MM Story Teller

Chapter 195

Viewers 32k

🦊Arc 13 [စွမ်းအင်ကျောက် လက်မှုပညာရှင်]

Chapter 195

13.2 - ငါသူ့ကို ဒီနေ့သေအောင်ရိုက်မှာ ကြည့်နေလိုက်ကြ!

အမှန်တကယ်တွင် မူလခန္ဓာကိုယ်က ယခုကဲ့သို့သော အချစ်ဇာတ်လမ်းမျိုးတွင် ပေါ်မလာသင့်ပေ၊

အကြောင်းမှာ သူ၏တည်ရှိနေမှုနှင့် ယခုလိုဇာတ်လမ်းမျိုးက ဘယ်လိုမှ မလိုက်ဖက်နိုင်သောကြောင့်ပင်။ ဇာတ်ကြောင်း၏ပဏာမအရ အနှီသူသည် ဇာတ်လိုက် shou ကို ဘယ်လိုဒုက္ခပေးရမလဲဟူ၍ အမြဲတွေးနေတတ်သော ကျေးဇူးမသိတတ်သည့် ငတုံးတစ်ကောင်ဖြစ်နေသည်၊

ဇာတ်လိုက် shou သည် သားရဲတပိုင်းဖြစ်နေရုံမှလွဲပြီး ဝိညာဥ်စွမ်းအားကြီးမားကာ ဆရာတစ်ယောက်ဖြစ်သော သူ့ထက်ပင် အရည်အချင်းပိုရှိနေသေးသည်။ ဤအကြောင်းကြောင့် ညီဖြစ်သူနှင့် ကန့်လန့်တိုက်ရရန် ဘာမဆိုလုပ်ခဲ့သည်။ ဇာတ်လိုက် shou သည် အစပိုင်းက လက်တုံ့ပြန်မှုမရှိခဲ့သော်ငြား နောက်ဆုံးတော့ သည်းခံစိတ်ကုန်သွားပြီး ပြန်လုပ်လေတော့၏။

ထိုသူမှအပ ဤဇာတ်လမ်းထဲမှ လူအချို့သည် မကောင်းဆိုးဝါးထက်ပင်ဆိုးသော်လည်း ဇာတ်လိုက် shou ၏မိဘများကမူ ထင်မထားလောက်အောင် သဘောကောင်းကြသည်။

မူလခန္ဓာကိုယ်က ဘာကြောင့် ဤမိသားစုအပေါ် မကောင်းတွေးနေပြီး ပြဿနာရှာရလောက်သည်အထိ ဖြစ်ရသည့်အကြောင်းအရင်းကို သူလည်းမတွေးတတ်တော့ပေ။သို့သော်လည်း ၎င်းတို့အားလုံးက ဇာတ်လိုက်၏ ရှုထောင့်မှသာ ဖြစ်နေသည်။

ဇာတ်လမ်းက မူလခန္ဓာကိုယ်ဘက်မှသာရေးထားလျှင် အခြေအနေက လုံးဝပြောင်းသွားနိုင်၏။

မူလခန္ဓာကိုယ်၏အဖေက သူ၏အမေဖြစ်သူမိသားစုနှင့် လက်ထပ်လိုက်ရ၏။ သူ၏အမေနှင့် အဘိုးတို့မှာ မတော်တဆမှုတွင် သေဆုံးသွာခဲ့ရပြီး သူ၏အဖေကအမွေရကာ အရာအားလုံးက သူ့အပိုင်ဖြစ်လာခဲ့သည်။

သူ၏အမေကိုယ်က အေးစက်မသွားသေးခင်မှာပင် ထိုသူက အချစ်စစ်ကို တွေ့ခဲ့ပြီး ဇာတ်လိုက်၏အမေနှင့် သားဖြစ်သူကို အိမ်သို့ခေါ်လာခဲ့သည်။

