MM Story Teller

Chapter 163

Viewers 29k

🌱Arc 4 - [ကျင့်ကြံရေးလောကတွင် လယ်စိုက်ခြင်း ]

Ch 163

သမိုင်းတွင်အမြန်ဆုံး နွေဦး (၁)

"ငါခဏ သွားလိုက်ဦးမယ်... အရေးပေါ် ကိစ္စတစ်ခုခုရှိရင် မြို့တော်ထဲမှာ စခန်းချနေတဲ့ ကျင့်ကြံသူတွေဆီကနေတစ်ဆင့် ဆက်သွယ်လိုက်... ငါ သူတို့ကိုလည်း ဒီအကြောင်း ပြောထားပြီးပြီ..."

စွေ့ချီချောင်းက မြို့အရှင်ကို ဆိုလိုက်သည်။

မြို့အရှင်မှာ အခြေအနေက မည်မျှလေးနက်သည်ကို အတန်ပင် နားမလည်ချေ။ သူက အမတအရှင်စွေ့၏ ဆရာက မတော်တဆဖြစ်သည်ဟုသာ သိထားရာ သိသိသာသာပင် စိတ်လှုပ်ရှားနေလေသည်။ အမတအရှင်စွေ့၏ ဆရာက မတော်တဆမှုနှင့် ကြုံရသည့်ကိစ္စမှာ အတန်ပင် ပြင်းထန်သော်လည်း သူက ပျော်ရွှင်မှုတစ်ထောင်မြို့တော်အတွင်းရှိ အခြေအနေကို စိတ်မပူဘဲ မနေနိုင်ချေ။

အမတအရှင်စွေ့က လယ်သမားတွေကို ဂရုစိုက်ဦးမှာလား...

အမတအရှင်စွေ့က သူတို့ကို စပါးစေ့နည်းနည်း ဝေပေးမယ်ဆိုပြီး ပြောကြနေတာ... ဒါပေမဲ့ ဒီလိုတွေ ဖြစ်သွားတော့ သူ အဲဒါကို ဘယ်တော့ ဝေပေးမှာလဲ....

မြို့အရှင်က မမေးရဲဘဲ စွေ့ချီချောင်းကို သနားကမားဖြင့် ကြည့်လိုက်သည်။

"ဟုတ်ကဲ့... အမတအရှင်စွေ့ သာယာတဲ့ ခရီးဖြစ်ပါစေလို့ ဆုတောင်းပေးပါတယ်..."

"ကျေးဇူးပါ..."

စွေ့ချီချောင်းက လက်ရှိအချိန်အတွက် မည်သည့် အာမခံချက်မှ မပေးနိုင်သေးချေ။ သူက မြို့ထဲတွင် စခန်းချနေသော ကျင့်ကြံသူများနှင့် သွားဆွေးနွေးစဉ်က သူတို့မျက်လုံးများထဲတွင် သနားနေဟန်များ ရှိပေသည်။ ၄င်းမှာ လူတစ်ယောက်က မုဆိုးဖိုတစ်ယောက်ကို ကြည့်သည့် အမူအရာမျိုးဖြစ်နေပေသည်။

ယနေ့မတိုင်မီအထိ စွေ့ချီချောင်းမှာ ကျင့်ကြံရေးလောကတွင် ဒဏ္ဍာရီလာ ပုဂ္ဂိုလ်တစ်ဦးဖြစ်ကာ လူအများက အားကျမနာလိုရသည်။

သို့သော် စွေ့ချီချောင်း၏ ကျောထောက်နောက်ခံက ညတွင်းချင်း ပျက်စီးကာ သူက အသရေတင့်ခြင်းမှ ကျဆင်းလုနီးပါး ဖြစ်နေ၏။

သူက ယွီလင်းဂိုဏ်း၏ တရားဝင် တပည့်တစ်ယောက် ဖြစ်လာသော်လည်း အမတထန်ဝေ့ ကျဆုံးပြီးနောက် ယွီလင်းဂိုဏ်းက သူ့၏ ကျင့်ကြံခြင်းတွင် မည်သည့်အခါမှ မကူညီဘဲ သူ့အား အခြားသော ကျင့်ကြံခြင်းစင်မြင့်ပေါ်သို့ တွန်းပို့ကာ ကောင်းမွန်သည့် ရင်းမြစ်များအားလုံးနှင့် ထောက်ပံ့ထားလေသည်။ သို့သော် သူတို့က အမတထန်ဝေ့ကြောင့် သူ့အား စောင့်ရှောက်ကြဆဲ ဖြစ်သည်။ သူ့၏ ကျင့်ကြံခြင်းအရည်အချင်းနှင့်ဆိုလျှင် သူက ကနဦး သန့်စင်မှုအဆင့်သို့ မတက်ရောက်နိုင်လျှင်ပင် သူ့အသက်မှာ နှစ်ရာအနည်းငယ်သာ ကြာရှည်နိုင်ပေသည်။

မည်သူကမှ ဤအကျော်အမော်မှာ ဥက္ကာပျံတစ်ခုကဲ့သို့ ဖြစ်မည်ဟု မမျှော်လင့်ထားပေ။ ၄င်းက ကောင်းကင်တွင် ပျော်ရွှင်လာလာချင်းမှာပင် ပြုတ်ကျလုဆဲဆဲ ဖြစ်နေလေသည်။

