Chapter 234 🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Chapter 234

🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Chapter 234

14.21 - ဒီနေ့ညတော့ အကောင်းဆုံးအမျိုးသားသရုပ်ဆောင်ဘက်ကနေ ရပ်တည်ရအောင်။

ပထမဆုံးရုပ်ရှင်ဖြစ်သော <ကောင်းကင်ဘုံသို့အမေး> အား ရိုက်ကူးပြီးစီးသွားချိန်တွင် ရွှယ်လင်နှင့်စူးလျို့နျန်တို့သည်လည်း အပိုင်းလေးပိုင်းကိုရိုက်ကူးပြီးခဲ့၍ စာနယ်ဇင်းရှင်းလင်းပွဲလုပ်ရန် အချိန်ကျရောက်ပြီဖြစ်သည်။ 

ဤအခြေအနေတွင် နောက်ဆုံးတွင်မတော့ ရွှယ်လင်တစ်ယောက် လူရှေ့သို့ထွက်လာရပြီ။ ယခင် <ပဟေဠိလမ်းမများ> ကြောင့် နာမည်ကြီးလာခဲ့သော်လည်း <ကောင်းကင်ဘုံသို့အမေး> မှာ ထပ်ဆင့်အောင်မြင်မှုတစ်ခုပင်ဖြစ်၏။

ဖန်းယွဲ့ကျီသည် <ကောင်းကင်ဘုံသို့အမေး> ၏မူရင်းဝတ္ထုမှ အပိုင်းလေးပိုင်းအတွက် အကြိုထွေလာလေးခုကို ထုတ်ပေးခဲ့သည်။ ကနဦးတွင် ရုပ်ရှင်ကို စာပေချစ်ပရိသတ်များအပါအဝင် စူးလျို့နျန်နှင့်ရွှယ်လင်၏ပရိသတ်များကပါ စတင်အားပေးခဲ့၏။ ရုပ်ရှင်သတင်းကို နားစွင့်နေကြသော ပရိသတ်များမှာ <ကောင်းကင်ဘုံသို့အမေး> မှ ပရိုမိုးရှင်းဓာတ်ပုံများကို မြင်လိုက်ကြပြီးနောက် <ကောင်းကင်ဘုံသို့အမေး> က ထိပ်စီးခေါင်းစဥ်ဖြစ်လာပြီး လူတိုင်းသည်လည်း ရုပ်ရှင်အတွက် ပရိုမိုးရှင်းဆင်းခြင်းကို မကြာမီစတင်ပြီး ထုတ်လွှင့်မှုလာတော့မည်ဖြစ်ကြောင်း အကြမ်းဖျင်းသိထားကြ၏။

ရွှယ်လင်၏ပရိသတ်များက အော်ဟစ်လိုက်ကြပြီး သူတို့ထံအာရုံစိုက်လာစေရန် တောင်းဆိုကြလေသည်။ ၎င်းတို့မှာ အင်မတန်သနားစရာကောင်းလှသည် ရွှယ်လင်က ရုပ်ရှင်ကိုအသည်းအသန်ရိုက်နေပြီး သူတို့ကိုလျစ်လျူရှုထားခဲ့၏။ သူဆယ်လ်ဖီပုံများကို တင်ပေးလေ့ရှိသော်လည်း ကုမ္ပဏီပြောင်းလိုက်ပြီးနောက်ပိုင်း ဆယ်လ်ဖီပုံများကို မတင်တော့ရုံမက ပရိုမိုးရှင်းအတွက် Weibo ပို့စ်များပင်မတင်တော့ချေ။ ထိုသူက ဘယ်တော့မှ သူတို့နှင့် စကားပြောလာမည်နည်း။

ယင်းက ရွှယ်လင်က အမည်ပိုရလာ၍ဖြစ်နိုင်ပြီး ပထမဆုံး တွေ့ဆုံပွဲ၌ပင် အသားကုန်အော်ဟစ်ကြတော့၏။

ရွှယ်လင်သည် တွေ့ဆုံပွဲများကို စိတ်မဝင်စားတတ်သော်လည်း ၎င်းတို့အားလုံးနှင့် သိကျွမ်းနေပြီး စူးလျို့နျန်လည်း ထိုနေရာတွင်ရှိနေလေရာ လူလုံးထွက်ပြရမည်က ဖြစ်သင့်သည်ပင်။ မည်မျှပင် တွန့်ဆုတ်နေမိပါစေ၊ သူထိုနေရာတွင်ရှိနေလျှင် သူ့ကိုမြင်သူက ငေးကြည့်လာမည်ဖြစ်ပြီး ထိုသူကိုလွှတ်ထားပေးလိုက်ရုံပင်။ စူးလျို့နျန် သူ့အနားတွင်ရှိနေသည်ကိုပါ ထပ်ပေါင်းလိုက်ပါက အဆုံးသတ်ကြည့်စရာတစ်ခု ဖြစ်လာပြီး ပရိသတ်များကလည်း ငိုတော့မည်အထိပျော်ရွှင်သွားကြလေသည်။ စူးလျို့နျန်က သူ့အား ပရိသတ်များကို နှိပ်စက်သူဟု အမည်တပ်သည် - ပရိသတ်များကသူ့အား အလွန်သဘောကျကြသော်လည်း သူက ၎င်းတို့ကိုလုံးဝဂရုမစိုက်ဘဲ လေထဲသို့ အနမ်းများဖြန့်ကြဲပေးပြီး နောင်အနာဂတ်တွင် Weibo ပေါ်၌ ကောင်းကောင်းဆက်ဆံပေးရန် အတင်းအကြပ်ခိုင်းစေနေ၏။