ဇာတ်လိုက် shou တွင် မူလခန္ဓာကိုယ်ထက် အသက်အရွယ်ပိုကြီးသော အစ်ကိုဖြစ်သူ သားရဲလူသားတစ်ယောက် ရှိသေးသည်။ အိမ်ပေါ်ရောက်လာသည့် သားရဲတပိုင်းမိထွေးဖြစ်သူက အပေါ်ယံတွင် မူလခန္ဓာကိုယ်အပေါ် ခင်မင်ပုံပြခဲ့သည်၊ အစားအသောက်များဝယ်ကျွေးပြီး အဝတ်အစားနှင့် အသုံးအဆောင်ပစ္စည်းများပါ ဝယ်ပေးခဲ့သည်၊ နောက်ကွယ်တွင်တော့ မူလကိုယ်အတွင်းမှ ဝိညာဥ်စွမ်းအင်တို့ကို နည်းနည်းချင်းစီ ဖျက်ဆီးနေမှန်း သိသာခဲ့သည်။

ဤကမ္ဘာပေါ်မှ ဆရာများသည် ငယ်ရွယ်စဥ်တည်းက ဝိညာဥ်စွမ်းအင်များ နိုးထလာလေ့ရှိသည်။ ဆရာများအတွက် ထိုအချိန်ကာလက ကြမ်းတမ်းပြီး တစ်စုံတစ်ခုဖြစ်ပွားခဲ့လျှင် တစ်ဘဝလုံးကိုပါ ထိခိုက်သွားစေနိုင်သည်။ မူလကိုယ်၏ အမေဖြစ်သူစွမ်းရည်အရ သူ၏ဝိညာဥ်စွမ်းအားက ဘယ်သောအခါမှ ပျမ်းမျှဟူ၍မရှိပေ။ မူလကိုယ်မှာ တတ်နိုင်သလောက် ကာကွယ်ခဲ့သော်ငြား ကံမကောင်းစွာဖြင့် သူက ဤအိမ်ကြီးတွင် နေထိုင်ရပြီး ဝိညာဥ်စွမ်းအားမှာလည်း ပျက်စီးလာခဲ့သည်။ ၎င်း၏နောက်ကွယ်တွင် မိထွေးဖြစ်သူရှိနေမှန်းကိုလည်း အတပ်သိနေခဲ့၏။

မူလခန္ဓာကိုယ်သည် အေးဆေးစွာနေထိုင်နေရပုံပေါ်သည့်တိုင် တကယ်တမ်းတွင် အနှီသူသည် အမျိုးစုံသောပင်ပန်းဆင်းရဲမှုများနှင့် ရင်ဆိုင်ခဲ့ရကာ အနိုင်ကျင့် နှိပ်စက်မှုတို့ကိုလည်း ခံခဲ့ရ၏။ သူသည်ဆရာတစ်ယောက်ဖြစ်စေကာမူ သူ၏ဝိညာဥ်စွမ်းအားနှင့် ဖွံ့ဖြိုးမှုကမမြင့်မားပေ၊ သို့ဖြစ်၍ အဖေဖြစ်သူကလည်း သူ့အား ရွံရှာသလိုကြည့်တတ်ပြီး ဆန်ကုန်မြေလေး အမှိုက်ကောင်ဟူ၍လည်း ဆဲရေးတတ်ပြီး အခြားသောကြမ်းတမ်းသည့် စကားများလည်း ပြောတတ်သေးသည်။ ထိုအခြေအနေမျိုးတွင် မိထွေးဖြစ်သူက ကြားဝင်ပါတတ်ပြီး အပေါ်ယံ၌ ဖြန်ဖျေပေးနေသလို ထင်ရလင့်ကစား တကယ်တမ်းတွင် သူမ၏ အသွားထက်သည့် ဓားတစ်ချောင်းပမာ စကားလုံးများက မူလကိုယ်ကို ပိုမို နိမ့်ကျသွားစေခဲ့၏။

သူ၏မိထွေးဖြစ်သူက သားရဲတပိုင်းဖြစ်ပြီး လက်မှုဆရာသခင်တစ်ယောက်ကို မမွေးပေးနိုင်ပေ။ သို့သော် မွေးထားသည့်သားရဲတစ်ပိုင်း သားတော်မောင်ကိုမူ အလိုလိုက်ကာဖျက်ဆီးထားခဲ့သည်။ ထိုသားရဲတစ်ပိုင်းပေါက်စသည်လည်း အမေဖြစ်သူက မူလကိုယ်ကို ပုံမှန်ထက် နှိမ်နေမှန်း သိသည့်အခါ အကောင်းသာပြောတတ်ပြီး အပြင်တွင် မူလကိုယ်ထည်အကြောင်းကို အပုပ်ချနေခဲ့သည်။ သူ၏တိုက်ခိုက်ရေးစွမ်းရည်က အမေဖြစ်သူမျှ မမြင့်မားသော်လည်း သူသည်ကား ကြာပန်းဖြူလေးပင်ဖြစ်ပြီး သနားစရာကောင်းအောင် သရုပ်ဆောင်ပြသည့်နေရာတွင် အလွန်ကိုတော်ပေသည်။

