Chapter 225 🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Chapter 225

🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Chapter 225

4.12 - တွေ့တယ်။ ချစ်ခဲ့ကြတယ်။ ပြီးတော့ အခါခါဆုံတွေ့ခဲ့ကြတယ်။

စူးရွှမ့်ယန်နှင့် ခက်ခဲသည့်တိုက်ပွဲတစ်ရပ်ကို ဆင်နွဲရတော့မည်ဟု ယူဆလိုက်၍ဖြစ်နိုင်သည်၊ ရွှယ်လင်က ပုံမှန်အတိုင်း ဟန်ချက်ညီအောင် ထိန်းလိုက်နိုင်ပြီး ဖြည်းဖြည်းချင်းစတင်စားနေလေ၏။

စူးရွှမ့်ယန်က သူ၏အရေးမစိုက်သည့်ပုံစံကြောင့် မှင်သက်သွားကာ အူမြူးနေသည့်ပုံစံကို ပြန်ထိန်းသိမ်းလိုက်သည်။ သူ့ကိုယ်သူ တစ်ယောက်တည်း ဓာတ်ပုံများအားကြည့်နေရမည်ကို အဓိပ္ပာယ်မရှိဟုတွေးလိုက်မိ၏။ ဓာတ်ပုံများက လူအစစ်မျှ သူ့အားပျော်အောင်မလုပ်ပေးနိုင်ပေ။ အနှီသူနှင့်ပတ်သက်၍ အင်မတန်စိတ်ဝင်စားဖွယ်ကောင်းပြီး သံသယဖြစ်နိုင်သည့် ကိစ္စများရှိနေကာ ၎င်းတို့ကိုသိရသည်အထိ ကျိန်းသေပေါက်အဖြေရှာရမည်ပင်။

သူ့လက်ထဲမှ မလွတ်မြောက်နိုင်သည့်အရာက မည်သည့်အရာများ ဖြစ်နိုင်မည်နည်း။ သူ့အပိုင်မဟုတ်ခဲ့လျှင်ပင် သူ၏စိတ်ဝင်စားမှုများကိုပေါက်ဖွားလာစေခဲ့ရာ စွန့်လွှတ်မည့်အတွေးများကိုလည်း တွေးမိတော့မည်မဟုတ်ပေ။

*****

ရွှယ်လင် ရိုက်ကွင်းပေါ်က ယခုမှပြန်လာခဲ့သော်လည်း မန်နေဂျာက နေ့စဥ် သူ့ပစ္စည်းများကို သိမ်းပေးထားသောကြောင့် အခက်အခဲမရှိခဲ့ပေ။ သူသည်ပုံမှန်အတိုင်း အဝတ်အစားအိတ်ကိုဖွင့်ကာ သူ့ပစ္စည်းများကိုပြန်လည်ထည့်သိမ်းလိုက်သည်။ စူးရွှမ့်ယန်က ပစ္စည်းပို့ပေးသောစက်ရုပ်ကို ပြန်သိမ်းပေးနေစဥ် သူက စားသောက်ပြီး သူ့အခန်းကိုပြန်သွားခဲ့သည်။ နှစ်ယောက်လုံးက ခဏတစ်ဖြုတ်ခန့် ကိုယ့်အလုပ်ကိုယ်လုပ်နေခဲ့ကြ၏။

သို့သော်လည်း အဆိုပါအေးချမ်းမှုက ယာယီမျှသာ။ လိုက်လျောညီထွေဖြစ်နေမှုလေးက စူးရွှမ့်ယန်းယတစ်ယောက် သခင်လေးရွှယ်လင်၏အိပ်ခန်းထဲသို့ သူ့အဝတ်အစားအိတ်ကြီးသယ်လာစဥ်မှာပင် ပျက်စီးသွားခဲ့ရ၏။ ရွှယ်လင်ထံတွင် အံဆွဲပါသောဗီရိုတစ်လုံးရှိပြီး အားလုံးကပြည့်နေလေပြီ။ သူအဝတ်အစားအိတ်ကို ဖယ်မည်အပြုတွင် ခေါင်းလှည့်လိုက်လေရာ စူးရွှမ့်ယန်ကသူ့အဝတ်အစားအိတ်ကို သူ၏အိတ်ဘေးတွင်ထားလိုက်သည်ကိုမြင်လိုက်ရသည်။ သူက ဆောင့်ကြောင့်ထိုင်ကာ ၎င်းကိုဖွင့်ရန်ကြိုးစားနေလေ၏။ အနှီသူက အသေအချာပင် သူ့ပစ္စည်းများကို ဖယ်ပစ်ရန်စီစဥ်နေခြင်းပင်။