ရုပ်ရှင်မိတ်ဆက်သည့် ပထမဆုံးနေ့တွင် ရိုက်ကူးရေးအဖွဲ့က ပရိသတ်များနှင့် အွန်လိုင်းပေါ်တွင် စုဝေးစေပြီး ရွှယ်လင်သည်လည်း ရုပ်ရှင်ရုံသို့လာရာတွင် စူးရွှမ့်ယန်ကိုပါ ခေါ်လာခဲ့သည်။

ရွှယ်လင်သည် ဖန်သားပြင်တွင် သူ့ကိုယ်သူမြင်ရတော့မည်ဖြစ်၍ စိတ်ဝင်တစားရှိနေ၏။

ဤခေတ်အခါတွင် ရုပ်ရှင်ကိုရှုစားရန် နည်းလမ်းအသွယ်သွယ်ရှိသည်။ လူသုံးအများဆုံးမှာ ရုပ်ရှင်ထဲတွင် ၎င်းကိုယ်တိုင်စိတ်နှစ်ထားခြင်းဖြစ်သည်။

 <ကောင်းကင်ဘုံသို့အမေး> က ထိုသို့သောရုပ်ရှင်မျိုးမဟုတ်၊ ကြည့်ရှုသူများမှာလည်း ဖန်သားပြင်ကိုကြည့်ရာတွင် မျက်မှန်းပါးပါးတစ်လက် တပ်ထားရန်လိုသည်။ ရွှယ်လင်က သူနှင့်စူးရွှမ့်ယန်းထိုင်ရန်အတွက် နှစ်ယောက်ထိုင်ခုံကို ရွေးလိုက်ပြီး ထိုင်လျှင်မကျပ်စေရန် သာမန်အနေအထားဖြင့်သာထိုင်လိုက်သည်။

ပါပါရာဇီများကတော်လွန်း၍ ၎င်းတို့လက်မှရှောင်နိုင်ရန်နှင့် အခြားသူများ သူတို့အားမမှတ်မိစေရန် သူ၏နည်းလမ်းမှာ ရုပ်ရှင်ပြီးသည်အထိ ပုန်းနေရန်ဖြစ်သည်။ ပရိသတ်များက ဇာတ်လမ်းထဲတွင်မြောနေပြီး ရွှယ်လင်ကမူ ရုပ်ရှင်ကိုသာကြည့်နေကာ ကျန်သည့်အပိုင်းများတွင်စူးရွှမ့်ယန်ကိုသာ ခပ်တိုးတိုးစကားပြောနေလေ၏။

စူးရွှမ့်ယန်က သူ့ကြောင့် အတော်လေးနှောင့်ယှက်ခံနေပြီး ရုပ်ရှင်ကိုကောင်းကောင်းမကြည့်ရပေ။ နောက်ပိုင်း၌ နှစ်ယောက်လုံးစိတ်လျှော့လိုက်ကြကာ တစ်ယောက်နှင့်တစ်ယောက်အပြန်အလှန်ကျီစယ်နေ၍ ဘေးမှလူများကဒေါသထွက်လာပြီး ၎င်းတို့ကိုခွေးစုံတွဲဟူ၍ ဆဲရေးလိုက်ကြတော့သည်။

နှစ်ယောက်သားက ထိုဆဲရေးသံများကို မကြားသလို ဟန်ဆောင်နေလိုက်ကြ၏။

<ကောင်းကင်ဘုံသို့အမေး> ရုပ်ရှင်ပြီးသွားသည့်အခါ ရွှယ်လင်သည် နှစ်ရက်ခန့်အနားယူပြီး ရှေးခေတ်ရုပ်ရှင် <မြစ်ပြင်ကျယ်> ရိုက်ကူးရေးအတွက် ကျူးရော့ချင်က ရိုက်ကူးရေးအတွက် ရှေးခေတ်ပစ္စည်းများပြင်ဆင်ရန် တစ်လခန့်အချိန်ယူချင်နေ၍ အဝတ်အစားများထုတ်ပိုးရတော့သည်။ သူ၏ရုပ်ရှင်က သုံးရမည့် ပစ္စည်းအင်မတန်များပြားကာ သရုပ်ဆောင်မင်းသားများလည်း အချိန်မီဇာတ်ကောင်နှင့် တသားတည်းဖြစ်သွားရန်အနှီသူကမျှော်လင့်နေခဲ့သည်။

