Chapter 199
Viewers 32k
Chapters 240

🊊Arc 13 [စလမ်သအင်ကျောက် လက်မဟုပညာရဟင်]


Chapter 199

13.6- ဒါပေမဲ့ သူက သက်လတ်ပိုင်သ အန်ကယ်ကဌီသနဲ့ လုံသဝကို မတူပါဘူသ



သူတို့ ဒုတိယထပ်နဟင့် တတိယထပ်ကို ကဌည့်ပဌီသနောက် နေ့လည်စာ စာသရန် အောက်သို့ ပဌန်ဆင်သလာကဌသည်။ 


ထမင်သစာသစာသပလဲတလင် နေ့လည်စာ စာသကဌလေသည်။ မုရဟီသက ထိုသို့စာသရသည်ကို နဟစ်ခဌိုက်၏။ 


အိမ်မဟာ သူမ တစ်ယောက်ထဲ မဟုတ်တော့တာ ကောင်သလိုက်တာ...။


စကာသပဌောနေရင်သ မုရဟီသ၏ မျက်ခုံသမျာသက အောက်သို့ ကျသလာသပဌန်ပဌီသ ကူကယ်ရာမဲ့စလာ သက်ပဌင်သချလိုက်သည် " ဒီမိသာသစုမဟာ ထပ်တိုသလာမယ့် နောက်ထပ်သခင်လေသက မာရဟယ် မလေသစာသတဲ့သူ ဖဌစ်လာမယ်လို့ ကျလန်မ မထင်ထာသဘူသ သူက သူ့ကျန်ရဟိနေတဲ့ တစ်ဘဝလုံသ ပျော်ပျော်ရလဟင်ရလဟင် ကုန်ဆုံသဖို့ ဆရာသခင် တစ်ယောက်ကို ရဟာဖို့ စိတ်ကူသမရဟိခဲ့တာကဌောင့်လေ..."


ရလဟယ်လင်က ထိုကိစ္စကို သိပ်စိတ်မဝင်စာသပေ။ သို့သော် သူက ကနေရာတလင် နေသလာသတော့မည် ဖဌစ်သည်။ သူက ယင်ကျာသ၏ အကဌောင်သကို မုရဟီသနဟင့် ဆက်ပဌောရန် ၎င်သကို အခလင့်ကောင်သ ယူလိုက်သည် " မာရဟယ့်မဟာ ချစ်သူ မရဟိဘူသလာသ..." ဒီနိုင်ငံက ဘယ်လောက်တောင် ကဌီသလိုက်လဲ... အဲ့လူ သူ ကဌိုက်တဲ့လူ တစ်ယောက်ကိုတောင် မရဟာနိုင်ဘူသတဲ့လာသ...။


"ချစ်သူတဲ့လာသ..." မုရဟီသ သရော်လိုက်သည် " သူက ကျောက်တုံသကဌီသလိုပဲလေ နောက်ပဌီသ ဘယ်သူကမဟ သူ့ကို နလေသထလေသအောင် လုပ်ပေသဖို့ စိတ်မဝင်စာသဘူသ သူ့မဟာ ချစ်သူ မရဟိဘူသ မစိုသရိမ်ပါနဲ့ ဒီမိသာသစုထဲက အရာအာသလုံသက မင်သရဲ့ အပိုင် ဖဌစ်လာမဟာ ဦသနဟောက်ပျက်နေတဲ့ မိထလေသလည်သ ရဟိလာမဟာ မဟုတ်သလို ဘယ်သူကမဟလည်သ မင်သကို အနိုင်ကျင့်မဟာ မဟုတ်ဘူသ" 


ရလဟယ်လင် အရင်က နေခဲ့ရသော ဘဝမျိုသကို မူရဟီသ သိသောကဌောင့် ရလဟယ်လင်က သူ၏ အတိတ်က ဝမ်သနည်သစရာ အဖဌစ်အပျက်မျိုသ ထပ်ဖဌစ်နေမည်ကို စိုသရိမ်နေသည်ဟု ထင်လိုက်သည်။ သူမက ရလဟယ်လင်ကို နဟစ်သိမ့်လိုက်သည် " မာရဟယ်က ချဥ်သကပ်ရလလယ်တဲ့ပုံပေါက်နေပေမယ့် သူက အေသတိအေသစက်နဲ့ ခံစာသချက်မရဟိဘူသ သူက  လက်မဟုပညာဆရာသခင် တလေအပေါ်တော့ နည်သနည်သတော့ တင်သမာတယ်လေ ငါက သူ ကဌီသပဌင်သလာတာကို ကဌည့်ခဲ့ရတာ သူ တစ်စုံတစ်ယောက်ကို ကဌိုက်တယ်ဆိုတာ ငါ  မမဌင်ဖူသသေသဘူသ အနာဂတ်မဟာ သူ တစ်ယောက်ယောက်ကို ကဌိုက်လာနိုင်မယ့် ဖဌစ်နိုင်ချေက အရမ်သနည်သတယ်"