အခြားသူများ၏ မျက်လုံးများက ခံစားချက်များဖြင့် တောက်ပနေသည်။ ဤအဖြစ်အပျက်မှတစ်ဆင့် သူတို့က ကျင့်ကြံရန်အတွက် ကိုယ်တိုင်အားစိုက်ထုတ်ရမည်ဟု ခံစားလိုက်ရသည်။

သူတို့ရဲ့ တာအိုလက်တွဲဖော်တွေနဲ့ ဆရာတွေအပေါ်မှာပဲ မှီခိုရတဲ့ လူတွေအတွက် မျှော်လင့်ချက်လုံးဝ မရှိဘူး...

စွေ့ချီချောင်းက အခြားလူများအတွက် သင်ခန်းစာယူစရာလူတစ်ယောက် ထပ်မံဖြစ်လာသော်လည်း သူက ၄င်းကို ဂရုမစိုက်ပေ။ သူ ယွီလင်းဂိုဏ်းသို့ ပြန်သွားကာ လိုတရ မြေကွက်များကို ပိဖွင်ပြီး ဖီးနစ်ရရှိခြင်း ဝါးစပါးတစ်စုကို စိုက်ပျိုးရန်အတွက် ဂိုဏ်းချုပ်ယန်နှင့် ညှိနှိုင်းရန် ကြိုးစားလိုက်သည်။ ဤထုတ်ကုန်မှာ အထွက်နှုန်းမြင့်ကာ ဗိုက်ပြည့်စေပြီး လက်ရှိ အစားအသောက်ကပ်ဘေးကို ဖြေရှင်းနိုင်ပေသည်။

စွေ့ချီချောင်းက ဂိုဏ်းချုပ်ယန် သူ့အား ခွင့်ပြုမည်မှာ ၇၀-၈၀ ရာခိုင်းနှုန်းခန့် သေချာလေသည်။ သူမက ရှောင်ပိုင်၏ သေဆုံးမှုအပေါ် သူမ၏ ပူဆွေးခြင်းကို ပပျောက်စေရန်နှင့် သဘာဝကပ်ဘေးကို ရှောင်လွှဲရန်အတွက် ကတိတစ်ခုပြုပေလိမ့်မည်။ သို့သော် သူမက သဘောတူလိမ့်မည်ဟု ယုံကြည်ချက် အပြည့်အဝ မရှိချေ။ သို့ဖြစ်ရာ မြို့အရှင်၏ စိုးရိမ်မှုများ ပပျောက်စေရန်အတွက် သူက မြို့အရှင်ကို သူတို့၏ဂိုဏ်းမှ စပါးအချို့ထောက်ပံ့ပေးမည်ဟု မပြောခဲ့ပေ။

စွေ့ချီချောင်းက မြူနှင်းဝေလငါးလေးကို စီးပြီး ဖေးကွမ်းနှင့်အတူ ယွီလင်းဂိုဏ်းသို့ ပြန်လာခဲ့သည်။

သူတို့ဂိုဏ်းထဲသို့ ဝင်လိုက်သည်နှင့် စွေ့ချီချောင်းမှာ ဂရုဏာသက်သောအကြည့်များဖြင့် ဝန်းရံခံလိုက်ရသည်။ သို့သော် သူက စိတ်ဝိညာဉ်လက်နက်ကို ဖန်တီးခဲ့သည်အား အတွင်းလူများက သိနေရာ အမတထန်ဝေ့ ကျဆုံးသည့်အခါ သူသည်လည်း ရွံ့နွံထဲသို့ ကျဆင်းသွားမည်ဟု သူတို့က မထင်ကြချေ။

သို့သော် အပြင်ဘက်ရှိလူတိုင်းက အမတထန်ဝေ့နှင့် စွေ့ချီချောင်းမှာ ဆရာတပည့် ဆက်ဆံရေးတစ်ခုရှိနေသော်လည်း အမှန်တွင် တာအိုလက်တွဲဖော်များ ဖြစ်နေခြင်းကို သိကြလေသည်။ ယခုတွင် သူတို့ဆက်ဆံရေးရှိ လူတစ်ဦးက ကျဆုံးသွားပြီဖြစ်ရာ ၄င်းမှာ ယွီလင်းဂိုဏ်းအတွက် ဆုံးရှုံးမှုကြီးတစ်ခုဖြစ်လေသည်။ စွေ့ချီချောင်းအတွက်မူ စိတ်နှလုံးပူဆွေးခြင်းကို ခံစားရမည်မှာ သံသယဖြစ်ဖွယ်ပင် မရှိချေ။

ကြည့်လိုက်လေ... စွေ့ချီချောင်းရဲ့ မျက်နှာက အမူအရာမဲ့နေပေမဲ့ သူ ထုတ်ပြောလို့မရတဲ့ နာကျင်မှုတစ်ခု ကြုံနေရတယ်ဆိုတာ သူတို့ပြောနိုင်သားပဲ...

