MM Story Teller

အပိုင်း၂၂၇

Viewers 40k

🍵Chapter 227

ဝေ့ကျူးကျူးက သူ့လက်ကို ကိုင်ရန် ပြေးလာလေသည်။

" လာ အစ်ကိုကြီး ကျားမင်။ လူတိုင်းက စပြီးစားသောက်ဖို့ အစ်ကို့ကို စောင့်နေကြတာ။ ညီမ‌လေးဖြင့် ဗိုက်ဆာ‌လွန်းလို့ သေတောင်နေပြီ "

" ဟားဟားဟား….."

ဝေ့ကျူးကျူး၏ စကားက လူတိုင်း ကို ရယ်မောစေသည်။

ထုံမျန်မျန်လည်း သူမ၏ဗိုက်လေးကို ပွတ်ပြီး " ဒုတိယ အစ်ကို၊ မျန်မျန်ရဲ့ ဗိုက်မှာ အသားတွေ မကျန်တော့ဘူး။ မျန်မျန် စားစရာတွေလိုတယ် "

ထုံရွှယ်လူက " အားလုံးထိုင်ပြီး စားကြရအောင်။ အေးသွားရင် အစားအသောက်တွေက အရသာရှိတော့မှာ မဟုတ်ဘူး "

ထုံကျားမင်က သူ့ထိုင်ခုံကို ဆွဲယူလိုက်သည်။

ဝက်သားတုံးများကို တူနှင့်ညှပ်ယူစားလိုက်ပြီး သူ့ပါးစပ်မှာ ဟင်းခတ်အမွှေးအကြိုင်များနှင့် ပြီးပြည့်စုံသော ဝက်သားများဖြင့် သူ့ပါးစပ်က ပြည့်ကြပ်နေသည်။ အနှစ်က ပစ်နှစ်ကာ အရသာရှိပြီး ချိုမြိန်သဖြင့် သူ့နှာခေါင်းမှာ တရှုံရှုံဖြစ်နေသည်။

ဤအကြိမ်သည် သူ၏မွေးနေ့ကို ပထမဆုံးအကြိမ် ကျင်းပခြင်းဖြစ်သည်။ သူ့မိဘများရှိနေစဥ်အချိန်ကတောင်မှ ဤကဲ့သို့ မရှိခဲ့ချေ။

မွေးနေ့တွင် မိဘများက ကြက်ဥနီ သို့မဟုတ် မွေးနေ့ ခေါက်ဆွဲပြုလုပ်‌ ပေးသည်ကို သူ့အတန်းဖော်များဆီမှ သူ ကြားခဲ့ဖူးသည်။ ထိုအကြောင်းကို တစ်ခါမှ မပြောခဲ့ဖူးသော်လည်း သူသည် ထိုအရာကို အလွန်အားကျခဲ့လေသည်။

သူက ယ‌နေ့သည်လည်း ခါတိုင်းကဲ့သို့ မည်သည်မှ ရှိလိမ့်မည်မဟုတ်ဟု ထင်ထားခဲ့သော်လည်း သူ့အား ဤကဲ့သို့ အံ့အားသင့်စရာ ပြင်ဆင်ပေးထားကြမည်ဟု မမျှော်လင့်ထားခဲ့ပေ။

ထုံရွှယ်လူက အသားများကို ဖြည်းညှင်းစွာ ဝါးလိုက်ပြီး သူမ နှုတ်ခမ်းများ အပေါ်သို့ ဖြည်းညှင်းစွာ ကွေးသွားသည်။

အခြားကလေးများသည် ညစာစားပြီးသောအခါ အခေါင်းပေါက်သကြားလုံးများကို အမြန်သွားစားကြသည်။