ထိုသူထံမှ အကြိမ်ပေါင်းများစွာ ဆုတ်ဖြဲခံလိုက်ရပြီး မူလကိုယ်၏ဂုဏ်သတင်းမှာ ကျောင်းတွင်လည်း အင်မတန်ဆိုးရွားနေခဲ့သည်။ သူ့ရှေ့တွင် အနှီသူသည် ချောမောပြီး တစ်မိုးအောက်တစ်ယောက် ဆရာသခင်ဟုပြောကြသော်လည်း နောက်ကွယ်တွင်မူ သူသွားသည့်နေရာတိုင်း လက်ညှိုးထိုးပြောဆိုနေကြသည်သာ။

အစပိုင်းတွင် မူလကိုယ်က မသိချင်ဟန်ဆောင်နေသေးသည်။ သည့်အပြင် သူတို့က ကလေးများလည်း မဟုတ်တော့ပေ။ သို့သော်လည်း ညီဖြစ်သူက ပြောချင်တိုင်းပြောဆိုနေလေသည်၊ သူ၏အမေဖြစ်သူက သူ့အား လှောင်ပြောင်ခံရရန် မွေးပေးလိုက်ခြင်းဖြစ်ကြောင်း၊ သူမကလည်း အသုံးမဝင်သည့် ဆရာသခင်တစ်ယောက်သာဖြစ်ပြီး သူမ၌ကြီးမားသော ဝိညာဥ်စွမ်းအားရှိသော်ငြား သူကဲ့သို့ ဆန်ကုန်မြေလေး အမှိုက်ကောင်ကို မွေးလာသေးကြောင်း ပြောဆိုနေဆဲပင်။

သူသည် သောကြာကြယ်(ကံမကောင်း)အဖြစ် မွေးလာပုံရပြီး ထို့ကြောင့်ပင် သူ့အမေနှင့် အဘိုးဖြစ်သူက မတော်တဆမှုတွင် ကွယ်လွန်သွားရခြင်းဖြစ်ကြောင်း ပြောခဲ့သည်။

ထိုသို့သောစကားမျိုး ကြားရလျှင် မည်သူကမှ သည်းညည်းခံနေနိုင်မည်မဟုတ်ပေ။ မူလကိုယ်သည် သူ၏ပါးစပ်သရမ်းသော ညီလေးကို ဒုတိယထပ်လှေကားမှ တွန်းချလိုက်သည်။ သားရဲတစ်ပိုင်းသားပေါက်လေးက လှေကားအောက်ကို ဇောက်ထိုးကျသွားပြီး ဆေးရုံရောက်သွားတော့၏။

သူပြန်ရောက်လာသည့်အခါ သားရဲတစ်ပိုင်းပေါက်စလေး၏ကိုယ်ထဲသို့ ဝိညာဥ်ကူးလာသည့် လူတစ်ယောက်က ဝင်နေနှင့်ပေပြီ။ ဇာတ်လိုက် shou သည် သွက်လက်ပြီးချစ်စရာကောင်းလာသည့်အပြင် ဇာတ်လိုက်၏အရှိန်အဝါများကြောင့် လူများက သူ့အားတွေ့တိုင်း ပိုချစ်လာကြပေ၏။

မူလကိုယ်ကမူ ညီလေးဖြစ်သူကို တွန်းချလိုက်မှုကြောင့် သူ့အဖေနှင့် အကြီးအကျယ်စကားများကြကာ သူကမြေအောက်ခန်းထဲသို့ ရောက်သွားလေ၏။ မတော်တဆမှုက ကျောင်းတွင်သတင်းပျံ့နေပြီး လူများကသူ့အား လူသတ်သမားအဖြစ် စတင်မြင်လာကြတော့သည်။

