Chapter 152

Volume 7 : ဥပဒေဌာန

Chapter 152 (ပြစ်မှုမရှိကြောင်းချေပချက် ၀၅)

ရွှီယိရှန်းသည် ပြစ်မှုဆိုင်ရာရဲတပ်ဖွဲ့သို့ ရဲများနောက်ကနေသွားသောအခါ ရဲတပ်ဖွဲ့၏တံခါးဝတွင် ‘ပေရှန်းမြို့ ပင်းကျန်းခရိုင် ပြစ်မှုဆိုင်ရာရဲတပ်ဖွဲ့’ဟူသော စာလုံးကို သူတွေ့လိုက်ရသည်။ ပေရှန်းတက္ကသိုလ်နှင့် ကမ်းခြေ ဘာဘီကျူးစားသောက်ဆိုင် နှစ်ခုစလုံးသည် ပင်းကျန်းခရိုင်တွင် တည်ရှိသည်။ "ကမ်းခြေရေနစ်သေဆုံးခြင်း" နှင့် "ကျောင်းလူသတ်မှု" နှစ်ခုစလုံးသည် ပင်းကျန်းခရိုင်ရဲတပ်ဖွဲ့၏တရားစီရင်ပိုင်ခွင့်အောက်တွင်ရှိသည်။

ရဲတပ်ဖွဲ့ရောက်လာသောအခါတွင် စစ်ဆေးမေးမြန်းရန် ပြန်လည်ခေါ်ဆောင်လာသော ကျူးရှောင်ထင်ကို သူသေချာပေါက်တွေ့လိမ့်မည်။

ရွှီယိရှန်းသည် ရဲအရာရှိ၏အိတ်ထဲတွင် မလှုပ်မယှက် နေခဲ့သည်။ ရဲတပ်ဖွဲ့တံခါးဝကို ဝင်လိုက်တာနဲ့ ရဲအရာရှိ၏ ဖုန်းမြည်လာသည်။ သူက ဖုန်းကို ကောက်ကိုင်လိုက်ပြီး တစ်ဖက်က လုပ်ဖော်ကိုင်ဖက်၏ တီးတိုးပြောသံကို ကြားလိုက်ရသည်။

"ခေါင်းဆောင်ချန်... ပေရှန်းတက္ကသိုလ်လူသတ်မှုရဲ့ မျက်မြင်သက်သေနဲ့ သံသယရှိသူတွေကို ခေါ်လာခဲ့ပြီး သေဆုံးသူရဲ့အလောင်းကို မှုခင်းဆေးပညာဌာနဆီ ပို့ထားတယ်... သူတို့က အခု စစ်ဆေးမေးမြန်းချင်လား"

ခေါင်းဆောင်ချန်သည် နှစ်စက္ကန့်လောက် နှုတ်ဆိတ်နေပြီး ပြောလိုက်သည်။

"အလျင်မလိုပါဘူး... မင်း ရုံးခန်းထဲသွားပြီး ငါ့ကို အသေးစိတ်ပြောပြပါ"

သူသည် ရုံးခန်းတံခါးကိုတွန်းပြီး ရေတစ်ခွက်လောင်းထည့်လိုက်သည်။ ခဏအကြာတွင် ရဲအရာရှိငယ်တစ်ဦးသည် တံခါးကို အလျင်စလိုခေါက်ကာ အခြေအနေကို အစီရင်ခံတင်ပြခဲ့သည်။

"ခေါင်းဆောင်ချန်... ပေရှန်းတက္ကသိုလ်မှာ သေဆုံးသွားတဲ့သူက ရှဲ့ရှန်းချင်လို့ခေါ်ပြီး အသက် 22 နှစ်ရှိပြီးတော့ ဥပဒေဌာနရဲ့ စီနီယာကျောင်းသူဖြစ်တယ်... သေဆုံးချိန်က မနက် 5:20 ဝန်းကျင်ခန့်မှာ သတင်းပေးတဲ့သူက သူမရဲ့အခန်းဖော်ဖြစ်သူ မောင်ယွဲ့... သတင်းပေးတဲ့သူက မနေ့ညနေက စာကြည့်ခန်းကို သွားခဲ့ပြီး မနက် 5:00 နာရီမှာ အိပ်ဆောင်ကို ပြန်လာခဲ့တယ်လို့ ပြောတယ်... တံခါးဖွင့်လိုက်တော့ အိပ်ဆောင်ရဲ့ကြမ်းပြင်က နေရာတိုင်းမှာ သွေးတွေရှိနေတာကို မြင်လိုက်ရပြီး နောက်ထပ်အခန်းဖော်ကျူးရှောင်ထင်က ရှဲ့ရှင်းချင်ကို ဓားနဲ့ထိုးသတ်ခဲ့တာကြောင့် သူမက အော်ဟစ်ပြီး ရဲကို အမြန်ခေါ်ခဲ့တာ"

ခေါင်းဆောင်ချန်က မျက်ခုံးပင့်လိုက်သည်။

"ကျူးရှောင်ထင်လား... မနေ့က ကမ်းခြေမှာ ဥပဒေဌာနက ဘာဘီကျူးသွားတုန်းက လိုက်သွားတဲ့ မိန်းကလေးလား"

ရဲအရာရှိငယ်က ပြန်ပြောသည်။

"ဟုတ်ပါတယ်... ခေါင်းဆောင်ချန်... သူမကို သိလို့လား"

ခေါင်းဆောင်ချန်က အပြုံးဖြင့် ဆိုသည်။

"တိုက်တိုက်ဆိုင်ဆိုင် ကမ်းခြေမှာ သေဆုံးသွားတဲ့ လျှိုကျားကျားက မနေ့ညက ကျူးရှောင်ထင်နဲ့အတူ တဲထဲမှာ အိပ်ခဲ့တာ... ကျူးရှောင်ထင်က မနက်စောစော ကမ်းခြေကနေ ထွက်သွားတာဖြစ်မယ်... ကျောင်းကို တစ်ယောက်တည်းပြန်သွားပြီးတော့ အိပ်ဆောင်ကို ပြန်လာပြီး သူမအခန်းဖော်ကို သတ်လိုက်တာလား"