စွေ့ချီချောင်းက ထူးဆန်းသည့် အကြည့်များအောက်တွင် ရွှေရောင်ခန်းမသို့ သွားလိုက်သည်။

ဂိုဏ်းချုပ်ယန်က ထိုင်ခုံတွင် နွမ်းနယ်နေသည့် မျက်နှာဖြင့်ထိုင်နေသည်။ သူမက ရှေ့တန်းမှ ပြန်ရောက်ခါစပင်ဖြစ်သည်။ စွေ့ချီချောင်းကို မြင်ပြီးနောက် သူမက ထပ်မံကာ အသက်ဝင်လာလေသည်။

"ရှစ်တိ..."

သူမက ဆိုလိုက်သည်။

"ဒီကိစ္စက... သေချာမစဉ်စားလိုက်မိတဲ့ ငါ့အမှားပါ... နတ်ဆိုးတွေက ငါတို့နဲ့ ကွဲနေတဲ့ နှစ်ပေါင်း ထောင်ချီအတွင်းမှာ ရှစ်ရှု့ကို ထောင်ချောက်ဆင်နိုင်တဲ့ လှည့်ကွက်တွေ လုပ်နိုင်သွားလိမ့်မယ်လို့ ငါမထင်ထားခဲ့မိဘူး... ငါတကယ့်ကို....."

"ဂိုဏ်းချုပ်... ကိုယ့်ကိုကိုယ်အပြစ်တင်နေစရာ မလိုပါဘူး..."

စွေ့ချီချောင်းက ဂိုဏ်းချုပ်ယန်၏ လက်ကို ကိုင်လိုက်သည်။

"ကိစ္စတွေ ပိုကောင်းလာနိုင်တဲ့ အခွင့်အရေးတစ်ခုလည်း ရှိလာနိုင်ပါတယ်... အမတဆိုတာက ရှားပါးဖြစ်တည်မှုအဆင့် ကျင့်ကြံသူတစ်ဦး ဖြစ်နေပြီးပြီလေ... သူ ထောင်ချောက်က လွတ်လာပေမဲ့ လောလောဆယ် ကျွန်တော်တို့ကို အသိပေးလို့မရသေးတာလဲ ဖြစ်နိုင်ပါတယ်..."

သူသည်လည်း စိုးရိမ်ကာ အတန်ကြာအောင် တွေးတောနေခဲ့ပေသည်။ အဆုံးတွင် သူက မှတ်ဉာဏ်တုလေယာဉ်ထဲတွင်ဖြစ်စေ လက်တွေ့လောကတွင်ဖြစ်စေ မည်သည့်အရာပင် ဖြစ်လာပါစေ တည်တည်ငြိမ်ငြိမ်ရှိနေသင့်သည်ဟု ခံစားရသည်။

ရှောင်ပိုင်မှာ နတ်ဆိုးများ၏ လှည့်စားခြင်းကို ခံရလျှင်ပင် ရှောင်ပိုင်၏ ခွန်အားနှင့်ဆိုလျှင် သူက ၄င်း၏ အခွံခွာချခဲ့သော ပုစဉ်းတစ်ကောင်ကဲ့သို့ ဖြစ်ပေလိမ့်မည်။ သူ့ကို LJJက ဖမ်းမိသွားပါက ရှောင်ပိုင်မှာ စွေ့ချီချောင်းက မှတ်ဉာဏ်တုလေယာဉ်ထဲမှထွက်ပြီး LJJနှင့် စကားပြောသည်ကို စောင့်ရန်သာ လိုပေသည်။ ဤပြဿနာမှာ အမှန်တကယ်တွင် ပိုကောင်းမွန်ရန်အတွက် ဖြစ်လာခြင်းပင်။

သို့သော် ဂိုဏ်းချုပ်ယန်က ၄င်းကိုကြားသောအခါ စွေ့ချီချောင်းက ဘိုးဘေးရှစ်ရှု့ သေဆုံးသည်ကို မယုံကြည်လိုဘဲ ပြန်မလာသည့် လူတစ်ယောက်ကို စောင့်နေလိုသည်ဟု ခံစားရပေသည်။

ဟင်း... ဂိုဏ်းထဲက ကြေးညိုခေါင်းလောင်းကြီးတောင် မြည်ပြီးသွားပြီလေ... ရှစ်ရှု့ရဲ့ နတ်ဘုရားအသိဉာဏ်နဲ့ ရုပ်ခန္ဓာက ဖျက်ဆီးခံလိုက်ရပြီးနေမှာပေါ့... ဒီကပ်ဘေးကြီးကနေ သူက ဘယ်လိုလုပ်ပြီး လွတ်လာနိုင်ပါ့မလဲ...

ဂိုဏ်းချုပ်ယန်က အမှန်တရားကို ပြောပြနိုင်ရန် နှလုံးသားမရှိချေ။ သူက စွေ့ချီချောင်း၏ လက်ကိုသာ ခါယမ်းလိုက်ပြီး ဆိုလိုက်သည်။

"အင်း..."