အခေါင်းပေါက်သကြားလုံးများမှာ အတွင်းတွင် အခေါင်းပေါက်ဗလာဖြစ်ပြီး အစွန်းနှစ်ဖက်စလုံးကို ကိုက်စားပြီးသည့်နောက် အခေါင်းပေါက်ကို ထောက်လှမ်းရေးမှန်ပြောင်းအဖြစ် အသုံးပြုကာ အချင်းချင်းအား ကြည့်နိုင်သည်။ ကလေး‌များက ထိုသည်ကို အလွန်သဘောကျကြလေသည်။

ကလေးများမှာ ကစားပြီးသောအခါ ကျန်သကြားလုံးများကို ဝါးစားကြသည်။ အခေါင်းပေါက်သကြားလုံးများမှာ ကြွပ်ရွကာ အရသာရှိသဖြင့် အလွန်စွဲလမ်းနေကြ၏။

သန့်ရှင်းရေးလုပ်ပြီးသည့်အခါ ထုံရွှယ်လူက အသစ်စက်စက် စစ်ကျောပိုးအိတ်တစ်လုံးကို ထုတ်လာပြီး ထုံကျားမင်ကို လှမ်းပေးလိုက်သည်။

" ဒါက မင်းအတွက် မွေးနေ့လက်ဆောင် "

ထုံကျားမင်၏ နှလုံးခုန်သံများ မြန်ဆန်လာပြီး စစ်ကျောပိုးအိတ်ကို မယုံကြည်နိုင်စွာ ကြည့်လိုက်သည်။ "ဒါ ကျွန်တော့်အတွက်လား "

ထုံရွှယ်လူက ခေါင်းညိတ်လိုက်သည်။

" အနာဂတ်မှာ နောက်ထပ်ပိုရလာဦးမှာပါ။ မင်း ဒါကို လက်ခံသင့်တယ် "

ထုံကျားမင်၏ မျက်လုံးများမှာ တုန်ယင်နေသည်။

" ကျေးဇူးတင်ပါတယ် မမကြီး "

သူ့အတွက် ဝေ့မိသားစု၏လက်ဆောင်မှာ ရှန်၀မ်ရုန်ပြုလုပ်ပေးသည့် ၀တ်စုံအသစ်ဖြစ်သည်။ ထုံကျားရှင်းနှင့် ထုံမျန်မျန်တို့သည်လည်း ထိပ်ဖျားဖြင့် ဂျင်ကဲ့သို့ လှည့်လို့ရသော သကြားလုံးများကို အသီးသီး ပေးကြသည်။

ဗိုလ်မှူးရှောင်းသည် လွန်ခဲ့သော ရက်အနည်းငယ်က စစ်တပ်စားသောက်ဆိုင်သို့ စာပို့ခဲ့သည်။

ထုံကျားမင်သည် လက်နှစ်ဘက်ကို နှလုံးသားပေါ်သို့တင်ထားကာ ပျော်ရွှင်နေလေသည်။

ထုံကျားရှင်းသည် သူ၏ ဒုတိယအကိုဖြစ်သူကို မနာလိုစွာ ကြည့်နေပြီး သူ့မွေးနေ့ရောက်လျှင်လည်း ဤကဲ့သို့ စပရိုက်ရှိနိုင်၊မရှိနိုင် တွေးနေလေသည်။

ထိုအချိန်တွင် ထုံကျန်းကျန်းက ဝန်ကြီး ရန်းရုံအန်းနှင့် စကားပြောနေ၏။

ထုံကျန်းကျန်းက မျက်မှောင်ကြုတ်လျက် ပြောလေသည်

" ဝန်ကြီး ယန်၊ အဲဒီ ရှန့်ဆိုတဲ့သူက ဘာဖြစ်ပြန်တာလဲ။ ၀န်ကြီးက သူ့ကို ဖန်ကျင်းယွမ်နဲ့ နီးစပ်ဖို့ စေလွှတ်လိုက်တယ်လို့ ကျွန်မထင်ခဲ့တာ။ သူတို့ ပြတ်စဲသွားကြပြီဆိုတဲ့စကားတွေ ဘာကြောင့် ရှိနေရတာလဲ "

