MM Story Teller

Chapter 221 🦊 Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Viewers 32k

Chapter 221

🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Chapter 221

14.8 - သူဘာဖြစ်နေတာလဲ? သူ့ပိုက်ဆံကိုသုံးဖို့ တခြားနေရာမရှိတော့ဘူးလား

နောက်တနေ့ ရွှယ်လင်နိုးလာချိန်တွင် လည်ပင်းတစ်ခုလုံး နာကျင်နေပြီး ခေါင်းမှာလည်း မူးဝေနေလေ၏။ ပြန်သက်သာလာချိန်မှ အိပ်ရာမှထထိုင်ပြီး မျက်မှောင်ကြုတ်ကာ နဖူးကိုနှိပ်နယ်နေလေ၏။

"စနစ်ရေ..." မနေ့ညက သူအိပ်ရေးဝခဲ့သော်ငြား နိုးလာချိန်တွင် သူ့အသံကအက်ကွဲနေလေသည်။ စနစ်မှာ အထိတ်တလန့်နှင့်တုန်ယင်သွားရပြီး host ကအားလုံးကိုမှတ်မိသွားပြီဟုထင်လိုက်၏။ "အင်း.." စနစ်ကသတိထားဖြေလိုက်သည်။

ရွှယ်လင်မှာ ဂုတ်ပိုးကိုပွတ်သပ်နေပြီး ခေါင်းယမ်းကာ တွေးဆ၍မေးကြည့်လိုက်သည်။ "ငါ့ကိုဘယ်သူက ဘားကနေပြန်ခေါ်လာပေးတာလဲ..."

".....အင်း...ဥက္ကဌစူး...." စူးမိသားစု၏ ညီအစ်ကိုသုံးယောက်ထဲတွင် စူးရွှမ့်ယန်က စူးမိသားစု၏ ခေါင်းဆောင်လည်းဖြစ်သလို အာဏာရှိသူလည်းဖြစ်သည်။ ထိုသူကို ဥက္ကဌဟုခေါ်သည်မှာမမှားပေ။

"သူငါ့ကိုတစ်ချက်တည်းနဲ့မှောက်အောင်လုပ်လိုက်တာလား.." ၎င်းကမေးရုံသက်သက်ပင်ဖြစ်သော်လည်း သူ့အသံက စစ်မေးနေပုံနှင့်ပိုတူသည်။ ရွှယ်လင်မှာ မနေ့ညကကိစ္စများကိုမမှတ်မိနိုင်သည်မှာ သေချာသည့်တိုင် သူ့အသံကြောင့် စနစ်မှာ ကြောက်လန့်ပြီး မျက်ရည်ပင်ဝဲသွားလေ၏။

"အင်း...အမှန်ပဲ..." သူသာမင်းကို ပွဲသိမ်းမပေးလိုက်ရင် မင်းသူ့ကိုရေချိုးခိုင်းဦးမှာ..အဝတ်အစားလဲခိုင်းပြီး...နင်းတောင်နင်းခိုင်းဦးမှာ...။

စနစ်က သူ့တွင်ရွေးစရာမရှိဟုပြောသော်လည်း ရွှယ်လင်သည်ကား ရူးမိုက်သည့်လုပ်ရပ်တစ်ခုကို ကျူးလွန်မိကြောင်းခန့်မှန်းထားနှင့်သည့်တိုင် မူးပြီးလုပ်ခဲ့သမျှကို မမှတ်မိတော့ပါချေ။ သူမူးနေခဲ့သည်ကိုပင်မှတ်မိပုံမရ..."ငါ့ရဲ့အရက်သောက်နိုင်စွမ်းက....ဒီလောက်ပဲရှိတာလား..." သူသည်ကား ခေါင်းငုံ့ကာ သံသယများပွားနေရင်း အတွေးနွံနစ်နေလေ၏။

"အင်း...မင်းတစ်ခွက်တည်းနဲ့ မှောက်သွားတာ..ပြီးတော့ကော့တေးလေ...မင်းရဲ့အရက်သောက်နိုင်စွမ်းက အဲဒီလောက်ပဲရှိတာ.." စနစ်မှာ အမှန်တရားကို လေပြည်ထိုးကာပြောရန်ကြိုးစားလင့်ကစား စကားလုံးများကြားမှအမှန်တရားက ရွှယ်လင်၏ ဂုဏ်သိက္ခာကိုတိုက်ခိုက်ရန် လုံလောက်သွားချေသည်။