လုပ်ဖော်ကိုင်ဖက်၏ မျက်လုံးများက ပြူးကျယ်သွားသည်။

"ဒီကိစ္စနှစ်ခုစလုံး ကျူးရှောင်ထင်နဲ့ သက်ဆိုင်နေတာလား"

ခေါင်းဆောင်ချန်က မျက်မှောင်ကြုတ်ကာ စားပွဲကို လက်ချောင်းများဖြင့် တောက်ရင်း ဆက်မေးသည်။

"ကျူးရှောင်ထင်ရဲ့ဖုန်းရပြီလား"

"သက်သေအဖြစ် စုဆောင်းထားပြီး သက်သေခံဌာနက သက်သေတွေကို စုဆောင်းနေပါတယ်"

"ကျောင်းရဲ့ စောင့်ကြည့်ရေးကင်မရာကို ကော်ပီကူးထားပြီလား"

"မိန်းကလေးတွေအိပ်ဆောင်မှာ စောင့်ကြည့်ရေးကင်မရာက ပျက်နေတယ်... တံခါးနားမှာက စောင့်ကြည့်ရေးကင်မရာပဲ ရခဲ့တယ်... ကျူးရှောင်ထင်နဲ့ အခြားသူတွေကို စောင့်ကြည့်နေတယ်"

"ကောင်းပြီ... သေဆုံးရတဲ့အကြောင်းရင်းကို အမြန်ဆုံး အဆုံးအဖြတ်ပေးဖို့ မှုခင်းဆရာဝန်ကို ပြောလိုက်ပါ... ပြီးတော့ ဒီကျူးရှောင်ထင်ကို ငါ မေးလိုက်မယ်"

ခေါင်းဆောင်ချန်သည် လှည့်၍ စစ်ဆေးမေးမြန်းခန်းထဲသို့ လျှောက်လာစဉ်တွင် မျက်နှာတွင် မျက်ရည်များနှင့် နှုတ်ခမ်းဖြူဖျော့နေသော ပိန်ပါးသော မိန်းကလေးကို ရဲအရာရှိအမျိုးသမီးက ခေါ်ဆောင်လာကာ တုန်တုန်ယင်ယင်ဖြင့် ကြည့်ပြီး ပြောလိုက်သည်။

"ကျွန်-ကျွန်မ အလျင်လိုနေလို့... ‌သန့်စင်ခန်းသွားလို့ရမလား"

ခေါင်းဆောင်ချန်သည် မေးစေ့ကို ထိကာ ရဲအရာရှိအမျိုးသမီးကို ပြောလိုက်သည်။

"သူမကို ခေါ်သွားပေးလိုက်"

ရွှီယိရှန်းသည် မူလက ခေါင်းဆောင်ချန်၏အိတ်ကပ်ထဲတွင် ပုန်းနေခဲ့သည်။ ဒီအခွင့်အရေးကို အသုံးချပြီး သူ mitosis စွမ်းရည်ကို အမြန်အသက်သွင်းပြီး ဆဲလ်တစ်ခုကို တိုက်ရိုက်ခွဲထုတ်ပြီး ရဲအရာရှိအမျိုးသမီး၏ အိတ်ကပ်ထဲကို ခုန်ဆင်းသွားသည်။

ရဲအရာရှိအမျိုးသမီးသည် ကျူးရှောင်ထင်ကို သန့်စင်ခန်းထဲ ခေါ်သွားပြီး လက်ထိတ်ကို ဖြုတ်ပေးကာ ကျူးရှောင်ထင်ကို အိမ်သာသွားခိုင်းလိုက်သည်။ ကျူးရှောင်ထင်တစ်ယောက်တည်း သန့်စင်ခန်းထဲကို ဝင်သွားတော့ ရွှီယိရှန်းသည် သူမခေါင်းပေါ်သို့ အမြန်ခုန်ချပြီး သူမ၏နားရွက်နားတွင် ပုန်းနေလိုက်သည်။ ကျူးရှောင်ထင်သည် သူမ၏ မျက်နှာကို ရေအေးဖြင့် ဆေးချလိုက်ပြီး သူမ အပြင်ထွက်ခါနီးတွင် ရုတ်တရက် သူမ၏နားထဲ၌ နူးညံ့သော အသံတစ်ခု ကြားလိုက်ရသည်။

"ကျူးရှောင်ထင်... မင်း ဘယ်သူ့ကိုမှ မသတ်ခဲ့ဘူး ဟုတ်တယ်မလား"

ကျူးရှောင်ထင်က ခဏတာ အံ့အားသင့်သွားပြီး မှန်ကို ထိတ်လန့်စွာ စိုက်ကြည့်ရင်း "ရှင်-ရှင်က ဘယ်သူလဲ"

ရွှီယိရှန်း: "ရှူး... စကားမပြောနဲ့... ငါမင်းကိုကူညီဖို့ ရောက်လာတာ... မင်းငါ့ကို မမြင်နိုင်ရင်... ငါ့ကို ဘုရားသခင်က မင်းကိုကယ်တင်ဖို့ စေလွတ်လိုက်တဲ့ လျှို့ဝှက်ဆန်းကြယ်စွမ်းအားတစ်ခုလို့ပဲ မှတ်ယူလိုက်ပါ"

ကျူးရှောင်ထင်: "..."

ဒါက Shounen anime လား... ဘုရားသခင်က သူမကို ကယ်တင်ဖို့ စေလွတ်ခဲ့တာလား...