ယန်ရုံအန်းက ပျော်ရွှင်နေပုံမရပေ။

" အဲ့ဒီကောင်က အသုံးမကျဘူး။ သူ့အကြောင်း ဆက်မပြောဘဲ နေရအောင်။ ထုံရွှယ်လူက အနာဂတ်ကို ခန့်မှန်းနိုင်တယ်ဆိုတာ မင်း သေချာရဲ့လား "

ထုံကျန်းကျန်းက ခေါင်းညိတ်လိုက်သည်။

" သေချာပါတယ်။ ထောက်ပံ့ပို့ဆောင်ရေးဌာနနဲ့ ယဉ်ကျေးမှုဌာနဆီ တစ်ယောက်ယောက်ကို သွားမေးခိုင်းလို့ရပါတယ်။ သူမက အတိတ်တုန်းက ထင်ရာစိုင်း၊ မစာနာတတ်တဲ့သူဖြစ်ခဲ့ပြီးတော့ ဘာကိုမှ ကောင်းကောင်းမလုပ်တတ်တဲ့သူ။ အခုလက်ရှိ သူမနဲ့ လုံးလုံး ကွဲပြားတဲ့လူတစ်ယောက်ပါ "

ယန်ရုံအန်းသည် စီးကရက်တစ်လိပ်ကို မီးညှိလိုက်ပြီး မီးခိုးများကို ဖြည်းညှင်းစွာ မှုတ်ထုတ်လိုက်သည်။

" အရင်က သူမ ဟင်းချက်တတ်လား "

သူ ယခင်က သူမအကြောင်းစုံစမ်းရန် သူ့လူတစ်‌ယောက်ကို စေလွှတ်ခဲ့ဖူးပြီး ထို့ကြောင့် ထုံရွှယ်လူသည် လျှို့ဝှက်ဆန်းကြယ်ပြီး ပြဿနာတစ်ခု သူ ခံစားခဲ့မိခြင်းဖြစ်သည်။

ထုံကျန်းကျန်းက ခေါင်းခါပြီး သူမ နှုတ်ခမ်းကို ဆူလိုက်သည်။

" ဟင်းချက်ဖို့လား။ သူမ အရင်တုန်းက မီးဖိုချောင်ထဲကိုတောင် မ၀င်ခဲ့ဖူးဘူး။ သူ့ခန္ဓာကိုယ်ကို တစ်ယောက်ယောက်ကများ အပိုင်စီးထားတာလားဆိုတာ မသိတော့ဘူး "

ထုံကျန်းကျန်းသည် ထုံရွှယ်လူက သူမကဲ့သို့ ပြန်လည်မွေးဖွားလာသည်ဟု သံသယရှိသည်။ သို့သော် ထုံရွှယ်လူ၏ အကျင့်စရိုက်သည် ယခင်ကနှင့် အလွန်ကွာခြားပြီး ယခုအခါ အံ့သြစရာကောင်းသော စားဖိုမှူးဖြစ်ကြောင်းကို သတိပြုမိသောအခါတွင် ထုံကျန်းကျန်းက ထိုအတွေးကို အမြန်စွန့်လွှတ်လိုက်သည်။

သူမ၏ဝိညာဉ် ပြန်လာနိုင်လျှင် ထုံရွှယ်လူ၏ခန္ဓာကိုယ်ကို အခြားဝိညာဉ်တစ်ခုက သိမ်းယူသွားခြင်းမှာလည်း ဖြစ်နိုင်သည်ဟု သူမ တွေးခဲ့သည်။

' ရှေးဟောင်းလေးခု 'အား တရုတ်အစိုးရသည် လွန်ခဲ့သည့်နှစ်အနည်းငယ်က‌တည်းက ဖယ်ရှားရန် ကြိုးပမ်းလျက်ရှိပြီး ဤအယူသီးမှုများကို မည်သူကမျှ အကြံပြုဝံ့ကြမည်မဟုတ်။ သူမ ကျယ်ကျယ်လောင်လောင် ပြောလျှင်ပင် မည်သူကမျှ ယုံကြည်မည် မဟုတ်ပေ။