ထို့နောက် စွေ့ရှစ်တိက ပူဆွေးမှုကို ဖုံးကွယ်ရန်အတွက် သူ့ကိုယ်သူ ထုံကျင်အောင် ပြုလုပ်နေပြီး ဆိုလိုက်သည်။

"ဂိုဏ်းချုပ်ယန် နောက်ထပ် ပြဿနာတစ်ခု ရှိပါသေးတယ်... အမတက လောလောဆယ် ပျောက်နေတာဆိုတော့ ကျွန်တော် သူ့ရဲ့ အိတ်ဆောင်အရွယ်လှိုဏ်ဂူတွေကို ဖွင့်လို့မရဘူးဖြစ်နေတာ... ဂိုဏ်းက မြေတချို့ကို ဖီးနစ်ရရှိခြင်း ဝါးပင်စိုက်ဖို့ ငှားချင်ပါတယ်... အဲဒါမှပဲ ကျွန်တော်က ဝါးဆန်ကိုသုံးပြီး ကပ်ဘေးကို ဖြေဖျောက်နိုင်ပြီး သေမျိုးကမ္ဘာရဲ့ အရေးတကြီး လိုအပ်ချက်တွေကို ဖြေရှင်းနိုင်မှာပါ..."

ယခင်က ဖော်ပြထားသည့်အတိုင်းပင် ဤကမ္ဘာပေါ်တွင် စိတ်ဝိညာဉ်စွမ်းအင်ပမာဏ အကန့်အသတ်နှင့်ရှိနေပေသည်။ သာမန်အားဖြင့်ဆိုလျှင် လိုတရမြေကွက်များမှာ ဂိုဏ်းထဲရှိ လူရာကျော်အတွက်သာ အစားအသောက် စိုက်ပျိုးရန် အသုံးပြုပေသည်။ လိုတရမြေကွက်များပေါ်သို့ တိုးတက်မှုမန္တန် ချမှတ်လိုက်ပါက ဂိုဏ်းထဲမှ လူများက အစားအသောက်များစွာ စားနိုင်မည် မဟုတ်ပေ။

သို့သော် အစားအသောက်မှာ မြို့ပေါင်းဆယ်ချီအတွက် စိုက်ပျိုးလျှင် သူတို့က သီးနှံကြီးထွားမှုကို အလျင်အမြန် တိုးချဲ့ရမည် ဖြစ်သည်။ ဤကဲ့သို့ စားသုံးမှုအောက်တွင် ယွီလင်းဂိုဏ်းက စိတ်ဝိညာဉ်စွမ်းအင် သိပ်သည်းလှသည့် အစီအရင်တစ်ခု ရှိလျှင်ပင် စိတ်ဝိညာဉ်စွမ်းအင်က ခဏအတွင်း ကုန်ခမ်းသွားအောင် စုပ်ယူခံရပေမည်။

ဒါပေမဲ့ ဒီအခိုက်အတန့်မှာ ဂိုဏ်းချုပ်ယန်က စွေ့ချီချောင်းကို ငြင်းနိုင်ပါ့မလား...

သူမက အံတင်းတင်းကြိတ်ကာ ဆိုလိုက်သည်။

"ငါ တခြားသက်ဆိုင်ရာ ဂိုဏ်းတွေရဲ့ ကိုယ်စာလှယ်တွေနဲ့ ဆွေးနွေးလိုက်ပါမယ်... ယွီလင်းဂိုဏ်းတစ်ခုတည်းရဲ့ စွမ်းအားက မလုံလောက်ဘူး... ငါတို့က ကပ်ဘေးကို ဖယ်ဖျောက်ပြီး သေမျိုးတွေကို ကူညီဖို့ဆိုရင် ကျင့်ကြံရေးလောကရဲ့ တခြားစွမ်းအားတွေနဲ့လည်း ပူးပေါင်းဖို့ လိုသေးတယ်..."

စွေ့ချီချောင်းက တည်ကြည်စွာနှင့် သူမကို ကျေးဇူးတင်လိုက်သည်။

"ဟင်း... နင် ကျေးဇူးတင်လောက်အောင် ငါလုပ်ပေးထားတာတစ်ခုမှ မရှိပါဘူးလေ... သူတို့ကို ကူညီပေးတာကလည်း ကျင့်ကြံရေးလောကတစ်ခုလုံးကို ကူညီပေးတာပဲလေ..."

ဂိုဏ်းချုပ်ယန်က သက်ပြင်းချလိုက်သည်။

"ရှစ်တိ... လွင့်မျောဥယျာဉ်ကို ပြန်ပြီး နားလိုက်ဦးလေ... လွင့်မျောဥယျာဉ်ကို ငါတို့ပို့ပေးတဲ့ အထောက်အပံ့တွေက အမြဲတမ်း အတူတူပဲဖြစ်သင့်တယ်လို့ ငါပြောပါတယ်... ရှစ်ရှု့က လူသားနယ်မြေအတွက် ဒီလိုမျိုး ကပ်ဆိုးကြီးကို ရင်ဆိုင်ခဲ့ရတာ... နင်က သူ့ရဲ့ တစ်ဦးတည်းသော တပည့်ပဲ..."