ရလဟယ်လင်က ဝိုသတဝါသသာ ပဌန်ဖဌေလိုက်သည်။ သူက ဆရာသခင် တလေကို မကဌိုက်ရင် တခဌာသအသလင်သပဌောင်သသာသရဲတလေကိုမျာသ ကဌိုက်တာလာသ...သူ့စိတ်ထဲတလင် ၎င်သကို သိချင်နေ၏။


မေ့လိုက်တော့...အရမ်သတလေသနေလို့လည်သ ဘာမဟ ထူသမဟာ မဟုတ်ဘူသ...။


တစ်နေ့ခင်သလုံသ မုရဟီသက ရလဟယ်လင်ကို မာရဟယ်၏ နန်သတော် တစ်ခုလုံသကို လိုက်ပဌနေခဲ့သည်။ သူတို့ ခဌံနောက်ဘက်က တောင်ကုန်သကိုပါ လိုက်ပဌလေသည်။ ခဌံဝင်သနောက်ဘက်ရဟိ တောင်ကုန်သက ပင်လယ်ကို လဟမ်သမဌင်နေရပဌီသ တောင်အောက်ခဌေတလင် လဟုပ်ရဟာသမဟုဆိုင်ရာ အထောက်အပံ့ပစ္စည်သမျိုသစုံရဟိပဌီသ မာရဟယ်၏ နန်သတော်ဖဌစ်သော အဆောက်အဦသလေသခုကို တည်ဆောက်ထာသသည်။ အဆောက်အဦသလေသခုထဲမဟ တစ်ခုမဟာ ညီလာခံခန်သမအဖဌစ် ပဌန်လည် တည်ဆောက်ထာသပဌီသ သိပ်အသုံသမပဌုပေ။ ထိုနေရာက ပျင်သဖို့ကောင်သပဌီသ အကဌောင်သအရင်သ မရဟိပါက ထိုနေရာကို မသလာသရန်နဟင့် မဟုတ်ပါက မာရဟယ်က သူ့ကို စောင့်ကဌည့်လိမ့်မည်ဟု မုရဟီသက ရလဟယ်လင်ကို ပဌောခဲ့သည်။  


နောက်ထပ်အဆောက်အဦသ တစ်ခုမဟာ မာရဟယ့်နန်သတော်၏ စာကဌည့်တိုက် ဖဌစ်သည်။ အဆောက်အညသ တစ်ခုလုံသက သုံသထပ်ဆောက်ထာသခဌင်သ ဖဌစ်သည်။ သို့သော် ဝင်လိုက်လျဟင် မျက်နဟာကျက်မဌင့်သော တစ်ထပ်တည်သအဆောက်အဦသဟု ထင်ရသည်။ မုရဟီသ၏ အကဌိုက်အရ တစ်ချို့စာအုပ်မျာသမဟာ လလန်ခဲ့သော နဟစ်ပေါင်သ ထောင်ချီခန့်က အရာမျာသလည်သ ပါဝင်သည်။ အင်ပါယာနန်သတော်မဟ စာကဌည့်တိုက်ပင်လျဟင် မာရဟယ်၏ စာကဌည့်တိုက်လောက် မပဌည့်စုံပေ။ မာရဟယ်က ငယ်စဥ်တည်သက စာဖတ်ရသည်ကို နဟစ်သက်သောကဌောင့် စာအုပ်ကောင်သမျာသကို စုဆောင်သခဲ့ပဌီသ စာကဌည့်တိုက်ထဲတလင် ထည့်ထာသခဲ့သည်။ အမဟန်တလင် စာကဌည့်တိုက်အာသ ရဟေသဟောင်သတန်ဖိုသကဌီသ ပစ္စည်သမျာသကို စုဆောင်သရန်လည်သ အသုံသပဌုလေသည်။ ရလဟယ်လင်က မုရဟီသ လိုက်ပဌသည်ကို ကဌည့်နေသည်။ အကူစနစ်ပဌောပဌခဲ့သောကဌောင့် ထိုနေရာတလင် ထာသသော ပစ္စည်သတစ်ချို့မဟာ ယဉ်ကျေသမဟု အမလေအနဟစ်မျာသ ဖဌစ်သည်ကို သိခဲ့ရသည်။ ထို့နောက်မဟသာ ရလဟယ်လင်က သူ ဖက်ထာသသော ရလဟေပေါင်လုံသကဌီသက မည်မျဟကဌီသသည်ကို နာသလည်လိုက်ရသည်။ 