ရွှီယိရှန်းသည် ဆဲလ်တစ်ခုအဖြစ်သို့ ပြောင်းလဲသွားပြီး စကားပြောနေခြင်းဖြစ်ကြောင်း ရှင်းပြရန် ခက်ခဲသည်။ အဓိပ္ပါယ်မဲ့သောအကြောင်းပြချက်တစ်ခုပြုလုပ်ပြီးနောက် အဓိကအကြောင်းအရာကို ချက်ချင်းပြောလိုက်သည်။

"ရဲတွေက မင်းကို မကြာခင် စစ်ဆေးမေးမြန်းတော့မှာ... ငါပြောခဲ့တာတွေကို မှတ်ထားနော်... ပထမအချက် မင်းက လူတစ်ယောက်ကို သတ်ခဲ့တယ်ဆိုတာ ဘယ်တော့မှ ဝန်မခံနဲ့... မင်းမလုပ်ဘူးလို့ပဲ အတင်းအကျပ်ပြောပါ... ဒုတိယအချက် ရဲတွေက စစ်ဆေးမေးမြန်းရာမှာ အတွေ့အကြုံရှိတာကြောင့် မလိမ်နဲ့... လိမ်လိုက်ရင် ယုတ္တိရှိရှိတဲ့ ကွင်းဆက်တွေကို အလွယ်တကူရှာတွေ့နိုင်ပြီး မင်းရဲ့သက်သေခံချက်က အနာဂတ်မှာ တရားသူကြီးရဲ့အမြင်ထဲ မယုံကြည်ချင်စရာဖြစ်လာလိမ့်မယ်... မသေချာတဲ့မေးခွန်းမျိုး ကြုံတွေ့တဲ့အခါ ‘မသိဘူး’လို့ပဲပြောနော်... ‘ဟုတ်လောက်တယ်၊ ဖြစ်နိုင်တယ်’ဆိုတဲ့ မသေချာမရေရာအဖြေတွေ မဖြေနဲ့... ရည်ရွယ်ချက်ရှိရှိ လူသတ်တာက သေဒဏ်ပေးခံရမှာဖြစ်ပြီး မင်းအသက်ကို ကယ်ချင်ရင် ငါပြောသလို လုပ်ပါ"

ကျူးရှောင်ထင်၏မျက်လုံးများက နီရဲနေပြီး သူမ၏စိတ်များက လုံးလုံးရှုပ်ထွေးနေကာ သူမ၏အာရုံများက ကယောင်ကတမ်းဖြစ်တယ်လို့ တွေးလိုက်မိသည်။ သို့ပေမဲ့ သူမ၏နားထဲကအသံသည် ဂရုစိုက်သော အစ်ကိုတစ်ယောက်လို နူးညံ့သိမ်မွေ့နေပြီး သူမက တိုးတိုးလေး ပြောလိုက်သည်။

"ဘာ-ဘာလို့ ကျွန်မကို ကူညီရတာလဲ"

ရွှီယိရှန်း: "ဘာလို့လဲဆိုတော့ မင်းအပြစ်မရှိဘူးဆိုတာ ငါယုံကြည်လို့ပဲ"

ကျူးရှောင်ထင်၏မျက်ရည်များက အထိန်းအကွပ်မဲ့စွာ စီးကျလာသည်။

မောင်ယွဲ့သည် တံခါးကိုတွန်းဖွင့်ပြီး "ကျူးရှောင်ထင်က လူတစ်ယောက်ကို သတ်လိုက်ပြီ" လို့အော်လိုက်ကတည်းက 703 အိပ်ဆောင်ကို လူများ အမြန်ဝိုင်းရံထားပြီး လူသတ်သမားကို ကြည့်သော ကြောက်စရာကောင်းသည့် မျက်လုံးတွေနဲ့ သူမကို ဝိုင်းကြည့်ကြသည်။ အားလုံးက ‘ကျူးရှောင်ထင်က လူတစ်ယောက်ကို သတ်လိုက်တယ်’ ‘သူမက ဘာလို့လူသတ်ရတာလဲ’လို့ ပြောကြပြီး သူမသည် အပြင်းအထန် ခေါင်းခါပြီး ‘ငါမသိဘူး’ ထပ်ခါတလဲလဲ ပြောနေပေမဲ့လည်း ဘယ်သူမှ သူမစကားကို နားမထောင်သလို မယုံကြဘူး။

ရဲများရောက်လာပြီးနောက်မှာတော့ သူမကို ပထမဆုံးအကြိမ် လက်ထိပ်ခတ်ခဲ့သည်။

အေးစက်နေသော သတ္တုလက်ထိတ်များက သူမနှလုံးသားတစ်ခုလုံးကို အောက်ခြေအထိ နစ်မြုပ်သွားစေသည်။ သူမဘဝသည် ဒီတစ်ကြိမ်မှာ လုံးဝအဆုံးသတ်သွားပြီလို့ သူမ တွေးလိုက်မိသည်။ သူမသည် အခင်းဖြစ်ပွားရာနေရာတွင် တစ်ယောက်တည်းရှိနေခဲ့ပြီး လူသတ်လက်နက်ကို မတော်တဆ ထိမိသွားကာ သူမ မည်သို့ပြောရမည်နည်း။ ရဲတွေက ယုံမှာလား။

သူမ ကူကယ်ရာမဲ့ ဖြစ်နေချိန်မှာပဲ ဒီနူးညံ့သိမ်မွေ့သောအသံက ကြီးမားသောခွန်အားတစ်ခုလိုဖြစ်စေပြီး သူမ၏စိတ်အာရုံကို ပြန်ဆွဲထုတ်လိုက်သည်။ ဒါက ကယောင်ချောက်ချားဟုတ်ဟုတ်၊ မဟုတ်ဟုတ် အနည်းဆုံးတော့ သူမှန်သည်—

သူမက လူသတ်သမားဖြစ်ကြောင်းကို ဝန်မခံသင့်ဘူး... ဝန်ခံလိုက်တာနဲ့ သေဒဏ်ချမှတ်ခံလိမ့်မယ်...