ဂိုဏ်းချုပ်က ပိုပို၍ စိတ်မသက်မသာ ခံစားလာရပြီး ဆက်မပြောနိုင်ချေ။

ထိုအစား စွေ့ချီချောင်းက သူမကို နှစ်သိမ့်ကာ ဆိုလိုက်သည်။

"လွင့်မျောဥယျာဉ်လား... ကျွန်တော်က လောလောဆယ်တော့ အဲ့ကို မပြန်သေးဘူး... ကျွန်တော်က ဂိုဏ်းချုပ်နဲ့ တစ်ခု ဆွေးနွေးချင်သေးတယ်..."

"နောက်ထပ် ဘာဆွေးနွေးဖို့ ရှိသေးလို့လဲ..."

ဂိုဏ်းချုပ်ယန်က စိတ်ဝင်တစားမေးလိုက်သည်။

စွေ့ချီချောင်းက သူ့အတွေးများကို ဖြတ်ကာ ဆိုလိုက်သည်။

"အရင်ဆုံး နတ်ဆိုးနယ်မြေနဲ့ တိုက်ပွဲမှာ ကျွန်တော်တို့က အသားစီးရနေသေးတယ်ဆိုတာကို အတည်ပြုချင်တယ်... ဟုတ်တယ်မလား..."

"ဟုတ်တယ်... ပြီးတော့ အဲ့ဒါတွေအကုန်ကလည်း နင့်ကျေးဇူးတွေပါ..."

ဂိုဏ်းချုပ်ယန်က ဆိုလိုက်သည်။ လူသားနယ်မြေထဲရှိ ကျင့်ကြံသူအရေအတွက်မှာ နတ်ဆိုးနယ်မြေအတွင်းရှိ နတ်ဆိုးအရေးအတွက်ထက် ပိုလေသည်။ စွေ့ချီချောင်း၏ စိတ်ဝိညာဉ်လက်နက်များပါ ထပ်ပေါင်းလိုက်သောအခါ လူသားတို့၏ တိုက်ခိုက်စွမ်းအင်ကို ကြီးကြီးမားမားတိုးတက်လာစေသည်။ လက်ရှိတွင် လူသားများ၏ စွမ်းအားမှာ နတ်ဆိုးများကို ခိုင်ခိုင်မာမာ ကျော်လွန်နေပြီး နတ်ဆိုး အနည်းငယ်သာလျှင် ပြဿနာရှာရန် နယ်စပ်ကို ဖြတ်လာနိုင်ပေသည်။

"တကယ်တော့ ကျွန်တော် ဖမ်းထားတဲ့ နတ်ဆိုးတွေဆီကနေပြီး နတ်ဆိုးနယ်မြေထဲက အခြေအနေအကြောင်း လေ့လာနေတာ..."

စွေ့ချီချောင်းက ဆိုလိုက်သည်။

ဂိုဏ်းချုပ်ယန်က သူတို့အား စစ်မေးရန် ကိုယ်တိုင်သွားဖူးရာ ၄င်းကို သိထားပေသည်။ သို့သော် ထိုသို့ပြောခြင်းဖြင့် စွေ့ချီချောင်းက မည်သည်ကို ဆိုလိုချင်သည်ကို မသိပေ။

စွေ့ချီချောင်းက ဆိုလိုက်သည်။

"အသားစားရတာကို ကြိုက်တာက နတ်ဆိုးသဘာဝပဲ... သူတို့က ရှားရှားပါးပါး အချိန်တွေမှာပဲ ကောက်သစ်မြက်စားဖို့ လိုတာ... နယ်မြေနှစ်ခုရဲ့ သဘာဝပတ်ဝန်းကျင်တွေက နှစ်ပေါင်းထောင်ချီအတွင်း မတူညီဘဲ တိုးတက်လာပြီး အခုဆို သူတို့မှာ ထူးခြားတဲ့ကိစ္စတွေလည်း ရှိနေပြီ... လူသားနယ်မြေထဲမှာဆိုရင် ကောက်သစ်မြက်ဆိုတာ မရှိဘူး..."

ဂိုဏ်းချုပ်ယန်က သူ ဂေဟပတ်ဝန်းကျင်အကြောင်း ပြောနေသည်ကို အကြမ်းဖျင်းနားလည်ပေသည်။

"အင်း..."

စွေ့ချီချောင်းက မှုန်မှိုင်းစွာဖြင့် ဆိုလိုက်သည်။

"ကျွန်တော် နယ်ဆိုးနယ်မြေထဲက အပင်တွေနဲ့ မြေကြီးတွေ အကြောင်းကို လေ့လာပြီးပြီ... အစကတော့ ကျွန်တော်က သူတို့ သီးနှံတွေ ဘယ်လိုစိုက်ကြလဲ မေးဖို့ပါပဲ... ဒါပေမဲ့ အဲ့ကနေ တစ်ဆင့် လူသားနယ်မြေထဲမှာ နတ်ဆိုးနယ်မြေရဲ့ ဂေဟစနစ်ကို ခြိမ်းခြောက်နိုင်တဲ့ တိရိစ္ဆာန်တွေ အများကြီးရှိနေတာကို မတော်တဆ ကောက်ချက်ချမိသွားတယ်..."