ရွှယ်လင်မှာ သူ့ကိုအမြန်တားလိုက်ရသည်။ "ခဏလေး! ခင်ဗျားအခုဘာလုပ်တော့မလို့လဲ..."

စူးရွှမ့်ယန်းက အပြစ်ကင်းသည့်မျက်နှာလေးဖြင့်ပြန်ဖြေလာ၏။ "မင်းပဲ ကိုယ့်ကိုဒီမှာနေလို့ရတယ်ဆို.."

ရွှယ်လင်က သူ၏အဝတ်အစားအိတ်ကိုလက်ညှိုးထိုးပြလိုက်သည်။ "ခင်ဗျားက ခဏပဲနေမယ်လို့ပြောခဲ့တာလေ! ခင်ဗျားရဲ့အဝတ်အစားအိတ်ထဲက ပစ္စည်းတွေကိုဒီအတိုင်းထားလိုက်ပါလား? အပြင်ကိုထုတ်နေစရာမှမလိုတာ..!"

သူသည်ကား ခေါင်းမော့ရင်ကော့ကာဖြင့်ပြောနေပြီး တစ်ကိုယ်လုံးက စိတ်တိုလွန်း၍တုန်ယင်နေလေ၏။ သို့သော် ဒေါသအလျောက် အတင်းလက်မခံသည့် ပုံစံပြလိုက်သည့်အခါ ကို့ရို့ကားယားဖြစ်သွားခဲ့ရသည်။ "ခင်ဗျားပစ္စည်းတွေထားဖို့ ကျွန်တော့်ဗီရိုထဲမှာ နေရာမရှိတော့ဘူး!"

စူးရွှမ့်ယန်မျက်လုံးများက အဝတ်ဗီရိုအပေါ်ရောက်သွားလေသည်။ ရွှယ်လင်ကား သရုပ်ဆောင်တစ်ယောက် ဖြစ်နေသောကြောင့် အိပ်ခန်းကို အဝတ်အစားလဲခန်းနှင့် တွဲလျက်ဆင်ထားလေသည်။ နံရံများကို စင်များနှင့်ကပ်ထားပြီး တည်ဆောက်ထားပုံက ပြီးပြည့်စုံသည်ထက်ပင်ပိုသေးသည်၊ သို့သော် ဗီရိုထဲတွင် အဝတ်အစားအများအပြားမရှိဘဲ စင်အများစုကလည်းရှင်းလင်းနေ၏။ ရွှယ်လင်မှာ အဝတ်အစားအများအပြားကို ရှင်းထုတ်ပြီးမှ ဆန်းကြယ်ပြီးရှင်းပြရခက်သောခံစားချက်ကိုသိရှိသွားကာ ၎င်းကသူ၏ အလှအပခံစားတတ်မှုကို မနှစ်သိမ့်ပေးနိုင်ခဲ့ပါချေ။ ထိုအချိန်က သူဘာကြောင့် ထိုပစ္စည်းများကိုဝယ်လာမိမှန်း နားမလည်နိုင်တော့သော်ငြား သူ့အားအရှက်ခွဲနေသလိုခံစားရစေကာ မျက်နှာကိုပင် ဓားဖြင့်လှီးပစ်ချင်လာရတော့သည်။

ယခုတော့ ၎င်းကအလွတ်ဖြစ်သွားပြီ၊ ကြည့်ရုံနှင့်ပင် ရှက်လာမိလေ၏။ စူးရွှမ့်ယန်က ဘာကိုမှမပြောဘဲ ဗီရိုအလွတ်ကိုကြည့်ရုံသာကြည့်ပြီး ဘာပြောရမှန်းမသိ၍ နားရွက်များနီလာနေသော ရွှယ်လင်ကိုပြန်ကြည့်လိုက်သည်။ သူသည် ရယ်ချင်နေသောစိတ်ကို ထိန်းထားလိုက်ရပြီး ပစ္စည်းများကို စတင်ရှင်းရတော့၏။