ပြီးနောက် ထိုကန့်လန်ကာအဖွင့်က ဇာတ်လိုက်အတွက်ပင်။

ဇာတ်လိုက်သည် အဖေဖြစ်သူထံမှ လည်ဆွဲတစ်ခုရခဲ့ပြီး မမျှော်လင့်ဘဲ လည်ဆွဲအတွင်းမှ လျို့ဝှက်ချက်ကို သိခွင့်ရခဲ့သည်။ ထိုအထဲတွင် ပဟေဠိဆန်သော နေရာအလွတ်ရှိနေကာ စိတ်ဝိညာဥ်ရေစီးကြောင်းလေးတစ်ခုလည်းရှိနေသည်။ ၎င်းတွင် အစဥ်အဆက် စွမ်းအင်ကျောက်ထုဆစ်သူဆရာသခင်များ၏ အမွေလည်းရှိ၏။

ဇာတ်လိုက် shou ကထိုအထဲတွင် ကျင့်ကြံပြီးနောက် သားရဲတပိုင်းကိုယ်၏ ကန့်သတ်ချက်ကြောင့် မတိုးတက်လာခဲ့သော စိတ်ဝိညာဥ်က စတင်တည်ငြိမ်လာခဲ့သည်။ သူ့မျက်လုံးကို စိတ်ဝိညာဥ်ရေစီးကြောင်းမှ ရေများဖြင့် အာဟာရဖြည့်တင်းကာ အထူးကျင့်ကြံသည့်နည်းလမ်းကို သုံးခဲ့သည်၊ သာမန်မျက်လုံးနှင့်ပင် စွမ်းအင်ကျောက်ရိုင်းများအတွင်းမှ စွမ်းအင်ခရစ်စတယ်များကို မြင်နိုင်လာလေ၏။

ပြောစကားများအရ စွမ်းအင်ကျောက်ရိုင်း၏ စိတ်ဝိညာဥ်စွမ်းအားကို စစ်ဆေးရာတွင် အတွင်းမှ စွမ်းအင်ခရစ်စတယ်၏အဆင့်နှင့် အရွယ်အစားကို ဗဟုသုတနှင့် အတွေ့အကြုံများအရ အကဲဖြတ်နိုင်သော်လည်း ဇာတ်လိုက် shou ၏ရွှေလက်ချောင်းကမူ လိမ်စားနေသည်နှင့်တူသည်။ သူစတင်လေ့ကျင့်ချိန်တွင် မူးဝေနေတတ်သည့်တိုင် ပိုလေ့ကျင့်လေ ပိုပြီးစိတ်ကျေနပ်ဖွယ်ကောင်းလာလေသာ။ အနှီလည်ဆွဲက ဇာတ်လိုက်ကို စီနီယာကျသော စွမ်းအင်ေကျာက်လက်မှုပညာဆရာသခင်လမ်းကြောင်းပေါ် လျှောက်စေခဲ့ပြီး ကျန်သည့်ဘဝတလျှောက်ကို ထိုအတိုင်းဆက်သွားစေခဲ့၏။

တကယ်တမ်း၌ အနှီလည်ဆွဲသည် မူလကိုယ်၏အမေဖြစ်သူ ချန်ထားခဲ့သည့် အမွေပစ္စည်းဖြစ်၏။ သူမဆန္ဒအရ မူလခန္ဓာကိုယ်အရွယ်ရောက်လာသည့်အခါ လွှဲပြောင်းပေးရန်စီစဥ်ခဲ့သော်လည်း အဖေဖြစ်သူက ဒဏ်ရာရစေခဲ့သည့်ပြစ်မှုကြောင့် ဇာတ်လိုက် shou ကိုပေးလိုက်သည်။

ဇာတ်လိုက် shou က ကြိုးစားနေရင်း အောင်မြင်တော့မည့်အချိန်တွင် ၎င်းတို့၏အဖေဖြစ်သူက မူလကိုယ်ကို အခြားမိသားစုနှင့် လက်ထပ်ပေးရန် အစီအစဥ်ချခဲ့သည်၊ နိုင်ငံရေးလှေကားထစ်တွင် ရှောရှောရှူရှူဖြင့် နောက်တဆင့်တက်လှမ်းနိုင်ရန်ရည်ရွယ်ထားခဲ့၏။