ရွှီယိရှန်းက နူးညံ့စွာပြောသည်။

"အခု အသက်ပြင်းပြင်းရှူပြီး အရင်ဆုံးစိတ်အေးအေးထားလိုက်ပါ"

ကျူးရှောင်ထင်သည် အသက်ပြင်းပြင်းရှူပြီး အတတ်နိုင်ဆုံး စိတ်တည်ငြိမ်အောင် ကြိုးစားသည်။

သူမစကားပြောခါနီးတွင် ရွှီယိရှန်းက သူမကို ကြားဖြတ်ပြောလိုက်သည်။

"စကားမပြောနဲ့... မင်းရဲ့အတွေးတွေကို သေချာရှင်းပြီးမှ ရဲတွေရဲ့မေးခွန်းကိုဖြေပါ... မင်းရဲ့သဘောထားက ရိုးရိုးသားသားဖြစ်ရမယ်... မကြောက်နဲ့... ရဲတွေက လူသတ်သမားကို အလွတ်ပေးမှာမဟုတ်ပေမဲ့ သူတို့က လူကောင်းတွေကိုတော့ မှားပြီးမဖမ်းဘူး... မင်း လူသတ်ထားတာမရှိသ၍ အမှန်တရားကို ထုတ်ဖော်မဲ့နေ့ဆိုတာ အမြဲရှိနေမှာပါ"

ကျူးရှောင်ထင်သည် မှန်ထဲတွင် မျက်ရည်များကျနေသော သူမကိုယ်သူ ကြည့်ပြီး အားတက်သရော ခေါင်းငြိမ့်လိုက်သည်။

သူမ အပြင်ထွက်လာသောအခါ သူမအခြေအနေက ပိုကောင်းလာသည်။ ရဲအရာရှိအမျိုးသမီးက သူမကိုကြည့်ကာ ပြောသည်။ "သွားရအောင်"

ကျူးရှောင်ထင်ကို ရဲအရာရှိအမျိုးသမီးက စစ်ဆေးမေးမြန်းခန်းသို့ ပြန်ခေါ်သွားခဲ့သည်။ ခေါင်းဆောင်ချန်သည် သူမကို တစ်ဖက်မှာ ထိုင်ခိုင်းပြီး မေးသည်။

"မင်းက အသက် 22 နှစ်၊ ပေရှန်းတက္ကသိုလ်ရဲ့ ဘာသာပြန်ဌာနက စီနီယာကျောင်းသူ ဟုတ်တယ်နော်"

"ဟုတ်ပါတယ်"

"ရှဲ့ရှန်းချင်နဲ့ မင်းရဲ့ ဆက်ဆံရေးကဘာလဲ"

"အခန်းဖော်"

"ပိုတိတိကျကျပြောရရင် မင်းက သူမကို ရန်ငြိုးထားတာမျိုးရှိလား... မင်းတို့အတူနေတာ ဘယ်လောက်ကြာပြီလဲ"

"..." ကျူးရှောင်ထင်က အံကြိတ်ကာ ခဏအကြာတွင် တိုးတိုးလေးပြောလိုက်သည်။ "ကျွန်မ သူမကို သဘောမကျဘူး... သူမက အခြားသူတွေရဲ့ခံစားချက်တွေကို ဂရုမစိုက်ဘူး...သူမက မနက် 2 နာရီအထိ ရည်းစားနဲ့ ဖုန်းပြောလေ့ရှိတယ်... ကျွန်မ စိတ်အားနည်းပြီး အိပ်ဆောင်က အသံတွေထွက်နေရငါ အိပ်မပျော်ဘူး... သူမကြောင့် ကျွန်မ ကောင်းကောင်းမအိပ်ရတာ တစ်လရှိပြီ"

"ဒါဆို မင်းရဲ့စိတ်ထဲမှာ သူမကို မုန်းလား"

"...နည်းနည်းပါ... လူသတ်တဲ့အဆင့်လောက်တော့ မဟုတ်ဘူး... ကျွန်မတို့ အခန်းဖော်သုံးယောက်လုံးက သူမအပေါ် အမြင်တချို့ရှိတယ်"

"မင်း မနေ့က ဥပဒေကျောင်းသားတွေနဲ့ ဘာဘီကျူးစားဖို့ ကမ်းခြေကို သွားခဲ့တာမလား... ညသန်းခေါင်ကြီး မင်းဘာလို့ တစ်ယောက်တည်း ကျောင်းပြန်လာခဲ့တာလဲ"

"ကျွန်မ အသားကင်အစားများပြီး ညသန်းခေါင်မှာ ဗိုက်နာလာတယ်... သူတို့ဥပဒေဌာနရဲ့ အစီအစဉ် စနေ၊ တနင်္ဂနွေ နှစ်ရက်ကို ကမ်းခြေမှာ ကစားကြမှာ... ကျွန်မ နေလို့မကောင်းတာနဲ့ အိပ်ကိုပြန်ပြီးတော့ ကောင်းကောင်းအိပ်ချင်လို့"

နေလို့မကောင်းတာက ကျိုးကြောင်းဆီလျော်ပေမဲ့ လက်ခံယုံကြည်နိုင်လောက်သည်အထိ မလုံလောက်ဘူး။ ရုပ်ပိုင်းဆိုင်ရာ မအီမသာဖြစ်မှု၊ ထို့အပြင် ညသန်းခေါင် ဗိုက်နာကြောင်း သက်သေပြနိုင်သည့် တဲအတွင်းမှ မိန်းကလေး လျှိုကျားကျားက ယခုအခါ အလောင်းဖြစ်သွားသည်။

"လျှိုကျားကျားကို သိလား... မင်းနဲ့ သူမရဲ့ ဆက်ဆံရေးက ဘာလဲ"

"ကျားကျားက ကျွန်မအချစ်ဆုံးသူငယ်ချင်းပါ... ကျွန်မတို့က အလယ်တန်းကျောင်းကတည်းက အတန်းအတူတူတက်ခဲ့ကြတာ... ဒီတစ်ခေါက် ဥပ‌ဒေဌာနက စီစဉ်တဲ့ ဘာဘီကျူးဆိုင်ကို သူမက ကျွန်မကို ခေါ်ခဲ့တယ်... မသွားတဲ့သူတွေ အများကြီးရှိလို့ ထိုင်ခုံအပိုတွေ အများကြီးရှိတယ်လို့ သူမက ကျွန်မကိုပြောတယ်... ဒီတော့ ကျွန်မလည်း အချိန်ဖြုန်းဖို့ သွားခဲ့တာ... သူမက ကျွန်မအတွက် ပိုက်ဆံပေးခဲ့တယ်"