ယခုသူရယ်လိုက်လျှင် ရွှယ်လင်က ချက်ချင်းပေါက်ကွဲသွားမည်မှန်း သူသေချာသိနေသည်။ အနှီသူစိတ်ဆိုးနေသည်ကို ကြည့်ရသည်မှာ အင်မတန်ပျော်စရာကောင်းလောက်မည်ဆိုသော်လည်း အိမ်ထဲဝင်နိုင်သေးရုံပင်ရှိသေးပြီး မောင်းထုတ်ခံရမည့်အရေးမှကာကွယ်ရန် သူ၏ဒေါသကို သွားမဆွလိုက်ခြင်းကပိုကောင်းလိမ့်မည်။

ပစ္စည်းထားသိုသည့်ပြဿနာက ရှင်းလင်းသွားသော်လည်း လူနှစ်ယောက်အတူစတင်နေထိုင်ချိန်တွင် ပစ္စည်းထားသိုသည့်ကိစ္စတစ်ခုတည်းနှင့် မပြီးသွားပေ။ နေ့စဥ်သုံးပစ္စည်းများနှင့် အခြားပစ္စည်းများကိုပါ ပြင်ဆင်ရန်လိုအပ်နေသေးသည်၊ နှစ်ယောက်သား အိပ်စက်ရမည့် ပြဿနာလည်းရှိသေး၏။ ၎င်းတို့က တစ်ခုပြီးတစ်ခု ဖြေရှင်းရမည့်ကိစ္စများပင်။

စူးရွှမ့်ယန်က ယူလာသည့်ပစ္စည်းများကိစ္စကိုဖြေရှင်းနေပြီး နေ့စဥ်လိုအပ်သည်အသုံးအဆောင်များကို အပြင်ထုတ်နေသည်။ ပုံမှန်တွင် သူသာမန်အသုံးပြုနေကျပစ္စည်းများကိုမယူလာသောကြောင့် အိမ်တွင်အပိုရှိလားဟု ရွှယ်လင်ကိုမေးလာလေသည်။ နောက်ဆုံးတွင်တော့ ၎င်းတို့မှာ ခွက်၊ မျက်နှာသုတ်ပဝါနှင့် အခြားပစ္စည်းများကို အတူသုံးရန်ဖြစ်လာလေသည်။ ၎င်းတို့က အတွဲလိုက်ပစ္စည်းများနှင့်ပင်တူပြီး ရွှယ်လင်ကို အနည်းငယ်စိတ်ဓာတ်ကျစေခဲ့သည်။

ဒီလိုဖြစ်လာမယ်မှန်းသာသိရင် အိမ်မှာပစ္စည်းအပိုတွေဝယ်မထားခဲ့ပါဘူး! အခုတော့ ကောင်တာပေါ်မှာ သူပစ္စည်းတွေတင်နေတာကို စူးရွှမ့်ယန်က ပြုံးပြုံးကြီးကြည့်နေပြီ... လူရိုက်ချင်စိတ်တောင်ပေါက်လာပြီ! ။

ညရောက်သည်နှင့် ရွှယ်လင်ကရေချိုးသန့်စင်ပြီး အပိုပစ္စည်းများကို ကူရှာပေးရသည်။ သူရေချိုးဝတ်ရုံနှင့် အပြင်ထွက်လာသည့်အခါ စူးရွှမ့်ယန်က သူ့အလုပ်သူလုပ်ရန်စာဖတ်ခန်းသို့ ဝင်သွားလေသည်။ ရွှယ်လင် အခန်းရှေ့မှဖြတ်သွားသည့်အခါ ထိုသူကအချိန်တစ်ခုထိ အိမ်ပြန်လာဦးမည်မဟုတ်ကြောင်း ပြောနေသည်ကို ကြားလိုက်ရ၏။ သူထိုကိစ္စကို စိတ်မဝင်စားနေဘဲ ခေါင်းသုတ်ရန် တဘက်စကို ခြေဗလာနှင့်ပင် သွားယူလိုက်ရသည်။