သူသည်ကား အရက်ကို ခွက်ထောင်ချီသောက်လျှင်ပင် မမူးနိုင်ပါဟု ဘာကြောင့်တွေးခဲ့မိမှန်း မသိသော်လည်း ထိုအချိန်က တစ်ခွက်ပင် မသောက်နိုင်ခဲ့ပါချေ။ ဖြစ်ပျက်ခဲ့သည့်အရာများကို အပေါ်ယံလေးပင် မမှတ်မိနိုင်သည့် အတွေ့အကြုံမှာခါးသီးကာ ရွှယ်လင်ကို စိုးရိမ်ပူပန်လာစေပြီး အနာဂတ်တွင် အရက်ပင် မသောက်သင့်တော့သလို စိတ်ဓာတ်ကျစေခဲ့သည်။ မနေ့ညက သူသည်အကြောသေနေသလိုမျက်နှာဖြင့် လူတစ်ယောက်နှင့်တွေ့ခဲ့ရပြီး တစ်ချီတည်းနှင့်မူးပြီးမှောက်သွားခဲ့သည်။

မည်သူနှင့်မျှ မတွေ့ခဲ့ရလျှင် နိုးလာချိန်တွင် မည်သည့်နေရာရောက်နေမှန်းပင် သိရမည်မဟုတ်။စဥ်းစားကြည့်ပြီးနောက် ထိတ်လန့်သွားရသည်

ရွှယ်လင်သည် ထိုအချိန်အတွင်း ဂုတ်ပိုးနာကျင်နေသည်ကို လျစ်လျူရှုထားလိုက်ရ၏။ သည့်အပြင် ကုမ္ပဏီအချို့မှ ခွဲထွက်လာခဲ့လျှင်ပင် စူးရွှမ့်ယန်ကသူ၏အထက်လူကြီးဖြစ်နေသေးပြီး အနာဂတ်တွင်လည်း အကြီးစားဘော့စ်ဖြစ်လာမည်။ အနာဂတ်တွင် အနှီသူကိုရှောင်နိုင်လျှင် အကောင်းဆုံးပင်။ သူသည် မနေ့ညက စိတ်လိုက်မာန်ပါလုပ်မိခဲ့သည့်ကိစ္စကြောင့် စနောက်ချင်ရုံသာဖြစ်သည်။ သို့သော် အနှီသူ၏ရေခဲတုံးနှယ်အေးတိအေးစက်မျက်နှာနှင့် တစ်ယောက်ယောက်က မေးခွန်းထုတ်လာလျှင်ပင် အချိန်အကြာကြီး ခပ်မဆိတ်နေတတ်သည့်စရိုက်အရ ရွှယ်လင်မှာ တဖက်လူနှင့်ပတ်သတ်စရာမလိုတော့မှန်း အတည်ယူလိုက်ပြီး ထိုလူကိုလက်စားချေရန်လည်း မလုပ်တော့ပေ။

သည့်အပြင် တဖက်လူ၏မျက်နှာထားမှာ 'ငါကသောက်ချောကြီး' ဆိုသည့်စကားလုံးများဖြင့်ပြည့်နေတတ်ပြီး ဖျတ်ကနဲကြည့်လျှင်ပင် အယ်လ်ပိုင်းတောင်ပေါ်၌ နှင်းကြာပန်းတစ်ပွင့်ပွင့်လာသလိုပင် သူ့လို အဆင့်နိမ့်သောသရုပ်ဆောင်မင်းသားအသေးလေးကို ပတ်သက်ချင်မည်မဟုတ်။

ရွှယ်လင်သည် စိတ်ချမ်းသာစွာဖြင့် မနေ့ကဖြစ်ပျက်ခဲ့သမျှကို မေ့ပစ်လိုက်ပြီး အနှီကပေါက်တိကပေါက်ချာဖြစ်ရပ်က ဘယ်တုန်းကမှမဖြစ်ခဲ့သလို ဟန်ဆောင်လိုက်သည်။ သူသည် အိပ်ရာမှထကာ ရေချိုးပြီး အိမ်သန့်ရှင်းရေးစက်ရုပ်ကို စောင်များအားလျှော်ခိုင်းလိုက်သည်။