ထိုသတင်းကြားရသည့်အခါ မူလကိုယ်က အဖေဖြစ်သူနှင့် စကားပြောရန် ကြိုးစားခဲ့သည်၊ သို့သော် စကားအနည်းငယ်သာပြန်ရခဲ့၏။ "ဘာပဲဖြစ်ဖြစ် မင်းကိုဘယ်သူမှလိုချင်ကြတာမဟုတ်ဘူးလေ...အဖေ့အတွက် အသုံးဝင်တာလုပ်ပေးနိုင်ရင်ပဲ ကောင်းနေပြီ..မင်းလိုဝိညာဥ်စွမ်းအင်နိမ့်တဲ့ ဆရာသခင်အတွက် အရမ်းခက်ခဲမှာ..ပြီးတော့ အပြင်မှာ ဖွံ့ဖြိုးမှုအားနည်းတဲ့လူကို လိုချင်တဲ့သူ ဘယ်သူမှမရှိဘူး..."

ဘယ်လိုအဖေရင်းက ဤသို့ နှလုံးသားမရှိသည့်စကားမျိုး ပြောနိုင်မည်နည်း။ အဆုံးတွင်တော့ မူလကိုယ်သည် အနှီမိသားစုမှ မျှော်လင့်၍ရမည့်အရာ မရှိတော့ကြောင်း သိလိုက်ရလေပြီ၊ သည့်နောက် လက်မထပ်ရအောင်ထွက်ပြေးမည့်အစီအစဥ်ကို ဆွဲလေတော့သည်။ မထင်မှတ်ဘဲ ထိုကိစ္စကအောင်မြင်လုဆဲဆဲ၌ သူသည် ဇာတ်လိုက်၏ သဘောမတူမှုကို ခံရတော့၏။

ဇာတ်လိုက်သည် အသားမကျသေးသည့်ကိုယ်နှင့် အပိုင်းပိုင်းကွဲနေသော မှတ်ဉာဏ်များကြောင့် အစ်ကိုကြီးဖြစ်သူကို သဘောမကျပေ။ အလိုလိုပင် ကိစ္စများကိုခက်ခဲအောင်လုပ်လာပြီး ကျောင်းတွင် ဇာတ်လိုက်ကိုလိုက်နေသည့် အချို့သားရဲလူသားများကလည်း အစ်ကိုဖြစ်သူကို သဘောမကျကြပေ။ သူတို့က ဇာတ်လိုက်ပျော်ရွှင်စေရန် မူလကိုယ်ကိုအရှက်ခွဲကြ၏။

ဇာတ်လိုက်က သူသည် သူ့အဖေ၏သားဖြစ်ကြောင်းပြောပြထားပြီး လက်ထပ်ပွဲမှ တကိုယ်ကောင်းဆန်ကာ ထွက်ပြေးအောင်ဖန်တီး၍ အစီအစဥ်ကိုဖျက်ဆီးရန် ပြောထားခဲ့သည်။ ထို့နောက် သူ့အဖေက သူနှင့်အတူ နှစ်အကြာကြီး အတူရှိသွားနိုင်မည်!။

မူလကိုယ်က ဇာတ်လိုက် shou သည် တတ်သိလိမ္မာသည့် သားတစ်ယောက်အဖြစ် သူ့နေရာကိုယူမည့်အတွက် နှာခေါင်းရှုံ့ပေ၏။

သူကမှ မိသားစုထဲမှာ အလိမ္မာဆုံးသားလေး မဟုတ်ဘူးလား?