နေ့စဥ်ဘဝတွင် သူသည်သက်သောင့်သက်သာဖြင့် ဖြတ်သန်းတတ်လေ၏။ ပစ္စည်းတစ်ခုကို ကြုံရာထားတတ်ပြီး ရေချိုးပြီးအပြင်ထွက်လာလျှင်လည်း ရေခြောက်အောင်မသုတ်တတ်ပေ၊ သို့ဖြစ်၍ သူဖြတ်သွားသည့်နေရာရှိ ကြမ်းပြင်တွင် ရေစက်များကျန်နေခဲ့တတ်သည်။ သန့်ရှင်းရေးလုပ်ရသည့် စက်ရုပ်မှာ သူသွားရာနောက်သို့ အမြှီးတန်းနှယ်လိုက်ကာ တစ်အိမ်လုံးအနှံ့ ရေစက်များကိုသန့်ရှင်းပေးရရှာ၏။ ထိုပုံစံကိုမြင်ရသည့်အခါ စူးရွှမ့်ယန်းမှာ ရယ်ရမလားငိုရမလားပင် မသိတော့ချေ။

မတိုင်ခင်က သူတဘက်ထားခဲ့မိသည့်နေရာကို သတိရလိုက်သည့်အခါ ရွှယ်လင်ကိုသွားပြေးဆွဲတော့သည်။

ရွှယ်လင်မှာ စူးရွှမ့်ယန်း၏ ဆွဲလားရမ်းလားနှင့်ခေါင်းခြောက်သည်အထိ သုတ်ပေးခြင်းကိုခံလိုက်ရပြီး မပြီးမချင်း လျှောက်သွားနေခြင်းကိုအတားခံလိုက်ရတော့သည်။

သူသည်ကား ထိုနေရာတွင်တောင့်တောင့်ကြီးရပ်နေရကာ သန့်ရှင်းရေးအရုပ်သည်လည်း သူ့ခြေထောက်အနားတွင် ခုန်ပေါက်လှည့်ပတ်နေပြီးမှ ထွက်ပြေးသွားလေသည်။ ရွှယ်လင်သည်ကား အသက်ပြင်းပြင်းရှူရင်း စူးရွှမ့်ယန်းကိုအမြန်လုပ်ပြီး ရေသွားချိုးရန်ဆော်ဩလိုက်ရချေ၏။

နှစ်ယောက်လုံး ရေချိုးသန့်စင်ပြီးကြသည့်နောက် နောက်ထပ်ပြဿနာတစ်ခုကို ကြုံတွေ့ရပြန်သည်။ ရွှယ်လင် ဤတိုက်ခန်းကိုဝယ်ခဲ့စဥ်က အိပ်ခန်းတစ်ခန်းသာပါသော တိုက်ခန်းအမျိုးအစားအဖြစ် ပြင်ဆင်ခဲ့မိသည်။ ယင်းသည် မာစတာအိပ်ခန်းတစ်ခန်းသာရှိပြီး အတော်လေးကြီးမားကာ ကုတင်နှစ်လုံးပင်ဝင်ဆံ့သည်။ ထိုအခြင်းအရာမှာ ရွှယ်လင်တစ်ယောက်တည်နေရစဥ်ကကိစ္စမရှိ၊ ယခုမူ စူးရွှမ့်ယန်းက သူနှင့်အတူနေရန်ဖြစ်လာပြီ။

သူဘယ်မှာအိပ်ရမှာလဲ?။

ရွှယ်လင်မှာ ဤအခြေအနေတွင်ပင် အတော်လေး တည်ငြိမ်နေလေသည်။ သူသည် အိပ်ရာထဲမှစောင်ကိုဆွဲယူလိုက်ပြီး ဆိုဖာပေါ်သို့ပစ်တင်လိုက်၏။ "လောလောဆယ်တော့ ဆိုဖာပေါ်မှာပဲအိပ်လိုက်ဦး...မနက်ဖြန်ကျမှ တစ်ယောက်အိပ်ကုတင်ကို စုံစမ်းကြည့်ကြမယ်..."