သူ့ကိုယ်ပေါ်တွင် အရက်နံ့မထွက်တော့မှ ရွှယ်လင်မှာ အားလုံးသန့်ရှင်းသွားပြီဟု ယူဆလိုက်နိုင်၏။

ဧည့်ခန်းထဲမှ တောင်တဖက်မြောက်တဖက်ဖြစ်နေသောဖိနပ်တို့ကို ဖိနပ်စင်ပေါ်သို့ပြန်တင်ကာ မနေ့ညက ၎င်းတို့ကိုချွတ်ပစ်ခဲ့သည့်ပုံကို ထပ်မတွေးတော့ပေ။ တစ်မနက်ခင်းလုံး ဟိုလှည့်သည်လှည့်နှင့် အလုပ်များနေရပြီးနောက် သူ့ကိုယ်သူအတွက် နေ့လည်စာပြင်ကာ နောက်ဆုံးမှ နာနိုကွန်ပျူတာကိုဖွင့်လိုက်နိုင်သည်။

လူတွေ့စစ်ဆေးပွဲကြောင့် သူသည် သည်ရက်ပိုင်းအတွင်း လိုင်းပေါ်မတက်နိုင်ခဲ့ပေ။ Weibo ကိုဖွင့်လိုက်သည်နှင့် ပရိသတ်ဒါဇင်ချီက သူ့အားစောင့်စားနေလေပြီ။ ရွှယ်လင်ကမျက်ခုံးပင့်ကာ သေချာကြည့်လိုက်မှ ထျန်းရွှမ်က သူတို့စာချုပ်ချုပ်ထားပြီဖြစ်ကြောင်း ကြေညာထားသည်ကို တွေ့လိုက်ရသည်။ သူ့အားယုံကြည်ကြောင်း ထျန်းရွှမ်တရားဝင်ဝက်ဘ်ဆိုက်ကကြေညာထားပြီး စူးလျို့နျန်ကလည်း ထပ်မံမျှဝေထားသေးသည်။

သူ့အားရုတ်တရက် ပါးစပ်အဟောင်းသားဖြစ်သွားစေမည့်နောက်တစ်ခုမှာ ရိုက်ကူးရေးအဖွဲ့မှထုတ်ပေးလိုက်သည့် သရုပ်ဆောင်စာရင်းပင်။

မနေ့က လူရွေးပွဲအပြီးတွင် ရိုက်ကူးရေးအဖွဲ့က သရုပ်ဆောင်များနှင့် အောင်အောင်မြင်မြင်စာချုပ်ချုပ်နိုင်ခဲ့သည်။ အွန်လိုင်းဝတ္ထုကိုအခြေခံရိုက်ကူးထားသော တီဗွီဒရမ်မာကြောင့် ထုတ်လုပ်သူများကဈေးကွက်အတွင်း ချက်ချင်းဝင်ရောက်လာပြီး ၎င်းတို့အနက် <ရှာပုံတော်> ဇာတ်ကားက အင်မတန်လူကြိုက်များခဲ့သည်။ ထို့အပြင် ကောင်းကင်ယံသည်လည်း ကမ္ဘာ့စာပေကွန်ရက်တွင်နတ်ဘုရားတစ်ပါးဖြစ်ခဲ့ပြီး ကမ္ဘာနှင့်ယှဥ်ကာ စာရေးဆရာကောင်းတစ်ယောက်အဖြစ် အသိအမှတ်ပြုခံခဲ့ရသည်။ သူ၏ဖန်တီးမှုများကိုရိုက်ကူးခဲ့သည်မှာ ဤတစ်ခုကပထမဆုံးမဟုတ်ပေ။ ယခင်ဖန်တီးမှုများကလည်း ရုပ်ရှင်နှင့်တီဗွီအစီအစဥ်များတွင် မှတ်ကျောက်တင်နိုင်ခဲ့သည်။ စာဖတ်သူများဘက်မှလည်း ဤတီဗွီဒရမ်မာက အောင်မြင်လိမ့်မည်ဟု ယုံကြည်ခဲ့ကြ၏။

အဆိုပါယုံကြည်မှုက အဓိကဇာတ်ဆောင်မင်းသားနေရာတွင် ရွှယ်လင်၏အမည်ပေါ်လာချိန်၌ လှုပ်ခတ်သွားခဲ့သည်။