[ T/N -ရှေးဟောင်းလေးခု က အတွေးအခေါ်‌ ဟောင်း၊ယဉ်ကျေးမှုဟောင်း၊အစဉ်အလာဟောင်း၊အမူအကျင့်ဟောင်း]

သို့သော် ယန်ရုံအန်းကမူ ယုံကြည်သူတစ်‌ယောက်ဖြစ်သည်။

ယန်ရုံအန်းသည် ဗေဒင်ဆရာမိသားစုမျိုးရိုးမှ ဆင်းသက်လာသူဖြစ်ပြီး သာမန်လူများထက် သဘာဝလွန်ဖြစ်ရပ်ဆန်းများကို ပို၍ယုံကြည်သူဖြစ်သောကြောင့် ထုံကျန်းကျန်း၏စကားကို အစ ပထမကတည်းက ယုံကြည်ခဲ့လေသည်။

ယန်ရုံအန်းက မီးခိုးငွေ့များကို ပါးစပ်အပြည့် မှုတ်ထုတ်လိုက်သည်။

" ရှန့်ဖန်းကလုပ်ပြီးသား။ မင်း လောလောဆယ် ထုံရွှယ်လူနဲ့ ခပ်ဝေးဝေးနေသင့်ပြီ။ ဘာလှုပ်ရှားမှုမှ မလှုပ်နဲ့။ ငါတို့ သူမကို သတိပေးမိသွားမှာမျိုး မလိုချင်ဘူး "

ထုံကျန်းကျန်းက သူ စီးကရက်သောက်သည်ကို ကြည့်ရင်း ညှို့ယူခံရပုံရလေသည်။

" အင်း ရှင်ပြောသမျှကို ကျွန်မနားထောင်ပါ့မယ်။ ဒါနဲ့ ကျွန်မတို့ဘယ်တော့ လက်ထပ်ကြမလဲ "

ယန်ရုံအန်းက လှည့်လာပြီး သူမ မေးစေ့ကို ကိုင်လိုက်သည်။ " မင်းက ဘာလို့ အဲ့လောက် စိတ်အားထက်သန်နေတာလဲ "

ထုံကျန်းကျန်းက ရှက်သွားလေသည်။

" ကျွန်မ ရှင့်ရဲ့ ဇနီး ဖြစ်ချင်တယ်၊ ပြီးတော့ ရှင့်ဘဝ တိုးတက်အောင် ကြိုးပမ်းတဲ့နေရာမှာ ကူညီပေးချင်တယ် "

အိမ်ထောင်ကျကာ ကလေးမွေးပြီး အမှန်တကယ် အတူရှိပြီးသည့်နောက်တွင်သာ သူမ သိထားသမျှ သူ့အား ပြောပြရန် သူမ ယုံကြည်နိုင်မည်ဖြစ်သည်။ မဟုတ်လျှင် သူက ကြိုက်သည့် မည်သည့်အချိန်၌မဆို ဘွတ်ဖိနပ်ကို တခြား လူအား ပေးလိုက်မည်ကို သူမ စိုးရိမ်မိလေသည်။

(T/N -ဆက်ဆံရေးကို တစ်ဖက်သက် ကြိုက်တဲ့အချိန် အဆုံးသတ်နိုင်တယ်လို့ ပြောတာပါ )

ယန်ရုံအန်းက သူမမျက်နှာဆီသို့ မီးခိုးငွေ့များ မှုတ်ထုတ်ပြီး တိုးတိုးလေး ရယ်မောလိုက်သည်။