စာဖတ်ခန်းက မကျယ်ပေ။ စူးရွှမ့်ယန်က အစကတည်းက အိပ်ခန်းထဲသို့ပြောင်းနေရန်ရည်ရွယ်ထားခဲ့သည်။ အခြားစာဖတ်ခန်းတစ်ခန်းရှိသေးလေရာ သူဆိုဖာပေါ်တွင် ကပ်သတ်အိပ်ရလျှင် သူ့အမည်ကိုဇောက်ထိုးဖြစ်အောင်သာ ရေးလိုက်တော့မည်။

သဘောတူညီမှုရရန် အချိန်ခဏလေးသာကြာမြင့်လိုက်သည်။ စူးရွှမ့်ယန်က ကုတင်ဝယ်မည့်ကိစ္စကို အမြန်ဖြတ်ပြောလိုက်လေ၏။ "ကိုယ်ဒီမှာအိပ်မှတော့...အိပ်ရာဝယ်ဖို့ကိုကိုယ်ပဲတာဝန်ယူရမှာပေါ့...မင်းစိတ်ချပါ.."

ရွှယ်လင်က ထိုသူ အခြေအနေကိုနားလည်သွားပြီဟုယူဆကာ မျက်ခုံးပင့်၍ အနှီသူကိုအပြင်တွင်ထားရစ်ခဲ့ပြီး အိပ်ခန်းတံခါးကိုပိတ်ကာ သူ့အိပ်ရာပေါ်သို့ခုန်တက်သွားတော့သည်။

ထိုအချိန်တွင် စူးရွှမ့်ယန်က အိပ်ခန်းအပြင်တွင်ကျန်ရစ်ခဲ့သော်လည်း လက်မလျှော့သေးပေ။ စာဖတ်ခန်းထဲသို့ လှည့်ဝင်သွားလေ၏။ အစက သူ၏ညီငယ်လေးကို မနှောင့်ယှက်ချင်လင့်ကစား အချို့အရာများက အမြန်ဖြေရှင်းလေပိုကောင်းလေပင်။

စူးလျို့နျန်မှာ သူ၏အစ်ကိုကြီးဖြစ်သူအတွက်နောက်ဆုံးဇာတ်ညွှန်းကို အချိန်ပိုဆင်းကာ ပြီးစီးအောင်လုပ်နေရရှာသည်။ သူ၏မတော်တဆအမှားလေးကို ပြန်သတိရမိတိုင်း နာကျင်ရလွန်း၍ မျက်ရည်ကျရလုနီးပါးပင် နောင်အနာဂတ်တွင် သူ့အစ်ကိုကြီး၏ကိစ္စများတွင် ဘယ်တော့မှဝင်မပါတော့! အနှီသူက တယောက်ယောက်ကို လိုက်ပိုးနေလျှင်ပင် ဘာကြောင့်သူ့ကိုပါ ထိခိုက်အောင်လုပ်နေရပါသနည်း?။

ရွှယ်လင်ကား အိမ်တွင်နှစ်ရက်လုံး ကောင်းကောင်းအနားယူနေခဲ့သည်၊ သို့သော် ရှန်းယွဲ့က နောက်တစ်နေ့နံနက်တွင် သူ့အားကုမ္ပဏီလာခဲ့ရန် ဖိတ်ခေါ်လေ၏။ သူနှင့်အင်မတန်လိုက်ဖက်ညီမည့် ဇာတ်ညွှန်းတစ်ခုရှိသည်ဟုဆိုသည်။ ထို့ကြောင့် ရွေးချယ်စရာမရှိတော့ဘဲ မနက်စာစားပြီးသည်နှင့် မနက်ခင်းလေ့ကျင့်ခန်းလုပ်ပြီး ပြန်လာသည့်စူးရွှမ့်ယန်ကို ပြောလိုက်သည်။

သူ ခပ်သုတ်သုတ်ထွက်လာခဲ့၍ မနေ့ညက စူးရွှမ့်ယန်တစ်ယောက် ကုတင်အသစ်ကိုမှာထားလေရာ ၎င်းကအိမ်သို့လာပို့လိမ့်မည်ဆိုပြီး ကျန်နေခဲ့သည်ကိုပင် အမှတ်မထားမိချေ။