အစတွင် လူများက အနှီမင်းသားငယ်လေးအကြောင်းကိုမသိခဲ့ပေ။ နောက်ပိုင်းတွင် ၎င်းတို့က သူ့အားသတိထားမိလာကြပြီး ရွှယ်လင်က အလှပန်းအိုးတစ်အိုးသာဖြစ်ကာ အသုံးဝင်မည်မဟုတ်ဟုထင်ခဲ့ကြသည်။ ရုပ်ရှည်လေးကိုသာကြည့်ပြီး မည်သို့များ အနှီဇာတ်ကောင်နှင့်လိုက်ဖက်ပါမည်နည်း။ ရိုက်ကူးရေးအဖွဲ့နှင့် ဒါရိုက်တာများ၏ ဦးနှောက်တိုင်း ခွေးစားခံလိုက်ရလေသလား? ဒရမ်မာ၏အဓိကသရုပ်ဆောင်ကိုရွေးချယ်ရာတွင် ဤသို့သောလူမျိုးကိုရွေးချယ်လိုက်ခြင်းက ဇာတ်လမ်းတစ်ခုလုံးကို ဖျက်ဆီးပစ်ခြင်းမဟုတ်ပါလား။

အရံသရုပ်ဆောင်များအားလုံးက ကြံ့ခိုင်ပြီးအတွေ့အကြုံရှိကြကာ ယခင်အလုပ်များတွင်လည်း အဆက်အသွယ်များရှိကြသည် သရုပ်ဆောင်နေရာအတွက် လူရွေးရာတွင် ရိုက်ကူးရေးအဖွဲ့နှင့် ဒါရိုက်တာများထံ၌ ပြဿနာမရှိသော်လည်း အဓိကဇာတ်လိုက်ရွေးချယ်ရာတွင် မည်သို့များအမှားလုပ်နိုင်မည်နည်း။

ထို့ကြောင့် လူစုလူဝေးကြီးကစတင်ပြီး ထိုခေါင်းစဥ်ဖြင့် ဆွေးနွေးကြတော့သည်။ ရွှယ်လင်၏ယခင်အလုပ်နှင့် အနုပညာလောကကိုဝင်ရောက်ခဲ့ပုံ၊ ယခင်ကအသံသရုပ်ဆောင်ပင်လုပ်ခဲ့ပြီး ယင်းကြောင့် နာမည်ကြီးလာရပုံတို့ကိုပြောနေခဲ့ကြသည်။ လူအချို့ကမူ သူ့အားအောင်မြင်မှုမရှိ၍ လှောင်ပြောင်ခဲ့ကြသည်။ သူက ဤလောကထဲတွင် ဆယ်နှစ်တိုင်အောင်နေခဲ့သော်လည်း 'နတ်ဘုရား' ဟူသောဂုဏ်ပုဒ်ကိုမရခဲ့ပေ။ ဤနှစ်များအတွင်း သူ၏မျက်နှာလေးပေါ်တွင် မှီခိုနေခဲ့ရပြီး လူကြိုက်များလာအောင် အလှပန်းအိုးအဖြစ် သရုပ်ဆောင်ပြခဲ့ရသည်။

သူ့အားလှောင်ပြောင်ခဲ့ကြသူများမှာ အရံသရုပ်ဆောင်များသာ။ လူအများစုက ထျန်းရွှမ်နှင့် စူးလျို့နျန်တို့အကြောင်းကို အဓိကထားပြောကြပြီး ကိစ္စများကိုဖြစ်နိုင်ချေရှိသည့်ထောင့်အမျိုးမျိုးမှ သုံးသပ်ပြကြသည်။ ၎င်းတို့က ထျန်းရွှမ်တွင် မကြာသေးခင်ကတင်စာချုပ်ချုပ်ထားပြီးသော အနုပညာရှင်များရှိပြီး အားလုံးကစောင့်ကြည့်နေခဲ့ပါက ၎င်းတို့၏စာချုပ်ချုပ်ရန် လိုအပ်ချက်ကမြင့်သွားလိမ့်မည်မှန်းသိကြသည်။ ရွှယ်လင်က မျက်နှာလေးတစ်ခုတည်းကြောင့်နှင့် စာချုပ်ချုပ်လိုက်လျှင် စူးလျို့နျန်က သူ၏အမည်နှင့်ကျော်ကြားမှုအပေါ်သက်ရောက်ပြီး သူ့မျက်နှာကို သူရိုက်မိသလိုဖြစ်လိမ့်မည်။ ရူးနေသူသာ ထိုသို့လုပ်လိမ့်မည်ပင်။