" ကိုယ့်ဇနီးနဲ့က ကွာရှင်းပြီးသွားပြီ။ အဲဒီဟာနဲ့ ပက်သက်တဲ့ကိစ္စအားလုံးပြီးတာနဲ့ ကိုယ်တို့လက်ထပ်ကြမယ် "

မီးခိုးငွေ့များက ထုံကျန်းကျန်းကို မျက်စိမှေး၍ ကြည့်စေသည်။ " ကွာရှင်းဖို့ သူမက သဘောတူမှာလား "

ယန်ရုံအန်းက သူမ မေးစေ့ကို လွှတ်လိုက်ပြီး သူ့အကြည့်က အေးစက်သွားပြန်သည်။

" မင်းရဲ့ မျက်နှာလှလှလေးနဲ့ အဲဒါကို စိတ်မပူပါနဲ့။ ကိုယ်တို့ လက်ထပ်မယ်လို့ ကိုယ် မင်းကိုပြောနေတယ်လေ "

သူထံ၌ ပြင်းထန်သော အရှိန်အဝါရောင်ရှိပြီး တိတ်ဆိတ်ကာ အေးစက်နေသည့်အချိန်တိုင်း အခြားသူများအား အသက်ရှူကြပ်သည့် ဖိအားကို ထုတ်ဖော်ပြသသည်။

ထုံကျန်းကျန်းသည် သူ၏ရှေ့တွင် မည်သည့် အလျင်စလိုအပြူအမူကိုမှ မပြုလုပ်ဝံ့ပေ။

" အာ ဒါနဲ့ ထုံရွှယ်လူ့ချစ်သူရဲ့ အမေနဲ့ သူမ မိသားစုကို မြို့တော်ဆီ ပြန်ခေါ်ဖို့ ရှင့်ကို ကျွန်မ တလောက မေးခဲ့တယ် မဟုတ်လား။ သူတို့ ဘာလို့ ဒီမှာ မရှိကြသေးတာလဲ "

ယန်ရုံအန်း၏ မျက်မှောင်ကြုတ်မှုကပို၍ နက်ရှိုင်းသွားသည်။

" ကိုယ် သူတို့ကို ပြန်ပြောင်းလာဖို့ ပြောခဲ့ပေမယ့် တစ်ယောက်ယောက်က အနှောင့်အယှက်ပေးခဲ့တယ်။ သူတို့ ပြန်လာဖြစ်တော့မှာ မဟုတ်ဘူး "

အဆုံးမှာတော့ သူ့ထံ၌ လုံလောက်သည့် အာဏာမရှိခဲ့ပေ။ မဟုတ်လျှင် သူတို့က သူ့အား ကတိပေးထားခဲ့‌သော်လည်း ဤအတိုင်း အဘယ့်ကြောင့် ပြန်သွားခဲ့မည်နည်း။

ထုံကျန်းကျန်းသည်လည်း မျက်မှောင်ကြုတ်သွားလေသည်။

" ဘာလို့ ကျွန်မတို့ တစ်ခုခုလုပ်တိုင်း အတားအဆီးတွေ အများကြီး ရှိနေတာလဲ။ သူတို့နောက်ကွယ်က တစ်ယောက် က ထုံရွှယ်လူဖြစ်နိုင်တယ်လို့ ရှင် ထင်လား "

သူမသည် ယန်ရုံအန်းအား ၀မ်ရူကွေ့ ၏မိခင်မိသားစုကို မြို့တော်ဆီသို့ပြန်ခေါ်စေလိုခဲ့သည်။ ၀မ်ရူကွေ့၏မိခင်မှာ ကိရိယာကောင်းတစ်ခု ဖြစ်မည်ဖြစ်ကာ ယခင်ဘဝ၌ ၀မ်ရူကွေ့ကို အဆုံးတိုင်အောင် တွန်းပို့ခဲ့သူဖြစ်သည်။

၀မ်ရူကွေ့သေဆုံးသွားလျှင် ထုံရွှယ်လူ ကြီးစွာဒုက္ခရောက်မည်ကို သူမ ယုံကြည်ပြီး ထိုသည်က သူမကို ပျော်ရွှင်စေမည်။