အိပ်ခန်းက ကျယ်ဝန်းပြီး ရွှယ်လင်ကလည်းပစ္စည်းအများအပြားမထားချေ။ သူ့အိပ်ရာတစ်လုံးနှင့်တင်ပြည့်နေပြီး စူးရွှမ့်ယန်က ဆိုဖာနှင့်တွဲလျက်အိပ်ရာကို ဝယ်ယူခဲ့သည်၊ ၎င်းက အသုံးမလိုသည့်အချိန်တွင်လည်း ခေါက်သိမ်းထားနိုင်၏။ ယင်းသည် ဧည့်ခန်းစတိုင်နှင့်လိုက်ဖက်မှုရှိပြီး စူးရွှမ့်ယန်သည်လည်း အကြာကြီးနေရန်မစီစဥ်ထားခဲ့ချေ။

သူသည် ရွှယ်လင်နှင့်တစ်ညတာအတွက်သာ သဘောတူထားခဲ့ပြီး သူ့စိတ်ထဲမှအမှတ်တရများလည်း အတော်လေးရှင်းလင်းသွားခဲ့ပြီ။ ကမ္ဘာပေါင်းများစွာကျင်လည်ခဲ့ရ၍ မှတ်ဉာဏ်များက တကွဲတပြားစီဖြစ်နေခဲ့သော်လည်း စူးရွှမ့်ယန်ကဖြေရှင်းနိုင်ခဲ့သည်။ သူသည်ကား ဆရာသခင်တစ်ယောက်ဖြစ်ပြီး သူတို့နှစ်ယောက်ကြားမှပတ်သတ်မှုက ယခင်ဘဝအချို့တွင်သာ ရှိခဲ့ခြင်းမျိုးမဟုတ်မှန်း သဘောပေါက်နားလည်ထားခဲ့သည်၊ သို့သော် ကမ္ဘာပေါင်းများစွာဖြတ်သန်းပြီး ရရှိခဲ့သည့်သူတို့၏အတွေ့အကြုံများက တွေ့ဆုံသည်၊ ချစ်ခဲ့ကြပြီး ထပ်တလဲလဲသိကျွမ်းခဲ့ကြခြင်းပင်။

ထိုအကြောင်းအရင်းတစ်ခုတည်းကသာ ကမ္ဘာသို့ဝင်လိုက်သည်နှင့် သူ၏မှတ်ဉာဏ်များပိတ်ဆို့ခံရစဥ်တွင် ရွှယ်လင်ကမူ သူတို့ကြားမှပတ်သတ်မှုက မည်သို့ဖြစ်နေနိုင်ကြောင်း အတိအကျသိနေရခြင်းပင်ဖြစ်ပေမည်။

၎င်းတို့ကိုအမှတ်ရသည့်အခါတိုင်း စူးရွှမ့်ယန်က ရွှယ်လင်အပေါ် အပြစ်ရှိစိတ်နှင့် သနားစိတ်တို့ကို အလုံအလောက်ခံစားရတတ်၏။

ထိုကိစ္စများ၏ဆက်နွယ်မှုကို ဝိုးတဝါးခန့်မှန်းမိသော်လည်း စူးရွှမ့်ယန်းက အနှီသူမမှတ်မိလာခင် ဆယ်မျက်နှာကမ္ဘာကို သွားရှာရန်မရည်ရွယ်ထားခဲ့ပေ။

သူမှတ်ဉာဏ်များကို ဆုံးရှုံးလိုက်ရသည်မှာ အကြောင်းအရင်းရှိနိုင်သည်။ အရေးအကြီးဆုံးမှတ်ဉာဏ်အစိတ်အပိုင်းများကို ဆုံးရှုံးလိုက်ရသည့်အကြောင်းအရင်းအား ယခုလေးတင်ပင် သဘောပေါက်သွားခဲ့ပြီ။