"မင်း ရေကူးတတ်လား"

ရဲအရာရှိ၏ မေးခွန်းများက ခုန်ပေါက်သွားသည်။

ကျူးရှောင်ထင်သည် မေးခွန်းကြောင့် အံ့အားသင့်သွားပြီး ခဏမျှ တုံ့ဆိုင်းသွားကာ "ဟုတ်ကဲ့" ဟု ပြန်ဖြေလိုက်သည်။

"လျှိုကျားကျား ရေကူးတတ်တာ မင်းသိလား"

"အင်း... သူမလည်း ရေကူးတတ်တယ်"

"မနေ့ညက အိပ်ရာမဝင်ခင် လျှိုကျားကျားကို မင်း ရေပေးခဲ့တာလား"

"သူမက ရေငတ်တယ်လို့ပြောလို့ ကျွန်မ သူမကို ရေတစ်ပုလင်းပေးခဲ့တယ်"

ရွှီယိရှန်းသည် သူနားထောင်လေလေ တစ်ခုခုမှားနေတယ်လို့ ခံစားရလေဖြစ်လာသည်။ ကျူးရှောင်ထင်သည် လျှိုကျားကျား သေဆုံးသွားတာကို အတိအကျမသိခဲ့လောက်ပေ။ ရဲများသည် သူမက လျှိုကျားကျားအား ဆေးတိုက်ပြီး ပင်လယ်ထဲဆွဲချခဲ့ကြောင်း သံသယရှိသောကြောင့် လျှိုကျားကျားနဲ့ပတ်သက်ပြီး ရေကူးခြင်း၊ ရေသောက်ခြင်း အစရှိသဖြင့်ကို မေးခဲ့သည်။

"မင်း အိပ်ဆောင် 703 ကိုပြန်သွားတုန်းက ဘာတွေ့ခဲ့လဲ ငါ့ကိုပြောပြ" ရဲအရာရှိက ရုတ်တရက် အကြောင်းအရာ ပြောင်းသွားသည်။

ထိုအချိန်က မြင်ကွင်းကို တွေးရင်း ကျူးရှောင်ထင်၏ နှုတ်ခမ်းများက တုန်တုန်ယင်ယင်နှင့် သူမ၏လက်များကို တင်းတင်း ဆုပ်ထားရင်း "ကျွန်-ကျွန်မ ရှဲ့ရှန်းချင် ကြမ်းပြင်ပေါ်မှာ လဲနေတာကို တွေ့ပြီး ကျွန်မကို အကူအညီနေသေးတယ်... ကျွန်မလည်း ထိတ်လန့်ပြီး သူမကို ကယ်ဖို့ ပြေးသွားတယ်... သွေးတွေထွက်နေတာကြောင့် ကျွန်မ သူမသွေးထွက်တာကိုရပ်ဖို့ ဓားကိုကိုင်လိုက်တယ်... ဒီလောက်အထိ ပြင်းထန်လိမ့်မယ်လို့ ကျွန်မ မထင်ထားဘူး... သူမက မတော်တဆ ဒဏ်ရာရတာလို့ပဲ ထင်ခဲ့တာ"

စစ်ဆေးမေးမြန်းနေသော ရဲများသည် တစ်ယောက်ကို တစ်ယောက် ကြည့်နေကြသည်။

ကျူးရှောင်ထင်သည် ခဏငြိမ်သက်သွားပြီးနောက် ရဲများက သေဆုံးသူ၏ လက်ကိုင်ဖုန်းကို ထုတ်ယူကာ မေးလိုက်သည်။

"သူမ မသေဆုံးမီ နောက်ဆုံးဆက်သွယ်ခဲ့သူက မင်းဖြစ်ပြီး ‘ပြန်လာပြီး စကားပြောရအောင်... ငါတို့ကြား အဆုံးသတ်သင့်ပြီ’လို့ သူမက မင်းဆီ WeChat ကနေ မက်ဆေ့ခ်ျပို့ခဲ့တယ်... ဒါက ဘာအဓိပ္ပါယ်လဲ"

ကျူးရှောင်ထင်၏ မျက်နှာက ဖြူဖျော့သွားသည်။

ရွှီယိရှန်းက သူမနားထဲကို တိုးတိုးပြောလိုက်သည်။

"မဖုံးကွယ်ထားနဲ့... မင်းတို့ကြားမှာ မကျေနပ်ချက်ရှိရင် ရှင်းရှင်းလင်းလင်းပြောလိုက်"

ကျူးရှောင်ထင်သည် ခေါင်းငြိမ့်ပြီး ငိုကာပြောသည်။

"ကျွန်မတို့ ဘာသာရပ်က အတန်းဖော် ကျိုးယိကျားဆိုတဲ့သူကို ကျွန်မ တစ်ချိန်လုံး တိတ်တိတ်လေးသဘောကျခဲ့ပေမဲ့ ကျွန်မ သူ့ကို ဖွင့်မပြောရဲခဲ့ဘူး... ရှဲ့ရှန်းချင်က ပိုရဲရင့်ပြီး ကျိုးယိကျားကို ဖွင့်ပြောဖို့ အစပြုခဲ့တယ်... ကျွန်မ သူမကို မနာလိုဖြစ်နေမှန်း သိတာကြောင့် သူမ အဲဒီလိုပြောတာက ဒီကိစ္စဖြစ်လိမ့်မယ်"