ဂိုဏ်းချုပ်ယန်၏ အကြည့်များအောက်တွင် စွေ့ချီချောင်းက ဥပမာတစ်ခုနှင့် ရှင်းပြလိုက်သည်။

"ဥပမာဆိုရင် လူသားနယ်မြေထဲမှာ နေရာတိုင်းမှာ တွေ့နိုင်တဲ့ ကုန်းမြေပုရွက်ဆိတ်တွေကို နတ်ဆိုးနယ်မြေထဲကို ပို့လိုက်ရင် သူတို့က ကောက်သစ်မြက်နဲ့ တခြားအင်းစက်တွေအတွက် ခြိမ်းခြောက်မှုအကြီးကြီး ဖြစ်မှာ... သူတို့က သားဖောက်တာလည်းမြန်ပြီး ဥတွေအများကြီး ဥပြီး ကောင်းကောင်းပုန်းနိုင်တယ်... ကုန်းမြေပုရွက်ဆိတ်တွေ ကြီးလာရင် ကောက်သစ်မြက်တွေ သိသိသာသာကျလာမှာ... ကောက်သစ်မြက်က သာမန်မြက်မဟုတ်ဘူး... အဲ့ဒါက စိတ်ဝိညာဉ်စွမ်းအင်မရှိရင် အရမ်းကြီးမြန်မြန် ကြီးလာမှာ မဟုတ်ဘူး..."

"လူသားနယ်မြေထဲက နှင်းပွင့်ရှဉ့်ကလည်း နတ်ဆိုးနယ်မြေထဲမှာ သဘာဝရန်သူလုံးဝ မရှိဘူး... သူတို့က အမြန်မျိုးဖောက်၊ ဟင်းသီးဟင်းရွက်တွေ ဖျက်ဆီးနိုင်ပြီး မျှခြေကို ဖျက်ဆီးနိုင်တဲ့ ရောဂါပိုးတွေလည်း ယူလာနိုင်တယ်....."

"ပြီးတော့ ယွီလင်းဂိုဏ်းရဲ့ နေရာတိုင်းမှာ တွေ့ရတဲ့ တွင်းအောင်းမြွေရောပဲ..."

"နောက်ဆုံးတော့ နတ်ဆိုးနယ်မြေထဲက ဟင်းသီးဟင်းရွက်တွေ လျော့ကျလာပြီး သူတို့ရဲ့ တိရိစ္ဆာန်မွေးမြူမှုက ကျွေးစရာမရှိတော့ဘဲ ရောဂါဖြစ်စေတဲ့ ပိုးမွှားတွေနဲ့ ကပ်ပါးကောင်တွေက အဲ့မှာ တိုးပွားလာလိမ့်မယ်... အဲ့အကောင်တွေကို သင့်တော်တဲ့ပမာဏသာ ပို့နိုင်ရင် အသိသာဆုံး ရလာဒ်အနေနဲ့ နတ်ဆိုးနယ်မြေလည်း အငတ်ဘေးဆိုက်မှာပဲ... နတ်ဆိုးတွေ အများကြီးက စားစရာမရှိ ဖြစ်လာမှာ... သူတို့က အဲ့ပြဿနာကို ဘယ်လို ဖြေရှင်းရမလဲ မသိရင် နတ်ဆိုးတွေအတွက်က အရင်က ဂေဟစနစ်ကို ပြန်ရအောင်လုပ်ဖို့ ခက်ခဲလောက်မှာ..."

ဇီဝဆိုင်ရာ ကျူးကျော်ခြင်းမှာ သဘာဝအလျောက်သာမက လူသားများ၏ ပြုလုပ်ချက်များကြောင့်ပါ ဖြစ်ပွားခြင်းပင်။ ဇီဝဆိုင်ရာကျူးကျော်မှု ဖြစ်လာစေနိုင်သည့် လူသားများ၏ ပြုလုပ်ချက်များမှာ လူသားတို့၏ ရွှေ့လျားနိုင်စွမ်း တိုးတက်လာသည့်အခါ သိသိသာသာ ကျယ်ပြန့်လာပေသည်။ စွေ့ချီချောင်းနေထိုင်သည့် နေရာတွင်ပင် ဂြိုလ်များအားလုံးက သူတို့၏ ဂြိုလ်ဆီသို့ ဧည့်သည်တစ်ဦး လာရောက်ခွင့်ပြုရန် စေ့စပ်သည့် စစ်ဆေးမှု လိုအပ်ပေသည်။

ဤခေတ်တွင် ဆိုးသွမ်းသော သက်ရောက်မှုနှင့် အချို့သော ဂြိုလ်သားမျိုးနွယ်များက စိုက်ပျိုးရေးမှ ငါးနှင့် တိရိစ္ဆာန်မွေးမြူရေး အပါအဝင် လူသား ခန္ဓာကိုယ်အထိ ဂေဟစနစ်တစ်ခုလုံးကို ဖျက်ဆီးနိုင်လေသည်။

ကျင့်ကြံသူများက နောက်ကွယ်တွင် တိတ်တဆိတ် ပြုမူနိုင်လျှင် နတ်ဆိုးနယ်မြေဆီသို့ ဂြိုလ်သားမျိုးနွယ်များ၏ တိုက်ခိုက်မှုမှာ နှစ်ဆတိုးနိုင်သည်ဟု စွေချီချောင်းက ဆိုပေသည်။

ဂိုဏ်းချုပ်ယန် - "..."

