next