ခေါင်းဆောင်ချန်က မျက်ခုံးပင့်လိုက်သည်။

"မင်း သဘောကျနေတဲ့ကောင်လေးကို လုယူပြီး မင်းရှေ့မှာ အဲဒီကောင်လေးနဲ့ နေ့တိုင်း ဖုန်းပြောနေတော့ မင်းက သူမကို အမြဲတမ်းမနာလိုဖြစ်ပြီး အိပ်ဆောင်ထဲမှာ သူမနဲ့ အပြင်းအထန် အငြင်းအခုံဖြစ်ပြီးတော့ သူမကို စိတ်လိုက်မာန်ပါ ဓားနဲ့ထိုးသတ်လိုက်တာ ဟုတ်တယ်မလား"

ကျူးရှောင်ထင်သည် မျက်လုံးပြူးပြီး ခေါင်းကို အရူးအမူး ခါလိုက်သည်။

"မဟုတ်ဘူး... ကျွန်မ သူမကို တကယ်မသတ်ခဲ့ဘူး"

ခေါင်းဆောင်ချန်: "ဒါပေမဲ့... သူမကို သတ်ခဲ့တဲ့ဓားပေါ်မှာ မင်းရဲ့လက်ဗွေရာတွေပဲ ရှာတွေ့ခဲ့တယ်"

ကျူးရှောင်ထင်သည် အံ့အားသင့်သွားကာ ပါးစပ်အဟောင်းသားဖြင့် တစ်ဖက်ကို ကြည့်နေခဲ့သည်။

ဤစကားကိုကြားသောအခါ ရွှီယိရှန်း၏ခေါင်းက ရုတ်တရက် ကြီးလာသည်— လူသတ်သမားသည် လက်ဗွေရာကို ချန်ထားခြင်းမရှိသော်လည်း ကျူးရှောင်ထင်၏လက်ဗွေရာက ကျန်နေတာကြောင့် ငြင်းပယ်လို့မရပေ။ သူမသည် အိပ်ဆောင်သို့ ပြန်ရောက်ပြီးနောက် သေဆုံးသွားသူနှင့် စကားများ ငြင်းခုံခြင်း ရှိ၊ မရှိသည် သူမ၏ကိုယ်ပိုင်စကားသာဖြစ်သည်။ မည်သည့်လူသားသက်သေမျှ သူမအား သက်သေခံရန် မကူညီနိုင်သည့်အပြင် ရုပ်ပိုင်းဆိုင်ရာသက်သေများသည် သူမအတွက် အလွန်အဆင်မပြေပေ။

ကျူးရှောင်ထင်သည် အာရုံများဝေဝါးလာပြီး သူမ၏မျက်လုံးတွေက အနည်းငယ်မှိုင်းနေသည်။

"ကျွန်မလက်ဗွေတွေပဲလား... ဒါက ဘယ်လိုဖြစ်ရတာလဲ"

ခေါင်းဆောင်ချန်: "မင်းရဲ့ အခန်းဖော် မောင်ယွဲ့ရဲ့ အဆိုအရ ဒီဓားက မင်းပိုင်တာတဲ့... လိမ္မော်ရောင်သစ်သီးဓား... အရမ်းထက်တယ်... မင်း ကျောင်းစူပါမားကတ်ကနေ ပြီးခဲ့တဲ့ အပတ်က ဝယ်ခဲ့တာတဲ့"

ကျူးရှောင်ထင်သည် စားပွဲပေါ်ရှိ လိမ္မော်ရောင်ဓားကို စိုက်ကြည့်ရင်း သူမ၏မျက်နှာမှာ ပြာသွားသည်။

ဤသည်မှာ အမှန်ပင် သူမ၏ဓားဖြစ်သည်။

သူမ အသက်ပြင်းပြင်းရှူပြီး တုန်တုန်ယင်ယင်အသံနဲ့ ပြောသည်။

"ဒီဓားကို အံဆွဲထဲမှာ ကျွန်မသေချာထည့်ထားတာ... လူသတ်သမားက ရှဲ့ရှန်းချင်ကို ဓားနဲ့ထိုးသတ်ပြီး ကျွန်မကို ချောက်ချတာဖြစ်ရမယ်"

ခေါင်းဆောင်ချန်: "လူသတ်ပြီး မင်း‌ကိုချောက်ချလောက်တဲ့အထိ ဘယ်သူက မင်းကိုရန်ငြိုးနေတာလဲ"

ကျူးရှောင်ထင်က ခဏလောက်စဉ်းစားပြီး ခေါင်းခါလိုက်သည်။

"ကျွန်-ကျွန်မကို ဘယ်သူက ရန်ငြိုးထားလဲ တကယ်မသိဘူး"

ခေါင်းဆောင်ချန်က အကြောင်းအရာပြောင်းလိုက်သည်။

"လျှိုကျားကျားကကော... မင်း သူမကို သတ်လိုက်တာလား"

ကျူးရှောင်ထင်: "ဘာ... ကျားကျားက..."

ခေါင်းဆောင်ချန်သည် သူ့ရှေ့က မိန်းကလေးကို စူးရှစွာကြည့်ရင်း ပြောလိုက်သည်။

"လျှိုကျားကျားက မင်း ထွက်သွားပြီး သိပ်မကြာခင်မှာပဲ ရေနစ်သေဆုံးသွားတယ်... မနေ့ညက မင်း လျှိုကျားကျားနဲ့ ကမ်းခြေမှာ ဘာဘီကျူးစားပြီး ညလယ်မှာ သူမကို ရေတစ်ပုလင်း ပေးခဲ့တယ်... ရေထဲမှာ ဆေးတွေပါပြီး သူမက ရေကိုသောက်ပြီးတော့ မေ့လဲသွားတယ်... မင်းက သူမကို ရေနစ်ဖို့ ပင်လယ်ထဲခေါ်သွားပြီးတော့ တက္ကစီစီးပြီး ထွက်ပြေးသွားတယ်... ကျောင်းပြန်ရောက်တော့ ရှဲ့ရှန်းချင်နဲ့ စကားများပြီး သစ်သီးဓားနဲ့ သူမကို ထိုးသတ်လိုက်တယ်"

ကျူးရှောင်ထင်၏မျက်နှာပျက်သွားသည်။

"မဟုတ်ဘူး... ဒါက အဲဒီလိုမဟုတ်ဘူး"