သို့သော် တစ်စုံတစ်ယောက်က သူမ၏အကြံအစည်ကို ပျက်ပြားစေလိမ့်မည်ဟု သူမ မျှော်လင့်ခြင်းမရှိခဲ့ပေ။ ထိုသို့ဖြစ်ပျက်သွားခြင်းက သူမကို မကျေမနပ် ဖြစ်စေသည်။

ယန်ရုံအန်းက " ဖြစ်နိုင်တယ်။ အဲဒီမိန်းမရဲ့ နောက်ခံက ဘယ်လိုမျိုးလဲဆိုတာ ကိုယ်တို့ မသိဘူး။ သူမ ပတ်ဝန်းကျင်မှာ သြဇာကြီးတဲ့သူတွေ အများကြီးရှိတယ်။ အဲဒါကြောင့် လောလောဆယ်မှာ ကိုယ်တို့ ငြိမ်သက်နေဖို့ လိုအပ်တယ် "

" မင်းလုပ်စရာရှိတာက ကိုယ့်ဘဝတိုးတက်အောင် ကူညီဖို့ပဲ။ ဒါမှ မင်းစိတ်တိုင်းကျ လုပ်ချင်တာ လုပ်နိုင်မှာ "

အနာဂတ်တွင် ထုံရွှယ်လူကို သူမ၏ ခြေ ထောက်အောက်တွင် ထားနိုင်မည်ဟူသည့် အတွေးက နောက်ဆုံးတွင် ထုံကျန်းကျန်းအား ပြုံးစေသည်။

" ကောင်းပါပြီ၊ ကျွန်မ ရှင့်စကား နားထောင်ပါ့မယ်။ ကျွန်မ သူမ အနား မသွားတော့ပါဘူး "

ယန်ရုံအန်း ကျေနပ်စွာ ခေါင်းညိတ်လိုက်၏။

🍵

ကျိုးရန်သည် ကြီးမားသောအပြုံးမျက်နှာဖြင့် အခြေစိုက်စခန်းဆီသို့ ပြန်ရောက်လာသည်။

တခြားသူများက သူ ဤကဲ့သို့ ပျော်ရွှင် နေသည်ကို မြင်သည့်အခါ မနေနိုင်ကြသဖြင့် မေးမြန်းကြလေသည်။

" သုတေသီ ကျိုး၊ ဒီနေ့ ဘာလို့ ဒီလောက်တောင် ပျော်နေတာလဲ။ သတင်းကောင်းတစ်ခု ဝေမျှစရာရှိလို့လား "

ကျိုးရန်၏ ပါးစပ်က ပွင့်လာလေသည်။

" မင်း ခန့်မှန်းကြည့်‌လေ။ ငါ့ရည်းစားနဲ့ ငါ စေ့စပ်ပြီးသွားပြီ၊ ငါတို့ ဇွန်လထဲ ရက်သတ်မှတ်လိုက်ပြီ "

ထိုသည်ကို ကြား‌သောအခါ အားလုံးက သူ့ကို ဂုဏ်ပြုကြပြီး ကျိုးရန်၏ အပြုံးမှာ နားရွက်သို့ ချိတ်လုမတတ်ဖြစ်နေသည်။

အလုပ်ပြီးသည်နှင့် သူ၏ စေ့စပ်ကြောင်းလမ်းမှုအကြောင်း ၀မ်ရူကွေ့နှင့် ဟွမ်ချီမင်တို့အား ပြောပြရန် မစောင့်နိုင်တော့ပေ။

ဟွမ်ချီမင်က " အေးပါ ဂုဏ်ပြုပါတယ်ကွာ။ ငါ့နည်းလမ်းက အဆင်ပြေမယ်လို့ မင်းကိုပြောခဲ့သားပဲ "