သူမက ကြောင်အသွားလေသည်။

ဒါက... သူ တကယ်ပဲ ဒါကို မတော်တဆ "အဖြေထုတ်"ထားတာလား... သူက ဘယ်လို ကြောက်စရာကောင်းတဲ့ ကိစ္စတွေကို အဖြေထုတ်ထားတာလဲ... အဲ့စိတ်ဝိညာဉ်စွမ်းအင်စက်ကလည်း "မတော်တဆ" ထုတ်မိသွားတာ မဟုတ်လောက်ဘူး မလား...

ဂိုဏ်းချုပ်ယန်က စွေ့ချီချောင်း၏ ဆိုလိုရင်း အများစုကို နားလည်ပြီး သူ၏ ကောက်ချက်များက ယုံရသည်ကို အပြည့်အဝ ယုံကြည်ပေသည်။

ဂိုဏ်းချုပ်ယန်က ထရပ်လိုက်သောအခါ စွေ့ချီချောင်းက ထိုင်ချလိုက်သည်။ သူမက စွေ့ချီချောင်းကို ကြည့်ရန် ခေါင်းငုံ့လိုက်ရာ သူမရှစ်တိ၏ တည်ငြိမ်လှသော မျက်နှာထက်တွင် အနက်ရောင်အရိပ်တစ်ခု ဖုံးလွှမ်းနေသည်ဟု ခံစားလိုက်ရသည်။

ရှစ်တိက ရှစ်ရှု့ရဲ့ ကျဆုံးမှုကြောင့် လက်စားချေချင်တာတော့ မဟုတ်လောက်ဘူးမလား...

"တကယ်တော့ ကျွန်တော်လည်း ဒီလိုမျိုး မပြောချင်ပါဘူး... ဘာပဲဖြစ်ဖြစ် နတ်ဆိုးနယ်မြေရဲ့ လယ်ကွင်းတွေက အပြစ်ကင်းတယ်လေ... အရေးအကြီးဆုံးက အဲ့ဒါက ကျွန်တော်နဲ့ မဆိုင်တာဘဲ... သူတို့ ကျွန်တော့်ကို ရန်လာမစရင် ကျွန်တော်လည်း သူတို့ကို ရန်စမှာ မဟုတ်ဘူး..."

စွေ့ချီချောင်းက မျက်မှောင်ကြုတ်လိုက်သည်။

"ဒါပေမဲ့ ဒါတွေအကုန်လုံးက နတ်ဆိုးတွေ ခေါင်းမာလို့ ဖြစ်ရတာ... ကျွန်တော်ကတော့ ဆုံးဖြတ်ချက်ချဖို့က ဂိုဏ်းချုပ်ယန်အပေါ်ပဲ မူတည်တယ် ထင်တယ်..."

" ကျွန်တော်တို့အတွက်က သူတို့ ဆာနေတဲ့ အချိန်မှာ နတ်ဆိုးတွေနဲ့ ညှိနှိုင်းဖို့ ပိုလွယ်မယ်ထင်တယ်..."

စွေ့ချီချောင်းက ခန့်မှန်းချက်တစ်ခု ဆိုလိုက်သည်။

နတ်ဆိုးနယ်မြေပင်ဖြစ်စေ လူသားနယ်မြေပင်ဖြစ်စေ နတ်ဆိုးများဖြစ်စေ လူသားများဖြစ်စေ ပိရမစ်တစ်ခုက သူတို့၏ လူမှုအသိုင်းအဝိုင်း အခြေအနေကို ထင်ဟပ်ရန် အသုံးပြုနိုင်ပေသည်။ ကျင့်ကြံခြင်းအမြင့်ဆုံးနှင့် လူတစ်ဦးမှာ ပိရမစ်၏ထိပ်တွင် ရှိနေမည် ဖြစ်သည်။ အတိုချုပ်အနေဖြင့်ဆိုရသော် နတ်ဆိုးအများစုနှင့် လူသားအများစုမှာ စွမ်းအင်များစွာမရှိဘဲ ပိရမစ်၏ အောက်ခြေတွင် ရှိနေမည်ဖြစ်သည်။ သူတို့တွင် ကျင့်ကြံခြင်း များများစားစားမရှိရာ သီးနှံကြီးထွားမှုကို တိုးမြှင့်ရန်အတွက် စွမ်းရည် မရှိချေ။ ပိရမစ်အောက်ခြေရှိ အားအနည်းဆုံး လူအများစုမှာ မိုးရွာသည့်ရက်များတွင် သီးနှံများ ပိုသိုလှောင်နိုင်ရန်သာ ကြိုးစားနိုင်ပေသည်။

နတ်ဆိုးအများစုက သူတို့ခန္ဓာကိုယ်၏ လိုအပ်ချက်အများစုကို ဖြည့်ရန်အတွက် အသားအပြင် ပုံမှန်အချိန်အပိုင်းအခြားများတွင် ကောက်သစ်မြက်ကို စားပေသည်။ သို့သော် နတ်ဆိုးများက ကောက်သစ်မြက်၏ ကြီးထွားမှုကို မည်သို့ မြှင့်တင်ရမည်အား မသိချေ။ သူတို့က သူတို့၏ ဂေဟစနစ်ကို နားမလည်၍ သူ့တို့ကိုယ်သူတို့ မှီခိုကာ ကောက်သစ်မြက်များ ထပ်မံစိုက်ရန်မှာ သူတို့အတွက် ခက်ခဲပေလိမ့်မည်။

နတ်ဆိုးတွေက အဆာခံမလား ငြိမ်းချမ်းရေးယူပြီး သူတို့ရဲ့ လိုအပ်ချက်ကို ဖြည့်မလား...