ကံကောင်း၍ ထျန်းရွှမ်က အမြောက်အများရင်းနှီးထားပြီး သူ့အား ယခုလိုမျှော်လင့်ချက်ပေးထားသော်လည်း သရုပ်ဆောင်အများစုက တစ်လမျှ အချိန်ကုန်ခံပြီးလာရောက် လေ့ကျင့်နိုင်မည်မဟုတ်၊ သို့ဖြစ်၍ အနှီသရုပ်ဆောင်များက လူသစ်များနှင့် အများဆုံးဖွဲ့ထားခြင်းဖြစ်လိမ့်မည်။ အရံသရုပ်ဆောင်အများစုသည် နောက်ခံအော်ပရာအဖြစ် သရုပ်ဆောင်ရာတွင် အတွေ့အကြုံရှိကြပြီး ထိုသို့သောသရုပ်ဆောင်မျိုးက အလွယ်တကူအသားမကျပေ၊ ၎င်းတို့ကရုပ်ရှင်ကို နှစ်ပိုင်းခွဲခြင်းဖြင့်အဆုံးသတ်လိုက်လေရာ ပို၍ပင်ဒုက္ခများသွားတော့သည်။

ယခုကဲ့သို့သော ဆုံးဖြတ်ချက်မျိုးချလိုက်ခြင်းက သရုပ်ဆောင်ရော ကုမ္ပဏီအတွက်ပါစိန်ခေါ်မှုကြီးတစ်ခုပင်၊ သို့သော် ကံသီကာ ကျူးရော့ချင်က ၎င်းကိုအောင်မြင်ရမည်ဟုယုံကြည်ချက်ရှိနေပြီး ထျန်းရွှမ်ကလည်း ဤပရောဂျက်တွင် ငွေအမြောက်အမြားပုံအောထားလေရာ နှစ်ဖက်လုံးသည် ပျော်ပျော်ရွှင်ရွှင်ပူးပေါင်းလိုက်ကြပြီး တစ်လကြာ လေ့ကျင့်မည့်အစီအစဥ်မှာလည်း ဖြစ်မြောက်သွားတော့သည်။

ဇာတ်လိုက်ဖြစ်သောရွှယ်လင်သည် အခြားသူများထက် ပိုလေ့လာရန်လိုအပ်၏။ သခင်လေးချီသည် နေရာအစုံတွင် ပါရမီပါပြီး အနုပညာနှင့်သိုင်းပညာတွင်လည်း တစ်ဖက်ကမ်းခတ်ကျွမ်းကျင်သည်၊ သည့်အပြင် တိုင်းပြည်ရေးရာနှင့် စစ်ရေးနှစ်မျိုးလုံးတွင်လည်း စွမ်းစွမ်းတမံဆောင်ရွက်နိုင်သည်။ ကျူးရော့ချင်က တစ်လတည်းနှင့် သူ၏လေ့လာမှုက မလုံလောက်နိုင်ဟုတွေးခဲ့ပြီး ရွှယ်လင်ကိုပိုတိုးလုပ်ရန် အကြံပေးခဲ့သည်။ 

အရေးပေါ်အခြေအနေကြောင့် ရွှယ်လင်၏ စိန်ခေါ်လိုစိတ်က မြင့်တက်သွားခဲ့၏၊ သူသည် ရုပ်ရှင်အပေါ်တွင် တစ်ရာ့နှစ်ဆယ်ရာခိုင်နှုန်းအထိ အာရုံစိုက်လေ့လာခဲ့သည်။ သူနေ့တိုင်း၎င်းအပေါ်တွင်သာ အာရုံရောက်နေ၍ စူးရွှမ့်ယန်ပင် သူနှင့်စကားပြောရန်စိတ်မပါတော့ဘဲ မနက်အိပ်ရာထသည်နှင့် လူတစ်ယောက်လုံး လေထဲတွင်ပင်ပျောက်သွားတတ်သည်။

စူးရွှမ့်ယန်မှာ ဆယ်မျက်နှာကမ္ဘာကိုပင် ပိုမုန်းမိလာ၏။ ဘာကို 'အနုပညာလောကအားလျပ်တပြက်တိုက်ခိုက်ခြင်းလဲ'? ဒုက္ခပေးနေတာ အသိသာကြီး။ ရွှယ်လင်၏စွမ်းရည်အရ စူးရွှမ့်ယန်ကဲ့သို့ မှတ်ဉာဏ်များကို အမြန်ဆုံးပြန်ရနိုင်သည်။ သို့ထိတိုင် ဆယ်မျက်နှာကမ္ဘာ၏ဆုံးဖြတ်ချက်အရ ရုပ်ရှင်ဧကရာဇ်ဟူသောဘွဲ့ကိုရပြီးမှ သူ၏နောက်ဆုံးအမြှီးကိုရမည်ဖြစ်သည်။