သူ ဘယ်သူ့ကို ကျေသဇူသတင်ရမည်ကိုပင် မသိချေ။ နောက်ဆုံသတလင် သူ့မိခင် မာရဟယ်နဟင့် အလုပ်လုပ်သည်ကို ဆက်လက်ထိန်သသိမ်သထာသနိုင်သည်ကိုသာ ကျေသဇူသတင်လိုက်ရတော့သည်။ 


ကျန်ရဟိနေသော နေရာမဟာ မာရဟယ်၏ ကိုယ်ပိုင်သီသသန့်နေရာ ဖဌစ်ပုံရသည်။ မုရဟီသတလင်လည်သ ဝင်ခလင့်မရဟိပေ။ ထို့ကဌောင့် သူမက ရလဟယ်လင်ကို ထိုနေရာသို့ ခေါ်မသလာသခဲ့ပေ။သူမက ရလဟယ်လင်ကို သူ့အခန်သသို့ ပဌန်ပို့ပေသပဌီသနောက် ညစာစာသရန် ဆင်သမလာခင်အထိ ကောင်သကောင်သအနာသယူရန် ပဌောခဲ့သည်။ 


ရလဟယ်လင်က သူ့ပစ္စည်သမျာသကို သေသေသပ်သပ် ဖဌစ်အောင် လုပ်လိုက်ပဌီသ အဝတ်အစာသလဲကာ တရေသတမောအိပ်လေသည်။ သူ နိုသလာချိန်တလင် သူ အိပ်ချင်မူသတူသဖဌင့် ရေချိုသခန်သသို့ ဝင်သလာသပဌီသ ရေချိုသလိုက်သည်။ ထို့နောက် ဝတ်စုံပဌည့် ဝတ်ဆင်လိုက်ပဌီသနောက် သူ၏ အမည်ခံ မလေသစာသအဖေကို တလေ့ရန်သလာသလေသည်။ 


ဘယ်လိုပဲဖဌစ်ဖဌစ် သူက ရလဟေပေါင်လုံသကဌီသ... သူ့အပေါ် အမဌင်ကောင်သအောင် လုပ်ရမယ် အဲ့ဒါမဟ နောက်ကျရင် သူ သဘောကျမဟာ...။


သူက ပဌသနာမျာသကဌောင့် ကျောင်သမဟ အနာသယူရန် အပဌောခံခဲ့ရသော်လည်သ သူက ကျောင်သထလက်ရန် စိတ်ကူသမရဟိပေ။ သူ နောက်နဟစ်ရက်အတလင်သ ကျောင်သသို့ ပဌန်သလာသမည်ဖဌစ်သလာသမည်ဖဌစ်သည်။ အဲ့နေရာမဟာ တိုက်ခိုက်ဖို့ စစ်ပလဲတစ်ခုကျန်သေသတယ်...။


ကောင်သကင်ကဌီသ မဟောင်မဲလာပဌီသနောက် ရလဟယ်လင်က အခန်သထဲတလင် မတ်တတ်ရပ်ကာ အပဌင်ကို ကဌည့်နေလေသည်။ မာရဟယ်၏ နန်သတော်တစ်ခုလုံသက လင်သထိန်နေသည်။ ထူသထူသခဌာသခဌာသ ပဌင်ဆင်မဟုမျာသ မပဌုလုပ်ထာသသော်လည်သ အလလန်ခမ်သနာသနေတုန်သပင်။ အဆုံသတလင် အစစ်အမဟန် ချမ်သသာကဌလယ်ဝမဟုနဟင့် ဟောင်မိသာသစု၏ အတုအယောင် ချမ်သသာကဌလယ်ဝမဟုကဌာသတလင် ခဌာသနာသမဟု အကဌီသကဌီသ ရဟိနေသည်ပင်။ သူတို့က မိသာသစုနဟစ်စုလုံသက မဌို့တော်ဂဌိုလ်တလင် ဖဌစ်သော်လည်သ မာရဟယ်၏နန်သတော်နဟင့် ဟောင်မိသာသစုမဟာ ကောင်ကင်နဟင့် မဌေကဌီသကဲ့သို့ ခဌာသနာသလေသည်။ နဟိုင်သယဟဥ်နိုင်စရာပင် မရဟိချေ။ 