"လျှိုကျားကျား သောက်ခဲ့တဲ့ ရေဘူးထဲမှာ အမည်မသိအမှုန့်ကို ပုလင်းရဲ့နှုတ်ခမ်းမှာ တွေ့ရှိခဲ့တယ်... အဲဒါက ဘယ်လိုဆေးအမျိုးအစားလဲဆိုတာ ငါတို့ မကြာခင် ရှာတွေ့လိမ့်မယ်" ခေါင်းဆောင်ချန်က စားပွဲကို ညင်သာစွာပုတ်ပြီး ပြောလိုက်သည်။ "ကျူးရှောင်ထင် ဝန်ခံလိုက်တော့... ငြင်းဆန်မနေနဲ့တော့"

ကျူးရှောင်ထင်သည် အသက်ပြင်းပြင်းရှူပြီး ပြောလိုက်သည်။

"ကျွန်မ ဘယ်သူ့ကိုမှ မသတ်ထားဘူး... ကျွန်မ တစ်ယောက်ယောက်ကို သတ်ခဲ့တယ်ဆိုတာ ရှင့်မျက်စိနဲ့ ကိုယ်တိုင်မြင်ခဲ့လို့လား"

ခေါင်းဆောင်ချန်က ပေါ့ပါးစွာ ဆိုသည်။

"မင်း ဒီမှာ စိတ်အေးအေးထားပြီး ဝန်ခံချင်သလားဆိုတာ စဉ်းစားထားပါ... မင်း ဝန်ခံရင် တရားရုံးက မင်းကို ပေါ့ပေါ့တန်တန် ပြစ်ဒဏ်ပေးလိမ့်မယ်"

ရဲအရာရှိ နှစ်ယောက် ထွက်သွားပြီး ရလဒ်များရဖို့အတွက် မှုခင်းဆရာဝန်ကို သွားရှာလောက်သည်။

ကျူးရှောင်ထင်သည် ကြောင်တက်တက်ထိုင်နေကာ ပိန်းပါးသော မိန်းကလေးသည် ကူကယ်ရာမဲ့စွာ တုန်လှုပ်နေခဲ့သည်။ ဒီလောက်ကြီးမားသောကိစ္စနဲ့ တွေ့ကြုံသောအခါ ဘယ်သူကမှ အေးအေးဆေးဆေးမနေနိုင်ပါဘူး။ လူမှုရေးအတွေ့အကြုံနည်းနည်းသာရှိသော အသက် 22 နှစ်အရွယ် တက္ကသိုလ်ကျောင်းသူလေးတစ်ယောက်ဆိုရင် ပြောစရာတောင်မလိုတော့ပေ။

ရွှီယိရှန်းသည် လေးလေးနက်နက် သက်ပြင်းချလိုက်ပြီး ခွဲထားသော ဆဲလ်သည် မှုခင်းဆေးစစ်မှုရလဒ်ကို နားထောင်ရန် ခေါင်းဆောင်ချန်၏နောက်သို့ လိုက်သွားသည်။

မှုခင်းဆရာဝန်က ပြောသည်။

"ရှဲ့ရှန်းချင် သေဆုံးချိန်က မနက် 5:30 ဝန်းကျင်လောက်မှာဖြစ်ပြီး သေဆုံးရတဲ့ အကြောင်းရင်းက နှလုံးသွေးကြောကျဉ်း ပေါက်ပြဲမှုကြောင့် ကြီးမားတဲ့ သွေးယိုစိမ့်မှု ဖြစ်ခဲ့တယ်... သူမက ဓားနဲ့ တစ်ချက်တည်း ထိုးသတ်ခံခဲ့ရပြီး ခန္ဓာကိုယ်မှာ အခြားဒဏ်ရာတွေမရှိပေမဲ့ သူမလက်သည်းမှာတွေ့ရှိတဲ့ အရေပြားတစ်ရှူးစရဲ့ မျိုးရိုးဗီဇက ကျူးရှောင်ထင်နဲ့ ကိုက်ညီတယ်... တစ်ဖက်လူရဲ့ ခန္ဓာကိုယ်ကို ကုတ်လိုက်တာဖြစ်မယ်"

ခေါင်းဆောင်ချန်က ခေါင်းငြိမ့်လိုက်သည်။

"လျှိုကျားကျားကကော"

မှုခင်းဆရာဝန်က ပြောသည်။

"လျှိုကျားကျားက သေဆုံးရတဲ့အကြောင်းရင်းက အဆိပ်သင့်တာကြောင့်ဖြစ်ပြီး ရေပုလင်းထဲမှာ အဆိပ်ပြင်းတဲ့ cyanide ကို ရှာဖွေတွေ့ရှိခဲ့တယ်... သူမ သေဆုံးပြီးနောက် ရေနစ်သလိုဟန်ဆောင်ဖို့ ပင်လယ်ထဲကို ပစ်ချခံလိုက်ရတာ... သူမရဲ့နှာခေါင်းနဲ့ အဆုတ်တွေမှာ ပင်လယ်ထဲက အနည်အနှစ်သဲလွန်စတွေကို မတွေ့ဘဲ သူမက ပင်လယ်ထဲကိုပြုတ်ကျပြီးနောက် အသက်မရှူသလို ရုန်းကန်ခြင်းမရှိဘဲ သေဆုံးသွားခဲ့ပြီးပြီ"

"ကျူးရှောင်ထင်ရဲ့ လက်ဗွေရာတွေကို ရေပုလင်းပေါ်မှာ တွေ့ရှိခဲ့တယ်" သက်သေခံဌာနမှ လုပ်ဖောက်ကိုင်ဖက်တစ်ဦးက ပြောသည်။ "ကျူးရှောင်ထင်ရဲ့ဖုန်းကို လော့ခ်ဖွင့်ပြီး တက္ကစီမှတ်တမ်းနဲ့ ဖုန်းခေါ်ဆိုမှုမှတ်တမ်းတွေကို တွေ့ရှိခဲ့တယ်... မနက် 4:30 လောက်မှာ ကမ်းခြေကနေ ကျောင်းကိုသွားဖို့ Didi Express ကားကို ခေါ်ခဲ့တယ်... မနက် 5:10 မှာ ကားက ကျောင်းတံခါးမှာ ရပ်သွားတယ်... 5:20 မှာ ရှဲ့ရှန်းချင်က ကျူးရှောင်ထင်ကို ဖုန်းခေါ်ပြီး မိနစ်ဝက်လောက်ပဲကြာတယ်"