ရွှယ်လင်မှာ အချိန်တစ်ခုအထိ အလုပ်များနေခဲ့သည့်တိုင် တကယ်တမ်းတွင် စူးရွှမ့်ယန်လည်းအငြိမ်မနေရပေ။ စူးမိသားစုအမည်နှင့် တောင်တစ်လုံးကိုဝယ်ခဲ့ပြီး တောင်တစ်ခုလုံး၏ဧရိယာကိုတိုးချဲ့ရန်ဟု အကြောင်းပြကာ တောင်ခြေတွင်ရှိနေသည့်ရွာကိုရွှေ့ပြောင်းခဲ့သည်။ တောင်သည်ဝေးလံသည့်နေရာတွင်ရှိပြီး လူအချို့သာနေထိုင်ကြသောကြောင့် ထိုနေ့တွင် စူးရွှမ့်ယန်မှာ အလုပ်တွင် အဆင်ပြေမှုရှိမရှိသွားကြည့်ခဲ့ပြီး လူများကိုယာယီနေရာချပေးရာတွင် အထူးစီစဥ်ပေးခဲ့သည်။

သူတို့အလုပ်များနေကြစဥ်မှာပင် အချိန်များက အလျင်အမြန်ကုန်ဆုံးသွားခဲ့သည်။ မျက်စိတစ်မှိတ်အတွင်း နှစ်ကုန်သို့ရောက်လာခဲ့ကာ အော်စကာဆုပေးပွဲအချိန်သို့ပင် ရောက်လာခဲ့ပြီ။ <မြစ်ပြင်ကျယ်> ထုတ်လုပ်ရေးက အလောတကြီးနှင့် အလျင်လိုနေသော်လည်း နောက်ဆုံးမိနစ်လေးမှ စာရင်းသွင်းနိုင်ခဲ့သည်။ မည်သည့်ရလဒ်ထွက်လာပါစေ၊ သူတို့လုပ်နိုင်သည့်အရာအားလုံး လုပ်ခဲ့ပြီးပြီပင်။

အော်စကာဆုပေးပွဲသည် ပေလီမိသားစုမှ ကြီးမှူးကျင်းပသည့် တစ်ကမ္ဘာလုံးဆိုင်ရာပွဲတော်ဖြစ်သည်။ ဤနှစ်ရုပ်ရှင်ပွဲတော်ကို ဖန်းပြည်ရှိ ပြဇာတ်ရုံကြီးတွင်ကျင်းပ၏၊ <မြစ်ပြင်ကျယ်> များက စိတ်မပျက်ခဲ့ရပေ အကောင်းဆုံး ရုပ်ရှင်ဓာတ်ပုံဆု၊ အကောင်းဆုံးတေးဂီတဆု၊ အကောင်းဆုံးဇာတ်ညွှန်းဆု၊ အကောင်းဆုံးအမျိုးသားသရုပ်ဆောင်ဆု၊ အကောင်းဆုံးဇာတ်ပို့ဆု နေရာငါးခုတွင် ဇကာတင်စာရင်းဝင်ခဲ့သည်။ ဇကာတင်အဆင့်သာရှိသေးသော်လည်း <မြစ်ပြင်ကျယ်> သည် ဤနှစ်ရုပ်ရှင်များအနက် မြင်းနက်တစ်ကောင်ဖြစ်လာမည်ဟု ခန့်မှန်းရ၏။

ရွှယ်လင်သည်ကား ဤနှစ်တွင် ရုပ်ရှင်နှစ်ကားရိုက်ကူးခဲ့သည်။ <ကောင်းကင်ဘုံသို့အမေး> နှင့် <မြစ်ပြင်ကျယ်> များ ဇာတ်ကားနှစ်ကားလုံးတွင် အကောင်းဆုံးသရုပ်ဆောင်ဆုဝင်ခဲ့သော်လည်း စူးလျို့နျန်က <ကောင်းကင်ဘုံသို့အမေး> တွင် စာရင်းဝင်ခဲ့ပြီး ရွှယ်လင်က <မြစ်ပြင်ကျယ်> တွင်ဝင်ခဲ့သည်။ အော်စကာရုပ်ရှင်ပွဲတော်တွင် ရုပ်ရှင်ဧကရာဇ်နေရာအတွက် တစ်ယောက်ပဲယှဥ်ပြိုင်ခွင့်ရှိသည်ဟု စည်းမျဥ်းမရှိဘဲ လူတိုင်းရုပ်ရှင်တစ်ကားအတွက် ဇကာတင်စာရင်းဝင်နိုင်သည်၊ ထျန်းရွှမ်သည်လည်း ဖန်းချင်းယွင်နေရာသရုပ်ဆောင်ထားသော ရွှယ်လင်အတွက် ဇကာတင်စာရင်းဝင်နိုင်သည်။

အကောင်းဆုံးအမျိုးသားဇာတ်ဆောင်ဆုအပြင် ရွှယ်လင်သည် အကောင်းဆုံး မျက်နှာသစ်သရုပ်ဆောင်နေရာတွင်လည်း  စာရင်းဝင်ခဲ့သေးသည်။ ရှန်းယွဲ့မှာ အကောင်းဆုံး အမျိုးသားသရုပ်ဆောင်ဆုကိုရရန်ပင် ခက်ခဲနေ၍ တစ်ဆုပင်ရမည်ဟု မထင်ထားတော့ပေ။