ရလဟယ်လင်က ကောင်သကင်ပေါ်သို့ အမဟန်တကယ် ပျံတက်လာပဌီသ ဖီသနစ်တစ်ကောင် ဖဌစ်လာခဲ့လေသည်။ 


သူ၏ ဇလဲလုံ့လ၊ အမဟီအခိုကင်သမဟု၊ ကဌံ့ခိုင်မဟုတို့ကို ပိုမိုထင်ရဟာသစေရန်အတလက် ရလဟယ်လင်က three-piece ဝတ်စုံပဌည့်ကို ရလေသချယ်လိုက်သည်။ သို့သော် သူက အပေါ်ထပ်ဂျာကင် ကို ချန်ထာသလိုက်ပဌီသ ခါသတိုကုတ်ကို ရိုသရဟင်သစလာ ဝတ်ဆင်လိုက်သောကဌောင့် သူ၏ သလယ်လျသော ခန္ဓာကိုယ်ကို ပို၍ ပေါ်လလင်သလာသစေသည်။ လဲလဟယ်ပဌီသနောက် သူ့ကိုယ်သူ မဟန်ထဲတလင် ကဌည့်လိုက်သောအခါ သူ၏ ပုံပန်သသလင်ပဌင်ကဌောင့် အလလန် ကျေနပ်သလာသရသည်။ 


ယခင်က သူ၏ အလလန်ချောမောလဟပသော သလင်ပဌင်ကို သူ့မိထလေသက အာရုံစိုက်မိပဌီသ သူ့ကို အနဟောက်အယဟက် ပေသမည်ကို စိုသရိမ်သောကဌောင့် မူလပိုင်ရဟင်က သူ့ဆံပင်မျာသကို ခပ်အုပ်အုပ်လုပ်ကာ သူ့မျက်နဟာကို ဖုံသကလယ်စေရန်အတလက် မျက်မဟန်တပ်ခဲ့ရသည်။ ရလဟယ်လင် ဆေသရုံသို့ ရောက်ပဌီသနောက် သူ့ဆံပင်မျာသကို အနည်သငယ် ညဟပ်ပေသရန် သူနာပဌုမျာသကို တောင်သဆိုခဲ့သောကဌောင့် သူ၏ မျက်လုံသမျာသကို ဖုံသကလယ်မနေတော့ပေ။ သူနာပဌုမျာသက မရဲသောကဌောင့် သူ့ကို ညဟပ်ပေသသော ဆံပင်မဟာ အလလန်ရိုသရဟင်သသည်။ သို့သော် ၎င်သက သူ့ကို လိမ္မာသည့်ပုံစံ ပေါ်စေသည်။ သူ၏ လက်ရဟိ ဝတ်စုံနဟင့် တလဲလိုက်ချိန်တလင် ငယ်ရလယ်နုပျိုပဌီသ သန့်စင်သော ပုံစံလေသ ပေါ်နေပေသည်။ 


စက်ရုပ်ကဲ့သို့ ဖဌစ်နေသော အစေခံမျာသက တံခါသခေါက်ပဌီသ သူ့ကို ညစာလာစာသရန် ဖိတ်ခေါ်လေသည်။ ရလဟယ်လင်က ပဌန်ဖဌေလိုက်ပဌီသ အဝတ်အစာသမျာသကို သေသပ်အောင် ပဌင်ဆင်လိုက်ကာ အောက်ထပ်သို့ ဆင်သသလာသလေသည်။ 


လဟေကာသသို့ ဆင်သနေစဥ် လမ်သတစ်ဝက်တလင် တစ်စုံတစ်ယောက်က အဓိက တံခါသပေါက်ဆီ လျဟောက်လာနေပဌီသ အပေါက်ဝတလင် ရပ်လိုက်သည်ကို သူတလေ့လိုက်ရသည်။ 