စူးလျို့နျန်က ဤအလုပ်ကိုလုပ်လာခဲ့သည့်မှာကြာခဲ့ပြီ၊ အခြားလူများထံမှ ပါးရိုက်ခံရသည့်အကြိမ်ရေမှာလည်း မနည်းတော့ချေ။ သူ၏မိသားစုအသိုင်းအဝိုင်းထဲကဖြစ်စေ အခြားလူများထံမှဖြစ်စေ၊ စူးလျို့နျန်နှင့်ပတ်သတ်လာလျှင် ၎င်းတို့အားလုံးကအင်မတန်တည်ငြိမ်ကြသည်။

ရုပ်ရှင်ဧကရာဇ်စူးတွင် လုပ်ရပ်တိုင်းအတွက်အကြောင်းပြချက်ရှိလိမ့်မည်ဟု အားလုံးကလက်ခံယုံကြည်ကြပြီး ပြီးသည့်ခဲ့နှစ်ရက်လုံး မျက်ခွက်ဖြတ်ရိုက်ခံရမ့ည်ကို ထိုင်ကြည့်နေခဲ့ကြသည်။ စူးလျို့နျန်ကိုအားပေးနေသူများပင် ရွှယ်လင်ကို အကောင်းမြင်ပေးနေကြ၏။

ဆိုလိုသည်မှာ ရွှယ်လင်၏ Weibo ပို့စ်တွင် အုပ်စုနှစ်စုက ပြင်းပြင်းထန်ထန်ကွဲနေခဲ့သည်။ အချို့က သူ၏စုတ်ပြတ်နေသောသရုပ်ဆောင်ချက်များကြောင့် ရိုက်ကူးရေးအသင်းကိုခက်ခဲစေလိမ့်မည်ဟု ဆဲဆိုနေကြပြီး သူ့ကိုအားပေးသူများကမူ ကြိုးစားရလိမ့်မည်ဟုပြောကြသည်။ သူ၏ပရိသတ်အစုမှာ အခြားသောပရိသတ်အဖွဲ့များနှင့် ယှဥ်ကြည့်လျှင် သေးငယ်အားနည်းပြီး မျက်နှာလေးနှင့်စကားပြောလိုက်တိုင်း ချိုသာနေတတ်သောအသံလေးက ၎င်းတို့၏မြေခွေးလေးမည်မျှလှပကြောင်း၊ မည်မျှအသံသာကြောင်းချီးမွမ်းကြလေ၏။

ရွှယ်လင်မှာ အဆိုပါ ကသောင်းကနင်းအခြေအနေများကြောင့် ဆွံ့အခဲ့ရသည်။ သူ၏ QQ အကောင့်သို့ အော်တိုဝင်ပြီး လိုင်းပေါ်တက်လိုက်သည်နှင့် ခေါင်းစဥ်နှင့်ပတ်သက်၍ မက်ဆေ့ချ်ရေးရန် စတင်အကြံထုတ်ရတော့သည်။

ရွှယ်လင်ဘက်မှ အသံသရုပ်ဆောင်ပိုင်းနှင့်ပတ်သက်ပြီး မည်သည့်အလုပ်ကိုမှလက်ခံထားခဲ့ခြင်းမရှိသည်မှာ သေချာသည်၊ သို့သော် ရိုက်ခတ်မှုမှာ ပြင်းထန်လွန်းလှလေရာ မန်နေဂျာပင်သူ့အားလာရှာရတော့၏။

သူ QQ ကိုဖွင့်လိုက်သည်နှင့် အမှန်တကယ်ကိုပင် ကိစ္စကြီးနေခဲ့လေပြီ။ ပုံမှန်တွင် နတ်ဘုရားကြီးဟုသုံးနှုန်းတတ်သော နွေဦးဒလိမ့်တုံးပင် သူ့ထံမဆုံးနိုင်သောမက်ဆေ့ချ်များ ပေးပို့လာခဲ့၏။ သူသည် ထိုမန်နေဂျာများအားလုံးချစ်စရာကောင်းသည်ဟု ခံစားလိုက်ရပြီး စားကြောင်းနှစ်ကြောင်းသုံးကြောင်းနှင့်ပင် ဖန်သားပြင်တစ်ခုလုံး၌ ပြည့်သိပ်သွားခဲ့လေ၏။