နှစ်တိုင်း ဇကာတင်ဝင်သည့်ဆုမှန်သမျှရတတ်သည်မှာ စူးလျို့နျန်အတွက်လည်း ထုံးစံကဲ့သို့ဖြစ်နေလေပြီ။ ဤနှစ်မှ အနုပညာလောကထဲသို့ဝင်လာပြီး နှစ်ကားသာသရုပ်ဆောင်ရသေးသော လူသစ်လေးအနေဖြင့် အကောင်းဆုံးအမျိုးသားဇာတ်ဆောင်ဆုနေရာကို သူနှင့်ယှဥ်ပြိုင်ရမည်က ရွှယ်လင်အတွက်ခက်ခဲနေနိုင်သည်၊ သို့သော်လည်း ရွှယ်လင်က ပွင့်လင်း၏။ စူးလျို့နျန်၏ဘေးတွင်ထိုင်ကာ မကြေညာခင်ဟာသလုပ်နေသေးသည်။

 "ကျွန်တော်ခနက ခင်ဗျားအစ်ကိုကြီးကိုပြောခဲ့တယ်..ကျွန်တော်ဆုရရင် သူနဲ့အတူတက်ယူမယ်ဆိုပြီးတော့..အခုတော့ မျှော်လင့်ချက်လေးနည်းနည်း ရှိလာပြီပဲ..."

စူးလျို့နျန်ကအေးခဲသွားပြီး ရွှယ်လင်၏လက်ကိုညှစ်ကာ ပြောလိုက်၏။ "ရှောင်လင်.. ငါ့ကိုဒီလိုမခြောက်ပါနဲ့ကွာ! ငါဆုကိုစိတ်ထဲမထားပါဘူး! မင်းမရရင် အစ်ကိုကြီးငါ့ကို သတ်လိုက်မယ်ဟ!"

ရွှယ်လင်က မျက်လုံးလှိမ့်လိုက်၏။ "ခင်ဗျားသရုပ်ဆောင်ပြမယ်ဆိုရင်တောင် ဆင်ခြေကောင်းကောင်းတော့ ရှာသင့်တယ်လေ...စူးရွှမ့်ယန်က ဘယ်တုန်းက ခင်ဗျားကိုဆိုးဆိုးရွားရွားဆက်ဆံလို့လဲ...အများဆုံးရှိလှ..သူ့ဒေါသကို သူ့ရဲ့ဒုတိယအစ်ကိုဆီ ပုံချရုံပေါ့..."

စူးလျို့နျန် တွေးဆနေပြီးမှ သူ၏အစ်ကိုကြီးဖြစ်သူက သူ့အပေါ်ကို တစ်ခါမှ ကြမ်းကြမ်းတမ်းတမ်းမဆက်ဆံခဲ့သည်မှာ အမှန်ပင်ဖြစ်ကြောင်း သဘောပေါက်သွား၏။ သူအမှားလုပ်မိလျှင်ပင် သူ့အစ်ကိုကြီး ဒုတိယအစ်ကိုကို အသင်အပြမှား၍ဟူကာ အပြစ်တင်တတ်သည်။ ထိုအကြောင်းတွေးကြည့်လိုက်သည့်အခါ သူကအပြစ်တင်ရခံရမည့်လူမဟုတ်သောကြောင့် ရှည်ရှည်ဝေးဝေးမတွေးတော့ပေ။ "မင်းပြောတာမှန်တယ်..ဒီလိုဆို ငါစိတ်ချလိုက်ပြီ.."

ဘေးတွင်ထိုင်ကာ တရှူးရှူးဖြစ်နေသော စူးရွှမ်းချင်: "....." 

သူ၏ညီလေးက ယခုရက်ပိုင်းအတွင်း ပို၍ပိုကာ ယုတ္တိကျကျ တွေးခေါ်တတ်လာပြီပင်။ ရွှယ်လင်နှင့် အချိန်ကုန်လိုက်ရ၍ သူ၏စိတ်အခြေအနေက ပို၍အနည်းငယ်ကြမ်းတမ်းလာပုံရသည်။ တကယ်ကို မကောင်းသည့်အကျင့်ဆိုသည်မှာ တတ်လွယ်လေ၏။

"နောက်ထပ် သီးသန့်ဆုပေးပွဲရှိပါသေးတယ်...ဒီနှစ်တော့ ကျွန်တော်တို့ အကောင်းဆုံးလူသစ်သရုပ်ဆောင်ဆုနဲ့ စလိုက်ကြရအောင်ဗျာ ~" စင်ပေါ်ရှိအစီအစဥ်တင်ဆက်သူက သူမလက်ထဲမှကတ်ကိုကြည့်ကာ  တောက်ပစွာပြုံးလိုက်သည်။ "ဒီနှစ်တွေမှာ အရမ်းတော်တဲ့ မျက်နှာသစ်သရုပ်ဆောင်တွေ ဘယ်လောက်ထွက်လာခဲ့လဲ...ပြီးတော့ ဘယ်လောက်အံ့ဩစရာကောင်းတဲ့ ရုပ်ရှင်တွေ ထွက်လာခဲ့ပါသလဲ?  စာရင်းဝင်သရုပ်ဆောင်တွေကို ကြည့်လိုက်ကြရအောင်~"