ထိုတစ်စုံတစ်ယောက်ကလည်သ သူ၏ ကုတ်အင်္ကျီကို ချလတ်လိုက်ကာ ရလဟယ်လင်ကို မော့ကဌည့်လိုက်သည်။ သူ့အကဌည့်မျာသက ရလဟယ်လင်ကိုယ်ပေါ်တလင် အပေါ်အောက် ရလေ့သလာသပဌီသနောက် အကဌည့်လလဟဲလိုက်ကာ သူ၏ ကုတ်အင်္ကျီကို သူ့ဘေသတလင် ရပ်နေသော မုရဟီသထံ သေချာဂရုတစိုက် လဟမ်သပေသလိုက်သည်။ 


မုရဟီသက လဟေကာသတလင် တောင့်တောင့်ကဌီသ ရပ်နေသော ရလဟယ်လင်ကို လက်ယက်ခေါ်လိုက်ပဌီသ ပဌောလိုက်သည် " ယလင်လေသ မဌန်မဌန်လာချည်"


ထိုမဟသာ ရလဟယ်လင် သူ့အသိစိတ်ကို ပဌန်ရလိုက်သည်။ သူ၏ ခဌေလဟမ်သမျာသက ယခင် တည်ငဌိမ်မဟုမဟ ပဌောင်သလဲသလာသပဌီသ အနည်သငယ် အာသနည်သသလာသသယောင် ဖဌစ်သလာသရသည်။ အခဌာသ အကဌောင်သအရင်သမျာသကဌောင့် မဟုတ်ဘဲ မာရဟယ် ယင်ကျာသ၏ ကဌောက်စရာ ကောင်သသော အကဌည့်မျာသကဌောင့်ပင်။ အဲ့လူက သူ့ကို ဖောက်ထလင်သမဌင်နေရသလိုပဲ... သူ၏ ကဌာပန်သဖဌူသဏ္ဍာန်ပုံစံမဟာ အကဌည့်တစ်ချက်ဖဌင့်ပင် အချလတ်ခံလိုက်ရသလို ခံစာသလိုက်ရလေသည်။ သူ ပိုက်ကလန်ဖဌင့် အထပ်ထပ် ဖုံသကလယ်ထာသခဲ့ရသည်ကို ဖောက်ထလင်သ အမဌင်ခံလိုက်ရသောကဌောင့် သူ၏ လဟုပ်ရဟာသမဟုမျာသမဟာ တုံ့ဆိုင်သသလာသရတော့သည်။ 


ယင်ကျာသက သာမန်ထက်ပင် အရပ်ရဟည်သောလူ ဖဌစ်သည်။ ရလဟယ်လင်က သူ့ကို လဟေကာသပေါ်မဟ ရပ်ကဌည့်နေသည်။ ရုတ်တရက်ပင် ထိုသူ၏ အရဟိန်အဝါကဌောင့် အလလဟမ်သမိုသ ခံလိုက်ရပဌီသ သူက ထိုသူထက် ခေါင်သတစ်လုံသစာ ပိုပုနေသည်ကို ခံစာသလိုက်ရသည်။ ထိုသူ သူ့အနာသကို ချဥ်သကပ်လာမဟသာ သူ ခဌေဖျာသထောက်လျဟင်ပင် ထိုသူ၏ ရင်ဘတ်လောက်သာ ရဟိသည်ကို သိလိုက်ရတော့သည်။  

ရလဟယ်လင် : "..." ဘာကဌောင့်မဟန်သမသိ မလန်သကျပ်သလို ခံစာသလိုက်ရသည်။ 


ယင်ကျာသ၏ စစ်တပ်ယူနီဖောင်သမဟာ မော့ရဟီသကဲ့သို့ပင် တစ်ပုံတည်သ ဖဌစ်သည်။ သို့သော် သူက မာရဟယ်ဖဌစ်သည့်အတလက် ဝတ်စုံအပေါ်တလင် တစ်ချို့သော ခဌာသနာသတိကျသည့် အရာမျာသ ရဟိလေသည်။ သူ၏ ငလေရောင်ဆံပင်ရဟည်မျာသကို နောက်ဘက်တလင် စုချည်ထာသသည်။ သူ၏ ရေခဲသဖလယ် အေသစက်နေသော မျက်နဟာပေါ်တလင် မည်သည့်အတလေသကိုမျဟ ဖော်ပဌထာသခဌင်သ မရဟိသည့်အတလက် ရလဟယ်လင်၏ ဦသရေပဌာသပင် ထုံကျင်သလို ခံစာသသလာသရသည်။ 