မဟုတ်သေး၊ အရေးအကြီးဆုံးက ရွှယ်လင် သူ့အပေါ်တွင် နောက်တကြိမ်ချစ်မိလာစေရန် လုပ်ဆောင်ရမည်။ မမှတ်မိကြလျှင်ပင် သူတို့အပြန်အလှန်သဘောကျနေသည်ဟု သူယုံကြည်ထားဆဲပင်။ သူတို့သည် ကမ္ဘာပေါင်းများစွာအတူရှိလာရန် ကံကြမ္မာဖန်လာပြီး သူ့ချစ်သူ၏မှတ်ဉာဏ်များ ပျောက်ဆုံးသွားရသည့်အကြောင်းအရင်းကို မဖြေရှင်းနိုင်စရာမရှိ။

ရွှယ်လင်သည်ကား သူ၏ပိုင်နက် ကျူးကျော်ခံလိုက်ရသည်ကိုမသိသေး။ ကုမ္ပဏီသို့အမြန်သွားခဲ့ပြီး ဇာတ်ညွှန်းတထပ်ကြီးကို ယူလာခဲ့ရသည်။

ပုံမှန်တွင် ဇာတ်ညွှန်းများကို သရုပ်ဆောင်မင်းသားများထံပေးလေ့မရှိ၊ အကြောင်းမှာ နောက်ပိုင်းမင်းသား အပြောင်းအလဲဖြစ်ခဲ့လျှင် ၎င်းတို့လက်ထဲမှ ဇာတ်ညွှန်းကပေါက်ကြားသွားနိုင်သောကြောင့်ပင်၊ ရိုက်ကူးရေးဝန်ထမ်းများက သရုပ်ဆောင်အတည်တကျဖြစ်မှ ဇာတ်ညွှန်းကို ထုတ်ပေးလေ့ရှိကြသည်။ ယခု ဇာတ်ညွှန်းရလာသည့်ရွှယ်လင်အတွက် ထူးဆန်းနေလေ၏။

ရွှယ်လင်၏ပုံစံက တစ်ခုခုပြောချင်နေသလိုထင်ရပြီး ရှန်းယွဲ့ကသူ့အား လက်ကာပြ၍တားလိုက်လေသည်။

 "ဒီဇာတ်ညွှန်းမှာ ဇာတ်လိုက်မင်းသားနှစ်ယောက်ပါတယ်...ဒီနှစ် ငါတို့က လျို့နျန်ရဲ့ <ကောင်းကင်ဘုံသို့အမေး> ဝတ္ထုကိုအခြေခံရိုက်ဖို့ အားခဲထားတယ်..လျို့နျန်က မနေ့ညကလေးတင် ဇာတ်ညွှန်းကိုအပြီးသတ်ရေးခဲ့တာ..ပြီးတော့ အဓိကဇာတ်လမ်းအပြင် အခန်းပိုတွေလည်းပါသေးတယ်...အရင်ဖတ်ကြည့်လိုက်ဦး...ပြီးမှမင်းရဲ့အတွေးကိုပြောပြပေါ့.."

ရွှယ်လင်သည် တဒင်္ဂခန့် အူကြောင်ကြောင်ဖြစ်နေပြီးမှ ခေါင်းညိတ်ပြလာသည်။

သူသည်ကား ယခုချက်ချင်းပင် ထုတ်လုပ်ရေးအကြီးစားနှင့် အခွင့်အရေးပေးခံလိုက်ရချေပြီ။ ရှန်းယွဲ့၏စကားအရ ရုပ်ရှင်အတွက်သူ၏ဇာတ်ကောင်နေရာကို ဆုံးဖြတ်ထားပြီးဖြစ်ကာ သူကအရွေးချယ်ခံလိုက်ရပြီ ဖြစ်လိမ့်မည်။ ရွှယ်လင်က ခပ်ရေးရေးမျှ မျက်မှောင်ကြုပ်သွားသေးသော်လည်း မကြာခင်မှာပင် သူ့မျက်ခုံးများက ပြန်လည်ပြေသွားလေ၏။ သူ့ထံတွင်ပြောစရာသိပ်မရှိ၊ ဇာတ်ညွှန်းကောင်းသာဖြစ်နေလျှင် သူယူလိုက်မည်သာ၊ အကယ်၍....။