ဖန်သားပြင်ကျယ်ပေါ်တွင် ဗီဒီယိုအတိုလေးအားပြသလာသည်။ စူးလျို့နျန်က ရွှယ်လင်ဘက်သို့ကိုင်း၍မေးလာ၏။ "ရှောင်လင်...စိတ်လှုပ်ရှားနေလား..ဒီနှစ်မှာ ဇကာတင်စာရင်းဝင်တဲ့ အကောင်းဆုံးလူသစ်သရုပ်ဆောင်ငါးယောက်တောင်ရှိတယ်..ဒါပေမဲ့ လေးယောက်ကမင်းကိုမယှဥ်နိုင်ဘူး...မင်းကျိန်းသေဆုရလိမ့်မယ်~" သူပြောပြီးသည်နှင့် စင်ပေါ်မှကြေညာသံထွက်လာလေ၏။

"ဒီနှစ်ရဲ့ အကောင်းဆုံးမျက်နှာသစ်သရုပ်ဆောင်ဆုရှင်ကတော့! <ကောင်းကင်ဘုံသို့အမေး> ရွှယ်လင်ပါ!" လက်ခုပ်တီးသံများက မိုးချုန်းသံနှယ် ကျယ်လောင်စွာထွက်ပေါ်လာပြီး တိုက်ရိုက်ထုတ်လွှင့်နေသောကင်မရာက ရွှယ်လင်ကိုဦးတည် ရိုက်ကူးလာသည်။ စူးလျို့နျန်သည် တမုဟုတ်ချင်း ခပ်မတ်မတ်ထိုင်လိုက်ပြီး ရွှယ်လင်ကိုပြုံးကာဖက်လိုက်သည်။

ရွှယ်လင်ကသူ့အား ခဏသာဖက်လိုက်ကာ မတ်တပ်ရပ်၍ ဖန်းယွဲ့ကျီနှင့်လက်ဆွဲနှုတ်ဆက်လိုက်၏၊ စတိတ်စင်ပေါ်သို့ သွားသည့်တစ်လျှောက် ရိုက်ကူးရေးအဖွဲ့များနှင့်နှုတ်ဆက်သွားလေသည်။ ရွှယ်လင်သည် စတိတ်စင်ပေါ်သို့ သွားနေချိန်တွင် ပျော်နေ၍ လမ်းလျှောက်ရာတွင်ပင် မြောက်ကြွကြွဖြစ်နေခဲ့၏။

လက်ထဲတွင် လေးလံသောဆုကို ကိုင်ထားရင်း စတိတ်စင်ပေါ်တွင် ဦးညွတ်နှုတ်ဆက်လိုက်ပြီး ပြုံးကာဖြင့် ကင်မရာဘက်သို့အနမ်းပေး၍ပြောလိုက်သည်။ 

"ကျွန်တော့်ကို အားပေးစကားကိုပြောခဲ့ကြတဲ့ ဒိုင်လူကြီးမင်းတို့ကိုကျေးဇူးတင်ချင်ပါတယ်...ဒီနှစ်ကကျွန်တော့်အတွက် အရမ်းအဓိပ္ပာယ်ရှိတဲ့နှစ်လေးပါ...ကျွန်တော််အခွင့်အရေးသစ်တွေရခဲ့တယ်..ဘဝအသစ်စနိုင်ခဲ့တယ်..လူသစ်တွေနဲ့တွေ့ခဲ့ပြီး အလုပ်အကိုင်သစ်လည်းရခဲ့ပါတယ်..ကျွန်တော့်အနားမှာရှိနေပေးခဲ့ကြတဲ့ လူတွေကိုကျေးဇူးတင်ပါတယ်..ပြီးတော့ ကျွန်တော့်ကို အသစ်တဖန်မွေးဖွားလာအောင်လုပ်ပေးခဲ့တဲ့ ချစ်ခြင်းမေတ္တာတွေအတွက်လည်းကျေးဇူးတင်ပါတယ်ခင်ဗျာ..."

တိုက်ရိုက်ထုတ်လွှင့်နေသည့် အွန်လိုင်းပြသရာနေရာတွင် သူလေပေါ်အနမ်းပေးလိုက်၍ မှတ်ချက်များပေါက်ကွဲမတတ်ဖြစ်နေ၏။ "အား.....နတ်ဘုရားလေးကငါ့ကိုနမ်းသွားတယ်တော့...!"

 "လူကိုလွှတ်လိုက်စမ်း...ငါပါမယ်...!"

 "ဝူး...ဝူး....ဝူး..ငါအရမ်းပျော်တာပဲ...ငါအနမ်းခံလိုက်ရပြီ!" 