ဂိုဏ်းချုပ်ယန်က ၄င်းကို တွေးမိသောအခါ ထိုင်မနေနိုင်ချေ။

"ငါ အဲ့ဒါကို သေချာတွေးကြည့်ပါမယ်..."

စွေ့ချီချောင်းက တည်ငြိမ်စွာ ထရပ်လိုက်သည်။

"ကျွန်တော်ပြောတဲ့ ပုံစံငယ်ကို အရင် စမ်းကြည့်လို့ရတယ်... ကျွန်တော် အရင်ပြန်နှင့်တော့မယ်... ဖီးနစ်ရရှိခြင်း ဝါးပင်နဲ့ ပတ်သတ်ကဲ့ ကိစ္စကိုတော့ ပိုပြီး အာရုံစိုက်ပေးဖို့ ဂိုဏ်းချုပ်ကိုပဲ ဒုက္ခပေးရဦးမယ်..."

".ငါ နားလည်ပါတယ်..."

ဂိုဏ်းချုပ်ယန်က ကျေနပ်နေပေသည်။

စွေ့ချီချောင်းက လွင့်မျောဥယျာဉ်သို့ တစ်ယောက်တည်း ပြန်သွားလိုက်ပြီး သူ့ဟင်းသီးဟင်းရွက် စိုက်ခင်းများကို ဂရုစိုက်ရန် လက်တိုလက်တောင်း အလုပ်သမားများနှင့် ဆုံလိုက်သည်။ သူဂိုဏ်းမှ ထွက်သွားသည့် အချိန်အတွင်း သူ့လယ်ကွင်းများကို ဂရုစိုက်ပေးသူမှာ လက်တိုလက်တောင်း အလုပ်သမား ဖြစ်သည်။ ထို့အပြင် ထိုလက်တိုလက်တောင်း အလုပ်သမားက သူနှင့်အတူ ယွီလင်းဂိုဏ်းသို့ဝင်လာသူများဖြစ်သည်။

လက်တိုလက်တောင်းအလုပ်သမားက အရိုအသေပေးလိုက်သည့်အခါ စွေ့ချီချောင်းအား အကြိမ်အနည်းငယ် ထပ်မကြည့်ဘဲ မနေနိုင်ချေ။ စွေ့ချီချောင်းသည်လည်း တစ်ချိန်က လက်တိုလက်တောင်း အလုပ်သမားတစ်ဦးဖြစ်ခဲ့သည်။ ဤနှစ်ပိုင်းအတွင်း စွေ့ချီချောင်းက အတက်အကျများစွာကို ကြုံခဲ့ပြီး ဖြစ်သည်။

ဤတစ်ကြိမ်တွင် သူက စွေ့ချီချောင်းကို မနာလိုဖြစ်သည်လား မဖြစ်သည်လားကိုပင် မပြောနိုင်ချေ။

ဘာပဲဖြစ်ဖြစ် စွေ့ချီချောင်းက ဂိုဏ်းရဲ့ ခွဲခြား ဆက်ဆံရေးကို တကယ်ပဲ လက်ခံနိုင်တယ်လား...

ပြီးတော့ နောက်ပိုင်းမှာ စွေ့ချီချောင်းက တာအိုလက်တွဲဖော်တစ်ယောက် ရှာချင်ရင်တောင် ရှာလို့ရတော့မှာ မဟုတ်ဘူး... စွေ့ချီချောင်းက အမတထန်ဝေ့လိုမျိုး ထူးချွန်တဲ့ ပုဂ္ဂိုလ်တစ်ယောက်နဲ့ တွဲ့ဖူးသွားပြီကိုး... သူ့ရဲ့ အနာဂတ်လက်တွဲဖော်က အမတထန်ဝေ့နဲ့ နှိုင်းယှဉ်ခံရရင် ခံစားချက်ကောင်းပါတော့မလား...

စွေ့ချီချောင်းမှာ လက်တိုလက်တောင်းသမားတွင် အတင်းအဖျင်းအပြည့်နှင့် ခေါင်းတစ်ခုရှိနေသည်ကို မသိချေ။ သူက လက်တိုလက်တောင်း အလုပ်သမားကို အလုပ်လုပ်ရန်မလိုတော့ကြောင့် တည့်တိုးသာပြောလိုက်ပြီး လယ်ကွင်းများကို သူကိုယ်တိုင် ဂရုတစိုက်စစ်ဆေးလိုက်သည်။

🌳🌳🌳

Prev Next