"ကျူးရှောင်ထင်ရဲ့ လှုပ်ရှားမှုလမ်းကြောင်းဟာ သေဆုံးသူနှစ်ယောက်ရဲ့ သေဆုံးချိန်နဲ့ အခြေခံအားဖြင့် တူနေတယ်" ခေါင်းဆောင်ချန်က ခေတ္တရပ်ပြီး ပြောသည်။ "သေဆုံးသူနှစ်ယောက်ရဲ့ လူမှုဆက်ဆံရေးတွေကို ဆက်လက်စုံစမ်းပါ... အခြားသံသယရှိသူ မရှိဘူးဆိုရင် အချက်အလက်တွေကို စုစည်းပြီး တရားစွဲဖို့ ပြင်ဆင်သွားမယ်"

ရွှီယိရှန်းသည် ဆဲလ်အဖြစ်ပြောင်းလဲရန် အချိန်ကန့်သတ်ချက်ရှိသည်။ အချိန်ကုန်တော့မှာကိုမြင်တော့ သူချက်ချင်းပြန်သွားပြီး ကျူးရှောင်ထင်ကို ပြောလိုက်သည်။

"မင်းကို ကူညီဖို့ ငါနည်းလမ်းရှာလိုက်မယ်... သက်သေတွေက မင်းအတွက် သိပ်အဆင်မပြေဘူး... မင်းက ဥပဒေကို နားမလည်ရင် မင်းကို ချေပဖို့ ရှေ့နေကို ရှာရလိမ့်မယ်"

ကျူးရှောင်ထင်သည် ခေါင်းငုံ့ကာ စိတ်ပျက်လက်ပျက်ဖြင့် ပြည့်နှက်နေသော မျက်နှာနဲ့ သူမ၏အသံက စိတ်ညစ်နေသည်။

"ဒါပေမဲ့... ကျွန်-ကျွန်မမှာ ရှေ့နေငှားဖို့ ပိုက်ဆံမရှိဘူး"

ရွှီယိရှန်း: "မင်း အခမဲ့ ဥပဒေရေးရာ အကူအညီအတွက် လျှောက်ထားလို့ရတယ်လေ"

ကျူးရှောင်ထင်: "အခမဲ့ရှေ့နေက စိတ်ချရပါ့မလား"

ရွှီယိရှန်းက နူးညံ့စွာ ပြောသည်။

"စိတ်ချရပါတယ်... မင်းလို လူတွေကို ကူညီပေးဖို့ ရှေ့နေတော်တော်များများက ဆန္ဒရှိကြမှာပါ... တရုတ်နိုင်ငံမှာ ဥပဒေရေးရာ အကူအညီပေးနေတဲ့ စေတနာ့ဝန်ထမ်းစင်တာတွေ အများကြီးရှိပြီး ရှေ့နေတွေလည်း အရမ်းကျွမ်းကျင်တယ်... ဒီနေ့နေ့လယ်ပိုင်းမှာ ရှေ့နေက မင်းကို လာတွေ့လိမ့်မယ်... အားတင်းပြီး အရှုံးမပေးနဲ့"

ကျူးရှောင်ထင်က နူးညံ့စွာ ‘အင်း’ဟု အသံပြုလိုက်သည်။

ရွှီယိရှန်း: "ငါ အရင်သွားလိုက်ဦးမယ်... နောက်မှတွေ့မယ်နော်"

ကျူးရှောင်ထင်က မေးလိုက်သည်။ "ရှင်က ဘယ်သူလဲ"

သူမနားထဲမှာ ဘာသံမှ မရှိတော့ဘူး။

ရွှီယိရှန်းသည် ရဲစခန်းမှ ထွက်သွားပြီးနောက် လမ်းထောင့်တွင် သူ၏မူလခန္ဓာကိုယ်ကို ပြန်ပြောင်းပြီး ရဲစခန်းမှ စုံစမ်းမှုရလဒ်များနှင့် မှုခင်းဆရာဝန်က ဆုံးဖြတ်ခဲ့သော သေဆုံးရသည့်အကြောင်းရင်းကို အမြန်စာရိုက်ပြီး အဖွဲ့ထံပို့ခဲ့သည်။

ယွဲ့ရှင်းဝမ်က ကူကယ်ရာမဲ့စွာ ပြောသည်။

"ဒါက တောင်ကြီးလို သက်သေမျိုးပဲ"

လက်ဗွေရာများ၊ အဆိပ်များ၊ လူသတ်လက်နက်များ၊ ရွေ့လျားနေသောလမ်းကြောင်းများ၊ ခေါ်ဆိုမှုမှတ်တမ်းများ၊ WeChat မှတ်တမ်းများနှင့် မျက်မြင်သက်သေများ...

သက်သေအားလုံးက ကျူးရှောင်ထင်ကို ညွှန်ပြနေသည်။ ဤမိန်းကလေးက လုံးဝကိုကံမကောင်းတာပဲ။

ထိုသို့သော အခြေအနေမျိုးက လန်ယာရုန်၏ တိုက်ခိုက်ရေးစိတ်ဓာတ်ကို အမှန်တကယ် နှိုးဆွပေးခဲ့သည်။

"ဒီမိန်းကလေးရဲ့နာမည်ကို ငါတို့က ရှင်းရမှာပေါ့... သူမကို ကူညီမဲ့သူမရှိရင် သူမက သေဒဏ်ပေးခံရပြီး အဲဒါက အရမ်းသနားစရာကောင်းလိမ့်မယ်"

#TK