၎င်းတို့အပြင် အခြားသောတူညီသည့်မှတ်ချက်များလည်း အခန်းထဲရောက်လာ၏။ အချို့လူများက သူ့အားမသိကြသော်လည်း မှတ်ချက်အတွဲလိုက်ကို ကြည့်ပြီးသည့်အခါ သူနှင့်ပတ်သတ်၍ အနည်းနှင့်အများသိသွားကြခဲ့ကြသည်။

ညအချိန်က ယခုလိုပင်ပြီးဆုံးသွားပြီး သူသည်လည်း ပရိသတ်အသစ်များ ရလာတော့မည်ထင်၏။ 

ဆုလက်ခံရယူသည့် စကားပြောကြားပြီးနောက် ရွှယ်လင်သည် ကိုယ်ကိုကိုင်းညွတ်ရင်း အနောက်ဆုတ်သွားလိုက်သည်။

သူသည် အလျင်မလိုဘဲ စင်ပေါ်မှဆင်းလာပြီး အင်မတန်တည်ငြိမ်နေသောပုံစံနှင့် စိတ်လှုပ်ရှားခြင်းလည်းမရှိ။ လူအများစုက သူ၏ယခုပုံစံကြောင့် သဘောကျနေကြပြီး ဆုက သူ့အတွက် ပုဂ္ဂိုလ်ရေးအရအရေးမကြီးသည့်သဘောထားကြောင့် မနက်ဖြန်သတင်းစာခေါင်းစီးပိုင်းများတွင် သူ့အားပိုပိုသာသာရေးကြနိုင်သည်။ သူနှင့်ပတ်သတ်သော မည်မျှသေးငယ်သည့်သတင်းပင်ဖြစ်ပါစေ သတင်းသမားများက သူ၏အားနည်းချက်ကိုရှာဖွေပြီး သူနှင့်ပတ်သတ်သောအရာတိုင်းကို သတင်းရေးကြလိမ့်မည်။

ထိုင်ခုံသို့ပြန်ရောက်လာသည့်အခါ ရွှယ်လင်မှာ သက်ပြင်းရှည်ကြီးအား မှုတ်ထုတ်မိချေ၏။ စူးလျို့နျန်ကသူ့အား ရေးတစ်ဘူးကမ်းပေးလာပြီး မေးလိုက်သည်။ "စင်ပေါ်တက်ရတာဘယ်လိုနေလဲ..."

ရွှယ်လင် ရေတစ်ငုံစုပ်သောက်ကာ တည်တည်ငြိမ်ငြိမ်ပင်ပြန်ဖြေလိုက်သည်။ "ကျွန်တော် အကောင်းဆုံးအမျိုးသားဇာတ်ဆောင်ဆုရမှပဲ ထပ်မေးတော့...အဲဒီတော့မှပြောပြမယ်.."

စူးလျို့နျန် ကျစ်သပ်လိုက်သည်။ ဆုရ၍ သူ့ထံတွင် ခံစားချက်အထွေအထူးမရှိ။ တဖက်တွင်ပြောရလျှင် ထိုပုံမှန်ဆုကိုရလိုက်၍လည်း သက်သေပြစရာမရှိပေ။ "မင်းသရုပ်ဆောင်ကောင်းတာကိုငါသိပါတယ်.ပြီးတော့ မင်းရဲ့ဇာတ်ညွှန်းကပိုတောင်ကောင်းသေးတယ်...ဒါပေမဲ့ မင်းအခုပြောပြီးပြီနော်...မရတော့မှ ကိုယ့်ပါးကိုယ်ပြန်မရိုက်နဲ့..သိပ်မတော်လေ ကောင်းလေပဲ..."

ရွှယ်လင် သူ၏နက်ကတိုင်ကိုညှိလိုက်ပြီး စတိတ်စင်ပေါ်မှ စိတ်လှုပ်ရှားစရာ ဖျော်ဖြေမှုကို ကြည့်ရှုနေလိုက်သည်။ "ကျွန်တော် ဆုမရရင်..ခင်ဗျားအစ်ကိုကြီးရဲ့ တစ်လကြာအောင် ပြင်ဆင်ထားရတာတွေက အလကားဖြစ်ကုန်မှာပေါ့...သူက ကျွန်တော်ဆုရတာနဲ့ အပြင်မှာဟယ်လီကော်ပတာနဲ့စောင့်နေမှာ..အဲဒါမှ ချက်ချင်းထွက်ပြေးလို့ရမှာလေ..."

စူးလျို့နျန်: "......" သူဘယ်လိုလုပ် စကားသုံးခွန်းတည်းနဲ့ အစ်ကိုကြီးကို ဆွဲထည့်နိုင်ရတာလဲ! ရှောင်လင်.. မင်းအပိုင်သိမ်းခံလိုက်ရပြီလား!။

အခြားသူ၏မျက်နှာလေးက သူ့အပေါ် အာနိသင်ရှိသွားပုံရသည်၊ စူးလျို့နျန်မှာ ထိုသို့သော ချဥ်စူးနေသော အနံ့များပါနေသည့် အချစ်များဖော်ပြတတ်ပုံက သူ့မျက်နှာကိုဖြတ်ရိုက်နေသလို ခံစားလိုက်ရတော့၏။ တစ်ခုခုတော့မှားနေပြီ! နောင်တွင် လူရှေ့မျက်နှာထွက်မပြခင် အခြေအနေကိုအရင်စစ်ဆေးကြည့်ရမည်၊ ယခုကဲ့သို့ မျက်ကန်းအချစ်မျိုးက တကယ်ကိုကြောက်စရာကောင်းပြီး နောက်ပိုင်းတွင် သူပိုပြီးအာရုံစိုက်ခံရနိုင်သည်!။