စူးလျို့နျန်သည်ကား ကမ္ဘာ့စာပေအဖွဲ့အစည်းတွင် နတ်ဘုရားဟုသတ်မှတ်ခံထားရသည့် နတ်ဘုရားတစ်ပါးဖြစ်သည်။ သူ့လက်ထဲမှထွက်လာသည့်အရာတိုင်း မကောင်းသည့်အရာဟူ၍ ရှိပါမည်လား?။

<ကောင်းကင်ဘုံသို့အမေး> မှာ စိတ်ကူးယဥ်ဝတ္ထုအမျိုးအစားဖြစ်သည်။ ဇာတ်ညွှန်း၏ ပဏာမအစပိုင်းတွင်တည်းက ထျန်းရွှမ်က ရုပ်ရှင်အတွက် အပိုင်းလေးပိုင်းခွဲကာ ထုတ်လွှင့်ရန်စီစဥ်ထားပုံရ၏။ ဤရိုက်ကူးရေးက အချိန်ကာလကြာမြင့်နိုင်သည် တစ်ခေါက်တည်းနှင့် အပြီးရိုက်နိုင်သည့်တိုင် ရိုက်ကူးရေးပြီးသည့်နောက် ရုပ်ရှင်ကိုလေးပိုင်းခွဲရတော့မည်။

ရုပ်သံဇာတ်လမ်းတွဲမှ မည်မျှအကျိုးအမြတ်ပြန်ရနိုင်မှန်း မည်သူကမှမပြောနိုင်၍ အတော်လေးစွန့်စားရနိုင်သည့် ရင်းနှီးမှုပင်။ ယခုကဲ့သို့ရိုက်ကူးရသည့်ရုပ်ရှင်မျိုးက အစမ်းအနေဖြင့်အရင်စီစဥ်ပြီးမှ ဆက်ရိုက်သင့်မသင့်ဆုံးဖြတ်ရနိုင်သည်။ ပရိသတ်က အားမပေးပါက ဇာတ်လမ်းကိုပြန်ပြင်ရမည် သို့မဟုတ် ရင်းနှီးမြှုပ်နှံမှုကိုချက်ချင်းရပ်ရလိမ့်မည်။ ယခုကဲ့သို့ တစ်ကြိမ်တည်းနှင့် ပုံအောလိုက်ပြီး အကျိုးအမြတ်ကို လောင်းကြေးထပ်ထားခြင်းက ကုမ္ပဏီအနေဖြင့် ဤစီးရီးတွင်မည်မျှယုံကြည်မှုရှိထားမှန်း ပြသနေခြင်းပင်။

<ကောင်းကင်ဘုံသို့အမေး> မှာ ကျင့်ကြံရေးလောကဇာတ်လမ်းမျိုးဖြစ်သော်လည်း ဤဇာတ်လမ်းထဲမှဇာတ်လိုက်က အစတည်းကတုံးအပြီး တစ်ဖြည်းဖြည်းချင်း တိုးတက်သွားသည့်လူမဟုတ်ချေ။ ဤဝတ္ထုအတွင်းမှဇာတ်လိုက်က နတ်ဘုရားအသေးစား ချင်းရှီပင်ဖြစ်သည်။

သူတစ်ယောက်တည်းကသာ ဤကမ္ဘာပေါ်တွင် နတ်ဘုရားဖြစ်လာနိုင်မည့် အခွင့်အရေးရှိသူပင်။ ဤကမ္ဘာပေါ်တွင် မသေမျိုးဖြစ်လာနိုင်သူများရှိသော်လည်း ကောင်းကင်ဘုံနှင့်ကမ္ဘာမြေအကြားတွင် သူတစ်ဦးတည်းကသာ နတ်ဘုရားဖြစ်လာရန် အရည်အချင်းပြည့်မှီသူပင်။

<ကောင်းကင်ဘုံသို့အမေး> သည် ချင်းရှီးနှင့် နတ်ဘုရားဖြစ်လာရန် သူ၏တောင်းဆိုချက်အကြောင်းဖန်တီးထားသော ဝတ္ထုတစ်ပုဒ်သာဖြစ်သည်။