ထိုစကားက ဇာတ်လိုက်ကို တက်ကြွသွားစေပြီး မူလကိုယ်က လက်ထပ်ရမည့်အရေးမှမလွတ်မြောက်အောင် ချက်ချင်းပင် အခန်းထဲသော့ခတ်ထားလိုက်သည်။

ပြင်ပကမ္ဘာနှင့် အဆက်ဖြတ်ထားလိုက်ပြီး အမှိုက်ကောင်တစ်ယောက်ဖြင့် အတင်းအကျပ်လက်ထပ်စေလိုက်သည်။

ထိုအမှိုက်ကောင် ခင်ပွန်းသည်ကလည်း သူ့အားဒေါသတကြီးဖြင့် အနိုင်ကျင့်နေပြီး အသုံးမကျဘဲ ကလေးတစ်ယောက်မွေးပေးရန်ပင်အားမရှိ၍ ဆူဆဲလေတော့သည်။

မူလကိုယ်မှာ ထိုသို့သောကိစ္စမျိုးဖြင့် တခြားလူထံ နှိပ်စက်ခံရသည့်အဖြစ်မျိုးကို တစ်ခါမှမကြုံခဲ့ရဖူးပေ။ သူသည် လက်စားချေရန်ကြိုးပမ်းနေပြီး အသေအချာအစီအစဥ်ဆွဲကာ ခင်ပွန်းသည်ကိုသတ်ပစ်လိုက်တော့သည်။

ထို့နောက် သူအဖမ်းခံလိုက်ရပြီး တရားစွဲခံရကာ ထောင်နန်းစံလိုက်ရသည်။

အကျဥ်းထောင်ဟူသည်မှာ ကောင်းသည့်နေရာမဟုတ်။ ဆရာသခင်များအတွက် ကာကွယ်ရေးရှိသော်လည်း ခင်ပွန်းသည်၏မိသားစုကအင်အားကြီးကာ သူ၏ထွက်ဆိုချက်များကို အပြစ်ပေါ့စေသည်အထိ မဖြစ်အောင် ကြိုးကိုင်ထားခဲ့သည်။

သူသည် သားရဲလူသားများ၏ အကျဥ်းထောင်သို့ပင်အပို့ခံရပြီး မုဒိန်းကျင့်ခံရလုနီးပါးပင် ဖြစ်ခဲ့ရသည်။

ကံကောင်း၍ အကျဥ်းထောင်ဘော့စ်နှင့်သိကျွမ်းခဲ့ရပြီး သူ၏ကိုယ်ပိုင်ဉာဏ်ရည်ဖြင့် လွတ်မြောက်အောင်ကြံခဲ့သည်။ သူသည် တကယ်ပင်အောင်မြင်လုနီးပါးဖြစ်ခဲ့ပြီး ထောင်ဖောက်ရာတွင် ကူညီပေးခဲ့သည့် အကျဥ်းထောင်ဘော့စ်နှင့်အတူ ကြယ်တာရာဝရမ်းပြေးများ ဖြစ်လာခဲ့သည်။ နောင်တွင် ဇာတ်လိုက် shou က သူ့အားခြေရာပျောက်သွားပြီး သတင်းထပ်မကြားရတော့ပေ။

စနစ်က ရွှယ်လင်ကိုပေးခဲ့သည့် မှတ်ဉာဏ်များအရ နောက်ပိုင်းတွင် မူလကိုယ်၏ဝိညာဥ်စွမ်းအင်ပြန်ရအောင် ဘော့စ်ကနည်းလမ်းပြန်ရှာပေးခဲ့သည်၊ နှစ်ယောက်အတူ ကြယ်တာရာပင်လယ်ဓားပြများအဖွဲ့ဖွဲ့ပြီး တစ်နှစ်ပတ်လုံး အင်ပါယာကိုလှည့်လည်နေခဲ့၏။

ဤဘဝမျိုးက ဇာတ်လိုက်ထက်ပင် အတက်အကျပိုများနေသည်။ ပျော်စရာကောင်းပြီး အဆုံးသတ်တွင် သူ၏ကိုယ်ပိုင်ပျော်ရွှင်မှုကို ရအောင်ရှာနိုင်ခဲ့သည်။ တစ်ဘဝလုံးကို အကျဥ်းထောင်ဘော့စ်နှင့်အတူ သတ္တိရှိစွာနှင့် ပျော်ရွှင်စွာ ဖြတ်သန်းသွားပြီး နှစ်ယောက်မှာ သက်ဆုံးတိုင် ပေါင်းဖက်သွားကြလေ၏။ ရွှယ်လင်သည် တကယ်ပင်မူလကိုယ်အစား ဝမ်းသာသွားခဲ့ပြီး သူ၏ဆန္ဒကိုစနစ်ထံမေးမြန်းခဲ့သည်။