နွေဦးဒလိမ့်တုံးကမူ ယခင်ကအတိုင်းပင် သူ့အားမြှောက်ပင့်လာကာ မင်ဆေ့ချ်တိုင်းက သူ့ကိုထွက်လာရန် အသနားခံနေလေသည်။

ရွှယ်လင်မှာ အသံသွင်းထားသမျှကို ပို့ပေးလိုက်ပြီဖြစ်ရာ ဇာတ်ညွှန်းအသစ်သည်လည်းထွက်မလာသေးပေ။ နွေဦးဒလိမ့်တုံးကသူ့အား ဘာအတွက်ရှာနေရပါသနည်း။

[နွေဦးဒလိမ့်တုံး: QAQ ငါ့ရဲ့ချစ်စရာမြေခွေးလေးရေ...အဖွဲ့ကိုလည်း တစ်ချက်လောက်ကြည့်လိုက်စမ်းပါဦး..ငါတို့ကလွှင့်တောင်လွှင့်နေပြီ..ဒါပေမဲ့ မင်းကအဖွဲ့ထဲဝင်ပြီးတော့ စကားလည်းတစ်ခါမှလာမပြောဘူး...ငါတို့သရုပ်ဆောင်တွေကို မကြိုက်လို့လားဟင်?! QAQ]

အနှီချစ်စရာကောင်းသော အပြုအမူလေးက ရွှယ်လင်ကိုရယ်ရခက် ငိုရခက်ဖြစ်စေသည်။ ပုဂ္ဂိုလ်ရေးအရ သူသည် အဖွဲ့အားလုံး၏ သတိပေးချက်များကို ပိတ်ထားတတ်လေ့ရှိသော်လည်း မတိုင်ခင်ကအထိ အဖွဲ့ထဲတွင်စကားမပြောခဲ့သည်မှာအမှန်ပင်။

[နှင်းမြေခွေး: ဒီရက်ထဲမှာ ကျွန်တော်အလုပ်နည်းနည်းများနေလို့ပါ..ကျွန်တော်မနှုတ်ဆက်ဖြစ်တာအတွက် တောင်းပန်ပါတယ်..ဇာတ်လမ်းကဘယ်အချိန်စမှာလဲ...]

[နွေဦးဒလိမ့်တုံး: အာ...အချစ်လေး...နောက်ဆုံးတော့ပေါ်လာပြီပေါ့!!! မင်းအလုပ်များနေတာကိုငါသိပါတယ်...ကွန်ဂရက်ကျူလေးရှင်း...ဇာတ်ကောင်အသစ်ရတဲ့အတွက်ရော...ကုမ္ပဏီအသစ်နဲ့စာချုပ်ချုပ်နိုင်တဲ့အတွက်ရော...]

[နှင်းမြေခွေး: ကျေးဇူးပါ]

[နွေဦးဒလိမ့်တုံး: ဟေ့...ဟေ့..မင်းအနှေးအမြန်နာမည်ကြီးလာလိမ့်မယ်လို့ငါပြောပါတယ်...ငါတို့ဒီညမှာစလွှင့်မှာ..မင်းလိုင်းပေါ်မတက်လာရင် ငါအပြင်မှာလာသောင်းကျန်းမှာနော်! ငါမင်းရဲ့အိမ်လိပ်စာကိုရှာနိုင်တယ်ဆိုတာသတိရ]

[နှင်းမြေခွေး: ဟုတ်ပါပြီ..ဟုတ်ပါပြီ..ခင်ဗျားရှာတွေ့နိုင်ပါတယ်..ကျွန်တော် အဖွဲ့ထဲသွားကြည့်လိုက်ဦးမယ်]