ဆုများကို တစ်ဆုပြီးတစ်ဆုချီးမြှင့်သွားသည်။ အကောင်းဆုံးအမျိုးသမီးဇာတ်ဆောင်ဆုအတွက် သံသယဖြစ်စရာမလိုပါချေ။ ဆုရရှိသူမှာ ကျီဇီယန်ဖြစ်ပြီး စစ်ပွဲအကြောင်းရိုက်ကူးထားသော ဇကာတင်စာရင်းဝင်ရုပ်ရှင်ကြောင့်ရရှိသွားခြင်းဖြစ်သည်။ အချို့သောအကြောင်းပြချက်များကြောင့် ရွှယ်လင်သည် ကျီဇီယန်ကိုတွေ့ချိန်တွင် သူမခေါင်းပေါ်၌ ရောင်ခြည်ထွက်နေသလိုခံစားရ၏။ ၎င်း၏အလင်းရောင်ကမှိန်သော်လည်း တကယ်ကို ရောင်ခြည်တန်းပင်။ သူ ယွမ်ချွမ်းပိုင်၏ချစ်သူ ပေလီရှောက်ကျွယ့်နှင့် နောက်ဆုံးတစ်ခေါက်တွေ့စဥ်ကလည်း ထိုအတိုင်းမြင်ခဲ့ရဖူးသည်။

အစတွင် သူအမြင်မှားနေသလိုတွေးမိသော်လည်း စနစ်က ၎င်းကို ဇာတ်လိုက်၏အရောင်အဝါဟုခေါ်ကြောင်း ရှင်းပြခဲ့၏။ သို့ထိတိုင် ၎င်းတို့၏ရောင်ဝါက ဇာတ်ကွက်များကြောင့် ပျက်စီးသွားရလေရာ အလင်းရောင်က မှိန်ဖျော့နေရခြင်းဖြစ်၏။ မဟုတ်ပါက မျက်လုံးကျိန်းလောက်သည်အထိ တောက်ပနေခဲ့ပေမည်။

"ဒီနှစ်အတွက် အကောင်းဆုံးအမျိုးသားသရုပ်ဆောင်ဆုနေရာကို ယှဥ်ပြိုင်ကြတာကြမ်းတမ်းတယ်...အရင်က ရှင်ရှင်ဧကရာဇ်ဆုရဖူးတဲ့ မင်းသားဟောင်းတွေပါနေတာ..မကြာခဏ ဇကာတင်စာရင်းဝင်ဖူးတဲ့ သူငယ်ချင်းဟောင်း လူသစ်တွေလည်းပါပါတယ်..." 

အကောင်းဆုံး အမျိုးသားသရုပ်ဆောင်ဆုအတွက် ကြေညာပေးရန်တာဝန်ရှိသူမှာ အကောင်းဆုံးအမျိုးသမီးသရုပ်ဆောင်ဆုရှင် ကျီဇီယန်ဖြစ်လေသည်။ သူမသည် ငါးမြှီးဂါဝန်ရှည်ကိုဝတ်ထားပြီး သူမ၏လှိုင်းတွန့်ဆံပင်ရှည်များက လေထဲတွင် ဝဲလွင့်နေ၏။ သူမ၏ အသွင်အပြင်က အထက်တန်းကျကာ သိမ်မွေ့ပြီး နူးညံ့ပုံလည်းရ၏။ "ဒီနှစ်ဆုရှင်က ဘယ်သူရမှာလဲ..." သူမပြောအပြီးတွင် ဇကားတင်စာရင်းဝင်သရုပ်ဆောင်များ၏ ဗီဒီယိုကလစ်တိုလေးကိုပြသလာသည်။

ဇကာတင်စာရင်းဝင်မင်းသားများ၏ အင်အားမှာ အထင်သေး၍မရချေ။ သရုပ်ဆောင်စွမ်းရည် ကိုယ်စီရှိပြီး အနုပညာလောကဆိုသည်မှာ စင်ပေါ်တွင်တစ်ယောက်တည်နိုင်ရုံနှင့် မရပေ။ ဆုလိုချင်လျှင် လိုအပ်သောအားအင်ရှိနေမှဖြစ်မည်။

ကျီဇီယန် လက်ထဲမှစာအိတ်ကိုဖွင့်လိုက်သည်။ အမည်ကိုမြင်လိုက်ရသည့်အခါ သူမမျက်ခုံးများက သာသာလေးမြင့်တက်သွား၏။

"ကောင်းပါပြီ..ဒီနေ့ညရဲ့ အကောင်းဆုံးအမျိုးသားသရုပ်ဆောင်ဘက်က ရပ်တည်ပေးလိုက်ရအောင်__"