မူလကိုယ်၏ တစ်သက်လုံး နောင်တရသွားခဲ့သည့်ကိစ္စမှာ သူ၏အမေဖြစ်သူအကြောင်းကို ပြန်မတွေးချင်တော့ခြင်းနှင့် သူ့မိသားစုမှ ငကြောင်ကောင်ကို လက်တုံ့ပြန်ရန်မဟုတ်ဘဲ ၎င်းတို့ဘဝလျှောက် ပျော်ရွှင်စွာနေသွားနိုင်ရန်ဖြစ်သည်။ ရွှယ်လင်သည် တွေးတောနေပြီးနောက် အိပ်ရာမှထကာ အဝတ်ဗီရိုကြီးကိုဆွဲဖွင့်ပြီး သူ့အတွက် အဝတ်အစားတစ်ထည်ကိုရွေးဝတ်လိုက်သည်။

မူလကိုယ်၏စိတ်အနေအထားက သူ့အကြိုက်နှင့် သင့်တော်မှုရှိပြီး လက်စားချေရာတွင်လည်း အကူအညီပေးရန် စိတ်ဝင်တစားရှိသည်။ စနစ်က မူလကိုယ်၏ ကွန်ပျူတာအသေးစားလေးအတွင်းမှ အချက်အလက်များကို မရမကသိမ်းယူနေပြီး ကွန်ရက်ထဲသို့ဝင်လိုက်သည်။ ရွှယ်လင်၏အမိန့်အရ ၎င်းသည် ရွှယ်လင်ကို ဆရာသခင်၏ကာကွယ်ရေးရသည်အထိကူညီပေးပြီးနောက် ရွှယ်လင်ကသူ့ထံရောက်လာသော အကြံဉာဏ် များကို အမြန်ယူလိုက်လေသည်။

*****

ဇာတ်လိုက်က ယနေ့ပင်ပြန်ရောက်လာလိမ့်မည်။ မူလကိုယ်က သူ့အားလှေကားမှ တွန်းချလိုက်ခြင်းဖြစ်ကြောင်း ပြောအပြီး၌ အဖေဖြစ်သူက သူ့အား ကြမ်းတမ်းစွာဖြင့် ဆူငေါက်လိမ့်မည်။ ရွှယ်လင်က ထိုအခွင့်အရေးကို အမိအရယူကာ အနှီကြောက်စရာကောင်းသော မိသားစုမှ အပြီးထွက်သွားရန် ပြင်ဆင်ထား၏။

ဆရာသခင်များကာကွယ်ရေးအဖွဲ့အစည်းက ကာကွယ်ရေးတွင် မပြည့်စုံသည့်ဆရာများကို အခြေခံထားပြီး ... ၎င်းတို့၏ မူလမိသားစုများထံမှ ပေါ့ပျက်ပျက်ဆက်ဆံခံရမှုများနှင့် မိသားစုများထံမှ ခွဲခွာမှုပြုလုပ်သူများကို ရည်ရွယ်ထားသည်။

ဆရာသခင်ကာကွယ်ရေးအဖွဲ့အစည်းက ၎င်းတို့အတွက် နောက်ထပ်အုပ်ထိန်းသူတစ်ယောက်ကို ရွေးချယ်ပေးပြီး ၎င်းတို့၏အခွင့်အရေးနှင့် လုပ်ငန်းစဥ်အရ အပြည့်အဝ ကာကွယ်ပေးမည်ဖြစ်သည်။

ရွှယ်လင်က မိသားစုပြန်မလာခင် ကြာမည့်အချိန်ကို စနစ်အားမေးမြန်းပြီး အချိန်ကိုတွက်ချက်ကာ ဆရာသခင်ကာကွယ်ရေးအဖွဲ့အစည်းနှင့် ဆက်သွယ်ခဲ့သည်။