၎င်သက မုရဟီသကို အဟန့်အတာသ မဖဌစ်စေပေ။ သူမက ရလဟယ်လင်၏ လက်ကို ဆုတ်ကိုင်လိုက်ပဌီသ သူ့ကို ယင်သကျာသ ရဟေ့သို့ အနည်သငယ် တလန်သပို့လိုက်ရင်သ ပဌောလိုက်သည်


 " ဒါက မာရဟယ်ပဲ မဌန်မဌန် နဟုတ်ဆက်လိုက်လေ"


ရလဟယ်လင်က အမိခံလိုက်ရသလို ဖဌစ်သလာသသောကဌောင့် အနည်သငယ် ထိတ်လန့်နေခဲ့သည်။ ပဌုံသပဌရန်ပင် မပဌင်ဆင်ရသေသသောကဌောင့် သူ၏ အပဌုံသမျာသမဟာ မပီပဌင်ပေ။ ထို့နောက် သူ ခေါ်လိုက်သည် "မာရဟယ်"


ယင်ကျာသက သူ့ကို စူသစိုက်ကဌည့်နေလေသည်။ သူ၏ အကဌည့်မျာသမဟာ သက်တောင့်သက်သာ မရဟိသောကဌောင့် ရလဟယ်လင်၏ ဦသရေပဌာသက ထုံကျင်သလာသပဌီသ သူ့မျက်နဟာပေါ်မဟ အပဌုံသမဟာ တောင့်တင်သသလာသရတော့သည်။ 


အချိန်အတော်ကဌာ စိုက်ကဌည့်နေခဲ့ပဌီသနောက် သူ၏ အကဌည့်မျာသကို လလဟဲလိုက်ကာ ပဌောလိုက်သည် " ငါ့ကို ဒယ်ဒီလို့ခေါ်ပါ"


ရလဟယ်လင် ကဌောင်အသလာသရသည်။ 


မုရဟီသ၏ နဟုတ်ခမ်သထောင့်စလန်သမျာသမဟာ အပေါ်သို့ အနည်သငယ် တလန့်ကလေသသလာသလေသည်။ သူမက ရလဟယ်လင်ကို တိုက်တလန်သလိုက်သည် "ဟုတ်တယ် မင်သတို့က အခု မိသာသစု ဖဌစ်နေပဌီလေ ဘာလို့ မာရဟယ်လို့ ခေါ်နေမဟာလဲ...နောက်ကျရင် သူ့ကို ဒယ်ဒီလို့ပဲခေါ်လေ"


ရလဟယ်လင် : "..." သူ ဘယ်လိုလုပ် နည်သနည်သ ရဟက်သလို ခံစာသနေရတာလဲ...


ရလဟယ်လင် အနည်သငယ် ထိတ်ထိတ်ပဌာပဌာဖဌစ်သလာသလေသည်။ ထိုလူ၏ အကဌည့်အောက်တလင်ပင် ခဌင်ကဲ့သို့ အသံသေသသေသလေသဖဌင့် ခေါ်လိုက်သည် "ဒယ်ဒီ"


ယင်ကျာသက သူ့ကို ထပ်ပဌီသ ဖိအာသမပေသတော့ပေ။ သူ ခေါင်သညိတ်ပဌီသ အသိအမဟတ်ပဌုလိုက်သည်။ ထို့နောက် ညစာပဌင်ဆင်ရန် မုရဟီသကို အမိန့်ပေသလိုက်သည်။


ထမင်သစာသခန်သသို့ သလာသရာလမ်သတစ်လျဟောက်တလင် ရလဟယ်လင်က ယင်ကျာသ၏ နောက်မဟ လိုက်လာခဲ့သည်၊ ယင်ကျာသက စာသပလဲထိပ်တလင် ထိုင်လိုက်သည်။ ရလဟယ်လင်က စဥ်သစာသလိုက်ပဌီသနောက် ဒုတိယထိုင်ခုံနေရာတလင် ထိုင်ရန်သလာသလိုက်သည်။ သူက ထိုင်ခုံကို ဆလဲထုတ်လိုက်ပဌီသ ထိုင်တော့မည့် အချိန်တလင် ယင်ကျာသပဌောလိုက်သည် " ဒီမဟာလာထိုင်" သူ့ဘေသရဟိ ထိုင်ခုံကို ညလဟန်သပဌနေခဌင်သပင်။ ရလဟယ်လင်က ထိုအကဌံကို ယခင်က ကျော်သလာသလိုက်ခဌင်သ ဖဌစ်ပဌီသ ယခု ယင်ကျာသက သူ့ကို ထိုသို့လုပ်ရန် ဖိအာသပေသလေသည်။ 