အစပိုင်းက ရွှယ်လင်သည် ထိုအပေါ်တွင်အာရုံသိပ်မထားခဲ့ပေ၊ နောက်ပိုင်း၌ အသံဒရမ်မာ <စစ်မြေပြင်မှဓားတစ်လက်> က ဆယ်နှစ်တာထုတ်လုပ်ရေးမှ ထုတ်ရလောက်သည်အထိ မရိုးရှင်းနေကြောင်းသိလိုက်ရသည်။ ပုံမှန်အားဖြင့် ဆယ်နှစ်တာထုတ်လုပ်ရေးမှသရုပ်ဆောင်များက အဖွဲ့အစည်းအတွင်းခန့်အပ်ထားသော ဝန်ထမ်းအင်အားဖြစ်သည့်တိုင် ယင်းသရုပ်ဆောင်အရေအတွက်၏ တဝက်ကျော်ခန့်က ဆယ်နှစ်တာမှဝန်ထမ်းပါဟု မဖော်ပြတတ်ကြချေ။ မန်နေဂျာနှင့် အသံသရုပ်ဆောင်အချို့ထက် ဒါရိုက်တာနှင့် ဇာတ်ညွှန်းရေးဆရာများကလည်း ဆယ်နှစ်တာကမဟုတ်ပုံပင်။

ရွှယ်လင် ဇာတ်ညွှန်းရေးဆရာ၏နာမည်ကိုကြည့်လိုက်သည်၊ ရယ်နေသောအမေ့ခံ၊ အံ့အားသင့်စရာပင်။ သူသေချာမမှတ်မိပါက....ရယ်နေသောအမေ့ခံက ဤစာအုပ်၏ စာရာရေးဆရာပင်မဟုတ်လား။ သူကဇာတ်ညွှန်းပါရေးသည်လား။

မည်မျှပင်ထူးဆန်းနေပါစေ၊ ရွှယ်လင်ကတော့ အဖွဲ့ထဲတွင် နာမည်ကြီးနေဆဲ။

[လူဆိုးလေး] နှင်းမြေခွေး: ဟယ်လို..အားလုံးပဲ..ကျွန်တော်အားလုံးကို မနှုတ်ဆက်ရသေးဘူးနော်...အားလုံးပဲအလုပ်ကြိုးစားခဲ့ကြပါတယ်]

[လူဆိုးလေး] နှင်းမြေခွေး: ....အုပ်စုနာမည်က...ဘယ်သူပေးထားတာလဲ?]

[မန်နေဂျာ] နွေဦးဒလိမ့်တုံး: ဟီး...ဟီး..ဟီး..အားလုံးကမင်းအတွက်ပြောင်းပေးထားကြတာလေ

[cv] တောင်ကုန်းပေါ်ကတောအုပ်လေး: အိုက်ယား...မြေခွေးလေးရောက်လာပြီကိုး..ဘာလို့လဲဆိုတော့ ထုတ်လွှင့်တာကဒီနေ့စပြီလေ...ပြီးတော့မင်းရော...အကုန်လုံးဆီကအလျက်ခံရဖို့ပြင်ထားပြီးပြီလား]

[cv] ကမ္ဘာကြီးအဆုံးသတ်ပြီ: မင်းလည်းအကြာကြီးမနေရတော့ဘူးဆိုတော့ လာရောမနေနဲ့ပါနဲ့တော့...ခံစားနေရတာမင်းတစ်ယောက်တည်းလို့ထင်ရင်တောင်...နောက်ဆုံးကျရင် မင်းရှင်းရမှာပဲ!]

[ဒါရိုက်တာ] မရေရာသောလှည့်ပြန်ခြင်း: မင်းတို့ကောင်တွေ ဘာကိစ္စရန်ဖြစ်နေကြတာလဲ? မြေခွေးလေးက အဓိကဇာတ်ကောင်လေ...မင်းတို့လိုသေပြီးသားကောင်တွေ...အထိနာနေတဲ့ကောင်တွေ ဘေးဖယ်နေကြ]

[ [စာရေးဆရာ] ရယ်နေသောအမေ့ခံ: အား! တကယ့်လူတော့ပေါ်လာပြီပေါ့ ~ ဘယ်လောက်ချစ်စရာကောင်းလိုက်လဲ..သူကတကယ်ကို အမေ့ခံနဲ့ကိုက်တဲ့လူဆိုးလေးပဲ..ဒီနားလာပါဦး...ဒီအန်တီကမင်းရဲ့ပါးလေးကိုညှစ်ချင်လို့~]

စကားပြောနေသည့်အဖွဲ့မှာ အုတ်အုတ်ကျက်ကျက်၊ ရွှယ်လင်ပင် မည်သူ့ကိုပြောရမှန်းမသိပေ။ သူပေါ်လာပြီးသည့်နောက် တစ်အုပ်စုလုံးကပွင့်ထွက်သွားပုံရပြီး စကားတိုင်းက သူ့အားစနောက်နေသည့်ချည်းပင်။ ရွှယ်လင်ထံတွင်သာ အတွေ့အကြုံမရှိထားပါက ယခုဆိုလျှင် သူ့မျက်နှာမှာသွေးရောင်သန်းနေလောက်ပြီ။