ကမ္ဘာပေါင်းများစွာကို ဖြတ်သန်းသွားပြီးသည့်နောက် ကြာပန်းဖြူပုံစံ သရုပ်ဆောင်ရခြင်းက ရွှယ်လင်အတွက် မခက်ခဲတော့ချေ။ တစ်စက္ကန့်အတွင်း ထိုဇာတ်ကောင်နေရာကို ဝင်ယူရန် ပြဿနာမဟုတ်ပေ။ သူက အခြေအနေကိုတိတ်တဆိတ်ဖြေရှင်းနိုင်ပြီး မိသားစုနှင့်ပတ်သက်သော ဆက်ဆံရေးတို့ကို ဖြတ်တောက်ချင်ခဲ့သည်။ အဖွဲ့အစည်းက လူလွှတ်ကာ အခြေအနေကို အတည်ပြုပြီး သူ့အားခေါ်ထုတ်သွားပေးနိုင်ရန် မျှော်လင့်မိပေ၏။

ကာကွယ်ရေးအဖွဲ့အစည်း တည်ရှိနေသော်လည်း အမှန်တကယ်တမ်းတွက် အင်မတန်အရေအတွက်နည်းပါးသောဆရာများသာ သူတို့မိသားစုမှ ထွက်ခွာရန်ရွေးချယ်ကြသည်။ထို့ကြောင့် ဆရာသခင်ကာကွယ်ရေးအဖွဲ့အစည်းက ရွှယ်လင်၏အခြေအနေကို အရေးကြီးသည့် ကိစ္စရပ်အဖြစ်ယူဆပြီး လူတစ်ယောက်ကို လွှတ်ပေးမည်ဟုအကြောင်းပြန်လာလေ၏။

ထို့ကြောင့် ရွှယ်လင်က သူတို့အိမ်သို့ဝင်လာရန် လမ်းညွှန်ပေးလိုက်ပြီး သူ၏မိဘများက သူတို့ကိုတံခါးဖွင့်ပေးသည်အထိ စောင့်ရန် မလိုအပ်ကြောင်းနှင့် သူ၏မျှော်လင့်ချက်ကိုထောက်ထားကာ အမြန်လာရန်တောင်းဆိုလိုက်သည်။

ဆက်သွယ်မှုကို အဆုံးသတ်လိုက်ပြီး မိသားစုများအိမ်ပြန်လာပြီး လှေကားပေါ်သို့ တက်လာသည့်အသံကို ကြားလိုက်ရသည်။ ရွှယ်လင်က မူလကိုယ်၏ အဖေအော်ဟစ်နေသံကိုကြားရပြီး သူ့အား အောက်ထပ်ကို အမြန်ဆင်းလာခဲ့ရန် အော်ခေါ်နေသံကိုပါ ကြားလိုက်ရ၏။

ရွှယ်လင်သည် ယခုလေးတင်အဆင်ပြေသည့်အဝတ်များနှင့် ပြင်ထားသည့်အိတ်ကို ကောက်ကိုင်လိုက်ပြီး မျက်လွှာချလိုက်သည့်အခါ အေးစက်သည့် မျက်နှာမျိုးဖြင့် ရန်လိုနေသည့်အရိပ်အယောင် ပြသထားလေသည်။

မျက်ခုံးနှင့်မျက်လုံးတို့က အေးစက်ပြီး မည်သည့်အရာကိုမှ အလေးမထားသလိုပင်။ ရွှယ်လင်သည် မှန်ကိုတစ်ချက်ကြည့်လိုက်ရာ သူ့ပုံစံက ဤကမ္ဘာမှ အဖေဖြစ်သူကို အဆိုးဆုံးပုံစံ ပြသနိုင်လေသည်။

လှေကားမှဆင်းသည့်အခါ သူ့လက်ထဲတွင် အလိုအပ်ဆုံးသောအရာကို ယူလာခဲ့၏။

ယနေ့မှစကာ သူထိုအခန်းထဲတွင်ဆက်နေတော့မည်မဟုတ်ပေ။

သူ့အခန်းက ဒုတိယအထပ်တွင် ရှိနေသည်။

ရွှယ်လင်၏အခန်းက ဒုတိယအထပ်၏နောက်ပိုင်းတွင်ကျပြီး သူလှေကားပေါ်မှ ဆင်းလာသည့်အချိန်တွင် အောက်ထပ်မှလူများက အသင့်အနေအထားရှိနေကြလေပြီ။

Prev Next