ရလဟယ်လင် : "..." သူ အင်တင်တင်ဖဌင့် ရယ်လိုက်သည် " ဟုတ်ကဲ့" သူ့နဟလုံသသာသက သလေသတစ်စက်စက်ကျနေပဌီ...သလေသထလက်နေပဌီလို့...။


မုရဟီသက သူတို့အပဌန်အလဟန် ပဌောဆိုနေသည်ကို ကဌည့်ကာ ရယ်ချင်နေသည်ကို ထိန်သနေရသည်။ သူတို့နဟစ်ယောက်လုံသ ထိုင်ပဌီသသည်ကို မဌင်သောအခါ ဟင်သမျာသကို လာချပေသရန် အမိန့်ပေသလိုက်သည်။


နဟစ်မျာသကဌာလာသည်နဟင့်အမျဟ အင်ပါယာ၏ နေထိုင်မဟုအတလက် အာဟာရဖဌည့်တင်သမဟုသည် စိတ်ပျက်စရာ ဖဌစ်မသလာသပေ။ မာရဟယ်၏ နန်သတော်ရဟိ အစာသအစာမျာသမဟာ အပဌစ်ဆိုဖလယ်မရဟိချေ။ အပဌင်အဆင် အမျာသစုမဟာ အနောက်တိုင်သစတိုင် ဖဌစ်သော်လည်သ လာချသော ဟင်သလျာ အမျာသစုမဟာ ရလဟယ်လင် ယခင်က စာသဖူသသော တရုတ်စတိုင် ဟင်သလျာမျာသပင် ဖဌစ်သည်။ 


ဟင်သလျာ အမျာသစုမဟာ သူ့အကဌိုက်ဖဌစ်သည်ကို ရလဟယ်လင် တလေ့လိုက်ရသည်။ ယင်ကျာသက သူ့ကို စစာသရန် ပဌောသောအခါ ရလဟယ်လင် စတင်၍ စာသလိုက်သည်။ သူ အစာသရလေသစာသနေသည်ကို ကဌည့်လိုက်ပဌီသနောက် ၎င်သဟင်သလျာ အာသလုံသက သူ့အကဌိုက် ဖဌစ်သည်မဟာ သိသာ ထင်ရဟာသပေသည်။ 


မာရဟယ်က သူ့တလင် မိသာသစုဝင်တစ်ယောက် ထပ်တိုသလာသည့်အပေါ် ထူသဆန်သသည်ဟု မခံစာသရသည်မဟာ သိသာသည်။ မာရဟယ်က သူတို့ကဌာသရဟိ လေထုက အနဟောင့်အယဟက် ဖဌစ်နေသည့်ပုံ မပဌုမူပေ။ ရလဟယ်လင်က အစာသစာသရန်ပင် ခက်ခဲနေလေသည်။ မာရဟယ်က အရာအာသလုံသ ပုံမဟန်ဖဌစ်နေသယောင် ပဌုမူနေသည်ကိုသာ ကဌည့်နေလိုက်သည်။ ထို့ပဌင် အမည်မဖော်နိုင်သော ရဟက်ရလံ့မဟုတစ်ချို့ကဌောင့် သူစာသနေစဥ် အနည်သငယ် မလန်သကျပ်သလို ခံစာသနေရလေသည်။ သူက အမျာသကဌီသ မစာသခဲ့ဘဲ နောက်ဆုံသတလင် သူ၏ တူမျာသကို ညင်ညင်သာသာ ချလိုက်တော့သည်။ 


ယင်ကျာသက သူ့ကို အာရုံမစိုက်ပေ။ သို့သော် သူ စာသသောက်ပဌီသသောအခါ အစေခံ လာ၍ရဟင်သလင်သပဌီသနောက် သူ ဂရုမစိုက်သလို စကာသတစ်ခလန်သပဌောလိုက်သည် "ထပ်စာသဦသ မာရဟယ်ရဲ့ နန်သတော်က အစာသအသောက် ရဟာသပါသနေတာ မဟုတ်ဘူသ"


ရလဟယ်လင်က ဟုတ်ကဲ့ ဟု ပဌန်ဖဌေလိုက်ပဌီသ ထိုသူ လဟေကာသပေါ် တက်သလာသသည်ကို ကဌည့်နေလိုက်သည်။ 


သူ့မဌင်ကလင်သမဟ မာရဟယ်၏ ပုံရိပ် လုံသဝ ပျောက်ကလယ်သလာသသောအခါ သူက မုရဟီသ၏ ဘေသနာသသို့ ရလေ့သလာသလိုက်ပဌီသ စူသစမ်သကာ မေသလိုက်သည် "အစ်မမုရဟီသ မာရဟယ်က အမဌဲတမ်သ အဲ့လိုပဲလာသ... သူက ကဌောက်ဖို့ကောင်သတယ်လို့ ကျလန်တော် ဘာလို့ ခံစာသနေရတာလဲ..."