တွေးကြည့်လိုက်ပြီးသည့်နောက် သူတုံ့ပြန်လိုက်သည့်အသံက တွန့်ဆုတ်နေဆဲပင်။

[ [လူဆိုးလေး] နှင်းမြေခွေး: ကျွန်တော်နဲ့အမေ့ခံကြားမှာ စိမ်းနေသေးတယ်..လူတိုင်းကဒီမှာရှိနေကြပြီဆိုတော့ ကျွန်တော်ကြိုးစားဖို့လိုသေးသလိုခံစားရတယ်]

[ [ဥက္ကဌ gong] မေ့လျော့နေသောကမ်းပါး: ငါကမူရင်းအသံသရုပ်ဆောင်ပါ..ပြီးတော့မင်းက နောက်ပေါက်တဲ့ရွှေကြာပေါ့..မင်းအဲဒီလိုထင်ရင်တော့ မင်းမှာတကယ်ကြိုစားဖို့လိုသေးလို့ပေါ့]

ရွှယ်လင်: "......" ??? ဒီလူကဘယ်လိုလုပ် အဖွဲ့ထဲရောက်နေရတာလဲ?? အသံဒရမ်မာအဖွဲ့ကနေ ထွက်သွားပြီမဟုတ်ဘူးလား?

[ [စာရေးဆရာ] ရယ်နေသောအမေ့ခံ: ဟီးဟီး...မေ့လျော့နေသောတောင် မင်းကိုချီးကျုးနေမှတော့..မြေခွေးလေးက လူဆိုးဇာတ်ရုပ်နဲ့တကယ်လိုက်လို့ဖြစ်မယ်]

[ [လူဆိုးလေး] နှင်းမြေခွေး: ...မေ့လျော့နေသောဆီကနေ ဘယ်လိုလုပ်ချီးကျုးတာခံရဲပါ့မလဲ]

[ [ဒါရိုက်တာ] မရေရာသောလှည့်ပြန်ခြင်း: ဘာလို့လဲဆိုတော့ ပြဿနာရှာတာသူဖြစ်နေတာကိုး...သူ့ကို နောက်ဆုံးပိုင်းဇာတ်ဝင်သီချင်းအတွက် အသံသွင်းဖို့ ခေါ်ထားရတာလေ]

[ [လူဆိုးလေး] နှင်းမြေခွေး: အဲဒီတုန်းက ထုတ်လွှင့်ဖို့လိုင်စင်ရပြီဆိုလို့ ကျွန်တော့်မှာအသည်းအသန်ဝင်လာခဲ့ရတာ..ဒါပေမဲ့ ရယ်မောနေသောအမေ့ခံကလည်း ဒီမှာရှိနေတာကို...] ဇာတ်ညွှန်းရေးဆရာက စာရေးဆရာကိုယ်တိုင်ပင်...ခွင့်ပြုချက်ရရန်မှာ သူမအပေါ်တွင်မူတည်သည်မလား

[ [စာရေးဆရာ] ရယ်မောနေသောအမေ့ခံ: ငါက ဇာတ်ညွှန်းရေးတဲ့လူဆိုပေမဲ့ စာချုပ်အရတော့ ငါက follow ထားဖို့လိုသေးတယ်လေ..ပြီးတော့ သတ်မှတ်ရက်ကလည်းကပ်လာပြီ..ခွင့်ပြုချက်ကလည်း ထုတ်ပေးရတော့မယ်..မန်နေဂျာကလည်း ငါ့ကိုလောနေပြီ]

[ [လူဆိုးလေး] နှင်းမြေခွေး: .....] ဒါကဘယ်လို သောက်ရေးမပါတာတွေလဲ!

[ [cv] တောင်ကုန်ပေါ်ကတောအုပ်လေး: ဟားဟားဟား! ငါမြေခွေးလေးရဲ့ မျက်နှာတောင့်တောင့်ကြီးကို ငါမြင်ယောင်နေတယ်..သူကအရမ်းလှည့်ပတ်ရလွယ်တာပဲ!]

Prev Next