၀မ်ရူကွေ့က စားပွဲကို ငုံ့ကြည့်နေပြီး မည်သည်ကိုမျှ မပြောပေ။

ကျိုးရန်က သွားအဖြီးသားဖြင့် ပြောလာသည်။

" အခု ရူကွေ့က ငါတို့ထဲ မစေ့စပ်ရသေးတဲ့ တစ်ဦးတည်းသောသူပဲ။ ရူကွေ့ မင်း ဒီထက်ပိုပြီး အားထုတ်တာ ကောင်းတယ် "

၀မ်ရူကွေ့က ဂရုမစိုက်သော အကြည့်ဖြင့် ကြည့်လိုက်သည်။

ဟွမ်ချီမင်က " မင်းရည်းစားကို ဘယ်လို လက်ထပ်ခွင့်‌တောင်းရမလဲဆိုတာကို တွေးနေသေးတုန်းလား။ ဝက်သား နှစ် ပေါင်ကို ရိုမန့်တစ်ဖြစ်တယ်လို့ မထင်ရင် လေးပေါင် ယူသွား။ မရသေးရင် ဆယ်ပေါင်အထိ ယူသွားလိုက်။ အဲဒါက ရိုမန့်တစ်ဖြစ်ဖို့ လုံလောက်မယ်မလား "

၀မ်ရူကွေ့ "……"

မည်သည့်အချိန်ကစပြီး ဝက်သားကို ရင်ခုန်စရာအဖြစ် သတ်မှတ်ခဲ့ကြသနည်း။

ကျိုးရန်က " ကောင်းပြီ၊ ချီမင်ရဲ့ချစ်သူနဲ့ ငါ့ချစ်သူက လက်တွေ့ကျကြတယ်။ လိုအပ်ခဲ့တာက ဝက်သားနှစ်ပေါင်ပဲ။ မင်းရဲ့အခြေအနေက ပိုပြင်းထန်တယ် ရူကွေ့ "

ဤအချိန်အထိ မည်သည့်စကားကိုမှ မပြောခဲ့သည့် ၀မ်ရူကွေ့က " အဲဒါက ငါ့ကောင်မလေးက တခြားသူတွေနဲ့ မတူလို့ပဲ။ သူမက ထူးခြားတယ်။ အဲဒါကြောင့် ဝက်သား ၂ ပေါင်နဲ့ မရဘူး ဖြစ်နေတာ "

"......"

ဟွမ်ချီမင်နှင့် ကျိုးရန်တို့သည် ခွေးစာတစ်လုတ်ကို အတင်းစားလိုက်ရပြီး ဗိုက်နာသွားသကဲ့သို့ပင် ခံစားလိုက်ရ၏။

ဤသည်က သူတို့၏ ဇနီး၊ချစ်သူရည်းစားများက တန်ဖိုးမရှိသကဲ့သို့ ဖြစ်နေလေသည်။

ထို့နောက် တစ်ဖန် စဉ်းစားကြည့်သည့်အခါ ၀က်သားနှစ်ပေါင်နှင့် လက်ထပ်ခွင့်တောင်းဆိုခြင်းက တန်ဖိုးမရှိသကဲ့သို့ အနည်းငယ်ဖြစ်လေသည်။

ထိုသို့ဆိုလျှင် သူတို့၏ဇနီး၊ချစ်သူရည်းစားများ နောင်အနာဂတ်တွင် ၀မ်ရူကွေ့၏ချစ်သူနှင့် ဘယ်သောအခါမှ မဆုံမိစေရန် သေချာပြုလုပ်ရပေမည်။ နှိုင်းယှဥ်နှိုင်းပြီး ဘာမှမလုပ်ချင်ကြဘူး။ သူတို့သည် သူမတို့ တွေ့ဆုံကာ တစ်ယောက်နှင့်တစ်ယောက် နှိုင်းယှဉ်အငြင်းပွားကြမည်ကို မလို‌လားပေ။

Prev Next