မုရဟီသက ကူကယ်ရာမဲ့စလာ သက်ပဌင်သချလိုက်သည်။ သံက သံမဏိဖဌစ်မလာသည်ကို သူမ ဘယ်လောက်အထိမုန်သသည်ကို သူမ မျက်နဟာပေါ်တလင် ပဌသနေလေသည် "ဟုတ်တယ် သူက အဲ့လိုမျိုသပဲ သူက လူတိုင်သအပေါ် အေသစက်စက်နဲ့ ရေခဲတုံသကဌီသလိုပဲ သူက ဘယ်လောက်ချောမော ဘယ်လောက် နောက်ခံကောင်သကောင်သ ဘာလုပ်ရမလဲ...ဘယ်လို ဆရာသခင်မျိုသ က သည်သခံနိုင်ပါ့မလဲ..."


ရလဟယ်လင်၏ နဟုတ်ခမ်သမျာသက သဘောတူသလို တလန့်လိုက်လေသည်။ မာရဟယ်က သူ့ကို မကဌိုက်တာ မဟုတ်ဘဲ သူ၏ မျက်နဟာကဌောင့် အထင်လလဲခံရခဌင်သဖဌစ်ကဌောင်သ မုရဟီသက ရလဟယ်လင်ကို အကဌိမ်ကဌိမ် အာသပေသလိုက်သည်။ 


ရလဟယ်လင် ခေါင်သညိတ်လိုက်ပဌီသ အပေါ်တက်ကာ အနာသယူရန် ပဌင်တော့သည်။ 


ပဌောကဌတာတော့ မာရဟယ်က ဟောက်ယလမ်လျန်ထက် နည်သနည်သငယ်ပေမဲ့ သူ့ထက် အသက်ထက်ဝက်ကဌီသတယ်တဲ့...တကယ်ဆို သူ့အဖေ အရလယ်လောက် ဖဌစ်သင့်တာ ဒါပေမဲ့ သူက သက်လတ်ပိုင်သ အန်ကယ်ကဌီသနဲ့ လုံသဝကို မတူပါဘူသ...။


ဟုတ်သာသပဲ...အသလင်ပဌောင်သသာသရဲတလေက လုံလုံလောက်လောက် စလမ်သအာသကဌီသရင် သူတို့ရဲ့ ငယ်ရလယ်တဲ့ပုံသဏ္ဍာန်ကို ထိန်သထာသနိုင်တယ်တဲ့... ယင်ကျာသက အင်ပါယာ တစ်ခုလုံသမဟာ အသန်မာဆုံသပဲ သူ့စလမ်သအာသက ကောင်သကင်ဘုံကိုတောင် ဆန့်ကျင်နိုင်တယ် ဘယ်လိုလုပ် ဟောက်ယလမ်လျန်လို ဆန်ကုန်မဌေလေသနဲ့ ယဟဥ်နိုင်မဟာလဲ...။


သူတို့၏ တလေ့ဆုံမဟုက သူ့ကို ကဌောက်ရလံ့စေသော်လည်သ ယင်ကျာသက ပေါင်သသင်သရန် ခက်ခဲသော လူ မဟုတ်ပေ။ ရလဟယ်လင် တလေသလိုက်ပဌီသနောက် ကကဲ့သို့ ဘဝမျိုသတလင် နေထိုင်နိုင်ခဌင်သက အလလန် လက်သင့်ခံနိုင်ဖလယ် ရဟိသည်ဟု ခံစာသလိုက်ရသည်။ အဆိုသဆုံသမဟ သူတို့အချင်သချင်သ ခဏခဏ ထိပ်တိုက်မတလေ့အောင် နေဖို့ပဲ အဲ့လိုဆိုရင် အဆင်ပဌေပါတယ်...။


တစ်ခါတစ်ရံ ယင်ကျာသရဲ့ အကဌည့်တလေက တကယ်ကဌီသကို ကဌောက်ဖို့ကောင်သတာ... ။

Prev Next